బోనాలు.. ఉపాధి జాతర

Jul 29 2026 1:04 AM | Updated on Jul 29 2026 1:04 AM

● ఆషాఢమాసంలో అంతటా కోలాహలం ● కళాకారులు, చేతివృత్తులు, వ్యాపార రంగానికి ఆదాయం ● బోనాల ఊరేగింపులో పోతరాజుల విన్యాసాలకు ప్రాధాన్యం ఇస్తున్నారు. ఇతర ప్రాంతాల నుంచి కళాకారులను జిల్లాకు రప్పిస్తున్నారు. ఇటీవల మంచిర్యాలలో పోతరాజులు విన్యాసాలతో ఆకట్టుకున్నారు. బోనం సమర్పణకు కుండలు ఎంతో అవసరం. నైవేద్యం సమర్పించే కుండతోపాటు దానిపై ఉండే చిన్న కుండ, దీపం ముంత కలిపి ఒక సెట్‌గా అమ్ముతున్నారు. వీటి విక్రయాలు జోరుగా సాగుతున్నాయి. తయారీలో కుమ్మరులు, ఇతర కళాకారులు బిజీగా మారారు. ● డీజే, డప్పు చప్పుళ్లతో బోనాల పండుగ ప్రతీ వీధిలోనూ కోలాహలంగా మారుతుంది. డప్పు కళాకారుల నుంచి డీజే నిర్వాహకుల వరకు ఈ సమయంలో మంచి ఆదాయం లభిస్తోంది. ● బోనం అలంకరణకు అవసరమైన పూల వ్యాపా రం ఊపందుకుంది. హైదరాబాద్‌ తదితర ప్రాంతాల నుంచి వ్యాపారులు పూలను తెప్పించి విక్రయిస్తున్నారు. ఇక మేకలు, కోళ్లకు భలే డిమాండ్‌ ఉంది.

మంచిర్యాలఅర్బన్‌: జిల్లాలో బోనాల సందడి కొనసాగుతోంది. ఆషాఢ మాసం నెల రోజులపాటు డప్పు చప్పుళ్లు, పోతరాజుల విన్యాసాలు, శివసత్తుల సిగాలు, కళాకారులు ఆటపాటలు, డీజే హోరు వాడవాడలా మార్మోగుతుంది. బోనాల జాతర సంస్కృతి, సంప్రదాయాలను పరిరక్షించడమే కాకుండా చిన్న తరహా వ్యాపారులు, కళాకారులు, చేతివృత్తుల కుటుంబాలకు నెల రోజులపాటు ఆశాజనకమైన ఆదాయం అందిస్తోంది. ఆధ్యాత్మికతకే పరిమితం కాకుండా జాతర అనేక రకాల వృత్తుల వారికి ఆర్థికంగా ఊరటనిస్తూ వ్యాపార రంగానికి సరికొత్త వెలుగునిస్తోంది.

ఆఫర్ల ధమాకా

ఆషాఢ మాసంలో బట్టల వ్యాపారం జోరుగా సాగుతోంది. సాధారణంగా ఈ మాసంలో శుభకార్యాలు లేక వ్యాపారాలు మందగిస్తాయి. ఇందుకు భిన్నంగా ప్రముఖ షాపింగ్‌ మాల్స్‌, వస్త్ర వ్యాపారులు ఆ షాఢం ఆఫర్ల విక్రయాలతో మార్కెట్‌ కిటకిటలాడుతోంది. ఒకటి కొంటే ఒకటి ఉచితం, 50నుంచి 80 శాతం రాయితీ ఇస్తుండడంతో జనం విపరీతంగా ఆసక్తి చూపుతున్నారు. బోనాల పండుగ, రాబోయే శ్రావణ మాస పూజలు, పేరంటాల కోసం మహిళలు ఇప్పటి నుంచే కొనుగోలు చేస్తున్నారు.

దారిపోచమ్మకు మొక్కులు..

బస్తీల్లో పోచమ్మ తల్లి ఉత్సవాల నేపథ్యంలో మేకలు, కోళ్లకు భారీ డిమాండ్‌ ఏర్పడింది. ఆపదలు తొలగి ఊరంతా ఆయురారోగ్యాలతో సల్లంగా ఉండేలా చూడు పోచమ్మ తల్లి అంటూ ప్రార్థిస్తూ వివిధ బస్తీల్లో భక్తులు, ప్రమాదాల నివారణకు రహదారి వెంట వెలిసిన దారి పోచమ్మకు వాహనదారులు కోళ్లు, మేకలతో మొక్కులు తీర్చుకుంటున్నారు. దీంతో మేకలు, కోళ్ల వ్యాపారం జోరుగా సాగుతోందని వ్యాపారులు తెలిపారు.