హంపీలో స్వచ్ఛతా అభియాన్‌

హొసపేటె: ప్రతిరోజూ దేశ విదేశాల నుంచి వేలాది మంది పర్యాటకులు హంపీని సందర్శిస్తారు. అందువల్ల కేవలం చారిత్రక కట్టడాలు, రోడ్లు, పర్యాటక ప్రదేశాలు, హంపీ చుట్టు పక్కల ప్రాంతాల్లోనే కాకుండా నిర్ణీత ప్రదేశాల్లోనే చెత్తను పారవేయడం ద్వారా హంపీని పరిశుభ్రంగా, పచ్చగా ఉంచుదాం అని పర్యాటక శాఖ డిప్యూటీ డైరెక్టర్‌ ప్రభులింగ ఎస్‌.తళకేరి అన్నారు. ప్రపంచ పర్యాటక దినోత్సవం–2026 కార్యక్రమంలో భాగంగా శనివారం హంపీలోని విరుపాక్షేశ్వర స్వామి ఆలయం ముందు, ఎదురు బసవణ్ణకు ఎదురుగా, గ్రామ పంచాయతీ ముందు రెండో రోజు పారిశుధ్య కార్యక్రమాన్ని నిర్వహించిన అనంతరం ఆయన మాట్లాడారు. పర్యాటకులకు మెరుగైన వాతావరణాన్ని కల్పించడంలో హంపీ నివాసులు, వ్యాపారవేత్తలు సహకరించాలన్నారు. ఆటో డ్రైవర్లు పర్యాటకుల్లో పరిశుభ్రతపై అవగాహన కల్పించి, తమ వాహనాల చుట్టు ఉన్న ప్రాంతాన్ని శుభ్రంగా ఉంచాలన్నారు. వీధి వ్యాపారులు ఆహార వ్యర్థాలు, ప్లాస్టిక్‌, ఇతర చెత్తను రోడ్డుపై పారవేయకుండా చెత్తబుట్టలను ఉపయోగించాలని ఆయన అన్నారు. హంపీని పరిశుభ్రంగా, పచ్చగా, అందంగా ఉంచడం ద్వారా దేశీయ, విదేశీ పర్యాటకులకు మెరుగైన అనుభూతిని అందించాలని ఆయన అన్నారు. రాష్ట్ర పురావస్తు మ్యూజియం, వారసత్వ శాఖ సహాయ సంచాలకురాలు మంజు, భారత పురావస్తు సర్వేక్షణ సంస్థ ఇంజనీర్‌ సునీల్‌, ఎవాల్వ్‌ బ్యాక్‌ రిసార్ట్‌ జనరల్‌ మేనేజర్‌ బిపిన్‌ బిడ్డప్ప, సిబ్బంది, హంపీ గైడ్‌లు, ప్రజలు పాల్గొన్నారు.