పొరపాటు.. దిద్దుబాటు

● జిల్లాలో ఐదు మున్సిపాలిటీలు ఉన్నాయి. వీటి పరిధిలో 136 వార్డులున్నాయి. ● దాదాపు ప్రతిచోటా ఒక వార్డుకు చెందిన వందలాది ఓటర్లు మరో వార్డు జాబితాలోకి వెళ్లిపోయాయి. దీంతోపాటు గ్రామాలు, ఇతర పట్టణాల ఓటర్లు కూడా ఉన్నారు. ● తద్వారా వార్డు ఓటర్ల సంఖ్య పెరగడమే కాకుండా వారంతా ఇతర వార్డులు, ప్రాంతాలకు చెందిన వారు కావడంతో ఆశావహులు ఆందోళన చెందుతున్నారు. (ఉదాహరణకు: మెట్‌పల్లి పట్టణంలోని 26వార్డుకు చెందిన సుమారు 200 ఓట్లు 21వార్డు ఓటరు జాబితాలో చేర్చారు. అలాగే కోరుట్ల మున్సిపాలిటీతో చుట్టూ పక్కల గ్రామాలకు చెందిన పలువురి ఓటర్ల పేర్లు ఇక్కడి జాబితాల్లో ఉండడం గమనార్హం) ● ఇవి తమ గెలుపోటములపై ప్రభావం చూపుతాయని ఆశావహులు ఆందోళన వ్యక్తం చేస్తుండడంతో అధికారులు వాటిని సరి చేసే పనిలో నిమగ్నమయ్యారు. ● ఓటర్ల తుది జాబితాను మొదట ఈనెల 10న విడుదల చేయాలనే ఆదేశాలు ఉన్నాయి. కానీ రాష్ట్ర ఎన్నికల కమిషనర్‌ రాణికుముదిని బుధవారం నిర్వహించిన సమావేశంలో 12న ప్రకటించాలని సూచించారు. ● అలాగే 16న పోలింగ్‌ స్టేషన్ల వివరాలతోపాటు ఫొటోతో కూడిన ఓటర్ల తుది జాబితాను ఆయా వార్డుల్లోని పోలింగ్‌ స్టేషన్ల వద్ద ప్రదర్శించాలని ఆదేశించారు. ● దీంతో జిల్లా అధికార యంత్రాంగం వీటికి సంబంధించిన ఏర్పాట్లను ముమ్మరం చేశారు. ● పంచాయతీ ఎన్నికల్లో రిజర్వేషన్లను మార్చిన ప్రభుత్వం.. మున్సిపల్‌ ఎన్నికల్లో కూడా గతంలో ఉన్న రిజర్వేషన్లను మార్చాలనే నిర్ణయానికి వచ్చినట్లు తెలిసింది. ● ఓటర్ల తుది జాబితా, పోలింగ్‌ స్టేషన్ల వివరాలు వెల్లడైన తర్వాత రిజర్వేషన్లపై దృష్టి సారించే అవకాశముంది. ● వార్డులకు సంబంధించిన రిజర్వేషన్లను కలెక్టర్‌ నిర్ణయిస్తే.. చైర్మన్ల రిజర్వేషన్లను ప్రభుత్వం ఖరారు చేయనుంది.