సీఐ తిక్క వేషాలు.. పెంపుడు కుక్కలు జనంపైకి.. భయాందోళనలో అపార్ట్‌మెంట్‌ వాసులు

హైదరాబాద్: పెంపుడు కుక్కతో తమాషా చేస్తూ..జనంపైకి ఉసిగొల్పిన ఓ సీఐపై పోలీసులకు ఫిర్యాదు అందింది. ఎల్‌బీనగర్‌ పోలీసులు తెలిపిన వివరాల ప్రకారం..ఎల్‌బీనగర్‌ చిత్రలేవుట్‌ కాలనీ మంజీరా హైట్స్‌ ఫేజ్‌–2లో నివాసం ఉండే డాక్టర్‌ ఎవీ జ్యోత్స్న ఓ ప్రైవేట్‌ ఆస్పత్రిలో గైనకాలజిస్ట్‌గా పనిచేస్తోంది. అదే అపార్ట్‌మెంట్‌లో ఉండే నాగేంద్రరావు హైదరాబాద్‌ సీసీఎస్‌లో ఇన్‌స్పెక్టర్‌గా పనిచేస్తున్నాడు. ఇతడు ఎలాంటి రక్షణ బెల్టు లేకుండా తన పెంపుడు కుక్కలను బయటకు తీసుకువస్తూ అపార్ట్‌మెంట్‌ వాసులను భయభ్రాంతులకు గురిచేస్తున్నాడు. దీనిపై ఎన్నిమార్లు చెప్పినా పట్టించుకోలేదు.

ఈ క్రమంలో గత నెల 31వ తేదీ రాత్రి 10: 30 గంటల సమయంలో ఇంటి వద్ద ఉన్న డాక్టర్‌ ఎంవీ జ్యోత్స్న కుక్కలను బయటకు వదలొద్దని చెప్పింది. దీంతో ఆగ్రహించిన నాగేంద్రరావు డాక్టర్‌ను దుర్భాషలాడుతూ ఆమెను బెదిరించాడు. కుక్కలను ఆమె పైకి వదలి తమాషా చూస్తుండిపోయాడు. ఈఘటనతో తీవ్రంగా భయపడిన డాక్టర్‌ జోత్స్న ఈ నెల 1న ఎల్‌బీనగర్‌ పోలీస్‌ స్టేషన్‌లో ఫిర్యాదు చేసింది. దీనిపై పోలీసులు కేసు నమోదు చేసి సీఐ నాగేంద్రరావుపై పలు సెక్షన్ల కింద నమోదు చేశారు. దర్యాప్తు చేపట్టారు. నాగేంద్రరావు ఆగడాలు సీసీ టీవీ కెమెరాల్లోనూ రికార్డయినట్లు అపార్ట్‌మెంటువాసులు పేర్కొన్నారు.