breaking news
RTC union elections
-
ఆర్టీసీ యూనియన్ ఎన్నికల ఫలితాలపై వివాదం
సాక్షి, హైదరాబాద్: ఆర్టీసీ గుర్తింపు సంఘం ఎన్నికలు ప్రశాంతంగా ముగిసినప్పటికీ, ఎన్నిక ఫలితాల మీద వివాదం చెలరేగింది. ఆర్టీసీ గుర్తింపు సంఘం ఎన్నికలు మొదలైనప్పటి నుంచి అనుసరిస్తున్న విధానానికి భిన్నంగా ఈసారి రీజియన్ స్థాయి గుర్తింపును కట్టబెట్టడం ఇప్పుడు వివాదానికి కారణమైంది. దీనిపై ఇతర యూనియన్లు తీవ్ర ఆగ్రహం వ్యక్తం చేస్తుండగా, రాష్ట్రస్థాయి గుర్తింపు దక్కించుకున్న ఈయూ కూటమి న్యాయపోరాటానికి సిద్ధమవుతున్నట్లు సమాచారం. ఈనెల 9న ఆర్టీసీ గుర్తింపు సంఘం ఎన్నికలు జరగ్గా అదే రోజు కౌంటింగ్ పూర్తి చేయడంతో విజేతలెవరో తేలిపోయింది. 14, 15 తేదీల్లో పోస్టల్ బ్యాలెట్కు వీలు కల్పించడంతో అధికారికంగా ఫలితాలను ఈనెల 17 రాత్రి వెల్లడించారు. ఇందులో రాష్ట్రస్థాయి గుర్తింపులో టీఎంయూ, ఎన్ఎంయూలతో కూడిన ఈయూ కూటమి 4,670 ఓట్ల మెజారిటీతో గెలిచిన విషయం తెలిసిందే. అయితే, రీజియన్ స్థాయి గుర్తింపు విషయంలోనే వివాదం మొదలైంది. సాధారణంగా ఆర్టీసీ గుర్తింపు సంఘం ఎన్నికల్లో ఓటర్లు రెండు ఓట్లు వేస్తారు. ఒకటి రాష్ట్రస్థాయి గుర్తింపునకు, రెండోది రీజియన్ స్థాయి గుర్తింపునకు వేస్తారు. రాష్ట్రస్థాయి గుర్తింపులో ఏ యూనియన్కు ఆధిక్యత వస్తే ఆ యూనియన్ విజయం సాధించినట్లవుతుంది. కానీ, రీజియన్ స్థాయిలో మాత్రం మెజారిటీ ఓట్లు కాకుండా మొత్తం ఓట్లలో 50 శాతం కంటే కనీసం ఒక ఓటు వచ్చిన యూనియన్ను విజేతగా ప్రకటిస్తారు. ఇది ఆర్టీసీలో యూనియన్ ఎన్నికలు మొదలైనప్పుడు జరిగిన ఒప్పందం. అప్పటి నుంచి దీన్ని అనుసరిస్తున్నారు. 50 శాతం కంటే కనీసం ఒక ఓటు ఏ యూనియన్కు రాకుంటే ఏ యూనియన్నూ కూడా విజేతగా ప్రకటించరు. అప్పుడు, రాష్ట్రస్థాయిలో గుర్తింపు యూనియన్గా ఎన్నికైన యూనియన్ను ఆ రీజియన్ గుర్తింపు యూనియన్గా ప్రకటించడం ఆ పద్ధతిలో భాగం, తాజాగా జరిగిన ఎన్నికల్లో ఏడు రీజియన్లలో 50 శాతం కంటే ఒక ఓటు చొప్పున ఓట్లు పోలయ్యాయి. ఆదిలాబాద్, నిజామాబాద్, కరీంనగర్, సికింద్రాబాద్ రీజియన్లలో టీఎంయూ, మహబూబ్నగర్, రంగారెడ్డి రీజియన్లలో కాంగ్రెస్ పార్టీ బలపర్చిన ఆర్టీసీ వర్కర్స్ యూనియన్, ఖమ్మంలో స్టాఫ్ అండ్ వర్కర్స్ ఫెడరేషన్లు విజయం సాధించాయి. మిగతా రీజియన్లలో ఆ పద్ధతిలో ఓట్లు పోల్ కాలేదు. ఆనవాయితీకి భిన్నంగా.. కానీ, తాజాగా ప్రకటించిన ఫలితాల్లో, మిగతా రీజియన్లలో ఆనవాయితీకి భిన్నంగా సాధారణ మెజారిటీ పొందిన యూనియన్లను విజేతగా ప్రకటించారు. దీంతో మెదక్, వరంగల్ రీజియన్లలో ఆర్టీసీ వర్కర్స్ యూనియన్, నల్గొండలో స్టాఫ్ అండ్ వర్కర్స్ ఫెడరేషన్, హైదరాబాద్ రీజియన్లో టీఎంయూలు విజేతలుగా నిలిచాయి. ఇందులో ఆర్టీసీ వర్కర్స్ యూనియన్, స్టాఫ్ అండ్ వర్కర్స్ ఫెడరేషన్లు కాంగ్రెస్పార్టీ బలపరిచిన టీడబ్ల్యూయూ కూటమిలో ఉన్నాయి. ఫలితంగా, రాష్ట్రస్థాయి గుర్తింపు దక్కించుకోలేకపోయిన ఆ కూటమి, రీజియన్లలో మెజారిటీ రీజియన్లు సాధించినట్లయింది. అధికార పార్టీ జోక్యం వల్లనే ఇలా జరిగిందని వైరి కూటమిలోని యూనియన్లు తీవ్రంగా విమర్శిస్తున్నాయి. ఆనవాయితీ ప్రకారం ఫలితాలు లెక్కించి ఉంటే, ఏ యూనియన్కు కూడా మెజారిటీ దక్కని నాలుగు రీజియన్లు రాష్ట్రస్థాయి గుర్తింపు దక్కించుకున్న ఈయూ ఖాతాలోకి చేరేవి. అలా కాకుండా ఇప్పుడు అధికార పార్టీ కూటమికి దక్కేలా పావులు కదిపారన్నది వాటి ఆరోపణ. అయితే, ఆనవాయితీగా వస్తున్న విధానానికి సంబంధించి ఎలాంటి చట్టబద్ధ నిబంధన కాదని, సింగరేణి, రైల్వే యూనియన్ ఎన్నికల్లో ఇలాంటి పద్ధతి లేదని, మిగతా సంస్థల్లో మెజారిటీ ఓట్లే ప్రాతిపదిక అని, ఇప్పుడు ఆరీ్టసీలో కూడా దాన్నే అనుసరించారని, దీన్ని తప్పుపట్టాల్సిన అవసరం లేదని అధికార పార్టీ బలపరిచిన కూటమిలోని యూనియన్లు పేర్కొంటున్నాయి. డిపోల్లో గెలిచాం...9 రీజియన్లలో గుర్తింపు మాదే: మొగుళ్ల రాజిరెడ్డిసాక్షి, హైదరాబాద్: ఇటీవల జరిగిన ఆర్టీసీ గుర్తింపు సంఘం ఎన్నికల్లో ఎస్డబ్ల్యూఎఫ్తో కలిసి తాము మొత్తం 51 డిపోల్లో విజయం సాధించామని అధికార కాంగ్రెస్ పార్టీ అనుబంధ తెలంగాణ ఆర్టీసీ వర్కర్స్ యూనియన్ (టీడబ్ల్యూయూ) వెల్లడించింది. రాష్ట్రంలోని 97 డిపోలకు గాను 51 డిపోల్లో గెలవడంతో పాటు 14 రీజియన్లలో తొమ్మిదింట గుర్తింపు తమకే వచ్చిందని, నాన్ ఆపరేషన్ పరిధిలోనికి వచ్చే బస్భవన్తో సహా ఆర్ఎం కార్యాలయాలు, వర్క్షాప్లు కలిపి ఎనిమిది యూనిట్లలోనూ తామే గెలిచామని యూనియన్ రాష్ట్ర అధ్యక్షుడు మొగుళ్ల రాజిరెడ్డి ఆదివారం ఒక ప్రకటనలో తెలిపారు. ఈ విజయం కార్మికుల్లో కాంగ్రెస్ పార్టీ పట్ల, తమ యూనియన్ పట్ల ఉన్న విశ్వాసానికి నిదర్శనమని, ఆర్టీసీ కార్మికుల సమస్యల పరిష్కారం, హక్కుల పరిరక్షణే లక్ష్యంగా కార్మీకుల పక్షాన నిరంతరం పోరాటం చేస్తామని పేర్కొన్నారు. ఎన్నికల్లో తమ కూటమికి మద్దతు తెలిపిన కార్మీకులకు కృతజ్ఞతలు తెలియజేస్తున్నామని, ఎన్నికల్లో తమపై కార్మికులు ఉంచిన విశ్వాసాన్ని నిలబెట్టుకుంటామని ఆ ప్రకటనలో రాజిరెడ్డి స్పష్టం చేశారు. -
దసరా ‘రద్దీ’ ముంగిట ఆర్టీసీ ఎన్నికలు
సాక్షి, హైదరాబాద్: తెలంగాణలో అతిపెద్ద పండుగ దసరా. బతుకమ్మ పండుగను అసుసరించి వచ్చే పర్వదినం కావటంతో సింహభాగం జనం సొంతూళ్లకు వెళతారు. దీంతో ఆర్టీసీ ఆ సమయంలో ప్రత్యేక బస్సులు తిప్పుతుంది. కానీ, ఈసారి ప్రణాళికాలోపం వల్ల ఆర్టీసీకి పెద్ద సవాల్ ఎదురైంది. విద్యాసంస్థలకు సెలవుల నేపథ్యంలో ఈనెల 9 నుంచి పెద్ద సంఖ్యలో జనం సొంతూళ్లకు వెళ్లటం ప్రారంభిస్తారు. దీంతో అదే రోజు నుంచి ఆర్టీసీ కూడా స్పెషల్ బస్సులను ప్రారంభిస్తోంది. కానీ, సరిగ్గా అదే రోజు ఆర్టీసీలో గుర్తింపు సంఘం ఎన్నికలు జరగనున్నాయి.సాధారణంగా ఎన్నికల రోజు సిబ్బంది ఎక్కువగా విధులకు దూరంగా ఉంటారు. ఓటర్లలో 90 శాతం మంది డ్రైవర్లు, కండక్టర్లే అయినందున, వారి హాజరు పలచగా ఉండటంతో బస్సుల సంఖ్య తక్కువగా తిరుగుతుంది. కానీ, అదే రోజు నుంచి స్పెషల్ బస్సులు తిప్పుతున్నట్టు ఆర్టీసీ ప్రకటించింది. సాధారణ సమయంలోనే, స్పెషల్ బస్సులకు సిబ్బంది సరిపోక డబుల్ డ్యూటీలు వేస్తారు. అయితే ఎన్నికలున్నందున డ్రైవర్లు, కండక్టర్లు డ్యూటీకి ఎగ్గొట్టే పరిస్థితి కనిపిస్తోంది. ఇక సాయంత్రానికి కౌంటింగ్ పూర్తయి ఫలితాలు కూడా అనధికారికంగా వెల్లడవుతాయి. అధికారికంగా 17వ తేదీన ఫలితాలను ప్రకటించనున్నా, అనధికారికంగా తొమ్మిదో తేదీనే తెలుస్తుంది. దీంతో గెలుపు సంబరాల్లో కొందరు, ఓటమి భారంతో కొందరు విందుల్లో ఉండే అవకాశం ఉంటుంది.డ్యూటీకి వెళ్లే ముందు బ్రీథ్ అనలైజర్ పరీక్ష జరుపుతారు. ఈ కారణంగా కూడా కొందరు గైర్హాజరవుతారు. వెరసి ఈ దసరా ప్రత్యేక బస్సుల వ్యవహారం ఇప్పుడు ఆర్టీసీలో గందరగోళంగా మారింది. ఆర్టీసీ మాటను పట్టించుకోని కార్మిక శాఖ ఆర్టీసీ కార్మిక సంఘం ఎన్నికలను కార్మిక శాఖ ఆధ్వర్యంలో నిర్వహిస్తారు. రిటర్నింగ్ అధికారి కూడా ఆ శాఖకు చెందినవారే ఉంటారు. ఎన్నిక తేదీని కార్మిక శాఖ ప్రకటించేసింది. దసరా, దీపావళి పండుగలు ఉన్నందున... ప్రయాణికుల రద్దీ ఉంటుందని, నవంబర్లో ఎన్నికలు నిర్వహించాలని ఆర్టీసీ కోరినా పట్టించుకోకుండా కార్మిక శాఖ ఈనెల 9ని ఖరారు చేసింది. దీంతో ఇప్పుడు అంతా గందరగోళంగా మారింది. ఇక ఔట్ సోర్సింగ్ సిబ్బందిపైనే భారం...ప్రస్తుతం ఆర్టీసీలో 2 వేల మంది ఔట్ సోర్సింగ్ డ్రైవర్లు, 1250 మంది కండక్టర్లు ఉన్నారు. వీరు కచ్చితంగా విధుల్లోకి వచ్చేలా, డబుల్ డ్యూటీ చేసేలా అధికారులు చర్యలు ప్రారంభించారు. ఎలక్ట్రిక్ బస్సు డ్రైవర్లు కూడా ఓటర్లు కానందున వారు కూడా డ్యూటీలో ఉంటారు. -
‘ఆర్టీసీ’ ఎన్నికల పోరు నేడు
నెల్లూరు(స్టోన్హౌస్పేట): ఆర్టీసీ యూనియన్ల గుర్తింపు ఎన్నికలకు సర్వం సిద్ధమైంది. గురువారం ఉదయం 5 గంటల నుంచే ఎన్నికలు నిర్వహించేందుకు కార్మికశాఖ అధికారులు ఏర్పాట్లు చేశారు. జిల్లాస్థాయి నుంచి రాష్ట్ర స్థాయి వరకు జోరుగా సాగిన ప్రచారంతో ఈ ఎన్నికలు సాధారణ ఎన్నికలను తలపిస్తున్నాయి. రాష్ట్ర నాయకులు డిపోల స్థాయిలో ప్రచారం, బహిరంగ సభలు నిర్వహించి భారీగా హామీలను ఇచ్చారు. ఆర్టీసీలో ఐదు యూనియన్లకు కార్మిక శాఖ గుర్తింపు ఉంది. ఎన్నికల్లో తమ ప్యానల్ను గెలిపించేందుకు ఏ యూనియన్ సొంతగా ప్రయత్నాలు చేయలేదు. రాజకీయ పార్టీల అండతో గెలుపే లక్ష్యంగా ప్రచారం చేశారు. కాగడా గుర్తుపై నేషనల్ మజ్దూర్ యూనియన్, బస్సు గుర్తుపై ఎంప్లాయీస్ యూనియన్ హోరాహోరీగా పోరాడుతున్నాయి. రీజియన్ స్థాయిలో ఎన్నికల కమిటీ ప్రధాన అధికారిగా డిప్యూటీ కమిషనర్ బి.ఏసుదాసును కార్మిక శాఖ నియమించింది. ఎన్నికల సహాయ అ«ధికారిగా అసిస్టెంట్ లేబర్ కమిషనర్ వెంకటనారాయణ వ్యవహరిస్తున్నారు. ఉదయం 5 గంటల నుంచి సాయంత్రం 6 గంటల వరకు పోలింగ్ జరుగుతుంది. 12 పోలింగ్ బూత్లు జిల్లాలోని పది డిపోల్లో ఒక్కొక్కటి చొప్పున, నెల్లూరు ఆర్ఎం ఆఫీసులో, పడుగుపాడు వర్క్షాపులో ఒకటి వంతున మొత్తం 12 పోలింగ్ బూత్లను ఏర్పాటు చేశారు. నెల్లూరు ఆర్ఎం ఆఫీసులో 48 ఓట్లు, ఈడీ ఆఫీసులో (వెంకటాచలం ట్రైనింగ్ ఆఫీసు) 52 ఓట్లు, నెల్లూరు డిపో–1లో 638 ఓట్లు, నెల్లూరు డిపో–2లో 532, సూళ్లూరుపేటలో 318, గూడూరు 337, వాకాడు 279 , రాపూరు 311, వెంకటగిరి 319, ఆత్మకూరు 339, ఉదయగిరి 287, కావలి 400, పడుగుపాడు వర్క్షాపులో 134, మొత్తం 3,994 మంది ఓటు హక్కును వినియోగించుకోవాల్సి ఉంది. ఎన్నికలు పకడ్బందీగా నిర్వహిస్తాం ఆర్టీసీ గుర్తింపు యూనియన్ల పోలింగ్ ప్రక్రియను పకడ్బందీగా నిర్వహించేందుకు ఏర్పాట్లను పూర్తి చేశాం. పోలింగ్ అయిన అర్ధగంట తర్వాత కౌంటింగ్ ప్రారంభమవుతుంది. రాత్రికల్లా ఫలితాలు వెలువడుతాయి. – బి.ఏసుదాసు, ఎన్నికల ప్రధాన అధికారి -
జులై 19న టీఎస్ఆర్టీసీ ఎన్నికలు
హైదరాబాద్: తెలంగాణ రాష్ట్ర రోడ్డు రవాణా సంస్థ (టీఎస్ఆర్టీసీ) గుర్తింపు సంఘం ఎన్నికలు జులై 19న జరగనున్నాయి. జులై 25, 26 తేదీల్లో రాష్ట్రవ్యాప్తంగా పోస్టల్ బ్యాలెట్ ఓటింగ్ నిర్వహిస్తారు. ఆగస్టు 6న తుది ఫలితాలు వెలువడతాయి. -
ఆర్టీసీ ఎన్నికలకు రెడీ!
4946 మంది ఓటర్లు 11 చోట్ల పోలింగ్ కేంద్రాలు బరిలో 8 యూనియన్లు సాక్షి, విశాఖపట్నం: ప్రతిష్టాత్మకంగా జరగనున్న ఆర్టీసీ గుర్తింపు యూనియన్ ఎన్నికలకు ఏర్పాట్లు పూర్తయ్యాయి. ఈ నెల 18న జరిగే ఈ ఎన్నికలకు ఎనిమిది యూనియన్లు పోటీ పడుతున్నాయి. విశాఖ రీజియన్ పరిధిలో పది డిపోల్లోనూ, విశాఖ రీజనల్ మేనేజర్ కార్యాలయంలో మరొకటి వెరసి 11 పోలింగ్ కేంద్రాలను ఏర్పాటు చేశారు. ఆ రోజు ఉదయం 5 నుంచి సాయంత్రం 6 గంటల వరకు పోలింగ్ నిర్వహించనున్నారు. రీజియన్ వ్యాప్తంగా 4946 మంది తమ ఓటు హక్కును వినియోగించుకోనున్నారు. ఓటరు ఒకటి రీజియన్కు, మరొకటి రాష్ట్ర యూనియన్కు ఓటేయాల్సి ఉంటుంది. రాష్ట్ర యూనియన్కు తెలుపు, రీజియన్ యూనియన్కు గులాబీ రంగు బ్యాలెట్లు ఇస్తారు. పోలింగ్ ముగిసాక అదే రోజు ఓట్ల లెక్కింపు ఉన్నా ఫలితాన్ని ఆ రోజు వెల్లడించరు. ఎందుకంటే ఈ నెల 24న పోస్టల్ బ్యాలెట్లను లెక్కిస్తారు. అయితే 18వ తేదీన ఫలితాన్ని అధికారికంగా వెల్లడించకపోయినా అనధికారికంగా ఏ యూనియన్ విజయం సాధించిందో తెలిసిపోతుంది. ఒకవేళ స్వల్ప ఓట్ల తేడా వస్తే మాత్రం పోస్టల్ బ్యాలెట్ ఓట్లు ఫలితాన్ని ప్రభావితం చేసే అవకాశం ఉంటుంది. ఈ ఎన్నికలను డిప్యూటీ లేబర్ కమిషనర్ ఆధ్వర్యంలో జరగనున్నాయి. ప్రస్తుతం విశాఖ రీజియన్లో ఎన్ఎంయూ, రాష్ట్రంలో ఎంప్లాయీస్ యూనియన్లు గుర్తింపు యూనియన్లుగా ఉన్నాయి. ఈ ఎన్నికల్లో కేవలం యూనియన్లకు కేటాయించిన గుర్తులకే ఓటేస్తారు. గెలిచిన అనంతరం ఆయా యూనియన్లు రీజియన్, డిపోల వారీగా కార్యవర్గాన్ని నియమిస్తాయి. ముగిసిన ప్రచారం: ఆర్టీసీ యూనియన్ ఎన్నికల ప్రచారం మంగళవారం సాయంత్రం ఆరు గంటలతో ముగిసింది. కొద్దిరోజులుగా బరిలో నిలిచిన వివిధ యూనియన్లు విస్తృతంగా ప్రచారం చేశాయి. పలు బహిరంగ సభలు, ర్యాలీలు నిర్వహించాయి. తమ యూనియన్ను గెలిపిస్తే చేయబోయే మేళ్లను, ప్రత్యర్థి యూనియన్ల వైఫల్యాలను వివరించాయి. గత ంకంటే తగ్గిన ఓట్లు: వాస్తవానికి ఆర్టీసీ గుర్తింపు యూనియన్ ఎన్నికల పదవీకాలం రెండేళ్లుంటుంది. గత ఏడాదితో రెండేళ్ల పదవీకాలం ముగిసింది. అయితే సమైక్యాంధ్ర ఉద్యమం కారణంగా గత సంవత్సరం ఈ ఎన్నికలు జరగలేదు. దీంతో మూడేళ్లు గడిచిపోయింది. ఈసారి ఎన్నికల్లో గతంకంటే దాదాపు వెయ్యి ఓట్లు తగ్గాయి. మూడేళ్ల క్రితం జరిగిన ఎన్నికల్లో దాదాపు ఆరు వేల ఓట్లుండేవి. ఈ రీజియన్లో 108 బస్సుల (సిటీలో 76, జిల్లాలో 32) ను తొలగించారు. ఒక్కో బస్సుకు సగటున 7.6 మంది సిబ్బంది ఉంటారు. దీంతో ఈ బస్సుల్లో పనిచేసే సిబ్బంది సంఖ్యను కుదించేయడం ఓట్ల సంఖ్య తగ్గడానికి కారణమని కార్మిక నాయకులు చెబుతున్నారు. గుర్తింపు ఎన్నికల్లో 95 శాతానికి పైగానే ఓట్లు పోలవుతాయని వీరు అంచనా వేస్తున్నారు. మరోవైపు రీజియన్లో అత్యధికంగా వాల్తేరులో 776 ఓట్లు, పాడేరులో అత్యల్పంగా 183 ఓట్లు ఉన్నాయి. ఏ యూనియన్కు ఏ గుర్తు? గుర్తింపు యూనియన్ ఎన్నికల బరిలో నిలిచిన యూనియన్లకు గుర్తులను కేటాయించారు. అవి బ్యాలెట్ పత్రంలో వరస క్రమంలో ఇలా ఉన్నాయి. 1) ఏపీఎస్ఆర్టీసీ బహుజన్ వర్కర్స్ యూనియన్ ఎగిరే పావురం 2) ఏపీఎస్ఆర్టీసీ ఎంప్లాయీస్ యూనియన్ బస్సు 3) ఏపీఎస్ఆర్టీసీ కార్మిక పరిషత్ బస్సు టైరు 4) ఏపీఎస్ఆర్టీసీ కార్మిక సంఘ్ కార్మికుని పిడికిలి 5) ఏపీఎస్ఆర్టీసీ నేషనల్ మజ్దూర్ యూనియన్ కాగడా 6) ఏపీఎస్ఆర్టీసీ స్టాఫ్ అండ్ వర్కర్స్ ఫెడరేషన్ నక్షత్రం 7) ఏపీఎస్ఆర్టీసీ యునెటైడ్ వర్కర్స్ యూనియన్ స్టీరింగ్ పట్టుకున్న డ్రైవర్ 8) వైఎస్సార్ ఆర్టీసీ మజ్దూర్ యూనియన్ టేబుల్ ఫ్యాన్


