నేడు దేశవ్యాప్తంగా సంక్రాంతి సందడి నెలకొంది. దేశంలోని పలు ప్రాంతాల్లో వివిధ రీతుల్లో సంక్రాంతి ఉత్సవాలు జరుగుతున్నాయి. వీటిలో గంగా స్నానం, గాలిపటాలు ఎగురవేడం లాంటివి ఉన్నాయి. మరోవైపు యూపీలోని ప్రయాగ్‌రాజ్‌లో అత్యంత వైభవంగా కుంభమేళా జరుగుతోంది.మకర సంక్రాంతి సందర్భంగా దేశవ్యాప్తంగా చాలాచోట్ల గాలిపటాలను ఎగురవేస్తారు. అయితే ఈ గాలిపటాలను ఎగురవేసేందుకు వినియోగించే చైనా మాంజా కారణంగా ప్రమాదాలు జరుగుతుంటాయి. ప్రాణాలు పోయిన సందర్బాలు కూడా ఉన్నాయి.మకర సంక్రాంతి సందర్భంగా మహారాష్ట్రలోని నాగ్‌పూర్‌లో భారీఎత్తున గాలిపటాలను ఎగురవేసే సంప్రదాయం ఉంది. గాలిపటాలు ఎగురవేసే వారు నైలాన్ దారం లేదా చైనా మాంజాను ఉపయోగిస్తుంటారు. వీటి కారణంగా ప్రాణహాని జరుగుతున్న నేపధ్యంలో నాగ్‌పూర్ పోలీసులు చైనీస్ థ్రెడ్‌ వినియోగం, విక్రయాలపై ఓ కన్నేసి ఉంచారు. లక్షల రూపాయల విలువైన చైనీస్‌ మంజాను స్వాధీనం చేసుకున్నారు. డ్రోన్‌ల సాయంతో.. గాలిపటాలు ఎగురవేసేవారిపై నాగపూర్‌ పోలీసులు నిఘా సారించారు. అదేవిధంగా నగరంలోని ప్రతీవీధివీధినా తిరుగుతూ చైనీస్ దారాన్ని ఉపయోగించవద్దని ప్రజలకు విజ్ఞప్తి చేస్తున్నారు.తాజాగా నాగ్‌పూర్ పోలీసులు రూ.25 లక్షల విలువైన చైనీస్‌ దారాన్ని స్వాధీనం చేసుకుని, వాటిని ధ్వంసం చేశారు. ఇండోర్ మైదానంలో 2,599 బండిళ్లు కలిగిన దాదాపు రూ.25 లక్షల విలువైన నిషేధిత నైలాన్ మాంజాను రోడ్ రోలర్ సహాయంతో ధ్వంసం చేశారు. ఆ ప్రాంత పౌరుల సమక్షంలో పోలీసులు ఈ విధమైన చర్యలు చేపట్టారు. చైనామాంజా వినియోగిస్తూ ఎవరైనా పట్టుబడితే వారిని నేరుగా కస్టడీకి పంపుతామని పోలీసులు హెచ్చరించారు. చైనీస్ థ్రెడ్ కారణంగా బైక్ రైడర్లు ప్రమాదాల బారిన పడుతున్న ఉదంతాలు చోటుచేసుకుంటున్నాయి.ఇది కూడా చదవండి: పతంగుల​కు ఎంత గాలి అవసరం? ఎందుకు తెగిపోతాయి?

సంక్రాంతి వస్తోందంటే వాకిట రంగవల్లులు, తెల్లవారు జామున హరిదాసులు, తెల్లవారిన తర్వాత గొబ్బియల్లో పాటలు, మధ్యాహ్నానికి పతంగులు గాల్లో ఎగురుతాయి. ఇవన్నీ పండుగ రాకను సూచించే ఉల్లాసాలు. సంక్రాంతి పండుగకు ఇంతే ఉల్లాసంగా ఉత్సవాలు కూడా జరుపుకుంటాం. సంక్రాంతి పండుగకు మనదేశంలో, గుజరాత్‌లో జరిగే పతంగుల ఉత్సవం అంటే విదేశాల నుంచి కూడా పర్యాటకులు ఉరకలు వేస్తూ వస్తారు. అహ్మదాబాద్‌ వేదికగా జరిగే ఈ వేడుకలకు నవంబర్‌ నుంచే ఏర్పాట్లు మొదలవుతాయి. నగరం డిసెంబర్‌ నాటికే పూర్తి స్థాయిలో ముస్తాబవుతుంది.తోకలేని గాలిపటాలుఅహ్మదాబాద్‌లో ‘ఇంటర్నేషనల్‌ కైట్‌ ఫెస్టివల్‌ 2025’ను ఈ నెల 11వ తేదీ నుంచి 14వ తేదీ వరకు నిర్వహిస్తున్నారు. ఈ ఇంటర్నేషనల్‌ కైట్‌ ఫెస్టివల్‌ అహ్మదాబాద్‌లో ప్రారంభమవుతుంది. కేవాడియా, రాజ్‌కోట్, వడోదరా, శివరాజ్‌ పూర్, ధోర్డో, సూరత్‌లలో కూడా వేడుకలు నిర్వహిస్తారు. గాలిపటం అంటే తోక ప్రధానం, కానీ తోకలేని గాలిపటాలు కూడా ఈ వేడుకల్లో కనిపిస్తాయి. నక్షత్ర పతంగులు, చేపలు, పులుల ఆకారంలో ప్రత్యేకమైన కాన్సెప్ట్‌లతో రూపొందిన గాలిపటాలను చూడవచ్చు. దేశవిదేశాల నుంచి పర్యాటకులు ఈ ఫెస్టివల్‌కి వస్తారు. అహ్మదాబాద్, కచ్, సూరత్, సాఉతారా, రాజ్‌కోట్, పోర్‌బందర్, గాంధీధామ్, అమ్రేలి, భావ్‌నగర్‌లలో గతంలో నిర్వహించిన ఫెస్టివల్‌లో పాల్గొన్న గాలిపటాల ఫొటో గ్యాలరీ స్టాల్‌ కూడా ఉంటుంది. ఏకకాలంలో ఐదు వందల పతంగులు గాల్లో ఎగురుతుంటే చూడడానికి రెండు కళ్లు చాలవనే మాట చాలా చిన్నది. అహ్మదాబాద్‌ లో1989 నుంచి ఇంటర్నేషనల్‌ కైట్‌ ఫెస్టివల్‌ జరుగుతోంది. సూర్యుడు ఉత్తరాయణంలోకి ప్రవేశించే సమయంలో ముందు ఒకటి రెండు రోజుల నుంచి తర్వాత మరో రోజు వరకు మొత్తం నాలుగు రోజులు నిర్వహిస్తారు. ఈ ఫెస్టివల్‌కి పతంగి తయారీదారులు ప్రత్యేకంగా నెల రోజుల ముందు నుంచే చేరుకుంటారు. మలేషియా, ఇండోనేషియా, యూఎస్, జ΄ాన్, చైనా, ఇటలీ వంటి అనేక దేశాల నుంచి పతంగులు చేసే నిపుణులు, పతంగులను ఎగురవేసే ఉత్సాహవంతులు నగరానికి చేరుకుంటారు. ప్రత్యేకమైన పతంగులను తయారు చేసే పెద్ద పెద్ద కంపెనీలు కూడా వేడుకలో పాల్గొంటాయి.కాంతులీనే పతంగులురంగురంగుల పతంగులను పగలంతా ఎగురవేస్తారు. వెలుగులు విరజిమ్మే తెల్లటి పతంగులను రాత్రి పూట ఎగురవేస్తారు. అవి ఆకాశంలో చంద్రుడికి పోటీగా విహరిస్తుంటాయి. ఇంటర్నేషనల్‌ కైట్‌ ఫెస్టివల్‌ని సంక్రాంతి పండుగ సందర్భంగా నిర్వహిస్తున్నప్పటికీ ఇందులో మతపరమైన ధార్మిక నియమాలేవీ ఉండవు. వేడుకలో అన్ని మతాల వాళ్లూ సంతోషంగా పాల్గొంటారు. బంధువులు, స్నేహితులు కుటుంబాలతోపాటుగా కలిసి వేడుకలకు హాజరవుతుంటారు. ఇది ఊరంతా కలిసి నిర్వహించుకునే వేడుకన్నమాట. రంజాన్‌ సమయంలో చార్మినార్‌ నైట్‌ బజార్‌లాగ అహ్మదాబాద్‌ నగరంలోని పతంగిబజార్‌ డిసెంబర్‌ మూడోవారం నుంచి జనవరి రెండు వారాల వరకు మొత్తం నెలరోజుల పాటు రోజూ 24 గంటలూ తెరిచే ఉంటుంది. ఎన్నివేల పతంగులు అమ్ముడవుతాయో లెక్క అందదు. మాంజాకు గాజు పొడి అద్దే దుష్టసంప్రదాయాన్ని నిషేధిస్తూ ప్రభుత్వం ఆంక్షలు విధించింది. ఈ నియమాన్ని కచ్చితంగా పాటించేటట్లు గట్టి నిఘా కూడా ఉంటుంది.పెద్దల కేరింతలుమన తెలుగువాళ్లు సంక్రాంతికి ప్రతి ఇంట్లో పతంగులు ఎగురవేస్తారు. హైదరాబాద్‌ ఆకాశం కూడా పతంగులతో కనువిందు చేస్తుంది. కానీ ఇక్కడ పిల్లలు పతంగులతో ఆనందిస్తుంటే పెద్దవాళ్లు పిల్లలను చూసి ఆనందిస్తుంటారు. ఇంటర్నేషనల్‌ కైట్‌ ఫెస్టివల్‌లో పెద్దవాళ్లు చిన్న పిల్లలైపోతారు. పరుగులు తీస్తూ మాంజాను జాడిస్తూ పతంగి పైకి ఎగిరే కొద్దీ కెవ్వున కేరింతలు కొడుతూ ఉంటే వాళ్లను చూసి పిల్లలు చప్పట్లు కొడుతూ ఈ వేడుకను ఎంజాయ్‌ చేస్తారు. (చదవండి:

నేడు ఫిబ్రవరి 14.. ఒకవైపు వసంత పంచమి. మరోవైపు ప్రేమికుల రోజు. ఉత్తరప్రదేశ్‌లో వాలెంట్సైన్స్‌ డే సందర్భంగా గాలిపటాలు ఎగురవేస్తుంటారు. పతంగులను ఎగురవేయడం ద్వారా తమ ప్రేమను చాటుతున్నామని యూపీలోని మీరఠ్‌కు చెందిన యువత చెబుతోంది. యువతీ యువకులు తాము గాలిపటం ఎగురవేసినప్పుడు దాని దారం తెగితే.. అది నేరుగా వారి జీవిత భాగస్వాముల దగ్గరికి చేరుతుందని అంటుంటారు. మీరఠ్‌లో వాలెంటైన్స్‌డే సందర్భంగా ఆకాశమంతా గాలిపటాలతో నిండిపోయింది. ఈసారి  ప్రత్యేకమైన గాలిపటాలు మార్కెట్‌లో సందడి చేస్తున్నాయి. ముఖ్యంగా గుండె ఆకారంలోని గాలిపటాలకు  మంచి డిమాండ్‌ ఏర్పడింది. కొన్ని గాలిపటాలలో అబ్బాయి, అమ్మాయిల రూపురేఖలు చిత్రీకరించారు. వాటి మధ్యలో హృదయాకారాన్ని తీర్చిదిద్దారు. 

హైదరాబాద్: పండుగ వేళ నగరంలో వరుస విషాదాలు చోటుచేసుకున్నాయి. ఇప్పటివరకు గాలిపటాలు ఎగురవేస్తూ 7 మంది మృతి చెందారు. తాజాగా మంగళవారం మరో ఇద్దరు మృతి చెందారు. రహ్మత్ నగర్‌లో స్నేహితులతో కలిసి గాలిపటాలు ఎగరవేయడానికి వెళ్లిన కపిల్ దేవ్ (23) అనే యువకుడు ఐదంతస్తుల భవనంపై నుంచి ప్రమాదశాత్తూ కింద పడడంతో మృతి చెందాడు. మృతిపై తల్లిదండ్రులు అనుమానం వ్యక్తం చేస్తున్నారు. ఆరుగురు స్నేహితుల ప్రమేయంపై అనుమానంతో కుటుంబ సభ్యులు మధురానగర్ పోలీసులకు ఫిర్యాదు చేశారు. పోలీసులు కేసు నమోదు చేసి విచారణ చేపట్టారు యాప్రాల్ గాలిపటానికి మరొక  బాలుడు మృతి  హైదరాబాద్ యాప్రాల్‌లో పతంగి ఎగరవేస్తూ భువన్ సాయి అనే బాలుడు భవనంపై నుంచి కిందపడి ప్రాణాలు కోల్పోయాడు. కాగా మంగళవారం ఒక్క రోజే ఇద్దరు మృతి చెందారు. TS: ప్రాణాలు తీస్తున్న పతంగులు!

హైదరాబాద్‌, సాక్షి: పతంగి దారాలు పండుగ పూట ఉత్త పుణ్యానికి మనుషుల కుత్తుకలు కోస్తున్నాయి. తెలంగాణలో రెండు రోజుల్లో ఆరుగురు మృత్యువాత పడగా.. తాజాగా సోమవారం మరో ప్రాణం పోయింది. దీంతో పోలీసులు అప్రమత్తం అయ్యారు. గాలిపటాలు ఎగరేసేప్పుడు జాగ్రత్తగా ఉండాలని సూచిస్తూనే.. నిషేధిత చైనా మాంజా దారం అమ్మినా, వినియోగించినా కఠిన చర్యలు ఉంటాయని హెచ్చరిస్తున్నారు.   సంక్రాంతి వేళ గాలి పటం సరదా ప్రాణాలు తీస్తోంది.  బిల్డింగ్‌పై నుంచి పడి ఇద్దరు, విద్యుత్‌ షాక్‌తో ముగ్గురు మృత్యువాత పడ్డారు. మాంజా దారం తగిలి ఆర్మీ జవాన్‌ మృతి చెందిన సంగతీ తెలిసిందే. అలా గడిచిన రెండు రోజుల్లో ఆరుగురు మృత్యువాత పడ్డారు.  సోమవారం  సంగారెడ్డి జిల్లా జహీరాబాద్‌లో మరో మరణం సంభవించింది. విద్యుత్‌ తీగలకు తగిలిన పతంగి తీసే క్రమంలో 22 ఏళ్ల యువకుడికి షాక్‌ తగిలింది. ఆస్పత్రికి తరలించే క్రమంలో ఆ యువకుడు కన్నుమూశాడు. ఝరాసంగం మండలం పొట్‌పల్లిలో ఇది జరిగింది.  వరుస ఘటన నేపథ్యంలో పోలీసులు అప్రమత్తం అయ్యారు. తల్లిదండ్రుల పర్యవేక్షణలోనే పిల్లలు గాలి పటం ఎగరేసేలా చూడాలని కోరుతున్నారు. బిల్డింగ్‌లపై కాకుండా మైదానాల్లో పతంగులు ఎగరేయాలని సూచిస్తున్నారు. అదే సమయంలో.. మాంజాదారం అమ్మినా, వినియోగించినా కఠిన చర్యలు ఉంటాయని హెచ్చరిస్తున్నారు. ఇప్పటికే పలు చోట్లా ప్రత్యేక బృందాలు తనిఖీలు చేసి దుకాణాల్ని సీజ్‌ చేస్తున్నాయి. సరదా పేరిట పతంగులు ఎగరేస్తూ పబ్లిక్‌ న్యూసెన్స్‌కు పాల్పడ్డా కూడా చర్యలు తప్పవని హెచ్చరించారు.

సాక్షి, హైదరాబాద్‌/లంగర్‌హౌస్‌: హైదరాబాద్‌కు అక్రమంగా దిగుమతి అయిన చైనా మాంజా ఓ ఆర్మీ అధికారి ప్రాణం తీసింది. ఆంధ్రప్రదేశ్‌ రాష్ట్రం విశాఖపట్నం జిల్లా పెదవాల్తేరుకు చెందిన కాగితాల కోటేశ్వర్‌రెడ్డి ఆర్మీలో నాయక్‌గా పని చేస్తున్నారు. ప్రస్తుతం లంగర్‌హౌస్‌లో ఉన్న మిలటరీ ఆస్పత్రిలో విధులు నిర్వర్తిస్తున్నారు. భార్య ప్రత్యూష, రెండేళ్ల కుమార్తెతో కలిసి బాపునగర్‌లో నివసిస్తున్నారు. విధులకు హాజరయ్యేందుకు శనివారం ద్విచక్ర వాహనంపై బాపునగర్‌ నుంచి లంగర్‌హౌస్‌ వైపు వస్తున్నారు. సాయంత్రం 6.30 గంటల సమయంలో లంగర్‌హౌస్‌ ఫ్లైఓవర్‌పై ప్రయాణిస్తున్న ఆయన మెడకు ఎగురుకుంటూ వచ్చి న పతంగికు కట్టిఉన్న చైనా మాంజా చుట్టుకుంది. ఆయన అప్రమత్తమయ్యేలోపే మాంజా గొంతుకు బిగుసుకుని కోసుకుపోయింది. దీంతో గొంతుపై తీవ్రగాయమై కోటేశ్వర్‌రెడ్డి వాహనంపైనుంచి కింద పడిపోయారు. రక్తం మడుగులో పడి ఉన్న ఆయన్ను గుర్తించిన స్థానికులు చికిత్స కోసం ఆయన పనిచేసే మిలటరీ ఆస్పత్రికి తరలించారు. అక్కడి వైద్యులు రెండు గంటలపాటు శ్రమించినా ఫలితం దక్కలేదు. కోటేశ్వర్‌రెడ్డి చికిత్స పొందుతూ శనివారం రాత్రి 9.30 సమయంలో కన్నుమూశారు. కేసు నమోదు చేసుకున్న లంగర్‌హౌస్‌ పోలీసులు దర్యాప్తు ప్రారంభించారు. మృతదేహానికి పోస్టుమార్టం నిర్వహించిన అనంతరం కుటుంబీకులకు అప్పగించారు.   కట్టడి చేసినా.. విచ్చలవిడిగా...  మనుషులతో పాటు పక్షులు, ఇతర ప్రాణులకు ముప్పు కలిగించే చైనా మాంజాను కట్టడి చేయా లని నగర పోలీసులు గత నెల నుంచే ప్రయత్నాలు ప్రారంభించారు. మాంజా రవాణా, నిల్వ, విక్రయంపై నిఘా ఉంచి అనేక కేసులు నమోదు చేశా రు. అయినప్పటికీ ధనార్జనే ధ్యేయంగా అనేక మంది వ్యాపారులు చైనా మాంజాను అక్రమంగా తీసుకువచ్చి విక్రయించారు. శని, ఆదివారాల్లో ఈ మాంజా ప్రభావం నగరవ్యాప్తంగా కనిపించింది. అనేక మంది వాహనచోదకులు దీని బారినపడి గాయప డ్డారు. రాజధానిలోని అనేక ప్రాంతాల్లో పక్షులు ఈ మాంజా కారణంగా తీవ్రంగా గాయపడటం, చనిపోవడం కనిపించింది. నగరంలోని దాదాపు అన్ని ఫ్లైఓవర్లు ‘డేంజర్‌ జోన్లు’గా మారాయి. మాంజా కారణంగా వాహనాలు సడన్‌గా వేగాన్ని తగ్గించడం.. వెనుక వచ్చే వాహనాలు ఢీకొట్టడంతో పలుచోట్ల ప్రమాదాలు చోటుచేసుకున్నాయి. 

సాక్షి, హైదరాబాద్‌: సంక్రాంతి పండగ పూట గాలిపటాల సరదా రాజధాని నగరంలో ఇద్దరి ప్రాణాలు తీసింది. రోడ్డుపై వెళుతూ చైనా మాంజా దారం తగిలి ఆర్మీ లో డ్రైవర్‌గా పని చేసే కోటేశ్వేర్ రెడ్డి మృతి చెందాడు. మరో ఘటనలో గాలిపటం ఎగురవేస్తూ అల్వాల్‌ పీఎస్‌లో పనిచేసే ఏఎస్సై కుమారుడు ఆకాష్‌ ఇంటిపై నుంచి కిందపడి మరణించాడు. దీంతో రెండు కుటుంబాల్లోనూ విషాదం నెలకొంది.  శనివారం సాయంత్రం ఇంటి నుంచి డ్యూటీకి వెళ్తున్న సమయంలో లంగర్‌హౌజ్‌స్ ఫ్లైఓవర్‌పై అడ్డుగా ఉన్న చైనా మాంజా మెడకు తగలడంతో తీవ్రంగా గాయపడ్డ కోటేశ్వర్‌రెడ్డి ఆస్పత్రిలో చికిత్స పొందుతూ మృతి చెందాడు. కోటేశ్వర్‌రెడ్డి స్వస్థలం విశాఖపట్నం. ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.  వేరే ఘటనలో గాలిపటం ఎగురవేస్తూ, ప్రమాదవశాత్తు భవనం పైనుండి పడి ఆకాష్‌(20) అనే యువకుడు మృతి చెందాడు. పేట్‌ బహీరాబాద్‌లో ఈ ఘటన జరిగింది.  సమాచారం అందుకున్న పోలీసులు కేసు నమోదు చేసుకుని దర్యాప్తు చేస్తున్నారు. పండుగ రోజు కుమారుడు మృతి చెందడంతో ఆకాష్‌ కుటుంబం శోకసంద్రంలో మునిగిపోయింది. సహచర ఉద్యోగి కుమారుడు మృతి చెందడంతో అల్వాల్ పోలీసుస్టేషన్‌లోలోనూ విషాద చాయలు అలుముకున్నాయి.  ఇదీచదవండి.. తెలంగాణలో హత్యా రాజకీయాలు చెల్లవు: కేటీఆర్‌ 

మధ్యప్రదేశ్‌లోని భోపాల్‌లోని ఎంవీఎం గ్రౌండ్‌లో ‘సంక్రాంతి మహోత్సవ్-2024’కు సర్వం సిద్ధమైంది. నేటి ఉదయం (జనవరి 14) రాష్ట్ర మంత్రులు, ఎమ్మెల్యేలు, ప్రజాప్రతినిధులు సూర్యునికి అర్ఘ్యం సమర్పించి ఉత్సవాన్ని ప్రారంభించనున్నారు.  ఉత్సవంలో భాగంగా మహిళలు సంప్రదాయ దుస్తులు ధరించి ఒకరికొకరు పసుపు, కుంకుమ పూసుకుంటారు. తరువాత పతంగుల పోటీ జరగనుంది. ఈ సందర్భంగా  గుజరాత్‌కు చెందిన​ పతంగుల కళాకారులు ప్రత్యేకంగా తయారుచేసిన జాయింట్‌ గాలిపటాన్ని ఎగురవేయనున్నారు. దాని పరిమాణం 25 అడుగుల వరకు ఉంటుంది. ఈ జాయింట్‌ పతంగులలో కార్టూన్లు, సింహాలు, వివిధ బొమ్మలు ఉంటాయి. ‘సంక్రాంతి మహోత్సవ్-2024’లో మహిళల ఆధ్వర్యంలో ఫుడ్ స్టాల్స్ ఏర్పాటయ్యాయి. అలాగే జిల్లా స్థాయి పతంగుల ఎగురవేత పోటీ ఏర్పాటు చేశారు. సాయంత్రం లోహ్రీ కార్యక్రమం నిర్వహిస్తున్నారు. ఇందులో భోగి మంటలు వేయడంతో పాటు పలు సాంస్కృతిక కార్యక్రమాలు నిర్వహించనున్నారు. గాలిపటాలు ఎగురవేయాలనే ఉత్సాహం కలిగినవారికి నిపుణులు శిక్షణ అందిస్తారు. ‘సంక్రాంతి మహోత్సవ్-2024’ జనవరి 15న ముగుస్తుంది.  ఇది కూడా చదవండి: తొలి గాలిపటాన్ని ఎవరు తయారు చేశారు? ఎందుకు ఉపయోగించారు?

సంక్రాంతి  సంబరం అంటే చుట్టాలు పక్కాలు, అరిసెలు, స్వీట్లు, భోగి పళ్లు, గంగిరెద్దులు, గొబ్బెమ్మల ముచ్చటే కాదు.  వీటన్నింటికి మించి మరో పండుగ కూడా ఉంది.  అసలు సంక్రాంతి అంటేనే చాలా ప్రదేశాల్లో పతంగుల పండుగ. , రెండు నెలల ముందు నుంచి పిల్లలు, పెద్దలు గాలి పటాలను ఎగుర వేస్తారు.   ఎవరికి నచ్చిన సైజులు,  ఆకారాల్లో రకరకాల గాలి పటాలను ఎగురవేస్తూ ఆనందంలో మునిగి  తేలతారు. ఆకాశంలో ఎటు చూసినా  పట్ట పగలే నక్షత్రాలొచ్చాయా అన్నట్టు గాలిపటాలు దర్శనిమిస్తాయి.  తెలంగాణా, గుజరాత్, రాజస్థాన్ రాష్ట్రాల్లో పతంగులు గురవేయడాన్ని పండగలా నిర్వహిస్తారు సంక్రాంతికి గాలి పటాలు ఎందుకు ఎగురవేస్తారు..? చరిత్ర ఏమిటి..? ఎక్కడి నుంచి మొదలైంది? తొలి రోజుల్లో వీటిని ఆత్మరక్షణకు, సమాచారాన్ని పంపించడం కోసం ఉపయోగించేవారట. దాదాపు 2 వేల సంవత్సరాల కిందట చైనాలో వీటిని తయారు చేశారట. సిగ్నలింగ్‌, మిలటరీ ఆపరేషన్స్‌లోనూ వీటిని వినియోగించారు. చైనాలో హేన్ వంశపు రాజుల చరిత్ర ప్రారంభం కావటానికి గాలిపటమే దోహదం చేసిందని పరిశోధకులు చెబుతారు.  మకర సంక్రాంతికి శీతాకాలం ముగిసి  వసంత రుతువు ప్రారంభానికి సూచికగా చూస్తారు  గాలిపటాలను పగటిపూట ఎగరవేయడంలో ఒక ఆరోగ్యపరమైన కారణం కూడా ఉంది. పతంగులు ఎగురవేయడం అనేది దేవుళ్లకు కృతజ్ఞతలు చెప్పడానికి ఒక మార్గం అని కొందరు విశ్వసిస్తారు. గాలిపటాలు ఎగరేసేటపుడు ఎక్కువ సమయం  మన బాడీ సన్‌లెటై్‌కి ఎక్స్‌పోజ్‌ అవుతుంది. అంతేకాదు లేలేత సూర్యకిరణాల్లో విటమిన్ డి లభిస్తుంది. సూర్యుడి లేతకిరణాలు చర్మంపై పడితే చర్మ సమస్యలు, ఆరోగ్య సమస్యలు తొలగిపోతాయని నమ్మకం.  అలాగే చలిగాలుల వల్ల కలిగే అనేక అంటువ్యాధులు, అనారోగ్యాలతో పోరాడేందుకు ఎంతో సహాయ పడుతుంది.ఆకాశంలో ఎగిరే గాలిపటాలను చూడటం కంటిచూపును మెరుగు పరుస్తుందని చైనీయుల విశ్వాసం. తల పైకి ఎత్తి చూసేటపుడు నోరు కొద్దిగా తెరచు కుంటుందని,  అది శరీరానికి శక్తిని ఇస్తుందని  కూడా వారు నమ్ముతారు. మొదట్లో వీటిని ఆత్మరక్షణకు, సమాచారాన్ని పంపించడం కోసం ఉపయోగించేవారట. ఆ తర్వాత సిగ్నలింగ్‌, మిలటరీ ఆపరేషన్స్‌లోనూ వీటిని వినియోగించారు. ఒకప్పటి గాలిపటాలు మందంగా, దీర్ఘచతురస్రాకారంలో ఉండేవి. క్రీస్తుపూర్వం 206లో చైనాలో హేన్ వంశపు రాజుల చరిత్ర ప్రారంభం కావటానికి గాలిపటమే దోహదం చేసిందని పరిశోధకులు చెబుతారు. దుర్మార్గుడైన రాజును ఓడించేందుకు  వచ్చిన ఆలోచనే తొలి గాలిపటం. ఇందులో భాగంగా కోటలోకి సొరంగాన్ని తవ్వాలనేది హేన్‌ చక్రవర్తి ప్లాన్‌.  అలా ఒక పతంగ్‌ను తయారు చేసి దానికి  దారం కట్టి ఎగరవేశాడు. ఆ దారం ఆధారంగానే,  సొరంగం తవ్వి సైనికులను పంపి కోటను  వశం చేసుకున్నాడని చెబుతారు. ఈ  నియమాలు తెలుసా? పతంగులు ఎగురవేసేటపుడు కొన్ని నిబంధనలు కూడా పాటించాలి.  ఇది ఆయా దేశాలని  బట్టి ఉంటాయి. థాయ్‌లాండ్‌లో పతంగులు ఎగురవేయాలంటే 78 రకాల నిబంధనలు పాటించాల్సి ఉంటుంది. బెర్లిన్ గోడపై నుంచి అవతలికి వెళ్ళే అవకాశం ఉండడంతో భారీ గాలిపటాలను ఎగురవేయడంపై తూర్పు జర్మనీలో నిషేధం విధించారు. జపాన్‌లో కొన్ని గాలిపటాల బరువు కొన్ని కిలోల వరకు ఉంటుందట.

బంజారాహిల్స్‌: తెగిన గాలిపటం కోసం పరుగులు తీస్తూ ఓ బాలుడు తప్పిపోయిన ఘటన బంజారాహిల్స్‌ పోలీసు స్టేషన్‌ పరిధిలో చోటుచేసుకోగా సీసీ కెమెరాల్లో గుర్తించి తల్లిదండ్రులకు అప్పగించారు. వివరాల్లోకి వెళ్తే.. కాకినాడకు చెందిన సింహాద్రి, అనసూయ దంపతులకు వినోదకుమార్‌ అనే 9 ఏళ్ల కొడుకు ఉండగా సంక్రాంతి పండుగకు 3 రోజుల క్రితం బంజారాహిల్స్‌ లోని ఇందిరానగర్‌ లో వుండే అమ్మమ్మ ఇంటికి వచ్చారు. సోమవారం మధ్యాహ్నం వినోద్‌ తన తల్లి, అమ్మమ్మ తోకలిసి కేబీఆర్‌ పార్క్‌ వైపు వచ్చారు. అంతలోనే ఓ పతంగి తెగి గాలిలో కొట్టుమిట్టాడుతున్న సమయంలో దాన్ని పట్టుకోవడానికి పరుగులు తీశారు. కొద్దిసేపట్లో తల్లి గమనించి కొడుకు కోసం గాలించింది. అక్కడే ఉన్న పోలీసులకు చెప్పి అంతటా వెతికింది. కేబీఆర్‌ పార్క్‌ ఇంటర్సెప్టర్‌ 10 మెయిన్‌ గేట్‌ పోలీసు పీసీలు అక్షయకుమార్, మహేష్‌ కుమార్, హెచ్‌జీలు దినకర్, నరేష్, కృష్ణంరాజు స్పందించి పార్కు చుట్టూ గాలించారు. అనంతరం సీసీ కెమెరాల్లో పరిశీలించారు. అదే సమయంలో బాలుడు ఓ చోట కనిపించాడు. వెంటనే బాలుడిని గుర్తించి పట్టుకొని తల్లిదండ్రులకు అప్పగించారు. ఓవైపు నెమళ్లు ఇంకోవైపు పతంగులు చూసి ఆనందంలో మునిగిపోయి వాటిని పట్టుకోవడానికి పరుగెత్తానని వినోద్‌ తెలిపారు.  

న్యూఢిల్లీ: సైనికల బలగాల కన్నుగప్పి దేశంలోకి ఆయుధాలు, మాదకద్రవ్యాలను డ్రోన్ల ద్వారా చేరవేస్తున్నాయి శత్రు దేశాలు. డ్రోన్ల ద్వారానే దాడులకు పాల్పడుతున్న సంఘటనలూ ఇటీవల వెలుగు చూశాయి. ఈ క్రమంలో శత్రు డ్రోన్లను నివారించేందుకు కొత్త అస్త్రాన్ని సిద్ధం చేస్తోంది భారత సైన్యం. తొలిసారి శత్రు డ్రోన్లను ధ్వంసం చేసేందుకు గద్దలకు శిక్షణ ఇస్తోంది. ఉత్తరాఖండ్‌లోని ఔలీలో అమెరికా, భారత్‌లు సంయుక్తంగా నిర్వహిస్తున్న యుద్ధ అభ్యాస్‌ ప్రదర్శనలో ఈ అస్త్రాన్ని భారత సైన్యం ప్రదర్శించింది.  ఈ సైనిక ప్రదర్శన సందర్భంగా ‘అర్జున్‌’ అనే గద్ద శత్రు దేశాల డ్రోన్లను ఏ విధంగా నాశనం చేస్తుందనే విషయాన్ని చూపించారు. శత్రు దేశాలకు చెందిన డ్రోన్లు ఉన్న ప్రాంతాన్ని గుర్తించి, ధ్వంసం చేసేందుకు గద్దతో పాటు ఓ శునకానికి సైతం శిక్షణ ఇచ్చారు. ఈ క్రమంలో డ్రోన్‌ శబ్దం వినబడగానే సైన్యాన్ని శునకం అప్రమత్తం చేసింది. అలాగే.. డ్రోన్‌ ఎక్కడి నుంచి వెళ్తుందనే విషయాన్ని గద్ద గుర్తించింది. ఇలాంటి పక్షులను శత్రు డ్రోన్లను గుర్తించి, ధ్వంసం చేసేందుకు ఉపయోగించటం ఇదే తొలిసారి. అయితే, సైనికపరమైన చర్యల కోసం గద్దలు, శునకాలను వినియోగిస్తున్నట్లు భారత సైన్యం తెలిపింది. పంజాబ్‌, జమ్ముకశ్మీర్‌లోని సరిహద్దుల గుండా దేశంలోకి ప్రవేశించే డ్రోన్లకు అడ్డుకట్ట వేసేందుకు ఈ ప్రక్రియ దోహదబడుతుందని పేర్కొంది. Here comes India's first anti #drone Kite (a bird) which can destroy a quadcopter in air. #IndianArmy #YUDHABHYAS22 pic.twitter.com/OByAwWuJop — Haresh 🇮🇳 (@HARESHRJADAV3) November 29, 2022 ఇదీ చదవండి: ప్రధాని మోదీని రావణుడితో పోల్చిన ఖర్గే.. బీజేపీ ఆగ్రహం

ఆధునిక యుగంలో మనిషి జీవితానికి, విద్యుత్‌కు ఉన్న అనుబంధం విడదీయలేనిది. క్షణం పాటు విద్యుత్‌ సరఫరా నిలిచిపోయినా.. భరించలేని పరిస్థితి. పదుల సంఖ్యలో విద్యుత్‌ ఉపకరణాలు లేని ఇల్లు ఉండదంటే అతిశయోక్తి కాదు. ఇంతటి ప్రాముఖ్యత ఉన్న విద్యుత్‌కు ప్రస్తుతం ప్రపంచవ్యాప్తంగా కొరత ఏర్పడుతోంది. బొగ్గు సంక్షోభం గతేడాది పలు దేశాలను చీకట్లోకి నెట్టేసింది. జల, సౌర, పవన, అణు, గ్యాస్‌ తదితర మార్గాల్లో విద్యుత్‌ ఉత్పత్తి చేస్తున్నా కూడా.. మనిషి అవసరాలకు సరిపోవడం లేదు. పెరుగుతున్న జనాభా, వారి అవసరాలకు అనుగుణంగా విద్యుత్‌ ఉత్పత్తిని భారీగా పెంచాల్సిన పరిస్థితి ఏర్పడింది. ఈ దిశగా ప్రపంచవ్యాప్తంగా పరిశోధనలు, ప్రయోగాలు జరుగుతున్నాయి. – సాక్షి, అమరావతి  స్కాట్లాండ్‌కు చెందిన రాడ్‌.. గాలిపటాలతో విద్యుత్‌ను పుట్టించే సరికొత్త టెక్నాలజీని కనిపెట్టారు. గాలిమరల ద్వారా విద్యుత్‌ తయారు చేస్తున్నప్పుడు.. గాలి పటాల ద్వారా ఎందుకు విద్యుత్‌ తయారు చేయకూడదని ప్రశ్నించుకున్న ఆయన.. ‘ఫ్లయింగ్‌ టర్బైన్‌’ టెక్నాలజీని ఆవిష్కరించారు. గాలి పటాలు ఎగురుతున్నప్పుడు విడుదలయ్యే శక్తిని కింద ఉండే గ్రౌండ్‌ స్టేషన్‌ విద్యుత్‌గా మారుస్తుంది. ఈ పద్ధతిలో చాలా తక్కువ కర్బన ఉద్గారాలు విడుదలవుతాయి. 10 కిలోమీటర్ల ఎత్తులోనూ గాలి పటాలు విద్యుత్‌ను జనరేట్‌ చేయగలవు. ఇవి నిరంతరం ఎగురుతూ ఉంటే ఒక ఇంటికి సరిపడే విద్యుత్‌ ఉత్పత్తి అవుతుంది. వ్యవసాయం, పరిశ్రమలు, చేపలు పట్టుకునే పడవలు, ఫ్యాక్టరీలు ఇలా అనేక చోట్ల ఈ విధానాన్ని ఉపయోగించుకోవచ్చు. క్లబ్‌లో కాళ్లు కదిపితే చాలు..  బ్రిటన్‌లోని ఒక నైట్‌ క్లబ్‌ సంస్థ.. తమ వద్దకు వచ్చి డ్యాన్స్‌ చేసే వారి శరీర ఉష్ణోగ్రతల ఆధారంగా విద్యుత్‌ తయారు చేస్తోంది. ఈ విద్యుత్‌ను అవసరమైనప్పుడు వాడుకునేలా.. భద్రపరుచుకునే ఏర్పాటు కూడా చేసింది. ఈ ఏడాది చివరి నాటికి పూర్తిస్థాయిలో విద్యుత్‌ ఉత్పత్తిని ప్రారంభిస్తామని నిర్వాహకులు తెలిపారు. దీని ద్వారా కాలుష్యాన్ని నియంత్రించి, వాతావరణ మార్పులను అరికట్టవచ్చని చెబుతున్నారు. అదేవిధంగా ఏపీలో ఇప్పటికే చెత్త నుంచి కరెంటు తయారు చేసే విధానాలకు శ్రీకారం చుట్టారు. అంతేకాకుండా మన రాష్ట్రంలో ప్రపంచంలోనే అతిపెద్దదైన నీటిలో తేలియాడే ఫ్లోటింగ్‌ సోలార్‌ ప్లాంట్‌ను ఏర్పాటు చేశారు. బొగ్గు కొరత నుంచి బయటపడటం కోసం బ్లూ హైడ్రోజన్‌ను జపాన్‌ ప్రత్యామ్నాయంగా భావిస్తోంది. జపాన్‌లోని టోక్యోలో బ్లూ హైడ్రోజన్‌ ఫ్యూయల్‌ సెల్‌తో వాహనాలు కూడా ప్రయోగాత్మకంగా నడిపారు. 

వర్చువల్‌ సమావేశాలు మరింత సౌకర్యవంతంగా నిర్వహించుకునేందుకు వీలుగా నూతన టెక్నాలజీని జూమ్‌ అందుబాటులోకి తేబోతుంది. విభిన్న ప్రాంతాలు, వేర్వేరు భాషలకు చెందిన ప్రజలు ఇబ్బంది లేకుండా మాట్లాడుకునే వెసులుబాటు కల్పిస్తోంది. ఇందుకు సంబంధించిన ఏర్పాట్లలో జూమ్‌ బిజీగా ఉంది.  మరింత సమర్థంగా మాట్లాడుతుండగానే ఒక భాషను అనువైన భాషలోకి తర్జుమా చేసి చెప్పే టెక్నాలజీతో దూసుకుపోతున్న జర్మనీకి చెందిన కైట్స్‌ సంస్థను జూమ్‌ టేకోవర్‌ చేసింది. కైట్స్‌కి సంబంధించిన సాంకేతికతను ఉపయోగించి వర్చువల్‌ మీటింగ్స్‌ మరింత సమర్థంగా ఉండేలా చూస్తామంటూ జూమ్‌ ప్రకటించింది. అంతేకాదు  కైట్స్‌కి చెందిన  ఇంజనీర్లు  మెషిన్‌ ట్రాన్స్‌లేషన్‌లో మరిన్ని నూతన ఆవిష్కరణలు చేస్తారని, అవి తమ యూజర్లకు మరింత సౌకర్యాన్ని అందిస్తాయని జూమ్‌ తెలిపింది. ఇప్పటికే ఉన్నా వర్చువల్‌ మీటింగ్‌లో విభిన్న భాషలు మాట్లాడేప్పుడు తర్జుమా చేసే ఫీచర్‌ను  ఈ ఏడాది ప్రారంభంలో  జూమ్‌ ప్రవేశపెట్టింది. అయితే మీటింగ్‌ జరిగేప్పుడు ఇతర శబ్ధాలు వినిపించినా, కొన్ని భాషలకు సంబంధించి స్థానిక యాసల్లో మాట్లాడినా, పదాలు పలికేప్పుడు స్పస్టత లోపించినా.... వాటిని అనువదించడంలో ఇబ్బందులు ఎదురవుతున్నా​యి. దీన్ని అధిగమించేందుకు మెషిన్‌ ట​‍్రాన్స్‌లేషన్‌లో మెరుగైన సంస్థగా ఉన్న కైట్స్‌ని జూమ్‌ టేకోవర్‌ చేసింది.    చదవండి : Incom Tax : జులై 1 నుంచి కొత్త టీడీఎస్‌ రూల్స్

కాన్పూర్‌(ఉత్తరప్రదేశ్‌): కరోనా వైరస్‌ వ్యాప్తి నేపథ్యంలో గాలిపటాలు ఎగరేయొద్దని ప్రజలకు పోలీసులకు విజ్ఞప్తి చేస్తున్నారు. కరోనా నివారణ చర్యల్లో భాగంగా దేశవ్యాప్తంగా లాక్‌డౌన్‌ అమలు చేస్తున్న నేపథ్యంలో ఇళ్లలో గడుపుతున్న జనంలో కొంతమంది కాలక్షేపానికి పతంగులు ఎగరవేస్తున్నారు. దీన్ని గుర్తించిన కాన్పూర్‌ పోలీసులు పతంగులు ఎగరేయొద్దని బాలీవుడ్‌ హిట్ పాటలతో ప్రజలకు విజ్ఞప్తి చేశారు. ‘గాలిపటాలు ఎగరవేయడం మానండి. మాట వినకుంటే జైలుకు వెళ్లడం ఖాయం’ అనే అర్థం వచ్చేలా పాటలతో కాన్పూర్‌ పోలీసులు ప్రచారం చేస్తున్నారు. పతంగులు ఎగరేయొద్దని పిల్లకు చెప్పాలని తల్లిదండ్రులకు సూచించారు. కేంద్ర వైద్యారోగ్య శాఖ తాజా గణాంకాల ప్రకారం ఉత్తరప్రదేశ్‌లో 1,868 కరోనా పాజిటివ్‌ కేసులు నమోదు కాగా, 29 మంది ప్రాణాలు కోల్పోయారు. కోవిడ్‌ సోకిన వారిలో 289 మంది కోలుకున్నారు. మరోవైపు దేశంలో కరోనా వైరస్‌ బారిన పడుతున్న వారి సంఖ్య నానాటికీ ఎగబాకుతోంది. దేశంలో పాజిటివ్‌ కేసుల సంఖ్య 27,892కు, మృతుల సంఖ్య 872కు చేరింది. కరోనా కట్టడికి అమలు చేస్తున్న లాక్‌డౌన్‌ను కేంద్రం పొడిగించే అవకాశాలున్నాయని వార్తలు వస్తున్నాయి. ఇదే జరిగితే ప్రజలు మరికొంత కాలం ఇళ్లకు పరిమితమయ్యే అవకాశాలు కన్పిస్తున్నాయి. చదవండి: కరోనా వైరస్‌.. మరో దుర్వార్త 

సాక్షి, సిటీబ్యూరో: పతంగులు అంటే సంక్రాంతి. సంక్రాంతి అంటే పతంగులు అన్నట్టుగా నగర జీవితం ముడిపడి ఉంది. తరతరాలుగా హైదరాబాద్‌ నగరంలో పతంగుల(గాలిపటాటు) తయారీ...పతంగులు ఎగురవేయడం ఇక్కడ ప్రత్యేకతగా చెప్పొచ్చు. ప్రాచీన సంప్రదాయం... హైదరాబాద్‌ నగరం ఏర్పడినప్పటి నుంచే(400 ఏళ్ల క్రితం) ఇక్కడ పతంగులు ఎగురవేసే సంస్కృతి ఉన్నట్లు చరిత్ర ద్వారా తెలుస్తోంది. కుతుబ్‌ షాహీల కాలం నుంచి ప్రతి ఏటా హేమంత రుతువులో నగరంలో పతంగుల పండుగ కొనసాగుతుంది.  ఇబ్రాహీం కులీకుతుబ్‌ షా హయాంలో గోల్కొండ కోటలో పతంగుల పండుగ అధికారికంగా జరిగేదట. ఆ రోజుల్లో కాగితాలతో చేసిన పతంగులు, మూలికలతో చేసిన మాంజాతో పోటీలు కూడా జరిగేవని చరిత్రకారులు తమ పుస్తకాల్లో రాశారు. కుతుబ్‌ షాహీల అనంతరం అసఫ్‌ జాహీల పాలనా కాలంలో హైదరాబాద్‌ ( పాతబస్తీలోని) మైదానాల్లో  పతంగుల పండుగ  ఘనంగా నిర్వహించే వారు. ఇక అరవ నిజాం మీర్‌ మహబూబ్‌ అలీ ఖాన్‌ పాలనా కాలంలో పతంగుల పండుగకు మరింత గుర్తింపు వచ్చింది. మైదానాల్లో పతంగుల పోటీలు నిర్వహించి ఎక్కువ పతంగులను పడగొట్టిన వారికి బహుమతులు కూడా ఇచ్చేవారు. 1985 వరకు పాతబస్తీలో ప్రతి ఏటా పతంగుల పోటీలు నిర్వహించారు. ఇప్పటికీ కొన్ని ప్రాంతాల్లో పోటీలు జరుగుతున్నాయి.. తగ్గుతున్న సందడి గత 10 ఏళ్లుగా పతంగుల హడావుడి తగ్గుతోంది. ఆధునిక పోకడలతో పిల్లల్లో పతంగులపై ఆసక్తి తగ్గింది. వీడియో గేమ్స్, కంప్యూటర్‌ గేమ్స్, నగరంలో మైదానాలు లేకపోవడం, పతంగులు ఎగురవేసే పద్ధతులు నేర్పించే వారు తక్కువవడం తదితర కారణాల చేత పిల్లలు ఆసక్తి చూపడంలేదు. ఎదో పండుగ రోజు కాసేపు పతంగులు ఎగుర వేసి మళ్లీ స్మార్ట్‌ గేమ్స్‌లో మునిగిపోతున్నారు. దీంతో తరతరాలుగా పతంగులు తయారు చేస్తున్న కుటుంబాలు చితికిపోతున్నాయి. సరైన ఉపాధి లేక ఇబ్బందులు పడుతున్నాయి. పతంగుల తయారీలో ఎక్కువ శాతం మహిళలు ఉండడంతో వారికి కూలీ కూడా పడడంలేదు. గతంలో సంక్రాంతి సీజన్‌లోనే కాకుండా వేసవి సెలవులు, ఇతర సీజన్‌లలో పతంగుల విక్రయాలు జోరుగా ఉండేవి. ప్రస్తుతం సంక్రాంతి సీజన్‌లో కూడా అమ్మకాలు లేక ఇబ్బందులు ఎదర్కొంటున్నామని తయారీదారులు వాపోయారు. నాలుగు తరాలుగా ఇదే వృత్తి   నాలుగు తరాలుగా ఇదే వ్యాపారంలో ఉన్నాం. అప్పటి నుంచి మా కుటుంబం పతంగుల తయారీపైనే ఆధారపడి ఉంది. ప్రసుత్తం పతంగుల వ్యాపారానికి ఆదరణ లేక తీవ్ర ఆర్థిక ఇబ్బందులు ఎదుర్కొంటున్నాం. గతంలో వందల సంఖ్యలో ఉన్న కుటుంబాలు నేడు పదుల సంఖ్యకు చేరుకున్నాయి. నెలల కొద్దీ చేసే పని ఇప్పుడు వారాల్లోకి వచ్చింది.– ముహ్మద్‌ సాబేర్, డబీర్‌పుర, పతంగుల తయారీదారు నాలుగు నెలల ముందు నుంచే తయారీ నిజాం కాలం నుంచి పతంగుల పండుగ ఉంది. సంక్రాంతికి నాలుగు నెలల ముందే పతంగుల తయారీ జరిగేది. యావత్తు తెలంగాణ జిల్లాలకు ఇక్కడి నుంచే సరఫరా అయ్యేవి. సంక్రాంతి సీజన్‌లో అప్పట్లో లక్షల్లో తయారు అయ్యేవి. ఇప్పుడు రానురాను ఆదరణ తగ్గుతోంది. తయారీ..వ్యాపారం కూడా బాగా పడిపోయింది.– భగవాన్‌ దాస్‌ బజాజ్, కాలికమాన్‌

సాక్షి, గుంటూరు: సంప్రదాయ క్రీడలకు ప్రతీక అయిన సంక్రాంతి సమయంలో ఏటా గాలిపటాలు ఎగురవేయడం ఆనవాయితీ. గతంలో గాలిపటాలను ఎగురవేసేందుకు నూలుతో తయారైన దారం (మాంజా) ఉపయోగించేవారు. దీనివల్ల ఎవరికీ.. ఎలాంటి గాయాలయ్యేవి కావు. ఇప్పుడు వీటి స్థానంలో రసాయనాలతో కూడిన చైనా మాంజా వాడకంతో తీవ్ర గాయాల పాలవుతున్న పాదచారులు, వాహన చోదకుల నిండు ప్రాణాలు గాల్లో కలుస్తున్నాయి. గాజు పిండి, ప్రమాదకరమైన రసాయనాలతో తయారు చేసే చైనా మాంజాను నేషనల్‌ గ్రీన్‌ ట్రిబ్యునల్‌ నిషేధించినా మార్కెట్‌లో విచ్చలవిడిగా లభ్యమవుతోంది.  కౌశిక్‌ మృతదేహం (ఫైల్‌)   యథేచ్ఛగా విక్రయాలు  చైనా మాంజాలపై నిషేధం ఉన్నప్పటికీ మార్కెట్‌లో విచ్చలవిడిగా లభిస్తోంది. ఇతర గాలిపటాలను చైనా మాంజాతో సులువుగా తెంపవచ్చనే ఉద్దేశంతో ఎక్కువ మంది దీనిపట్ల మొగ్గు చూపుతున్నారు. గాలి పటాలు ఎగిరే సమయంలో ఈ మాంజా విద్యుత్‌ తీగలు, వృక్షాలకు చిక్కుకుని పక్షులు మృత్యువాత పడుతున్నాయి. వీటి మనుగడకు పెనుముప్పుగా మారిన చైనా మాంజా వినియోగాన్ని పక్షి ప్రేమికులు, పర్యావరణవేత్తలు తీవ్రంగా వ్యతిరేకిస్తున్నారు. గాలిపటాలను నియంత్రించే క్రమంలో ఒక్కోసారి ఎగురవేసే వ్యక్తులు కూడా గాయాల పాలవుతున్నారు.  - గుంటూరులో సోమవారం తండ్రితో కలసి బైక్‌పై వెళ్తున్న మూడేళ్ల చిన్నారి కౌశిక్‌ మెడకు చైనా మాంజా చుట్టుకోవడంతో తీవ్ర రక్తస్రావమై మృతి చెందడం తీవ్ర విషాదాన్ని నింపింది.   - గత ఏడాది ఆగస్టులో ఢిల్లీలో చైనా మాంజా గొంతుకు చుట్టుకుని మానవ్‌ శర్మ (28) అనే యువకుడు మృత్యువాత పడ్డాడు.   - 2018లో చైనా మాంజా కారణంగా గుజరాత్‌లో 16 మంది మరణించడంతో కైట్‌ ఫెస్టివల్‌తో పాటు ఈ మాంజా వాడకాన్ని నిషేధించారు.  చట్టం ఏం చెబుతోందంటే..  రసాయనాలు పూసిన చైనా మాంజాతో పక్షులు, మనుషులకు ముప్పు వాటిల్లుతోంది. 2016 మార్చి 4న ఏపీ ప్రభుత్వం, 2016 జనవరిæ 13న తెలంగాణ సర్కారు వీటి విక్రయాలను నిషేధించాయి. పర్యావరణ పరిరక్షణ చట్టం 1986 ప్రకారం చైనా మాంజాను అమ్మటం, కొనుగోలు చేయడం నేరం. దీన్ని ఉల్లంఘించే వారికి ఐదేళ్లు, అంతకుమించి జైలు శిక్ష, రూ.లక్ష జరిమానా విధిస్తారు. జంతువులు, పక్షులకు హాని కలిగిస్తే వన్యప్రాణి సంరక్షణ చట్టం ప్రకారం మూడు నుంచి ఏడేళ్ల వరకు జైలు శిక్ష, రూ.10 వేల జరిమానా విధిస్తారు.   చైనా మాంజా తయారీ ఇలా..  దారానికి గాజు పిండి, సగ్గు బియ్యం, గంధకం, రంగులు అద్ది ఉడికించి చైనా మాంజా తయారు చేస్తారు. తమిళనాడులోని ఆరంబాకం, చెన్నైలోని ప్యారిస్, మౌంట్‌రోడ్డు మొదలైన ప్రాంతాల్లో చైనా మాంజా ఎక్కువగా తయారు చేస్తుంటారు. అక్కడి నుంచి ఏపీలోని పలు జిల్లాలకు సరఫరా అవుతుంది. తమిళనాడు సరిహద్దులో ఉన్న నెల్లూరు జిల్లాలోని తడ, సూళ్లూరుపేట, గుంటూరు నగరంలోని పట్నంబజార్, లాలాపేటలో కూడా చైనా మంజా తయారు చేస్తారు. రాష్ట్రంలోని కర్నూలు చిత్తూరు, కృష్ణా సహా పలు జిల్లాల్లో కుటీర పరిశ్రమగా చైనా మాంజా తయారీ నడుస్తోంది.   మనుగడకు ముప్పు  చైనా మాంజాతో గాలిపటాలను ఎగురవేయడం వల్ల పక్షులు, జంతువులకే కాకుండా మనుషులకు కూడా ముప్పు వాటిల్లుతోంది. చైనా మాంజా వాడకాన్ని పూర్తిగా నిషేధించాలి. నూలు దారంతో గాలిపటాలు ఎగురవేయడం వల్ల ఇలాంటి ప్రమాదాలు జరగవు  –తేజోవంత్, కార్యదర్శి, హెల్ప్‌ ఫర్‌ యానిమల్స్‌ సొసైటీ     ప్రజల్లో చైతన్యం రావాలి  ప్రాణాలు హరిస్తున్న చైనా మాంజాను ఎవరూ వినియోగించకూడదు. జీవోలకే పరిమితం అయిన నిషే«ధాన్ని ప్రభుత్వాలు అమలు చేసి చూపించాలి. ప్రజల్లో చైతన్యం రావాలి. చైనా మాంజాను స్వచ్ఛందంగా నిరాకరించాలి  – గోపాల్‌ సూరాబత్తుల, వ్యవస్థాపక కార్యదర్శి, యానిమల్‌ రెస్క్యూ ఆర్గనైజేషన్‌    ఇక కఠిన చర్యలు  చైనా మాంజా మెడకు చుట్టుకుని మూడేళ్ల బాలుడు మృతి చెందడం అందరినీ కలచి వేసింది. చైనా మాంజాను రాష్ట్ర ప్రభుత్వం నిషేధించింది. ఇకపై ఎవరైనా దీన్ని కొనుగోలు చేసినా, అమ్మినా, వినియోగించినా కఠిన చర్యలు తీసుకుంటాం. పోలీసులను సైతం అప్రమత్తం చేస్తాం. చైనా మాంజా విక్రయించే వ్యాపారులపై కేసులు నమోదు చేస్తాం  – ఐ.శామ్యూల్‌ ఆనంద్‌కుమార్, కలెక్టర్, గుంటూరు 

జెరూసలేం : ఇజ్రాయిల్‌ ప్రజలు గాలి పటాలను చూస్తే భయపడి పోతున్నారు. గాల్లో ఎగిరే గాలి పటాలు ఎక్కడ కనిపించినా వాటికి దూరంగా పరిగెడుతున్నారు. గాలి పటాలు చక్కగా ఎగరేయాలి గానీ భయపడటం దేనికి? అనుకుంటున్నారా. అవి మామూలు గాలి పటాలు కాదు మరి.. అడవులను, ఊర్లను తగలపెట్టే నిప్పు పటాలు. అసలు సంగతేంటంటే.. పాలస్తీనా, ఇజ్రాయెల్‌ దేశాల మధ్య గొడవలు జరుగుతున్న విషయం తెలిసిందే. మామూలుగా ఈ రెండు దేశాలు బాంబులతో, మిసైల్‌లతో, పెద్ద పెద్ద గన్నులతో దాడులు చేసుకునేవి.  కానీ పాలస్తీనాకు ఇప్పుడు వినూత్నంగా గాలి పటాలను రంగంలోకి దింపింది. చిన్న, భారీ సైజులో ఉండే ఈ గాలి పటాల తోకల చివర నిప్పుపెట్టి ఇజ్రాయెల్‌ దేశంలోకి ఎగరేసింది. అంతే అలా ఆ గాలి పటాలు అడవులను, ఊర్లను తగుల బెట్టుకుంటూ పోయాయి. గాలి పటాల వల్ల అటవీ ప్రాంతాలు, ఊర్లు తగలబడటం వల్ల దేశ ప్రజలు తీవ్ర ఇబ్బందుల పాలయ్యారు. కేవలం గాలి పటాలనే కాదు బెలూన్లను సైతం ఇజ్రాయెల్‌ దేశంలోకి వదిలింది పాలస్తీనా. వీటి కారణంగా శనివారం ఒక్క రోజే పది చోట్ల భారీగా మంటలు చెలరేగాయి. దీంతో విసిగిపోయిన ఇజ్రాయెల్‌ ఈ దాడులకు ప్రతిగా పాలస్తీనా ప్రధాన నాయకుడి కారును పేల్చిసింది.    

తండ్రీ కొడుకులు మేడపైకి ఎక్కి గాలిపటం ఎగరేస్తున్నారు. గాలిపటాన్ని ఎలా ఎగరేయాలో తండ్రి పిల్లవాడికి నేర్పిస్తున్నాడు. గాలిపటం బాగా ఎత్తుకు వెళ్లాక, దారాన్ని కొడుకు చేతికి అందించాడు తండ్రి. కొడుకు ముఖం సంతోషంతో వెలిగిపోయింది. ఆ వెలుగులో తండ్రి మనసు ఉప్పొంగిపోయింది. కొంతసేపు దారాన్ని చేత్తో పట్టుకున్నాక కొడుకు తండ్రిని అడిగాడు.  ‘‘నాన్నా.. దారంతో పట్టి ఉంచితేనే గాలిపటం అంత ఎత్తుకి ఎగిరిందే! దారాన్ని తెంపేస్తే ఇంకా ఎత్తుకు ఎగిరిపోతుంది కదా’’ అన్నాడు.  తండ్రి నవ్వాడు. ‘‘దారాన్ని తెంపేద్దామా మరి?’’ అని అడిగాడు.  ‘‘లె ంపేద్దాం నాన్నా..’’ అన్నాడు కొడుకు ఎంతో ఉత్సాహంగా. ఇద్దరూ కలిసి దారాన్ని తెంపేశారు. ‘టప్‌’మని దారం తెగిపోగానే గాలిపటం ఇంకా పైకి ఎగిరిపోయింది. అంతలోనే దారి తప్పి అటూ ఇటూ కొట్టుకుంటూ కిందికి పడిపోవడం మొదలుపెట్టింది! చివరికి ఎవరి మేడ మీదనో కూలిపోయింది. ‘‘ఇలా జరిగింది ఏంటి నాన్నా’’ అన్నాడు కొడుకు విచారంగా.  దారం తెంపేస్తే గాలిపటం ఇంకా ఇంకా పైకి పోతుందనుకుంటే, కిందికొచ్చి పడిపోవడం ఆ పిల్లాyì కి నిరుత్సాహం కలిగించింది.  తండ్రివైపు బిక్కమొహం వేసుకుని చూశాడు.  కొడుకును దగ్గరికి తీసుకున్నాడు తండ్రి.  ‘‘గాలిపటానికి దారం ఉండేది, దానిని ఎగిరిపోనీయకుండా పట్టి ఉంచేందుకు కాదు. గాలి ఎక్కువైనా, తక్కువైనా గాలిపటం తట్టుకుని నిలబడి, ఇంకా ఇంకా పైపైకి ఎగిరేలా చేసేందుకే’’ అని చెప్పాడు. మరో గాలిపటానికి దారం కట్టి ఎగరేసి కొడుకు చేతికి దారం అందించాడు.  జీవితంలో కూడా మనకు కొన్నిసార్లు అనిపిస్తుంటుంది. కుటుంబం అనే బంధం లేకపోయి ఉంటే మనం ఇంకా ఏదో సాధించి ఉండేవాళ్లం అని! నిజానికి కుటుంబం అందించిన ప్రేమ, సేవ, సౌకర్యాల వల్లనే మనం ఈ మాత్రమైనా నిలబడి ఉన్నామని గ్రహించాలి. కుటుంబం మనల్ని పట్టుకుని లేదు. పట్టుకుని ఉందనుకుని వదిలించుకునే ప్రయత్నం చేస్తే మనమే పట్టుతప్పిపోతాం. తెగిపోయిన గాలిపటంలా గింగిరాలు తిరుగుతూ ఎక్కడో పడిపోతాం. 


 హైదరాబాద్‌: గండిపేట చెరువు పరిసరాల్లో గాలిపటాల ఎగురవేతను పోలీసులు నిషేధించారు. ప్లాస్టిక్, రసాయనిక రంగులు కలిగిన పతంగులు, మాంజా (దారం) కారణంగా గండిపేట ప్రాంతంలోని జీవవైవిధ్యం దెబ్బతింటోందని శుక్రవారం విడుదల చేసిన ఓ ప్రకటనలో తెలిపారు. అంతేకాకుండా, వీటివల్ల గండిపేట చెరువు నీరు కలుషితమవుతోందని కమిషనరేట్‌ తెలిపింది. గండిపేట ప్రాంతానికి వలస వచ్చే అరుదైన పక్షులను రక్షించుకుందామని పిలుపునిచ్చింది.
 
 పతంగులు ఎగురవేసేందుకు వచ్చేవారు అదనంగా తీసుకువచ్చే ప్లాస్టిక్ బ్యాగులలో ఆహార పదార్థాలు, ప్లాస్టిక్ వాటర్ బాటిళ్లు, వాటర్ బ్యాగ్‌లను అక్కడే వదిలివేస్తున్నారని తెలిపింది. వీటితో పాటు మద్యం తాగి ఆ బాటిళ్లను పగులగొట్టడం, అక్కడే వదిలిపెట్టి వెళ్లిపోవడంతో అపరిశుభ్ర వాతావరణం ఏర్పడుతోందని వివరించింది. పర్యావరణం కలుషితమవుతోందని, అందుకే గండిపేట చెరువు (ఉస్మాన్ సాగర్) పరిసర ప్రాంతాలలో గాలిపటాలు ఎగురవేత పూర్తిగా నిషేధించినట్లు కమిషనరేట్‌ తెలిపింది.


 ► మొదలైన సంక్రాంతి సందడి  
 ► మార్కెట్లో రకరకాల గాలిపటాలు 
 ►చిన్నారుల్లో అంతులేని ఆనందం
 
 ఆదిలాబాద్‌ కల్చరల్‌: వానాకాలంలో ఆకాశంలో రంగురంగుల ఇంద్రధనస్సు దర్శనమిచ్చే సందర్భాలను మనం అప్పుడప్పుడు చూస్తుంటాం. అందులోని ఏడు రంగులను చూసి ఎంతో మురిసిపోతాం. అదే సంక్రాంతి పండుగకు మాత్రం వానతో సంబంధం లేకుండానే ఎన్నో రకాల రంగులతో, విభన్న ఆకారంలో ఆకట్టుకునే విధంగా విభిన్న ఆకృతులతో తయారు చేసినపతంగులు ఆకాశంలో దర్శనమిస్తున్నాయి. సంక్రాతి పర్వదినం మూడు రోజుల ముచ్చటైన పండగకు చిన్న పెద్దలు అందరు ఆనందోత్సహాలతో పతంగులను ఎగురవేస్తూ నిత్యజీవితంలో ఆనందాన్ని పోందుతుంటారు. ఈ పతంగులను ఎగురవేస్తూ జాగ్రత్తగా వ్యహరిస్తూ మధుర జ్ఞాపకాలు జీవితంలో ఉంటాయి.
 
 పతంగుల కథాకమామీషు..
 పతంగుల పండగ నిజాం కాలంలో గోప్ప ఆదరణపొందింది . దీని పుట్టుక ఆసక్తికరమే. సముద్ర తీర ప్రాంతాలు, మైదానాలు , ఎడారుల్లో గాలి తీవ్రతనువాటాన్ని తెలుసుకునేందుకుఆ రజుల్లో తేలికపాటి వస్తువులను గాలిలో ఎగురవేసేవారు. అవే పతంగుల పుట్టకకు కారణమయ్యాయని చెబుతుంటారు. రాజస్థాన్ లోని అల్వర్‌కు చెందిన మౌజీ 1872 లో మొట్టమొదటి సారిగా పిల్లల సరదా కొసం పతంగాన్ని ఎగురవేసనట్లుచెబుతుంటారు. అలా ఉత్తరాదిలో పుట్టిన పతంగి దక్షిణాది  సంస్కృతిలోభాగమైపోయిందనే కథనం ఉంది. నిజాం కాలంలోపతంగుల పోటీలను కుల, మతాలకతీతంగా నిర్వమించడం వల్ల అన్ని ప్రాంతాలోల  పతంగులను ఎగురవేయడం ప్రారంభం కాగా, ఇప్పటికి ప్రతి ఒక్కరూ పతంగులను ఎగురవేస్తున్నారు.
 
 విభిన్నరకాలుగా..
 సంక్రాంతి అంటేముగ్గులు, గొబ్బిళ్లు, హరిదాసుల కీర్తనలు, గంగిరెద్దుల విన్యాసాలు ఉండగా, వీటితోపాటు మరో ముఖ్యమైనది పతంగులు. సంక్రాంతి పేరుచెప్పగానే ఠక్కున చిన్నారులకు గుర్తుకోచ్చేది పతంగులే. నింగిలో రంగురంగుల గాలిపటాలు ఆకాశవీధిలో విన్యాసాలు చేస్తుంటే చిన్నారులతో పాటు పెద్దలకు కూడా ఆనందోత్సహంలో ముచ్చెత్తుతుంది. సినీహీరోలు, సీఎం, పీఎం ,పక్షలు, సీతాకోకచిలుకలు. కార్టూన్ బోమ్మలు, చోటాభీమ్‌ వంటి విభిన్న రకాల గాలిపటాలు అందుబాటులో ఉన్నాయి. కళాకారులు తమకళాత్మకంగా తయారుచేయడంతో ఈ గాలిపటాలు మైదానాలలో హరివిల్లుల అగుపిస్తున్నాయి.
 
 మాంజా స్థానంలో తంగూన్ ..
 పతంగులను ఎగురవెసేందుకు వినియోగించే మాంజా ఇప్పుడు లబించడం లేదు. చైనా నుంచి టన్నుల కొద్ది దిగుమతి అవుత్ను తంగూన్ (సన్నటి వైరు), మాజానుకబలించింది.  ఆ రోజుల్లో మాంజా తయారు చేయడం ఒక కళ. ఇందుకోసం గ్రామాల్లో ప్రత్యేకంగా కొంతమంది సంక్రాంతి పండగ సమయంలో దీనిని తయారు చేసేవారు. అన్నం మెత్తగా రుబ్బి, దానికి బెండకాయరసం, గుడ్డు, సీసం, రంగులు కలిపి దారానికి రుద్దేవాళ్లు. పదినిమిషాలు ఆరబెడిత  మాం జా తయారయ్యేది. ఇది మెత్తగా పతంగులను ఎగురేసెందుకు అనుకూలంగా ఉండేది. తంగూన్ తో తరుచూ చేతులకు గాయాలవుతున్నట్లు చిన్నారులు చెబుతున్నారు.
 
 అందుబాటు ధరల్లో
 పతంగులు పరిమాణం, నాణ్యత, రంగులను బట్టి ధరలు ఉన్నాయి. ప్రత్యేకగా వస్రా్తలతో తయారుచేసిన పతంగుల ధరలు అత్యధికంగా వందల్లో ధర ఉండగా , ప్లాస్టిక్‌తోచేసిన పతంగులు రూ. 5 నుంచి మొదలుకుని రూ. 100 వరకు లభ్యమవుతున్నాయి. వీటితో పాటు ప్లాస్టిక్‌ దారం.ప్రత్యేకంగా తయారు చేసిన మాంజాదారం మీటర్ల ధరలతో విక్రయిస్తున్నారు.  రూ. 10 నుంచి 300 వరకు మాంజధారాలు లభిస్తున్నాయి.
 
 జాగ్రత్త తప్పని సరి..
 ►  గాలిపటాలను వీలైనంత  మైదానాల్లోనే ఎగురవేయాలి
 ►  మేడలపైన, చెట్ల పైన,  ఓవర్‌హెడ్‌ట్యాంకుల పై నుంచి ఎగురవేయ వద్దు
 ►  పిట్టగోడలు లేని  మేడల పైకి పతంగులు ఎగురవేయడం శ్రేయస్కరం కాదు.
 ► చెట్లపై చిక్కుకున్న పతంగులను తీయాలనే ప్రయత్న చేయవద్దు, కోమ్మలకు వేలాడుతూ పతంగులను తీయకూడదు.
 ► రైలు పట్టాల సమీపంలో ఎట్టి పరిస్థితుల్లోనూ పతంగిని ఎగురవేయవద్దు
 ►  బస్సులు, లారీలు వెళ్లే ప్రదాన మార్గాల్లో కూడా గాలిపటాలు ఎగరువేయ వద్దు.
 ►  చైనా మాజాను వినియోగించవద్దు.దాంతో పక్షలకు ప్రాణాలకు ప్రమాదం. ప్రభుత్వం ఆ మాంజాలను నిషేదించింది.
 ► విద్యుత్‌ వైర్లకు అతుకున్న పతంగులను తీయడానికి ప్రయత్నం చేయవద్దు
 ► పిల్లలు పతంగులు ఎగురవేసేప్రాంతాలను తల్లిదండ్రులు జాగ్రత్తగా పరిశీలించాలి. గుంతలు , చెరువుకట్టలు, కాలువ కట్టల వద్దకు వెళ్లనివ్వకుండా చూడాలి.
 ► దారం తెగిపోయి గాలిలో ఎగిరిపోతున్న పతంపగిని పట్టుకోవాలని వీధుల్లో, రహదారిమీద  పరుగులు తీయవద్దు.  దీని వల్ల వాహానాలు ఢీకొని ప్రమాదాలకు గురయ్యే అవకాశం ఉంది.
  


 చార్మినార్‌: పెద్ద నోట్ల రద్దుతో పాటు చిల్లర సమస్యలు తలెత్తడంతో పాతబస్తీలో పతంగుల వ్యాపారం కుంటుపడింది. ప్రతి ఏటా డిసెంబర్‌–జనవరి సీజన్ లో పాతబస్తీలో పతంగుల కొనుగోళ్లు జోరుగా సాగుతాయి. కానీ ఈసారి పెద్ద నోట్ల రద్దు, చిల్లర సమస్య కారణంగా కొనుగోళ్లు భారీగా పడిపోయాయి. పాతబస్తీలోని గుల్జార్‌హౌజ్‌లో ఏటా దాదాపు ఐదు వేల దుకాణాల్లో పతంగుల సామాగ్రిని విక్రయిస్తారు. రోజూ లక్షల్లో వ్యాపారం జరుగుతుంటుంది. తెలంగాణలోని అన్ని జిల్లాలతో పాటు విజయవాడ, విశాఖపట్నం, గుంటూరు, నెల్లూరు, కర్నూలు తదితర ప్రాంతాల నుంచి రిటైల్‌ వ్యాపారులు కూడా ఇక్కడికి వస్తారు. కానీ ఈసారి ఆ సందడే కన్పించడం లేదు. మరోవైపు చైనా మాంజను నిషేధించడం కూడా కొనుగోళ్లపై ప్రభావం చూపుతోంది.
 
 
  


 ఎన్జీటీలో పెటా పిటిషన్
 న్యూఢిల్లీ: గాలిపటాలను ఎగురవేసేందుకు గాజుపూత పూసిన మాంజాను వినియోగించడంపై నిషేధం విధించాలని కోరుతూ జీవకారుణ్య సంస్థ-పెటా జాతీయ హరిత ధర్మాసనానికి(ఎన్జీటీ) ఫిర్యాదు చేసింది. ప్రత్యేకించి చైనా నుంచి భారీగా దిగుమతి అవుతున్న గాజుపూత పూసిన మాంజా వల్ల పక్షులతోపాటు మనుషులు కూడా గాయపడడం, ఒక్కోసారి ప్రాణాలు కూడా కోల్పోతున్నారని పిటిషన్‌లో పేర్కొంది. కాటన్ దారాలకు బదులుగా నైలాన్ దారాలను వాడుతున్నారని, అవి ఎంతకూ తెగకపోవడం, వాటికి అడ్డొచ్చిన పక్షులు, మనుషులు గాయపడడం వంటి సంఘటనలు ఏటా జరుగుతూనే ఉన్నాయని తెలిపింది.
 
 ఇక దేశీయంగా మాంజాను తయారుచేస్తున్న పరిశ్రమల నుంచి వెలువడుతున్న హానికారక రసాయనాలవల్ల పిల్లలకు శ్వాసకోశ వ్యాధులు వస్తున్నాయని ఫిర్యాదులో పేర్కొంది. అలహాబాద్ హైకోర్టు ఇచ్చిన తీర్పుతో ఉత్తరప్రదేశ్ అంతటా గతేడాది నుంచి చైనా మాంజాను నిషేధించారని తెలిపిన పెటా... దేశవ్యాప్తంగా నిషేధాన్ని అమలు చేసేలా ఆదేశాలు జారీ చేయాలని పిటిషన్‌లో అభ్యర్థించింది.


 హైదరాబాద్‌:  సంక్రాంతి పండుగ సందర్భంగా తెలంగాణ ప్రభుత్వం ఓ కీలక నిర్ణయం తీసుకుంది. పండుగ సందర్భంగా ఎగరవేసే గాలిపటాల కోసం ఉపయోగించే చైనా మాంజాను, గ్లాజు పూత మాంజాను నిషేధిస్తూ బుధవారం ఉత్తర్వులు జారీచేసింది. చైనా మాంజా (నైలాన్ దారం), గాజుపూత మాంజాను అమ్మడం, కలిగి ఉండటం, గాలిపటాలు ఎగరవేసేందుకు వినియోగించడం నిషేధిస్తున్నట్టు ఉత్తర్వుల్లో పేర్కొంది.
 
 సాధారణంగా సంక్రాంతి పడుంగ అనగానే ఆకాశం రంగురంగుల పతంగులతో సరికొత్త హరివిల్లులా దర్శనమిస్తుంది. గాలిపటాల హోరాహోరీ పోట్లాటతో రణరంగాన్ని తలపిస్తుంది. అయితే తమ గాలిపటం తెగిపోకుండా ఎదుటివారి పతంగులకు పేంచి వేసేందుకు ఈ మధ్య చాలామంది చైనా మాంజాను వాడుతున్నారు. దీనివల్ల పావురాలు, పిట్టలు, గద్దలు.. ఇలా పక్షులన్నీ గాయాలపాలవుతున్నాయి. కొన్ని సందర్భాల్లో మృత్యువాత పడుతున్నాయి. ఈ మాంజా వల్ల మనుష్యులు కూడా గాయాలపాలవుతున్నారు. ఈ నైలాన్ దారం వల్ల మనుషులకు, పక్షులకు హాని జరుగడమే కాకుండా ఇది భూమిలో, నీటిలో తొందరంగా కలిసిపోకపోవడం వల్ల పర్యావరణానికి కూడా తీవ్ర నష్టం వాటిల్లుతోంది. పక్షులపై ప్రేమ, సానుభూతి గల ప్రజలు సైతం గాలిపటాలు ఎగరేసేందుకు చైనీస్‌ మాంజాను ఎట్టిపరిస్థితుల్లో ఉపయోగించకూడదని, మాములు దారంతోనే గాలిపటాలను ఎగరవేసి మన ఆనందాన్ని పక్షులకు కూడా పంచాలని జంతు ప్రేమికులు కోరుతున్నారు.


 జోగిపేట: సంక్రాంతి అంటే చిన్న పిల్లలకు గుర్తొచ్చేది గాలిపటాలే! చిన్నాపెద్ద, మహిళలనే తేడాలేకుండా అందరూ పండగ వేళ పతంగులు ఎగరవేస్తుంటారు. భవనాలపై నిలబడి కుటుంబ సభ్యులతో, స్నేహితులకు కలిసి సంతోషాన్ని పంచుకుంటారు. ఈ నేపథ్యంలో జోగిపేటలో పెద్ద ఎత్తున గాలిపటాలు, చరఖా, దారం, మాంజాల విక్రయాలు జరుగుతున్నాయి. చుట్టుప్రక్కల ప్రాంతాలైన అల్లాదుర్గం, రేగోడ్, టేక్మాల్, పుల్కల్, కౌడిపల్లి, హత్నూర ప్రాంతాల నుంచి కూడా యువకులు ఇక్కడికి వచ్చి పతంగులు కొనుగోలు చేస్తున్నారు. ఈసారి ధరలు ఎక్కువగా ఉన్నట్టు పలువురు తెలిపారు.
  
 ఈ సంవత్సరం హీరో ప్రభాస్ నటించిన బాహుబలి సినిమా బొమ్మలతో గాలిపటాలు ఎక్కువగా వచ్చాయి. వీటితో పాటు డోలక్‌పూర్, బెన్‌టెన్ గాలిపటాలు ఆకట్టుకుంటున్నాయి. రూ.2 నుంచి రూ.20 వరకు విక్రయిస్తున్నారు. పతంగులు ఎగరవేయడానికి దారంతో పాటు మాంజాలు కూడా ఉపయోగిస్తారు. చరఖా రూ.750 చొప్పున విక్రయిస్తున్నారు. మద్యం బాటిల్ మాదిరి డబ్బాలలో చరఖా పెట్టి విక్రయిస్తున్నారు.


 హ్యూమర్ ప్లస్
  
 పతంగులను ఎగరేయడానికి మించిన పర్సనాలిటీ డెవలప్‌మెంట్ పాఠాలు లేవు. ‘గాలిపటాలు - వ్యక్తిత్వ వికాసం’ అనే అంశమ్మీద గాలీపులాక న్యాయంగా ఒక పరిశీలన చేద్దాం. దాన్ని ఎగరేసేవాడు ఎంతో ఓపికనూ, ఒడుపునూ అభ్యసించాలి. చెట్టుకు గాలిపటం చిక్కుకుంటే... దాన్ని మళ్లీ జేజిక్కించుకోడానికి మనం దారంతో చేసే విన్యాసాలన్నీ... భవిష్యత్తులో ఏదైనా అంశం మీద చేయాల్సిన చర్చల గురించి చెబుతాయి. బేరసారాలు నెరపడానికి కావాల్సిన కౌశలాన్ని నేర్పుతాయి. ఇక చేతికి రాదని తెలిశాక... వీలైనంత తక్కువ దారాన్ని నష్టపోతూ విషయాన్ని  ‘తెగగొట్టడం’ ఎలాగో తెల్పుతాయి గాలిపటాలు.
 
 గాలిపటాలతో లడాయి పెట్టడాన్ని ‘పేచీ’ అంటారన్నది చాలామందికి తెలిసిందే. దాంట్లో ఎన్నో వ్యూహాలుంటాయి. ఉదాహరణకు లడాయి తప్పనప్పుడు పటాన్ని పైనుంచి వచ్చేలా చేసి...  దారాన్ని ధారాళంగా వదలడాన్ని ఢీల్ వదలడం అంటారు. కింది వైపు నుంచి దారాన్ని తీసుకొని దారాన్ని వేగంగా లాగడాన్ని ఖీంచ్‌కాట్ అంటారు. మనం ఏదైనా విషయాన్ని తేలిగ్గా వదిలేయాలా అన్నది ‘ఢీల్’ వ్యూహం. పట్టు పట్టి కట్ చేయాలా అన్నది ఖీంచ్‌కాట్ ఎత్తుగడ. ఈ ప్రణాళికా రచనా పద్ధతులను చిన్నప్పుడే నేర్పేది పతంగుల యుద్ధం. అంటే వ్యూహాలూ, ఎత్తుగడలూ లాంటివన్నీ మనకు గాలితో పెట్టిన విద్య అవుతాయి. గాలిపడగతో లడాయి చేసే ఈ యుద్ధంలో మన ప్రత్యర్థితో తలపడే సమయంలోనే మన చెరఖ్ పట్టుకుని ఉండే తోడు కూడా ఉండాలని పటం పాఠాలు పేర్కొంటాయి.  
  
 గెలుపు లక్ష్యాన్ని మనమే ఛేదించాల్సి ఉన్నా... మన పక్షం వహించేందుకు ఆ తోడు తోడ్పడుతుందన్నది మనం నేర్చుకునే పాఠం. ఈ తోడు జీవిత భాగస్వామి కూడా కావచ్చు. చెరఖా పట్టినంత మాత్రాన పక్కవారిని మనకు గొడుగు పట్టే వారిగా చూడకూడదు. మన అడుగులకు మడుగులొత్తేవారుగా పరిగణించకూడదు. హీరో పక్కన ఉండే హీరోయిన్‌లాగానో లేదా హీరోయిన్ ఓరియెంటెడ్ ఫిల్మ్‌లో హీరోలాగానో లేదా కమెడియన్‌లాగానో తేలికగా చూడకూడదు. జీవితాంతపు తోడు అయితే నరకాసుర యుద్ధంలో సత్యభామ అనుకోవచ్చు. అదే జీవనకురుక్షేత్రంలోనైతే అర్జునుడి పాలిటి నారాయణుడని అనుకోవచ్చు. వాడు ఫ్లూటుకు బదులు చెరఖాను ధరించి ఉంటాడు. పింఛం లేని పామర పార్థసారథిలా అనునిత్యం తోడుంటాడు. పేచీలో ప్రత్యక్షంగా పాలుపంచుకోకుండా సలహాలిస్తుంటాడు. యుద్ధం గెలవడంలో తోడ్పడుతుంటాడు. జీవన భాగస్వామిని లేదా మిత్రులనూ మన  సాన్నిహిత సహచరులనుకుంటే... వాళ్లు మన గెలుపు వాళ్ల గెలుపులా ఫీలవుతుంటారు. మన విజయాన్నీ వాళ్లూ ఓన్ చేసుకుంటారు. అదే గనక జరగకపోతే పతంగులు ఎరగేసేవాడే ‘కటీ పతంగ్’ అవుతాడు. అనగా తెగిన గాలిపటమై, తూలుతూ కిందికి పడిపోతాడు.
  ఇక కోటికి పడగెత్తడం అనే మాట ఎలాగూ ఉంది. కోటి సంపాదించలేకపోతే గాలిపడగ ఎగరేస్తే గాలికి పడగెత్తినట్లే కదా. ఇలా ఆలోచిస్తూ సంపదలు సమకూర్చుకోకపోయినా పర్లేదు. కేవలం గాలిపటాలు ఎగరేస్తే చాలు. ఈ జీవనసారం అంతా నింగియే హద్దుగా ఎగిరే  గాలిపటం చేస్తున్న హితబోధ! ఆకాశంలోంచి చెరఖా వరకు కనిపించే దారపు ‘గీత’ బోధ!!
  - యాసీన్
  


 అటవీ శాఖ ప్రధాన ముఖ్యసంరక్షణాధికారి పీకే శర్మ
  
  సాక్షి, హైదరాబాద్: గాలిపటాలను ఎగురవేయడంలో చైనీస్ మాంజా (నైలాన్ మాంజా)ను వాడటం వల్ల జీవ హానితోపాటు, పర్యావరణ కాలుష్యం కూడా పెరుగుతోందని అటవీ శాఖ ప్రధాన ముఖ్యసంరక్షణాధికారి (పీసీసీఎఫ్) పీకే శర్మ అన్నారు. ఈ నష్టాన్ని దృష్టిలో పెట్టుకుని నైలాన్ మాంజా వినియోగంపై నిషేధం విధించాలని ప్రభుత్వానికి లేఖ రాశామని, త్వరలో సానుకూల నిర్ణయం వెలువడే అవకాశం ఉందన్నారు. నైలాన్ మాంజాతో పక్షుల రెక్కలు తెగడం, తీవ్రంగా గాయపడి ప్రాణాలు కోల్పోవడం జరుగుతోందన్నారు. దారాల్లో చిక్కుకుని మోటారు సైక్లిస్టులు, చిన్నారులు గాయపడిన సందర్భాలు కూడా ఉన్నాయన్నారు.
 
 అందువల్ల దారంతో చేసిన మాంజాలను వినియోగించాలని కోరారు. సమావేశంలో తెలంగాణ జీవ ైవె విధ్య మండలి సభ్య కార్యదర్శి సువర్ణ, చీఫ్ వైల్డ్ లైఫ్ వార్డెన్ ఏకే శ్రీవాస్తవ పాల్గొన్నారు. కాగా, ఆదిలాబాద్ జిల్లా కవ్వాల్ అభయారణ్యంలో ఐదేళ్ల తర్వాత మూడు పులులు కనిపించాయని పీసీసీఎఫ్ పీకే శర్మ వెల్లడించారు.


 పద పదవే గాలిపటమా పైన పక్షిలాగ ఎగిరిపోయే... అంటూ ఆనాడే పతంగ్‌ల వయ్యారాన్ని వర్ణించేశాడో కవి. నీలి మబ్బుల్లో తోక ఆడిస్తూ... అలా అలా తేలిపోతూ... పెకైగిరి ఎగిరి చుక్కలా మారిపోతుంటే నిజంగానే మనసు ఎక్కడికో వెళ్లిపోతుంది. ఇక గగనంలో గిరికీలు కొట్టించే ఆటగాళ్లెవరో... తొడ కొట్టి ‘కోత’లేసే పోటుగాళ్లెవరో తేల్చుకునే సమయం రానే వచ్చేసింది.
 
 సంక్రాంతి సంబరం అప్పుడే సిటీలో షురూ అయిపోయింది. కుప్పలు కుప్పలుగా గాలిపటాలు... పదునుదేలిన మాంజాలు రెడీ అయిపోయాయి. ధూల్‌పేట్... సికింద్రాబాద్... ఓల్డ్ సిటీ... న్యూ సిటీ... ఎక్కడ చూసినా లెక్కకు మించి పతంగ్‌లు సొగసులద్దుకుని ఆటగాళ్ల కోసం ఇదిగో... ఇలా ఎదురుచూస్తున్నాయి. ఆర్ యూ రెడీ!
  


 మెతుకుసీమలో సంక్రాంతి సంబరాలు మిన్నంటాయి. భూమి పుత్రులు పంటల రాకతో, పిల్లలు గాలి పటాల ఆటలతో, మహిళలు నోములు వ్రతాలతో, పెద్దలు కుటుంబమంతా కలిసిన ఆనందంతో వేడుకను జరుపుకుంటున్నారు.  అమ్మాయిలు రంగుల ముగ్గులతో స్వాగతం పలుకుతున్నారు. నువ్వులు, పలుకులు, పుట్నాలు, పేలాలు, బెల్లం మెళవింపుతో తయారు చేసిన ముద్దలు ఘుమఘుమలాడుతున్నాయి. సకినాలు, అరిసెలు, కుడుములు మొదలగు పిండి వంటల రుచులు నోరూరిస్తున్నాయి.
 
  నవధాన్యాలు పేర్చి మధ్యలో పిడకలపై మట్టిగురిగిలో పాలు, బియ్యం పోసి పొంగించే వైవిధ్య సంబరం ప్రారంభమైంది. దోషాలు తొలగి సిరి సంపదలు జీవితాల్లో ఉప్పొంగాలనే ఎన్నో అశలతో ప్రజలు సంక్రాంతిని ఆహ్వానిస్తున్నారు. ఉద్యోగ, వ్యాపార, విద్యారీత్యా విభిన్న ప్రాంతాల్లో నివసిస్తున్న వారెందరో కని పెంచిన పల్లెలకు, పట్టణాలకు వచ్చేశారు. ఆకాశం గాలి పటాల జోరుతో కళకళలాడుతోంది.
 
  
  ఇంటికి చేరి సందడి చేస్తూ..
  ఉన్నత చదువుల కోసం ఇతర ప్రాంతాలకు వెళ్లిన ప్రణతిసుధ, శ్రావణి పండుగ కోసం చేగుంటలోని తమ ఇంటికి చేరుకున్నారు. పండుగతోపాటు సెలవులను ఎంజాయ్ చేస్తున్నారు. పుస్తకాలతో నిత్యం కుస్తీ పడే వీరు ఇంటి పని లో తల్లికి ఆసారాగా ఉంటున్నారు. చేగుంట ఉన్నత పాఠశాల ఉపాధ్యాయుడు మురళికి ముగ్గురు కూతుళ్లు. పెద్దకూతురు ప్రణతిసుధ ఆదిలాబాద్‌లో ఎంబీబీఎస్ ఫైనల్ ఇయర్ చదువుతుంది.
 
 రెండో కూతురు శ్రావణి  హైదరాబాద్‌లో ఎంబీబీఎస్ కోసం లాంగ్‌టర్మ్ కోచింగ్ తీసుకుంటుంది. పండుగ సంబరాల కోసం వీరిద్దరు ఇంటికి చేరుకున్నారు. ప్రణతి అమ్మ వాణిశ్రీకి పిండివంటలు చేయడంలో సహకరిస్తుండగా శ్రావణి తన చిన్నారి చెల్లికి చిట్టి పొట్టి నీతికథలు చెబుతుంది. ఉన్నత చదువుల కోసం దూరప్రాంతాలకు వెళ్లిన తమ పిల్లలు ఇంటికి చేరడంతో సందడిగా ఉందని తల్లిదండ్రులు వాణి,మురళి ఆనందం వ్యక్తం చేస్తున్నారు.     
  
  ‘సకినాలు’ బహుత్ అచ్చాహై..
  సకినాలు టేస్టు బహుత్ అచ్చాహై.. అంటూ సంతోషం వ్యక్తం చేసింది ఉత్తరప్రదేశ్ రాష్ట్రం రాయ్‌బరేలి జిల్లా అడోభర్ గ్రామానికి చెందిన విద్య. గోదావరి సుజల స్రవంతి పైపులైన్ నిర్మాణం పనులు నిర్వహిం చేందుకు ఏడాది కిందట నంగునూరు మండలం పాలమాకులకు వచ్చి స్థిరపడ్డారు అనూజ్, విద్య దంపతులు.
 
 వీరు ఉంటున్న ప్రాంతంలో అందరూ ప్రత్యేక వంటకాలు చేస్తుండగా ఈమె కూడా వాటి తయారీని తెలుసుకుని తమ పిల్లలకు చేసి పెడుతున్నారు. అప్పాలు, చెగోడీలు, సకినాలు, బెల్లంనువ్వుల ముద్దలు చేస్తుంది. సంక్రాంతి పండుగను ఇక్కడ బాగా చేస్తారని తెలిపింది. తమ  పిల్లలు సింకు, కీర్తనలతో కలిసి ఉదయం ఇంటి ముందు ముగ్గు వేసి గొబ్బెమ్మలు పెట్టినట్టు చెబుతుంది విద్య. ఇక్కడి సంప్రదాయం తమకు బాగా నచ్చిందని చెబుతుంది ఆమె.


  సాక్షి, ఏలూరు/తాడేపల్లిగూడెం, న్యూస్‌లైన్ : సంక్రాంతి అంటేనే పల్లె పండగ. ప్రతి ఇల్లు నిండుగా పిల్లాపాపల సందడితో కళకళలాడుతున్నాయి. కొత్త దుస్తుల్లో మురిసిపోతున్న చిన్నారులు.. ముంగిళ్లలో ముగ్గులు.. వీధుల్లో భోగి మంటలు.. హరిదాసుల సందడి.. డూడూ బసవన్నల విన్యాసాలు.. పిండి వంటల ఘుమఘుమలు కనిపిస్తున్నాయి. వీటన్నికంటే ముఖ్యంగా పొట్టకూటికోసం చెల్లాచెదురైన వారి రాకతో పల్లెలన్నీ ఉత్సాహాన్ని నింపుకున్నాయి. ప్రతి ఇల్లు కుటుంబ సభ్యులు, బంధువులతో కళకళలాడుతోంది. ఎంత ఎదిగినా పల్లె ఒడిలో ఏడాదికోసారైనా ఒదగనిదే కొందరికి సంతృప్తి ఉండదు. తాతలతో ఆటలు ఆడుకోవాలి.. చిరుప్రాయంలో తాము చేసిన చిలిపి పనులను తెలుసుకొని మళ్లీ ఒక్కసారి బాల్యంలో విహరించాలి.. వయసులు మరచి ఆటలాడాలి.. పాటలు పాడాలి..అల్లరి చేయాలి.. కుటుంబ సభ్యులతో పండగను చేసుకొని పరవశించాలని పలువురు పల్లె తల్లి చెంతకు చేరారు. బస్సులు.. రైళ్లు.. విమానాలు ఎక్కి రెక్కలు కట్టుకుని పల్లె ముంగిట వాలిపోతున్నారు. చేల గట్లు, పచ్చని చెట్లు వీరికి ఆవాసాలుగా మారుతున్నాయి. అలసిపోయిన జీవులకు స్వాంతన చేకూరుస్తున్నాయి. సంక్రాంతి సందర్భంగా పల్లెల్లో పరిస్థితులపై ‘న్యూస్‌లైన్’ బృందం ఆదివారం పరికించింది. ఊరూవాడా సంక్రాంతి సందడే కనిపిస్తోంది. 
  
 
  
   ఆనందం అంతాఇంతా కాదు
  సంక్రాంతి సెలవులు ఎంజాయ్ చేసేందుకు పల్లెల్లోని పచ్చని పొలాలే బాగుంటాయని మీనాక్షి, సింధూజ, శ్రీదేవి అన్నారు. అలంపురంలో భవ్య, శృతి వారి స్నేహితులతో సంప్రదాయ దుస్తులతో చేలగట్లపై సందడి చేశారు. పల్లెటూళ్లంటే తమకెంతో ఇష్టమని, ఎన్ని పనులున్నా మానుకుని సంక్రాంతికి ఇక్కడకు వస్తుంటామని వారు అన్నారు. తాతయ్య, అమ్మమ్మ, బంధువుల మధ్య పండగ చేసుకోవడం తమకెంతో ఆనందాన్నిస్తుందని చెప్పారు. 
  
   పండగొచ్చింది.. సందడి తెచ్చింది
  తాడేపల్లిగూడెం : సింగపూర్, హైదరాబాద్ తదితర ప్రాంతాల్లో తీరిక లేకుండా గడిపే కుటుంబాలు ఆడి, పాడి సందడి చేశాయి. అన్నీ మరచి మది నిండుగా సంతోషంతో గడిపాయి. తాడేపల్లిగూడెం మండలం ఇటుకులగుంటలోని సుందరారాజుతోటలో 15 కుటుంబాల సభ్యులు ఆదివారం ఆట, పాటలతో గడిపారు. ఆప్యాయతలు, అనురాగాల పలకరింపులతో తోటలు, పొలాల్లో విహరించారు. అదేగ్రామానికి చెందిన రుద్రరాజు వరప్రసాదరాజు, స్వరూపరాణి బంధువులు మూడేళ్లుగా ఇలా సంక్రాంతి పండగకి ఒక్కచోట కలిసి సందడి చేస్తున్నారు. మహిళలు కళ్లకు గంతలు కట్టుకొని, హౌసీలు ఆడి ఉత్సాహానిచ్చారు. మెట్ట ఉప్పరగూడెంలో సోదరీమణులకు మోటారు సైకిళ్ల డ్రైవింగ్ నేర్పుతూ అన్నలు.. భోగి మంటలు వేసి అన్నలు సంబరపడ్డారు. వనంలో స్వేచ్ఛా విహంగాల మాదిరి కలియతిరుగుతూ సంక్రాంతి సంబరాన్ని కళ్లముందుంచారు.
  
   సంబరాలే భళా
  సంక్రాంతి సందర్భంగా జిల్లాలో వంటల పోటీలు, ముగ్గుల పోటీలే కాక పతంగుల (గాలిపటాలు) పోటీలు జోరుగా జరుగుతున్నాయి. మహిళలు, యువతులు ఈ పోటీల్లో ఉత్సాహంగా పాల్గొంటున్నారు. ముఖ్యంగా విద్యాసంస్థలు, మహిళా సంఘాలు, క్లబ్‌ల ఆధ్వర్యంలో పోటీలు నిర్వహిస్తున్నారు. చిన్నారులలో తెలుగు సంస్కృతి బీజాలు నాటేందుకు విద్యాసంస్థల్లో సంబరాలు  చేస్తున్నారు. 
  
   సున్నుండ.. పోకుండ.. జంతికలు.. అరిసెలు
  పెరవలి : సంక్రాంతి అంటేనే పిండి వంటలకు ప్రత్యేకం. ఘుమఘుమలాడే సున్నుండలు, జంతికలు, అరిసెలు, పోకుండలు, పూతరేకులు వంటి వంటలతో బంధువులను ఆనందింపజేయడం పరిపాటే. ధనికా, బీద తేడా లేకుండా ప్రతిఇంటా ఏదో ఓ రకం పిండి వంట తయారీలో మహిళలు నిమగ్నమయ్యారు. ముఖ్యంగా మినప సున్నుండలను ప్రతిఇంటా చేస్తున్నారు. గారెలు.. బూరెల సంగతి సరేసరి. 
  
   ఏటా వస్తాం
  అలంపురానికి చెందిన ప్రవాస భారతీయులు పొత్తూరి సురేష్‌కుమార్ రాజు, కనుమూరి సతీష్‌వర్మ పండగకు పిల్లలతో సొంతూరు వచ్చారు. వారి పిల్లలు వర్షిత్, కావ్య, తేజస్వీ, ప్రణవ్ కోతికొమ్మచ్చి ఆటలు ఆడి సందడి చేశారు. పల్లెటూళ్లలోనే సంక్రాంతి కళ కనిపిస్తోంది. ఎన్ని పనులున్నా ప్రతిఏటా పెద్ద పండగకి సొంతూరు వచ్చేస్తామని వారు అన్నారు.
  


 హరిదాసుల సంకీర్తనలు.. గంగిరెద్దుల విన్యాసాలు.. ముంగిట రంగవల్లులు..గొబ్బెమ్మలు..ఎడ్ల బండ్ల పందేలు..పిండివంటల ఘుమఘుమలు..కొత్త అల్లుళ్లకు మర్యాదలు, మరదళ్ల సరదాలతో పల్లె సంక్రాంతి శోభ సంతరించుకుంది. జిల్లాలోని అనేక పల్లెల్లో ఇలాంటి దృశ్యాలతో కోలాహల వాతావరణం నెలకొంది. భోగి, సంక్రాంతి, కనుమ పండగలను ఘనంగా జరుపుకునేందుకు అందరూ సిద్ధమయ్యారు. ఎక్కడ చూసినా ప్రజలు పండగ ఏర్పాట్లలో మునిగితేలే దృశ్యాలే కనిపిస్తున్నాయి. ఆదివారం రాత్రి నుంచే జిల్లాలో పలుచోట్ల భోగిమంటలు వేశారు.
  
  నెల్లూరు(వేదాయపాళెం), న్యూస్‌లైన్ : హిందువుల పెద్ద పండగైన సంక్రాంతిని పురస్కరించుకుని జిల్లాలోని పట్టణాలు, పల్లెలు కొత్తకళను సంతరించుకున్నాయి. వివిధ ప్రాంతాల్లో ఉద్యోగ, వ్యాపార రీత్యా స్థిరపడిన వారందరూ పండగ సందర్భంగా సొంతూరికి చేరుకుంటున్నారు. ఇలా వచ్చిన వారితో పల్లెలు కళకళలాడుతున్నాయి. కొత్తఅల్లుళ్లను ఆహ్వానించి సకల మర్యాదలు చేయడంలో అత్తామామలు, బావలను ఆటపట్టించడంలో మరదళ్లు నిమగ్నమయ్యారు.
  
  యువతులు ఇళ్ల ముందు పోటీలు పడి మరీ అందమైన రంగవల్లులను తీర్చిదిద్దుతున్నారు. చిన్నారులు గాలిపటాలు ఎగరవేయడంతో పాటు స్నేహితులతో కలిసి వివిధ ఆటపాటలతో గడుపుతున్నారు. మరోవైపు కోడి పందేలు, ఎడ్లబండ్లు, పడవల పోటీలకు రంగం సిద్ధమైంది. ఇప్పటికే పలుచోట్ల ఈ పందేలు జోరుగా జరుగుతున్నాయి. పోలీసులు ఆంక్షలు విధించినా పల్లెల్లో చెరువుగట్లపైనా, పొలాల్లోని పొదల చాటున కోడిపందేలు నిర్వహిస్తున్నారు. కనుమ పండగ నాడు కోవూరులో భారీ ఎత్తున ఎడ్లబండ్ల పోటీల నిర్వహణకు రంగం సిద్ధమైంది.
  
  పట్టణాల్లో సర్వం సిద్ధం
  సంక్రాంతి సంబరాలకు పట్టణాలు సిద్ధమయ్యాయి. నెల్లూరులోని పలు ప్రాంతాలు ఇప్పటికే కళకళలాడుతున్నాయి. ముంగిట ముందు రంగవల్లులు తీర్చిదిద్దడంలో యువతులు ఆసక్తి చూపుతున్నారు. భోగిమంటలు వేసేందుకు వీలుగా వివిద కూడళ్లలో తాటాకుల విక్రయం జోరుగా సాగుతోంది. వంటకాల కోసం సామాన్ల కొనుగోలు చేసే వారితో చిన్నబజారు, స్టోన్‌హౌస్‌పేట, పప్పులవీధి తదితర ప్రాంతాలు కిటకిటలాడుతున్నాయి. దుస్తులు కొనుగోలు చేసే వారితో వస్త్ర దుకాణాలు కిక్కిరిస్తున్నాయి.  
  
  పల్లెల్లో ఘుమఘుమలు
  నెల్లూరు(వేదాయపాళెం), న్యూస్‌లైన్ : పల్లెల్లో ఎక్కడ చూసినా పిండి వంటలు ఘుమఘుమలాడుతున్నాయి. రెండు..మూడిళ్ల వారు ఓచోట కూర్చుని నిప్పట్లు(అరిసెలు), లడ్డూలు, కొబ్బరివడలు, ఉప్పు చక్కలు, మనుబూలు తదితర వంటకాల తయారీలో నిమగ్నమై కనిపిస్తున్నారు. ఇంటిల్లిపాది కూర్చుని నిప్పట్లు తయారుచేసుకుంటున్నారు. గతంలో నిప్పట్ల కోసం బియ్యాన్ని రోకళ్లతో దంచేవారు. ఇప్పుడు పిండి దంచేందుకు కూలీలు కరువవడంతో మిల్లులపై ఆధారపడుతున్నారు.
  
  పట్టణాల్లో రెడీమేడ్ వంటలు
  పల్లెల్లో తప్ప చాలా చోట్ల పొయ్యిలు వెలగడం లేదు. పిండివంటలన్నీ రెడీమేడ్ అయిపోయాయి. నెల్లూరులో ప్రత్యేకించి పండగల సమయంలో పిండి వంటల కోసం దుకాణాలు వెలిశాయి. ఇప్పటికే ఉన్న స్వీట్ల దుకాణాల్లో పిండివంటలన్నీ అందుబాటులో ఉంటున్నాయి. కొందరు ఇళ్లలో తయారు చేసి ఆర్డర్ల మీద సరఫరా చేస్తున్నారు. స్టోన్‌హౌస్‌పేట, సాలివీధి, బంగ్లావీధి ప్రాంతాల్లో ఎక్కువగా ఇవి కన్పిస్తున్నాయి. కొన్నింటిని పీసుల లెక్కన, మరి కొన్నింటిని కిలోల ప్రాతిపదికన విక్రయిస్తున్నారు. అరిసెలు కిలో రూ. 120, కజ్జికాయ ఒకటి రూ.7, లడ్డు కిలో రూ.120, కొబ్బరివడ కిలో రూ.120, మురుకులు, పప్పుచెక్కలు రూ.140 విక్రయిస్తున్నారు.
  
  ఆర్డర్లతో బిజీ..బిజీ  
  శ్రీనివాసులు, పిండి వంటల విక్రయదారుడు
  సంక్రాంతి పండగ వచ్చిందంటే బిజీ బిజీగా గడపాల్సి వస్తోంది. డిసెంబర్ నుంచే పిండివంటలకు ఆర్డర్లపై ఆర్డర్లు వస్తున్నాయి. కిలోల లెక్కన ఆర్డర్లపై అమ్మకాలు జరుపుతున్నాం. గిరాకీ బాగానే ఉంటోంది. ఎక్కువ ఆర్డర్లు తీసుకుంటే అమ్మకాలు జరపలేకున్నాం. పిండివంటలు కావాల్సిన వారు 92916 63858 నంబరులో సంప్రదించవచ్చు.
  
  సమయం సరిపోవడం లేదు  
  కిషోర్, మౌనిక, స్టోన్‌హౌస్‌పేట
  చిన్నతనం నుంచి మా ఇంట్లో అమ్మానాన్న, బంధువులు అందరం కలిసి పిండివంటలు చేసుకునేవాళ్లం. ప్రస్తుతం మేం ఉద్యోగరీత్యా నెల్లూరులో ఉండాల్సి వస్తోంది. దీంతో సమయం సరిపోవడం లేదు. అందుకే రెడీమేడ్‌గా దొరికే పిండి వంటలను కొనుగోలు చేశాం.
  
  దుస్తులు సైతం రెడీమేడ్
  పండగ రోజులు వచ్చాయంటే పల్లెటూర్ల నుంచి పట్టణాల వరకు దర్జీలు బిజీబిజీగా ఉండేవారు. ప్రస్తుత రోజుల్లో రెడీమేడ్ దుస్తులపై ప్రజలు ఆసక్తి చూపుతున్నారు. గుడ్డ కొనడం, దాన్ని కుట్టించడం, రోజుల పాటు దర్జీల చుట్టూ తిరగడం వంటిని పక్కన పెడుతున్నారు. ఈ క్రమంలో రెడీమేడ్ వస్త్ర దుకాణాలు జనంతో కిటకిటలాడుతున్నాయి.