బెంగళూరు: ఆడాలని ఉన్నా ఆరోగ్యం, శరీరం సహకరించడం లేదని, అందుకే భారమైన హృదయంతో ఆటను మానేశానని ప్రముఖ బ్యాడ్మింటన్‌ క్రీడాకారిణి సైనా నెహ్వాల్‌ తెలిపారు. కర్ణాటకలోని ఉడుపి జిల్లా మణిపాల్‌ పట్టణంలో ఆమె మంగళవారం మీడియా సమావేశంలో మాట్లాడారు. ఔత్సాహిక క్రీడాకారులకు తర్పీదు ఇచ్చేందుకు కూడా తనకు ఆసక్తి లేదన్నారు. హైదరాబాద్‌లో బ్యాడ్మింటన్‌ శిక్షణ ఇచ్చేందుకు మంచి అకాడమీలు ఉన్నాయని చెప్పారు. ‘శిక్షణ ఇవ్వడం చాలా కష్టమైన పని. అది ఆడడం కన్నా కష్టం. 10–15 గంటలపాటు నిలబడి శిక్షణ ఇవ్వాలంటే మామూలు విషయం కాదు. అయితే పిల్లలకు ఆటల్లో ఆసక్తి కలిగించేలా పని చేస్తున్నా’ అని వివరించారు. పిల్లలు సోషల్‌ మీడియాకు స్వస్తి చెప్పి అన్ని రకాల క్రీడల వైపు మొగ్గు చూపాలన్నారు. గతంలో తాను జీవితంలో ఎంతో ఒత్తిడికి లోనయ్యానని, 25 ఏళ్లు కుటుంబం, ఆహారం, స్నేహితులు అందరికీ దూరమైనట్లు తెలిపారు.

సరైన సమయంలో సరైన నిర్ణయం తీసుకోవడం కూడా పెద్ద పరీక్షలాంటిదే. క్రీడాకారుడిగా కెరీర్‌ బాగా సాగుతున్న దశలోనే ఆట నుంచి వీడ్కోలు తీసుకోవాలంటే తెగువ అవసరం. ఆశించిన విజయాలు లభించకపోయినా... ఆటగాడిగా కొనసాగుతూ... ఇతరుల అవకాశాలను ప్రభావితం చేసే బదులు... వర్ధమాన క్రీడాకారులు తమ కెరీర్‌లో మరింత ఎదిగేందుకు మార్గదర్శిగా మారడం విజ్ఞుల లక్షణం. ఆ కోవలోకే తాను వస్తానని తెలంగాణకు చెందిన అంతర్జాతీయ బ్యాడ్మింటన్‌ క్రీడాకారుడు బసి సుమీత్‌ రెడ్డి చాటుకున్నాడు. ప్రపంచ బ్యాడ్మింటన్‌ సమాఖ్య (బీడబ్ల్యూఎఫ్‌) మిక్స్‌డ్‌ డబుల్స్‌ ర్యాంకింగ్స్‌లో 25వ ర్యాంక్‌లో ఉన్న సుమీత్‌ రెడ్డి క్రీడాకారుడిగా తన ఇన్నింగ్స్‌ ముగిసిందని సోమవారం ప్రకటించాడు. కోచ్‌ రూపంలో ఇప్పటికే రెండో ఇన్నింగ్స్‌ మొదలుపెట్టానని... భవిష్యత్‌లో భారత్‌కు మెరికల్లాంటి షట్లర్లను తయారు చేయడమే లక్ష్యంగా కోచ్‌గా స్థిరపడతానని సుమీత్‌ స్పష్టం చేశాడు. సాక్షి, హైదరాబాద్‌: బ్యాడ్మింటన్‌లో ఉన్న అన్ని ప్రముఖ టోర్నమెంట్‌లలో... నాలుగేళ్లకోసారి జరిగే ఆసియా క్రీడలు, కామన్వెల్త్‌ గేమ్స్, ఒలింపిక్స్‌ క్రీడల్లో భారత జట్టుకు ప్రాతినిధ్యం వహించే అవకాశం దక్కించుకోవడమంటే ఆషామాషీ కాదు. తెలంగాణకు చెందిన 33 ఏళ్ల బుసి సుమీత్‌ రెడ్డి తన కెరీర్‌లో ఇవన్నీ సాకారం చేసుకున్నాడు. ఇక తన కెరీర్‌లో మళ్లీ ఉన్నతస్థితికి చేరుకునే అవకాశం లేదని భావించిన సుమీత్‌ ఆటకు వీడ్కోలు పలకడమే ఉత్తమం అని ఆలోచించాడు. తన ఆలోచనను నిజం చేస్తూ బ్యాడ్మింటన్‌ క్రీడాకారుడిగా రిటైర్‌ అవుతున్నట్లు సోమవారం ఇన్‌స్ట్రాగామ్‌ వేదికగా ప్రకటించాడు.ఇక మీదట తన దృష్టంతా కోచింగ్‌పైనే ఉంటుందని ఈ సందర్భంగా సుమీత్‌ రెడ్డి స్పష్టం చేశాడు. ‘రిటైరయ్యాను. గర్వంగా ఉన్నాను. కెరీర్‌లోని తర్వాతి అధ్యాయం కోసం ఉత్సుకతతో ఉన్నాను. నేనీ స్థాయికి చేరుకోవడంలో ముఖ్యపాత్ర పోషించిన కుటుంబసభ్యులు, మిత్రులు, శ్రేయోభిలాషులకు కృతజ్ఞతలు తెలుపుకుంటున్నాను’ అని సుమీత్‌ తన పోస్ట్‌లో పేర్కొన్నాడు. ‘నా పరిమితికి మించి ఫలితాలు సాధించాలనే లక్ష్యంతో నిరంతరం శ్రమించాను. ప్రస్తుతం ప్రపంచ ర్యాంకింగ్స్‌లో 25వ స్థానంలో ఉన్నప్పటికీ నా కెరీర్‌లో ఉన్నత దశ దాటిపోయానని భావిస్తున్నాను. ఇతరత్రా కారణాలతోనూ నా ప్రొఫెషనల్‌ కెరీర్‌ నుంచి వైదొలుగుతున్నాను. ఇక ఆటను ఆపేయాలనే సంకేతాలు మన మదిలో మెదిలినపుడు ఎలాంటి సంకోచం లేకుండా నిర్ణయం తీసుకోవాలి. వెన్నునొప్పి కారణంగా ఒకదశలో వైద్యులు బ్యాడ్మింటన్‌ను వదిలేయాలని సూచించారు. కానీ హెడ్‌ కోచ్‌ పుల్లెల గోపీచంద్‌ ఇచి్చన ప్రోత్సాహంతో, ఆయన ఇచ్చిన సలహాలతో డబుల్స్‌ వైపు అడుగులు వేసి కెరీర్‌ను తీర్చిదిద్దుకున్నాను’ అని సుమీత్‌ వ్యాఖ్యానించాడు. నాన్న ప్రోద్భలంతో... అథ్లెటిక్స్‌ నేపథ్యమున్న తన తండ్రి భాస్కర్‌ రెడ్డి ప్రోత్సాహంతో 2001లో బ్యాడ్మింటన్‌ రాకెట్‌ పట్టిన సుమీత్‌ 2007లో ఆసియా జూనియర్‌ చాంపియన్‌షిప్‌లో భారత జూనియర్‌ జట్టుకు తొలిసారి ప్రాతినిధ్యం వహించాడు. ఐదేళ్ల తర్వాత 2012లో చైనా ఓపెన్‌ సూపర్‌ సిరీస్‌ టోర్నీ ద్వారా భారత సీనియర్‌ జట్టు తరఫున తొలిసారి బరిలోకి దిగాడు. అప్పటి నుంచి పుష్కరకాలం పాటు జాతీయ జట్టులో సభ్యుడిగా కొనసాగాడు.భార్య సిక్కి రెడ్డికి జోడీగామనూ అత్రితో కలిసి సుమీత్‌ రెడ్డి 2015లో పురుషుల డబుల్స్‌లో కెరీర్‌ బెస్ట్‌ 17వ ర్యాంక్‌ను అందుకోగా... భార్య సిక్కి రెడ్డితో కలిసి సుమీత్‌ 2025 మార్చిలో మిక్స్‌డ్‌ డబుల్స్‌లో కెరీర్‌ బెస్ట్‌ 25వ ర్యాంక్‌లో నిలిచాడు. 2014 ఇంచియోన్‌ ఆసియా క్రీడల్లో, 2018 జకార్తా ఆసియా క్రీడల్లో టీమ్‌ విభాగంలో భారత జట్టుకు ప్రాతినిధ్యం వహించిన సుమీత్‌ రెడ్డి 2016 రియో ఒలింపిక్స్‌లో మనూ అత్రికి కలిసి పురుషుల డబుల్స్‌ విభాగంలో పోటీపడ్డాడు. ఒక విజయం, రెండు పరాజయాలు నమోదు చేసుకొని సుమీత్‌ రెడ్డి–మనూ అత్రి ద్వయం రియో ఒలింపిక్స్‌లో గ్రూప్‌ దశలోనే నిష్క్రమించింది. 12 అంతర్జాతీయ టైటిల్స్‌... 2022 బర్మింగ్‌హామ్‌ కామన్వెల్త్‌ గేమ్స్‌లో మిక్స్‌డ్‌ టీమ్‌ ఈవెంట్‌లో రజతం నెగ్గిన భారత జట్టులో సుమీత్‌ సభ్యుడిగా ఉన్నాడు. 2016లో హైదరాబాద్‌ వేదికగా జరిగిన ఆసియా టీమ్‌ చాంపియన్‌షిప్‌లో కాంస్యం సాధించిన టీమిండియాలోనూ సుమీత్‌ సభ్యుడిగా నిలిచాడు. 2016లో గువాహటిలో జరిగిన దక్షిణాసియా క్రీడల్లో, 2019లో కఠ్మాండూలో జరిగిన దక్షిణాసియా ఆసియా క్రీడల్లో సుమీత్‌ రెడ్డి పురుషుల డబుల్స్, పురుషుల టీమ్‌ ఈవెంట్స్‌లో స్వర్ణ పతకాలు సొంతం చేసుకున్నాడు.ప్రపంచ బ్యాడ్మింటన్‌ సమాఖ్య (బీడబ్ల్యూఎఫ్‌) సర్క్యూట్‌లో సుమీత్‌ రెడ్డి ఓవరాల్‌గా 12 టైటిల్స్‌ సాధించాడు. ఇందులో గ్రాండ్‌ప్రి స్థాయికి చెందిన రెండు పురుషుల డబుల్స్‌ టైటిల్స్‌ (2015లో మనూ అత్రితో కలిసి మెక్సికో సిటీ గ్రాండ్‌ప్రి; 2016లో మనూ అత్రితో కలిసి కెనడా ఓపెన్‌) ఉన్నాయి. అంతర్జాతీయ చాలెంజ్, అంతర్జాతీయ సిరీస్‌ కేటగిరీల్లో కలిపి సుమీత్‌ 10 టైటిల్స్‌ గెలిచాడు. 2021లో భార్య సిక్కి రెడ్డితో కలిసి హైదరాబాద్‌లో సిక్కీ సుమీత్‌ బ్యాడ్మింటన్‌ అకాడమీని ప్రారంభించి ఒకవైపు కెరీర్‌ను కొనసాగిస్తూనే చిన్నారులకు శిక్షణ ఇచ్చాడు. ప్రస్తుతం జాతీయ డబుల్స్‌ కోచ్‌ల ప్యానెల్‌లో సభ్యుడిగా ఉన్న సుమీత్‌ భవిష్యత్‌లో భారత జట్టు బ్యాడ్మింటన్‌ పవర్‌హౌస్‌గా మారుతుందని విశ్వాసం వ్యక్తం చేశాడు.

పూసర్ల వెంకట సింధు... ఒలింపిక్స్‌లో పతకాలు సాధించింది.కామన్‌వెల్త్‌... వరల్డ్‌ చాంపియన్‌షిప్‌లలో స్వర్ణాలు సొంతం చేసుకుంది.ప్రపంచవేదికల మీద దేశ పతాకాన్ని సగర్వంగా ఎగురవేసింది.భారత మాత మెడలో పతకాల హారం వేసి బంగారు సింధు అయింది.ఈ ఏడాది మహిళాదినోత్సవాన్ని శ్రీమతి సింధుగా వేడుక చేసుకుంటోంది.సాధికారత దిశగా పయనిస్తున్న మహిళలకు అభినందనలు చెప్పింది.ఈ తరంలో మహిళలు బిజినెస్, స్పోర్ట్స్‌తోపాటు అన్ని రంగాల్లోనూ రాణిస్తున్నారు. కేవలం తమకు తాము నిలదొక్కుకోవడంతో సరిపెట్టడం లేదు, ఆ రంగంలో నంబర్‌ వన్‌గా నిలవడానికి శ్రమిస్తున్నారు. నంబర్‌ వన్‌ లక్ష్యాన్ని సాధిస్తున్నారు కూడా. ఈ స్ఫూర్తిని, ఇదే పంథాను కొనసాగించాలని అభిలషిస్తున్నాను. సక్సెస్‌కు దారి! ప్రతి ఒక్కరూ తమ కోసం తాము కొన్ని లక్ష్యాలను నిర్దేశించుకోవాలి. వాటిని చేరుకోవడానికి తగినంత శ్రమించాలి. సక్సెస్‌ అనే లక్ష్యాన్ని చేరడానికి ఉన్న ఏకైక దారి హార్డ్‌వర్క్‌. హార్డ్‌వర్క్‌తో మాత్రమే విజయానికి చేరువ కాగలుగుతాం. అది కూడా ఒక నెల శ్రమతోనో ఏడాది శ్రమతోనో శిఖరాన్ని చేరాలని ఆశించకూడదు. కొన్నేళ్ల కఠోరశ్రమ, అంకితభావంతో శ్రమించినప్పుడే సక్సెస్‌ మనదవుతుంది. అయితే కొందరికి సక్సెస్‌ కొంత త్వరగా రావచ్చు, మరికొందరికి ఆలస్యం కావచ్చు. మన మీద మనం నమ్మకాన్ని కోల్పోకూడదు. ఆశను వదులుకోకూడదు, నిరాశపడకూడదు. మనం మనవంతుగా శ్రమిస్తూ ఉండాలి. సక్సెస్‌ వచ్చినప్పటి నుంచి మరింత బాధ్యతగా పని చేయాలి. సక్సెస్‌ అనే శిఖరాన్ని చేరాం అని రిలాక్స్‌ కాకూడదు. నంబర్‌ వన్‌కి చేరడానికి నేనలాగే కష్టపడ్డాను, కష్టపడుతూనే ఉంటాను కూడా. అమ్మానాన్న... భర్త! ఇప్పటి వరకు నన్ను, నా ఆర్థిక వ్యవహారాలను అమ్మానాన్న చూసుకునేవారు. టోర్నమెంట్‌కి తోడుగా నాన్న వచ్చేవారు. ఇప్పుడు మా వారు వస్తున్నారు. నా గురించి అన్నీ వాళ్లే చూసుకుంటారు. నా ఫోకస్‌ అంతా ఆట మీదనే కేంద్రీకరించడానికి తగిన వెసులుబాటునిస్తున్నారు. పేరెంట్స్‌ నడిపించాలి! దేశానికి కొత్తతరం క్రీడాకారులు తయారు కావాలి. క్రీడాకారులను తయారు చేయాల్సిన బాధ్యత తల్లిదండ్రులదే. పిల్లలకు స్పోర్ట్స్‌ మీద ఆసక్తి ఉన్నప్పటికీ తల్లిదండ్రుల సహకారం లేకపోతే క్రీడాకారులు తయారుకారు. పిల్లలను క్రీడల దిశగా నడిపించడం పేరెంట్స్‌ చేతిలోనే ఉంటుంది. ఆటలు, చదువు రెండూ కీలకమే. రెండింటినీ ఎలా బాలెన్స్‌ చేసుకోవాలో నేర్పించగలిగింది కూడా పేరెంట్సేనని నా అభి్రపాయం. పేరెంట్స్‌కి కోరిక ఉన్నప్పటికీ పిల్లలకు ఆడాలనే ఆసక్తి లేకపోతే ఆ పిల్లలు దీర్ఘకాలం కొనసాగడం కష్టం. అలాగే ఆటల పట్ల ఆసక్తి ఉన్న పిల్లలకు పేరెంట్స్‌ సహకారం లేకపోతే తొలి అడుగు కూడా పడదు. అందుకే తల్లిదండ్రుల పాత్ర చాలా ముఖ్యం.సింధుగానే గుర్తించాలి! సమాజం నన్ను సింధుగానే గుర్తించాలి. ‘పీవీ సింధు’ అనగానే చేతిలో రాకెట్‌తో నా రూపం కళ్ల ముందు మెదులుతుంది. అలా నాకంటూ ఒక గుర్తింపు తెచ్చుకున్నాను. దేశం కోసం ఆడగలిగే స్థాయికి చేరాను. దేశం కోసం ఆడాను. దేశానికి ఎన్నో పతకాలను సాధించాను. దేశానికి గౌరవాన్ని పెంచడంలో నా శ్రమ కూడా ఉందని సంతోషపడుతున్నాను. ఈ గుర్తింపు ఇలాగే కొనసాగాలని కోరుకుంటున్నాను. – వాకా మంజులారెడ్డి, సాక్షి ఫీచర్స్‌ ప్రతినిధి

సాక్షి, హైదరాబాద్‌: ఎన్‌ఎండీసీ తెలంగాణ ఇంటర్నేషనల్‌ చాలెంజ్‌ బ్యాడ్మింటన్‌ టోర్నమెంట్‌ మిక్స్‌డ్‌ డబుల్స్‌ విభాగంలో భారత జట్టు మాజీ సభ్యురాలు, తెలంగాణ అమ్మాయి గద్దె రుత్విక శివాని సెమీఫైనల్లోకి దూసుకెళ్లింది. గచి్చ»ౌలిలోని కొటక్‌ పుల్లెల గోపీచంద్‌ అకాడమీలో ఈ టోర్నీ జరుగుతోంది.శుక్రవారం జరిగిన మిక్స్‌డ్‌ డబుల్స్‌ క్వార్టర్‌ ఫైనల్లో రుత్విక శివాని–రోహన్‌ కపూర్‌ (భారత్‌) ద్వయం 21–14, 14–21, 21–17తో భారత్‌కే చెందిన ధ్రువ్‌ రావత్‌–రాధిక శర్మ జోడీపై గెలిచింది. పురుషుల సింగిల్స్‌లో తెలంగాణకు చెందిన కాటం తరుణ్‌ రెడ్డి, రుషీంద్ర తిరుపతి సెమీఫైనల్లోకి అడుగు పెట్టారు. క్వార్టర్‌ ఫైనల్స్‌లో రుషీంద్ర 21–9, 21–10తో సంస్కార్‌ సరస్వత్‌ (భారత్‌)పై, తరుణ్‌ రెడ్డి 22–20, 22–24, 21–15తో రవి (భారత్‌)పై గెలిచారు.మహిళల సింగిల్స్‌లో ఆంధ్రప్రదేశ్‌ క్రీడాకారిణి తామిరి సూర్య చరిష్మా పోరాటం క్వార్టర్‌ ఫైనల్లో ముగిసింది. సూర్య చరిష్మా 21–18, 16–21, 21–23తో రక్షిత శ్రీ (భారత్‌) చేతిలో పోరాడి ఓడిపోయింది. భారత నంబర్‌వన్‌ అన్‌మోల్‌ ఖరబ్, అనుపమా, ఇషారాణి కూడా సెమీఫైనల్లోకి ప్రవేశించారు.క్వార్టర్‌ ఫైనల్స్‌లో అన్‌మోల్‌ 16–21, 21–14, 21–19తో దేవిక (భారత్‌)పై, అనుపమ 21–18, 27–25తో శ్రేయా (భారత్‌)పై, ఇషారాణి 21–18, 17–21, 21–18తో మాన్సి (భారత్‌)లపై నెగ్గారు. పురుషుల డబుల్స్‌లో తెలంగాణకు చెందిన పంజాల విష్ణువర్ధన్‌ గౌడ్‌ తన భాగస్వామి ఎం.ఆర్‌.అర్జున్‌తో కలిసి సెమీఫైనల్‌ బెర్త్‌ను ఖరారు చేసుకున్నాడు. క్వార్టర్‌ ఫైనల్లో విష్ణువర్ధన్‌ గౌడ్‌–అర్జున్‌ ద్వయం 21–11, 21–8తో గణేశ్‌ కుమార్‌–అర్జున్‌ (భారత్‌) జోడీపై గెలిచింది.

పారిస్‌ ఒలింపిక్స్‌ తర్వాత మరో టోర్నీ ఆడని భారత స్టార్‌ బ్యాడ్మింటన్‌ ప్లేయర్‌ పీవీ సింధు మళ్లీ కొత్త ఉత్సాహంతో బరిలోకి దిగేందుకు సిద్ధమైంది. వచ్చేనెలలో జరిగే ఫిన్లాండ్‌ ఓపెన్, డెన్మార్క్‌ ఓపెన్‌లతో పాటు ఆ తర్వాత యూరోప్‌ సర్క్యూట్‌లో వివిధ టోరీ్నల్లో పాల్గొనే అవకాశం ఉంది. ఈ నేపథ్యంలో దక్షిణ కొరియా మాజీ ఆటగాడు లీ హ్యూన్‌ ఇల్‌ను కన్సలి్టంగ్‌ కోచ్‌గా సింధు ఎంచుకుంది. ఇప్పటికే భారత మాజీ ఆటగాడు అనూప్‌ శ్రీధర్‌ సింధు తాత్కాలిక కోచ్‌గా పని చేస్తున్నాడు. 2016 రియో ఒలింపిక్స్‌లో రజతం, 2020 టోక్యో ఒలింపిక్స్‌లో కాంస్యం సాధించిన సింధు ఇటీవల జరిగిన పారిస్‌ ఒలింపిక్స్‌లో మాత్రం పతకం సాధించడంలో విఫలమైంది. ప్రిక్వార్టర్‌ ఫైనల్లోనే చైనా ప్లేయర్‌ బింగ్జియావో చేతిలో ఆమె ఓటమి పాలైంది. అంతకు కొంత కాలం ముందునుంచి కూడా సింధు చెప్పుకోదగ్గ ఫలితాలు సాధించలేదు. 2022లో సింగపూర్‌ ఓపెన్‌ గెలిచిన తర్వాత మరే టైటిల్‌ నెగ్గని సింధు... గత రెండేళ్ల వ్యవధిలో రెండు టోర్నీల్లో రన్నరప్‌గా మాత్రమే నిలవగలిగింది. రియో ఒలింపిక్స్‌లో పతకం గెలిచిన సమయంలో సింధు కోచ్‌గా ఉన్న పార్క్‌ సంగ్‌ కాంట్రాక్‌ ముగిసి 2023 ఆరంభంలోనే వెళ్లిపోగా... తాత్కాలికంగా ‘సాయ్‌’ కోచ్‌ విధి చౌదరితో కలిసి ఆమె పని చేసింది. దిగ్గజ ఆటగాడు హాఫిజ్‌ హషీమ్‌ను కోచ్‌గా తీసుకున్నా అదీ కొద్ది రోజులకే ముగిసింది.దాంతో బెంగళూరుకు వెళ్లి సింధు... ప్రకాశ్‌ పడుకోన్‌ వద్ద పారిస్‌ ఒలింపిక్స్‌కు సన్నద్ధమైంది. ప్రస్తుత సీజన్‌ ఇంకా పూర్తి కాకపోగా... కోచ్‌గా పని చేసిన ఆగస్‌ సాంటోసో కాంట్రాక్ట్‌ ఒలింపిక్స్‌తోనే ముగిసింది. దాంతో ఈ సీజన్‌ చివరి వరకు సింధుకు కొత్త కోచ్‌ అవసరం ఏర్పడింది. ఈ నేపథ్యంలో అటు శ్రీధర్‌తో పాటు ఇటు లీ హ్యూన్‌తో కలిసి పని చేసేందుకు ఆమె సిద్ధమైంది. వీరిద్దరు డిసెంబర్‌ 2024 వరకు సింధుకు శిక్షణనిస్తారు. ‘నా కెరీర్‌ కీలక దశలో అనూప్, లీ హ్యూన్‌లు కోచ్‌గా రావడం పట్ల సంతోషంగా ఉన్నా. భారత బ్యాడ్మింటన్‌పై అనూప్‌కు ఉన్న అవగాహన, ఆయన వ్యూహాలు నన్ను చాలా ఆకట్టుకున్నాయి. లీ హ్యూన్‌కు అపార అనుభవం ఉండటం నాకు కలిసొచ్చే అంశం. ఆటకు సంబంధించి ప్రతీ విషయంలో ఆయన సూక్ష్మ పరిశీలన నాకు మేలు చేస్తుంది. రాబోయే కొన్ని వారాల పాటు వీరిద్దరితో కలిసి పని చేసేందుకు ఉత్సాహంగా ఎదురు చూస్తున్నా’ అని సింధు వ్యాఖ్యానించింది. మాజీ వరల్డ్‌ నంబర్‌వన్‌ లీ హ్యూన్‌ అంతర్జాతీయ ఆటగాడిగా మంచి రికార్డు ఉంది. వరల్డ్‌ చాంపియన్‌షిప్‌లో కాంస్యం గెలిచిన అతను సుదిర్మన్‌ కప్‌లో స్వర్ణం, 3 కాంస్యాలు గెలిచిన... థామస్‌ కప్‌లో 2 రజతాలు, 2 కాంస్యాలు గెలిచిన కొరియా జట్లలో సభ్యుడు. ఆసియా క్రీడల్లో లీ హ్యూన్‌ 2 స్వర్ణాలు, 3 రజతాలు, కాంస్యం గెలవడంతో పాటు ఆసియా చాంపియన్‌షిప్‌లోనూ కాంస్యం అందుకున్నాడు. ప్రీమియర్‌ బ్యాడ్మింటన్‌ లీగ్‌ (పీబీఎల్‌) లో సింధు జట్టులో సభ్యుడిగా కలిసి ఆడాడు. ఐదేళ్ల క్రితం ఆటకు రిటైర్మెంట్‌ పలికిన అనంతరం అతను కోచింగ్‌ వైపు మారాడు.

జపాన్‌ బ్యాడ్మింటన్‌ స్టార్‌, ప్రపంచ మాజీ చాంపియన్‌ కెంటో మొమోటా ఆటకు వీడ్కోలు పలికాడు. అంతర్జాతీయ స్థాయి టోర్నీల నుంచి రిటైర్‌ అవుతున్నట్లు గురువారం ప్రకటించాడు. నాలుగేళ్ల క్రితం జరిగిన కారు ప్రమాదం తర్వాత తాను పూర్తిగా కోలుకోలేకపోయానని.. అందుకే ఈ నిర్ణయం తీసుకున్నట్లు వెల్లడించాడు. కాగా జపాన్‌కు చెందిన 29 ఏళ్ల కెంటో మొమోటా ఒకప్పుడు బ్యాడ్మింటన్‌ రంగంలో మకుటంలేని మహారాజుగా నీరాజనాలు అందుకున్నాడు. 2019లో ఏకంగా 11 టైటిళ్లు సాధించి సత్తా చాటాడు. ఆ ఏడాది ఆడిన 73 మ్యాచ్‌లలో మొమోటా కేవలం ఆరు మ్యాచ్‌లు మాత్రమే ఓడిపోయాడు. అయితే, ఆ మరుసటి ఏడాది మొమోటా కారు ప్రమాదానికి గురయ్యాడు. మలేషియా మాస్టర్స్‌ టైటిల్‌ గెలిచిన తర్వాత కౌలలంపూర్‌ విమానాశ్రయానికి చేరుకునే క్రమంలో అతడు ప్రయాణిస్తున్న కారు రోడ్డు  ప్రమాద ఘటనలో నుజ్జునుజ్జయింది. ఆ కారు డ్రైవర్‌ చనిపోగా.. మొమోటాకు తీవ్ర గాయాలయ్యాయి. మొమోటా కంటికి బలమైన దెబ్బ తలగడంతో సర్జరీ చేయాల్సి వచ్చింది. ఈ క్రమంలో మరో రెండు టైటిళ్లు గెలిచిన మొమోటా.. ఏడాది తర్వాత రెండో కంటి చూపు కూడా మందగించడంతో ఫామ్‌ కోల్పోయాడు.  ఈ నేపథ్యంలో రిటైర్మెంట్‌ ‍ప్రకటిస్తూ.. ‘‘కారు ప్రమాదం జరిగిన సమయంలో నేను నా గురించి ఆందోళన చెందలేదని చెప్తే అది అబద్ధమే అవుతుంది. ఆ యాక్సిడెంట్‌ తర్వాత కఠిన సవాళ్లు ఎదురయ్యాయి. ఆడాలనే తపన ఉన్నా నా శరీరం అందుకు సహకరించడం లేదు. అందుకే ఈ నిర్ణయం. అయితే, ఈ విషయంలో నేను ఎవరినీ తప్పుపట్టడం లేదు’’ అని కెంటో మొమోటా చెప్పుకొచ్చాడు. కాగా వరల్డ్‌ నంబర్‌ వన్‌ ప్లేయర్‌గా వెలుగొందిన మొమోటా ప్రస్తుతం 52వ ర్యాంకులో ఉన్నాడు. పారిస్‌ ఒలింపిక్స్‌కు అర్హత సాధించలేకపోయిన అతడు.. థామస్‌, ఉబెర్‌ కప్‌ తర్వాత ఆటకు దూరం కానున్నాడు.  

డాన్‌... ఆ పేరులోనే ప్రపంచాన్ని శాసిస్తున్న భావన వినిపిస్తుంది! ఈ డాన్‌ కూడా అలాగే చేశాడు. సుదీర్ఘకాలం పాటు బ్యాడ్మింటన్‌ ప్రపంచంపై తన ఆధిపత్యాన్ని ప్రదర్శించాడు. ఎందరు పోటీకొచ్చినా.. ఎందరు ప్రయత్నించినా అతడిని పడగొట్టలేకపోయారు. సాధించిన ఘనతలు, రికార్డులు చూస్తే అతని తిరుగులేని ఆట కళ్ల ముందు కనిపిస్తుంది. టీనేజర్‌గా దూసుకొచ్చి దాదాపు రెండు దశాబ్దాల పాటు విజయాలకు చిరునామాగా మారిన ఆల్‌టైమ్‌ బ్యాడ్మింటన్‌ గ్రేట్‌ లిన్‌ డాన్‌. షటిల్‌ను చైనా నడిపించిన కాలం నుంచి ఇతర దేశాల షట్లర్ల జోరు పెరిగే దాకా.. ఎక్కడా ఆటలో వన్నె తగ్గని వీరుడతను.  బ్యాడ్మింటన్‌ ప్రపంచంలో 9 టోర్నమెంట్‌లను అత్యుత్తమమైనవిగా భావిస్తారు. ఒలింపిక్స్, ప్రపంచ చాంపియన్‌షిప్, ప్రపంచ కప్, థామస్‌ కప్, సుదిర్మన్‌ కప్, సూపర్‌ సిరీస్‌ మాస్టర్స్‌ ఫైనల్స్, ఆల్‌ ఇంగ్లండ్‌ ఓపెన్, ఆసియా క్రీడలు, ఆసియా చాంపియన్‌షిప్‌... సూపర్‌ గ్రాండ్‌స్లామ్‌గా వ్యవహరించే వీటన్నింటిని గెలుచుకున్న తొలి, ఏకైక ఆటగాడు లిన్‌ డాన్‌ మాత్రమే. 28 ఏళ్ల వయసు వచ్చే సరికే అతను సాధించిన ఈ ఘనత.. డాన్‌ స్థాయి ఏమిటో చూపిస్తుంది. ఇన్నేళ్లలో మరే ఆటగాడికి సాధ్యం కాని రీతిలో అతను ప్రదర్శించిన ఆట డాన్‌ను బాడ్మింటన్‌ దిగ్గజంగా మార్చింది. ఒలింపిక్స్‌లో స్వర్ణాన్ని నిలబెట్టుకున్న ఏకైక షట్లర్‌ డాన్‌ మాత్రమే. 2008లో బీజింగ్‌లో సొంత అభిమానుల సమక్షంలో పసిడి సాధించిన అతను 2012 లండన్‌ ఒలింపిక్స్‌లోనూ కనకాన్ని సొంతం చేసుకున్నాడు. ఐదుసార్లు ప్రపంచ చాంపియన్‌గా నిలవడం కూడా అసాధారణ రికార్డే! మొత్తంగా అంతర్జాతీయ పోటీల్లో 666 విజయాలు, 66 టైటిల్స్‌ లిన్‌ డాన్‌ దిగ్గజ హోదాకు చిరునామాగా నిలిచాయి.  సుదీర్ఘకాలం సత్తా చాటుతూ.. అద్భుతమైన ఫిట్‌నెస్, పదునైన ఆటతో సుదీర్ఘ కాలం పాటు డాన్‌ బ్యాడ్మింటన్‌ను శాసించగలిగాడు. సరిగ్గా చెప్పాలంటే వేర్వేరు దశకాల్లో అతను భిన్నమైన ప్రత్యర్థులతో తలపడుతూ అన్ని సమయాల్లోనూ తనదైన ముద్ర చూపించాడు. ఉదాహరణకు డాన్‌ను ఎదుర్కొన్న భారత షట్లర్లను చూస్తే అతని ఆట ఏమిటో అర్థమవుతుంది. తన 17 ఏళ్ల వయసులో 2001లో అతను పుల్లెల గోపీచంద్‌కు ప్రత్యర్థిగా బరిలోకి దిగాడు. తన కెరీర్‌ అత్యుత్తమంగా సాగుతున్న  2000 మధ్యకాలంలో అనూప్‌ శ్రీధర్, అరవింద్‌ భట్‌లాంటి వారితో తలపడ్డాడు. ఆ దశాబ్దం చివర్లో పారుపల్లి కశ్యప్‌నూ ఓడించాడు. 2010 దాటాక భారత స్టార్‌ ప్లేయర్లు కిడాంబి శ్రీకాంత్, హెచ్‌ఎస్‌ ప్రణయ్, సాయిప్రణీత్‌లను డాన్‌ ఎదుర్కొన్నాడు. ఇక 2018కి వచ్చేసరికి భారత యువ ఆటగాడు లక్ష్య సేన్‌తోనూ కోర్టులో పోటీ పడ్డాడు. అటాకింగ్‌కి మారు పేరుగా డాన్‌ తన ప్రత్యర్థులపై చెలరేగాడు. పదిసార్లు షటిల్‌ గాల్లోకి లేస్తే తొమ్మిదిసార్లు డాన్‌ జంప్‌ చేసి స్మాష్‌ కొట్టడం సహజం. అదే అతని శైలి అంటూ మాజీ ఆటగాడు అనూప్‌ శ్రీధర్‌ కితాబు ఇచ్చాడు. బాడ్మింటన్‌లో లిన్‌ డాన్‌ అత్యుత్తమ ఆటగాడు అన్నది మరో మాటకు తావులేని స్టేట్‌మెంట్‌! టెన్నిస్‌లోనైనా కొన్నిసార్లు కొందరు ఆటగాళ్ల గురించి చర్చ సాగుతుంది. కానీ ఇక్కడ అలాంటి అవకాశమే లేదు అని అరవింద్‌ భట్‌ చెప్పాడు.  సంగీతం నుంచి షటిల్‌ వరకు.. చిన్నతనంలో పియానో బాగా వాయించడం చూసి తల్లిదండ్రులు డాన్‌ను సంగీతంలోనే కొనసాగమని ప్రోత్సహించారు. అయితే అతను మాత్రం దానిని సరదాకే పరిమితం చేసి బ్యాడ్మింటన్‌ రాకెట్‌ పట్టాడు. అతనిలోని సహజ ప్రతిభ ప్రత్యేక శిక్షణ అవసరం లేకుండానే దూసుకుపోయేలా చేసింది. చైనా ప్రభుత్వ అధీనంలో పనిచేసే ఆర్మీ స్పోర్ట్స్‌ టీమ్‌ దృష్టి డాన్‌పై పడిన తర్వాత మళ్లీ వెనుదిరిగి చూడాల్సిన అవసరం లేకపోయింది. ఆసియా జూనియర్‌ చాంపియన్‌షిప్‌లో విజేతగా నిలిచిన తన రాకను ఘనంగా చాటిన డాన్‌ ఆ తర్వాత అదే జోరుతో అద్భుతాలు చేశాడు. వరుస విజయాలతో 21 ఏళ్లకే తొలిసారి ర్యాంకింగ్స్‌లో వరల్డ్‌ నంబర్‌వన్‌గా నిలిచాడు.  చిరకాల ప్రత్యర్థితో.. ప్రపంచ బ్యాడ్మింటన్‌లో అత్యంత ఆసక్తికరమైన, సమ ఉజ్జీల సమరాలు అంటే.. లిన్‌ డాన్‌ – లీ చోంగ్‌ వీ (మలేసియా) మధ్య జరిగిన మ్యాచ్‌ల గురించే చెప్పాలి. ఒక తరం పాటు వీరిద్దరి మధ్య సాగిన పోటీ షటిల్‌ అభిమానులకు ఆనందాన్ని పంచింది. ఒలింపిక్స్, వరల్డ్‌ చాంపియన్‌షిప్‌ వంటి ప్రతిష్ఠాత్మక టోర్నీలో ఈ ఇద్దరి మధ్య సాగిన హోరాహోరీ మ్యాచ్‌ల గురించి ఎంత చెప్పినా తక్కువే. పోలిస్తే లీ చోంగ్‌ వీ అత్యధిక అంతర్జాతీయ విజయాలు (732), అత్యధిక వారాలు వరల్డ్‌ నంబర్‌వన్‌ (348) ఘనత సాధించాడు. ప్రతిభ, సాంకేతికపరంగా చూస్తే డాన్‌ కంటే చోంగ్‌ వీ ఎంతో ముందుంటాడు. కానీ కోర్టులోకి దిగేసరికి మాత్రం డాన్‌ ఒక్కసారిగా పూనకం వచ్చినవాడిలా మారిపోతాడు అనేది పుల్లెల గోపీచంద్‌ అభిప్రాయం. నిజంగానే ఓవరాల్‌ రికార్డు అలాగే ఉంది. వీరిద్దరూ 40 సార్లు తలపడగా లిన్‌ డాన్‌ 28–12తో ఆధిక్యం ప్రదర్శించాడు. అయితే ఈ అంకెలు చూస్తే అంతా ఏకపక్షంగా కనిపించినా.. వాస్తవం అది కాదు. ఒక్కో పాయింట్‌ కోసం, సుదీర్ఘ ర్యాలీలతో వీరిద్దరూ పోరాడిన తీరు ఆయా మ్యాచ్‌లను అద్భుతాలుగా నిలిపాయి. వీరిద్దరి మధ్య జరిగిన 2012 ఒలింపిక్స్‌ ఫైనల్‌ మ్యాచ్‌ బ్యాడ్మింటన్‌ చరిత్రలోనే అత్యుత్తమ మ్యాచ్‌లలో ఒకటిగా నిలిచిపోయింది. మరో చర్చ లేకుండా లిన్‌ డాన్‌ మాత్రమే బ్యాడ్మింటన్‌ చరిత్రలో అత్యుత్తమ ఆటగాడు అంటూ లీ చోంగ్‌ వీ చేసిన ప్రశంస డాన్‌ ప్రతిభకు అందిన సర్టిఫికెట్‌గా చెప్పొచ్చు. ఈ ఏడాది మే నెలలో ప్రపంచ బ్యాడ్మింటన్‌ సమాఖ్య (బీడబ్ల్యూఎఫ్‌) తమ హాల్‌ ఆఫ్‌ ఫేమ్‌లో ఒకేసారి ఈ ఇద్దరు స్టార్లను చేర్చడం విశేషం.  కోర్టులోనే ప్రేమ.. బ్యాడ్మింటన్‌లో సహచర క్రీడాకారిణి గ్జి గ్జింగ్‌ఫాంగ్‌తో ఏడేళ్ల పాటు డేటింగ్‌ చేసిన అనంతరం డాన్‌ ఆమెను పెళ్లి చేసుకున్నాడు. గ్జింగ్‌ఫాంగ్‌ కూడా రెండుసార్లు ప్రపంచ చాంపియన్‌గా నిలవడంతో పాటు 2008 బీజింగ్‌ ఒలింపిక్స్‌లో రజత పతకం సాధించింది. మాడ్రిడ్‌లో జరిగిన 2006 వరల్డ్‌ చాంపియన్‌షిప్‌ సింగిల్స్‌ పురుషుల, మహిళల విభాగాల్లో వీరిద్దరూ విజేతలుగా నిలిచాక ప్రేమబంధం మరింత బలపడింది. ఆటలో ఏ స్థాయికి ఎదిగినా చదువులో కూడా డాన్‌ చురుగ్గా ఉండేవాడు. కెరీర్‌లో ఉచ్ఛ దశలో ఉన్న సమయంలోనే అతను హువాఖియో యూనివర్సిటీ నుంచి మాస్టర్స్‌ డిగ్రీ పూర్తి చేశాడు. తద్వారా ఆటగాడిగా ఉంటూనే పోస్ట్‌ గ్రాడ్యుయేషన్‌ చేసిన తొలి చైనా ప్లేయర్‌గా నిలిచాడు. 2012లో రెండోసారి ఒలింపిక్స్‌ పతకం గెలిచాక లిన్‌ డాన్‌ బయోగ్రఫీ వచ్చింది. ‘అన్‌టిల్‌ ద ఎండ్‌ ఆఫ్‌ ద వరల్డ్‌’ పేరుతో వచ్చిన ఈ పుస్తకం ఎంతో మంది యువకులకు స్ఫూర్తిగా నిలిచి అత్యంత ఆదరణ పొందింది.  - మొహమ్మద్‌ అబ్దుల్‌ హాది  చదవండి: భారత మహిళలకు చేజారిన విజయం  టైటిల్‌కు అడుగు దూరంలో... 

KP Chowdary Case: తమ కూతురికి డ్రగ్స్‌ కేసుతో ఎలాంటి సంబంధం లేదని బ్యాడ్మింటన్‌ ప్లేయర్‌ సిక్కిరెడ్డి తల్లి మాధవి స్పష్టం చేశారు. కనీస విచారణ చేయకుండా.. తన ఆటతో దేశానికి పేరు ప్రఖ్యాతలు తెచ్చిన సిక్కిరెడ్డి పేరును కస్టడీ రిపోర్ట్ లో పెట్టడం సరికాదని పేర్కొన్నాడు. కాగా ‘కబాలి’ సినిమా తెలుగు నిర్మాత కేపీ చౌదరిని డ్రగ్స్‌ కేసులో పోలీసులు అరెస్టు చేసిన విషయం తెలిసిందే. పలువురు సెలబ్రిటీలతో అతడికి సత్సంబంధాలు ఉన్నాయన్న వార్తలు టాలీవుడ్‌లో ప్రకంపనలు రేపుతున్నాయి. అదే విధంగా కస్టడీ రిపోర్టులో బ్యాడ్మింటన్‌ క్రీడాకారిణి సిక్కిరెడ్డి పేరు ఉండటం విస్మయపరిచింది. ఈ నేపథ్యంలో ఆమె తల్లి మాధవి మీడియాతో మాట్లాడారు. కేపీ చౌదరితో తమ బిడ్డకు అసలు పరిచయమే లేదని తెలిపారు. ఇల్లు కావాలంటే వారం రోజుల పాటు కేపీ చౌదరిని తమ నివాసంలో ఉండమని చెప్పామే తప్ప అతడు ఇలాంటి వాడని తెలియదని వాపోయారు. వారం రోజులు ఇల్లు కావాలంటే ‘‘మాకు 2011 నుంచి కేపీ చౌదరి తెలుసు. ఒక వారం రోజుల పాటు ఇల్లు కావాలంటే స్నేహితహిల్స్లో ఉన్న మా ఇంట్లో ఉండమని చెప్పాను. కానీ అతడికి డ్రగ్స్ అలవాటు ఉందని మాకు తెలియదు. ఇప్పటికే పోలీసులు వచ్చి స్నేహిత హిల్స్ లో ఉన్న ఇంటి సీసీ ఫుటేజ్ తీసుకున్నారు. సిక్కిరెడ్డికి ఇంకా ఈ విషయం తెలియదు. నా బిడ్డకు కేపీ చౌదరికి ఎలాంటి పరిచయం లేదు. కావాలంటే సీసీ ఫుటేజ్ చూసుకోండి. మా అమ్మాయి పార్టీలకు వెళ్లదు.. మందు అలవాటు లేదు. ఎలాంటి విచారణకైనా మేము సిద్ధం’’ అని సిక్కిరెడ్డి తల్లి మాధవి అన్నారు. చదవండి: ఆమె అందానికి క్లీన్‌బౌల్డ్‌! షేన్‌ వార్న్‌తో బార్‌లో తొలిసారి చూశా.. సంపాదనలోనూ పెను సంచలనం.. విండీస్‌ను మట్టికరిపించిన పసికూన

మాట వినకపోతే మాట పలకలేము. మాటతో నిండిన ఈ ప్రపంచంలో మాట లేకపోతే శూన్యతే. సోను ఆనంద్‌ శర్మ ఆ శూన్యత నుంచే బయలుదేరింది. పూర్తి బధిరత్వం వల్ల మాటకు కూడా దూరమైన సోను ఈ ప్రపంచంతో బ్యాట్‌తోనే మాట్లాడాలనుకుంది. బధిర బాడ్మింటన్‌ క్రీడాకారిణిగా సోనువి ఘన విజయాలు. ఆ తర్వాత కోచ్‌గా మారి దేశానికి ఎందరో క్రీడాకారులనిచ్చింది. కాని ఇదంతా సులభమా? బధిరత్వం ఉంటే ఇన్ని ఆటంకాలా? దివ్యాంగుల గెలుపు కథల్లో సోను కథ ముఖ్యమైనది. ‘పూర్తిగా వినపడకపోతే ఏమవుతుందో తెలుసా?’ అని అడుగుతుంది సోను ఆనంద్‌ శర్మ. పూర్తిగా వినపడని వారు దానికి పూర్తి సమాధానం చెప్పలేరు. ఎందుకంటే పూర్తిగా వినపడని వారికే ఆ బాధ తీవ్రత తెలుస్తుంది. ‘వినడం వల్లే భాష మాట్లాడతాం. వాక్యాన్ని నిర్మిస్తాం. గ్రామర్‌ నేర్చుకుంటాం. పూర్తి వాక్యం రాస్తాం. పూర్తిగా వినపడకపోతే మీరు మాట్లాడలేరు. రాయలేరు. గ్రామర్‌తో సరిగ్గా రాయలేరు’ అంటుందామె. 47 ఏళ్ల సోను ఆనంద్‌ శర్మ ‘డెఫ్లింపిక్స్‌’ (బధిరులకు జరిగే ఒలింపిక్స్‌)లో బాడ్మింటన్‌ క్రీడాకారిణిగా ఈ దేశానికి పతకాలు తెచ్చింది. ఆ తర్వాత కోచ్‌గా మారి శిష్యులను తయారు చేసి పతకాలను తెస్తోంది. అయినప్పటికీ ఆమె ఒక బధిరురాలిగా వివక్ష ఎదుర్కొంటూనే ఉంది. ‘ఒలింపిక్స్‌లో పతకాలు సాధిస్తే ప్రభుత్వం పది లక్షలు ఇస్తుంది. బధిరుల ఒలింపిక్స్‌లో నేను పతకాలు సాధించాను. నా మెడల్స్‌ కూడా అంతకు సమానమే. అయినా నాకు డబ్బు రాలేదు’ అంటుందామె. అంతే కాదు... క్రీడాకారుల పెన్షన్‌లు, నజరానాలు అన్నీ కూడా అన్నీ సవ్యంగా ఉన్నవారికే. దివ్యాంగులకు వివక్షే. ‘అయినా సరే నేను నా దేశం కోసం పని చేస్తూనే ఉంటాను’ అంటుంది సోను. సైన్‌ లాంగ్వేజ్‌ ఎక్కడ? సోను ఆనంద్‌ శర్మది న్యూఢిల్లీ. పుట్టు బధిరురాలు. క్లాసుకు వెళితే టీచర్లకు సైన్‌ లాంగ్వేజ్‌ వచ్చేది కాదు. ఈమెకు పాఠాలు వినపడేవి కావు. ‘మన దేశంలో ఆరున్నర కోట్ల మంది పూర్తి బధిరులు లేదా పాక్షిక బధిరులు. వారిలో 50 లక్షల మంది పిల్లలు. అయినా మన దేశంలో కేవలం 700 స్కూళ్లలోనే సైన్‌ లాంగ్వేజ్‌లో చదువు చెప్తారు. సైన్‌ లాంగ్వేజ్‌ను అధికారిక భాషగా ప్రకటిస్తే సమస్య చాలామటుకు తీరుతుంది. కాని ప్రకటించరు. చదువు రాకపోతే బధిరులు జీవితాంతం ఇబ్బంది పడుతూనే ఉండాలి’ అంటుందామె. ఇప్పుడు ఆమె ఢిల్లీ టూరిజంలో ఉద్యోగం చేస్తుంది. మొత్తం డిజిటల్‌ కమ్యూనికేషనే జరుగుతుంది. సోను కమ్యూనికేట్‌ చేస్తుంది కాని భాష మెరుగ్గా ఉండదు. ‘అందుకని నన్ను ఒకలా చూస్తారు కొలీగ్స్‌’ అంటుందామె.   10 ఏళ్ల వయసు నుంచి పాఠాలు అర్థం కాకపోవడం వల్ల సోను బాడ్మింటన్‌తో ఆ వెలితి పూడ్చుకోవాలని అనుకుంది. ‘కాని మాకు మంచి కోచ్‌లు దొరికేవారు కాదు. కోచ్‌లు దొరికినా వారి దృష్టి నార్మల్‌ ఆటగాళ్ల మీద ఉండేది. బధిరుల మీద ఫోకస్‌ ఉండేది కాదు. అందుకని నన్ను నేను నమ్ముకున్నాను. రోజూ ఉదయం నుంచి రాత్రి దాకా ప్రాక్టీసు చేసేదాన్ని. మాది మధ్యతరగతి కుటుంబం. స్కూటర్‌ కూడా లేదు. బస్‌లో కోర్టుకు తిరుగుతుంటే మా తల్లిదండ్రులు భయపడేవారు... ఆడపిల్లనని... మాటలు రావని. మా నాన్న ఆఫీస్‌ నుంచి వచ్చి నా కోసం నేను ప్రాక్టీసు చేసే చోట కాచుకుని కూచునేవాడు’ అని గుర్తు చేసుకుంది సోను. ఆ శ్రమ వృథా పోలేదు. 1997 సమ్మర్‌ డెఫ్లింపిక్స్‌ నుంచి 2009 సమ్మర్‌ డెఫ్లింపిక్స్‌ వరకూ దేశం తరఫున ఆడి పతకాల పంట పండించింది సోను ఆనంద్‌ శర్మ. 2014 నుంచి కోచ్‌ శిష్యుల ద్వారా పతకాలు తెచ్చి పెడుతోంది.  బధిర బాడ్మింటన్‌ క్రీడాకారిణి, అర్జున అవార్డు గ్రహీత జెర్న్‌లిన్‌ అనిక ఈమె శిష్యురాలే. ‘దివ్యాంగులను తక్కువ అంచనా వేయొద్దు. వారి సామర్థ్యాల పై సానుభూతి వద్దు. మమ్మల్ని గ్రహాంతర వాసుల్లా చూడొద్దు. మీలాగే సాటి మనుషులుగా చూడండి’ అంటుంది సోను శర్మ. వారికి అనువుగా సమాజం మారాలి. వారి కోసం కూడా ఈ సమాజం ఉంది. వారి సమాన వాటాను ఈ అంతర్జాతీయ దివ్యాంగుల దినోత్సవం సందర్భంగా గుర్తు చేసుకుందాం.

భారత స్టార్‌ బ్యాడ్మింటన్ ప్లేయర్‌ హెచ్ ఎస్ ప్రణయ్ మరో రెండు రోజుల్లో పెళ్లి పీటలెక్కబోతున్నాడు. ఇటీవలే బీడబ్ల్యూఎఫ్ వరల్డ్ టూర్ ర్యాంకింగ్స్‌లో టాప్‌ లేపిన (నంబర్‌ వన్‌ ర్యాంక్‌) ప్రణయ్.. తన గర్ల్‌ఫ్రెండ్ శ్వేతా గోమ్స్‌ని వివాహం చేసుకోబోతున్నట్లు ట్విటర్‌ వేదికగా అనౌన్స్‌ చేశాడు. ప్రణయ్‌ తన ట్వీట్‌లో ఫియాన్సీ శ్వేతా గోమ్స్‌తో దిగిన ప్రీ వెడ్డింగ్ ఫోటోలను షేర్ చేశాడు. ఈ ఫోటోలు ప్రస్తుతం నెట్టింట వైరలవుతున్నాయి.  30 ఏళ్ల ప్రణయ్‌ ఈ ఏడాది భీకర ఫామ్‌లో కొనసాగుతున్నాడు. మే నెలలో జరిగిన థామప్‌ కప్‌లో భారత్‌ స్వర్ణం సాధించడంలో ప్రణయ్‌ కీలకపాత్ర పోషించాడు. అలాగే ఇటీవలే జరిగిన బీడబ్ల్యూఎఫ్ వరల్డ్ ఛాంపియన్‌షిప్స్‌, జపాన్‌ ఓపెన్‌లోనూ ప్రణయ్‌ సత్తా చాటాడు. ప్రణయ్‌ హైదరాబాద్‌లోని పుల్లెల గోపిచంద్‌ అకాడమీలో శిక్షణ తీసుకుని రాటుదేలాడు. ప్రణయ్‌ స్వస్థలం కేరళలోని తిరువనంతపురం.  All that you are is all that I will ever need ♥️ #3daystogo pic.twitter.com/SegXJdv5ES — PRANNOY HS (@PRANNOYHSPRI) September 10, 2022

వరంగల్‌ స్పోర్ట్స్‌: అవార్డునే ఇంటి పేరుగా మలుచుకున్న అర్జున పిచ్చయ్య ఇకలేరు. నాలుగు రోజులుగా అనారోగ్యంతో బాధపడుతున్న పిచ్చయ్య (104) ఆదివారం మధ్యాహ్నం 1.45 గంటల సమయంలో హనుమకొండ జిల్లా ధర్మసాగర్‌ మండలం రాంపూర్‌ పరిధిలో గల ఢిల్లీ పబ్లిక్‌ స్కూల్‌ ఆవరణలోని తన మనవడి (చిన్న కుమార్తె కొడుకు) ఇంట్లో తుది శ్వాస విడిచారు. ఆయన అసలు పేరు జమ్మలమడక పిచ్చయ్య. ఆంధ్రప్రదేశ్‌లోని కృష్ణా జిల్లా కూచిపూడి గ్రామంలో 1918లో జన్మించారు. బాల్యం, ప్రాథమిక విద్యాభ్యాసం బందరులో గడిచింది. క్రీడలపై ఉన్న అమితాసక్తి కారణంగా టెన్త్‌ ఫెయిల్‌ అయ్యారు. పదిహేనేళ్ల వయసు వరకు ఫుట్‌బాల్‌ ఎక్కువగా ఆడేవారు. ఆ తర్వాత అన్నయ్య నారాయణరావు స్ఫూర్తితో బాల్‌ బ్యాడ్మింటన్‌ వైపు మొగ్గు చూపారు. ఆ తర్వాత వెనుదిరిగి చూడకుండా ఆ క్రీడలో అర్జున అవార్డును అందుకునే స్థాయికి ఎదిగారు. 1970లో కేంద్ర ప్రభుత్వం ఈ అవార్డును ప్రకటించగా.. 1972లో అప్పటి రాష్ట్రపతి వీవీ గిరి చేతుల మీదుగా స్వీకరించారు. ఉద్యోగ ప్రయత్నాల్లో భాగంగా స్పోర్ట్స్‌ కోటాలో ఆజంజాహి మిల్లులో ఉద్యోగం కోసం 1947లో వరంగల్‌కు వచ్చిన పిచ్చయ్య ఇక్కడే స్థిరపడిపోయారు. ఈనెల 21న పిచ్చయ్య 104వ జన్మదిన వేడుకలు పలువురు క్రీడ, ఇతర ప్రముఖుల సమక్షంలో ఘనంగా జరిగాయి. ఆ రోజు అందరితో ఉత్సాహంగా మాట్లాడిన ఆయన ఆ తర్వాత జ్వరంతో బాధపడుతూ మంచం పట్టి ఆదివారం కన్ను మూశారు. పిచ్చయ్యకు  ఇద్దరు కుమార్తెలు కాగా, భార్య సత్యవతి 2007లో మరణించారు.

అమలాపురం: ‘అనుకున్న దానికన్నా ఉత్తమంగా ఆడాం. క్వార్టర్స్‌కు వచ్చి ఉంటే పతకం సాధించేవాళ్లం. మూడు మ్యాచ్‌లలో రెండు గెలిచినా క్వార్టర్స్‌కు అవకాశం రాలేదు. మా ప్రతిభ నిరాశపరచలేదు. ఫలితం అనుకూలం రాలేనందుకు బాధగా ఉన్నా 2024లో పారిస్‌లో జరిగే ఒలింపిక్స్‌లో పతకమే లక్ష్యంగా సాధన చేస్తాను’ అని షటిల్‌ బ్యాడ్మింటన్‌ క్రీడాకారుడు సాత్విక్‌ సాయిరాజ్‌ పేర్కొన్నాడు. టోక్యోలో జరిగిన ఒలింపిక్స్‌లో త్రుటిలో క్వార్టర్‌ ఫైనల్స్‌ అవకాశం కోల్పోయిన సాత్విక్‌ శనివారం సొంత ఇంటికి చేరాడు. ఈ సందర్భంగా అమలాపురంలో ఘన స్వాగతం లభించింది. ఆయన ‘సాక్షి’తో టోక్యో అనుభవాలను పంచుకున్నాడు. సాత్విక్‌ మాట్లాడుతూ..   ప్రణాళికతో సిద్ధమవుతా.. ‘చిరకాల కోరిక తీరింది. ఒలింపిక్స్‌ వేదికపై మన వాళ్లు ఎవరైనా ఆడుతుంటే టీవీలో ఆసక్తిగా చూసేవాడిని. అలాంటిది నేనే ఆడుతున్నప్పుడు చాలా సంతోషం కలిగింది. నిబంధన మేరకు ఏ జట్టు ఎక్కువ సెట్లు గెలిచారనే అంశం పరిగణలోకి తీసుకోవడం వల్ల క్వార్టర్స్‌ అవకాశం కోల్పోయాం. అయినా ప్రతిభతో క్రీడాభిమానుల మన్నననలు పొందాం. 2024లో పారిస్‌ ఒలింపిక్స్‌కు ఇప్పటి నుంచే సిద్ధమవుతాను. ప్రణాళికతో ఆడుతూ ఫిట్‌నెస్‌ పెంచుకుంటాను. డబుల్స్‌ కోచ్‌ను ఎంపిక చేసుకుని సాధన చేస్తాను. అట్టడుగు స్థాయి నుంచి క్రీడలను ప్రోత్సహిస్తే మనకు ఎక్కువ పతకాలు వస్తాయి. ఇతర దేశాల్లా లాంగ్‌ గోల్‌ పెట్టుకోవాలి. కనీసం నాలుగు, ఎనిమిదేళ్ల తరువాత జరిగే ఒలింపిక్స్‌కు క్రీడాకారులను ఇప్పటి నుంచే సిద్ధం చేయాలి. దీటైన సదుపాయాలుండాలి. అథ్లెటిక్స్‌లో నిరంతరం పోటీలు జరగాలి. ఒడిశా హాకీని దత్తత చేసుకున్నట్టుగా ఒక్కొక్క రాష్ట్రం ఒక్కొక్క క్రీడను దత్తత చేసుకుంటే బాగుంటుందని భావిస్తున్నాను.’ అని సాత్విక్‌ సాయిరాజ్‌ తెలిపాడు.  

సాక్షి, కాకినాడ: భారత బ్యాడ్మింటన్‌ స్టార్‌ ప్లేయర్, హైదరాబాద్‌ షట్లర్‌ భమిడిపాటి సాయిప్రణీత్‌ ఓ ఇంటివాడయ్యాడు. ఆదివారం కాకినాడలో సాఫ్ట్‌వేర్‌ ఇంజనీర్‌ శ్వేత జయంతితో సాయిప్రణీత్‌ వివాహం జరిగింది. సాత్విక్‌ సాయిరాజు సహా పలువురు బ్యాడ్మింటన్‌ క్రీడాకారులు ఈ పెళ్లికి హాజరయ్యారు. సాయిప్రణీత్‌-శ్వేత జంటకు సోషల్‌ మీడియా ద్వారా వివిధ రంగాల ప్రముఖులు శుభాకాంక్షలు తెలిపారు. ఈ ఏడాది సాయిప్రణీత్‌ అంతర్జాతీయస్థాయిలో అద్భుత ప్రదర్శన చేశాడు. ప్రపంచ చాంపియన్‌షిప్‌లో 36 ఏళ్ల తర్వాత పురుషుల సింగిల్స్‌లో కాంస్యం గెలిచిన భారత ప్లేయర్‌గా నిలిచాడు. కొన్నేళ్లుగా నిలకడగా రాణిస్తున్న సాయిప్రణీత్‌ను ఈ ఏడాది కేంద్ర ప్రభుత్వం ‘అర్జున అవార్డు’తో సత్కరించింది. 

గ్వాంగ్జు (కొరియా): సీజన్‌లో తొలి టైటిల్‌ కోసం ఎదురుచూస్తున్న భారత స్టార్‌ షట్లర్‌ కిడాంబి శ్రీకాంత్‌... నేటి నుంచి మొదలయ్యే కొరియా మాస్టర్స్‌ వరల్డ్‌ టూర్‌ సూపర్‌– 300 టోర్నమెంట్‌లో తన అదృష్టాన్ని పరీక్షించుకోనున్నాడు. ఇప్పటికే భారత స్టార్‌ షట్లర్లు పీవీ సింధు, సాయి ప్రణీత్‌ దూరంకాగా... తాజాగా వారి జాబితాలో సైనా నెహ్వాల్‌ చేరింది. వ్యక్తిగత కారణాలతో ఆమె టోర్నీ నుంచి వైదొలిగింది. దీంతో మహిళల విభాగంలో భారత ప్రాతినిధ్యం లేకుండా పోయింది. మరోవైపు హాంకాంగ్‌ ఓపెన్‌లో సెమీస్‌ చేరిన శ్రీకాంత్‌ ఆ ప్రదర్శనను పునరావృతం చేయా లనే పట్టుదలతో ఉన్నాడు. అతడు తన తొలి రౌండ్‌ పోరులో వోంగ్‌ వింగ్‌ కి విన్సెంట్‌ (హాంకాంగ్‌)ను ఎదుర్కోనున్నాడు. ముఖాముఖి పోరులో శ్రీకాంత్‌ 10–3తో ప్రత్యర్థిపై స్పష్టమైన ఆధిక్యంలో ఉన్నాడు. ఇతర భారత షట్లర్లలో ప్రపంచ 16వ ర్యాంకర్‌ సమీర్‌ వర్మ, అతని సోదరుడు సౌరభ్‌ వర్మలు బరిలో ఉన్నారు. తొలి రౌండ్‌లో కజుమస సకాయ్‌ (జపాన్‌)తో సమీర్‌ తలపడుతుండగా... సౌరభ్‌ వర్మ క్వాలిఫయర్‌తో తన అదృష్టాన్ని పరీక్షించుకోనున్నాడు.

వ్లాదివోస్తోక్‌(రష్యా): తెలుగు అమ్మాయి జక్కంపూడి మేఘన రష్యా ఓపెన్‌ సూపర్‌–100 బ్యాడ్మింటన్‌ టోర్నీ మహిళల, మిక్స్‌డ్‌ డబుల్స్‌లో సెమీస్‌కు దూసుకెళ్లింది. శుక్రవారం జరిగిన మిక్స్‌డ్‌ డబుల్స్‌ మ్యాచ్‌లో ఎనిమిదో సీడ్‌ మేఘన–ధ్రువ్‌ కపిల(భారత్‌) ద్వయం 21–3, 21–12తో స్థానిక జోడీ మస్కిమ్‌ మకలోవ్‌–ఎక్తరినా రియాజన్చెవాను చిత్తు చేసింది. తదుపరి రౌండ్‌లో ఏడో సీడ్‌ అద్నాన్‌ మౌలానా–మిచెల్‌ క్రిస్టీన్‌ బందాసో (ఇండోనేషియా) జోడీతో తలపడుతుంది. మహిళల డబుల్స్‌ క్వార్టర్‌ ఫైనల్‌ మ్యాచ్‌లో టాప్‌ సీడ్‌ మేఘన– పూర్వీషా రామ్‌(భారత్‌) జోడీ 21–19, 21–11తో విక్టోరియా కొజిరెవా–మారియా సుఖోవా(రష్యా) జంట పై నెగ్గి తుది నాలుగులోకి చేరింది. తదుపరి రౌండ్‌లో నాలుగో సీడ్‌ మికి కషిహర– మియుకి కటో(జపాన్‌) జంటతో తలపడుతుంది. కాగా, మహిళల సింగిల్స్‌లో రితుపర్ణ దాస్‌10–21, 21–16, 16–21తో టాప్‌ సీడ్‌ క్రిస్టీ గిల్మోర్‌(స్కాట్లాండ్‌), పురుషుల సింగిల్స్‌లో సిరిల్‌ వర్మ 11–21, 27–29తో ఇషాన్‌ మౌలానా ముస్తఫా (ఇండోనేషియా) చేతిలో పోరాడి ఓడారు. దీంతో ఈ రెండు విభాగాల్లో భారత్‌ ప్రస్థానం ముగిసింది.   

సాక్షి, హైదరాబాద్‌: భారత అగ్రశ్రేణి షట్లర్, ఒలింపిక్స్‌ రజత పతక విజేత పీవీ సింధుకు గత కొంత కాలంగా చెప్పుకోదగ్గ ఫలితాలు రాలేదు. 2019లో ఆమె ఆరు టోర్నమెంట్‌లు ఆడగా ఒక్కదాంట్లో కూడా ఆమె ఫైనల్‌ చేరలేక పోయింది. రెండు టోర్నీలలో సెమీస్‌ వరకు రాగలిగింది. అయితే ఏడాది రెండో అర్ధ భాగంలో తాను మంచి ఫలితాలు సాధిస్తానని ఆమె విశ్వాసం వ్యక్తం చేసింది. ఈ నెల 16నుంచి జరిగే ఇండోనేసియా ఓపెన్‌నుంచి విజయాల బాట పడతానని సింధు చెప్పింది. ‘ఈ సీజన్‌ నిజంగా గొప్పగా ఏమీ సాగలేదు. అయితే ఫర్వాలేదని చెప్పగలను. నేను సంతృప్తిగానే ఉన్నా. అయితే ఇంకా మెరుగ్గా ఆడాల్సిందని మాత్రం చెప్పగలను. నా వైపునుంచి లోపాలేమీ లేవు. కానీ కొన్ని సార్లు మనం 100 శాతం ప్రదర్శన ఇవ్వకపోవచ్చు. ఆటలో తప్పులు కూడా జరిగిపోతుంటాయి. ఫలితాలతో కొంత బాధపడ్డా ఎప్పుడైనా వచ్చే సారి మరో అవకాశం ఉంటుందనే విషయం మరచిపోవద్దు’ అని సింధు వ్యాఖ్యానించింది. తనకు దాదాపు నెల రోజుల విరామం లభించిందని, ఈ సమయంలో ఆటతీరు మెరుగుపర్చుకోవడంతో పాటు ఫిట్‌నెస్‌పై కూడా బాగా దృష్టి పెట్టినట్లు ఆమె పేర్కొంది. ‘ఇప్పుడు ఆటతో పాటు మానసికంగా కూడా దృఢంగా ఉండటం అవసరం. ఎందుకంటే మ్యాచ్‌లు సుదీర్ఘంగా సాగుతున్నాయి. అన్నింటికీ సిద్ధంగా ఉండాలి. వీడియో రికార్డింగ్‌లతో ప్రత్యర్థులు మన ఆటను పట్టేస్తున్నారు. కాబట్టి మళ్లీ మళ్లీ మన ఆటను, శైలిని మార్చుకోవాల్సి వస్తోంది. ఎంతో శ్రమిస్తే గానీ ఒక్కో పాయింట్‌ లభించడం లేదు’ అని సింధు విశ్లేషించింది. ప్రస్తుతం సింధు కొరియా కోచ్‌ కిమ్‌ జి హ్యూన్‌ పర్యవేక్షణలో శిక్షణ తీసుకుంటోంది.

న్యూఢిల్లీ: భారత స్టార్‌ బ్యాడ్మింటన్‌ క్రీడాకారిణి, తెలుగు తేజం పీవీ సింధు జాక్‌పాట్‌ కొట్టింది. చైనాకు చెందిన ప్రముఖ క్రీడా పరికరా ల తయారీ సంస్థ లీ నింగ్‌తో నాలుగేళ్ల కాలానికి ప్రచారకర్తగా రూ.50కోట్లకు ఒప్పందం కుదుర్చుకుంది. ఇందు లో రూ.40కోట్లు స్పాన్సర్‌షిప్‌కు కాగా, మిగిలిన సొమ్ము సింధుకు అవసరమైన క్రీడాసౌకర్యాల కోసం ఇస్తారు. కాగా, గత నెలలో మరో భారత స్టార్‌ షట్లర్‌ కిదాంబి శ్రీకాంత్‌తో సైతం ఇదే కంపెనీ రూ.35 కోట్లకు ఒప్పందం కుదుర్చుకున్న సంగతి తెలిసిందే. ప్రస్తుతం సింధుకు ఇవ్వజూపిన సొమ్ము ప్రపంచ బ్యాడ్మింటన్‌ చరిత్రలోనే భారీ మొత్తంగా భారత్‌లో లీ నింగ్‌ సంస్థకు భాగస్వామి, సన్‌లైట్‌ స్పోర్ట్స్‌ ప్రైవేట్‌ లిమిటెడ్‌ డైరెక్టర్‌ మహేంద్ర కపూర్‌ తెలిపాడు. ఇది ప్యూమా సంస్థతో భారత క్రికెట్‌ జట్టు కెప్టెన్‌ కోహ్లీ (ఎనిమిదేళ్ల కాలానికి రూ.100కోట్లు) చేసుకున్న ఒప్పందానికి ఇంచుమించు సమాన మొత్తమని పేర్కొన్నాడు. లీనింగ్‌తో సింధు ఒప్పందం కుదుర్చుకోవడం ఇది రెండోసారి.

వరంగల్‌ స్పోర్ట్స్‌ : క్రీడాకారుడికి సాధించాలనే తపన, అందుకు తగిన కృషి ఉంటేనే సరిపోదు,  అనుకున్న క్రీడల్లో రాణించాలంటే ఆటల్లో కొత్త మెళకవల కోసం సరికొత్తగా ఆలోచించే సృజనాత్మకమైన శక్తి కలిగి ఉండాలని ఇండియన్‌ డబుల్స్‌ షటిల్‌ బ్యాడ్మింటన్‌ క్రీడాకారుడు బుస్సు సుమిత్‌రెడ్డి అన్నారు. హన్మకొండ భీమారంలో సమీపంలోని కిట్స్‌ ఇంజనీరింగ్‌ కళాశాలలో జరుగుతున్న క్రీడా వార్షికోత్సవానికి ముఖ్యఅతిథిగా హాజరైన సుమిత్‌రెడ్డిని ‘సాక్షి’ పలకరించింది. ఈ సందర్భంగా ఆయన ఒలింపిక్స్‌ స్థాయికి ఎదిగిన తీరుతోపాటు యువ క్రీడాకారులకు పలు సూచనలు అందించారు. అవి ఆయన మాటల్లోనే..  మాది రంగారెడ్డి జిల్లా గున్‌గల్‌. ప్రస్తుతం హైదరాబాద్‌లోని ఆబిడ్స్‌లో ఉంటున్నాం. అమ్మ నిర్మలాదేవి ఆబిడ్స్‌ ప్రభుత్వ బాలికల ఉన్నత పాఠశాలలో వ్యాయామ ఉపాధ్యాయురాలు. నాన్న చంద్రభాస్కర్‌రెడ్డి సైతం వ్యాయామ ఉపాధ్యాయుడే. ఆయన ప్రస్తుతం ధూల్‌పేటలోని జలక్షత్రియ పాఠశాల ప్రిన్సిపాల్‌గా పనిచేస్తున్నారు. ఇద్దరూ వ్యాయామ ఉపాధ్యాయులే కావడం నా అదృష్టంగా భావిస్తా.  నేను మొదటిసారి 2001లో బ్యాడ్మింటన్‌ రాకెట్‌ను పట్టుకున్నా. నా మొదటి కోచ్‌ గోవర్ధన్‌రెడ్డి నాకు క్రీడల్లో ఓనమాలు నేర్పిస్తే, పుల్లెల గోపీచంద్‌ కోచింగ్‌ క్రీడా పరీక్షల్లో ఉత్తీర్ణత సాధించేలా చేసింది. ప్రతిరోజు నాన్న దగ్గరుండి ప్రాక్టీస్‌ చేయించేవాడు. అలా 17 సంవత్సరాల శిక్షణలో ఒలింపిక్స్‌ స్థాయికి ఎదిగాను. అదంతా నాన్న అందించిన ప్రోత్సాహమే. ఇండియా నుంచి షటిల్‌ బ్యాడ్మింటన్‌ డబుల్స్‌లో ఒలింపిక్స్‌లో ఆడే మొదటి అవకాశం నాకు రావడం అవధుల్లేని సంతోషాన్నిచ్చింది. నా జోడి మన్హోత్రితో కలిసి అనేక అంతర్జాతీయ స్థాయి పోటీల్లో మా సత్తా చాటాం. మా ఇద్దరి మధ్య మంచి అవగాహన ఉంటుంది. మన్హోత్రి తో కలిసి 2016 రియో ఒలంపిక్స్‌లో మా శాయశక్తులా ఆడాం. మూడు మ్యాచ్‌ల్లో మొదట  జపాన్‌పై విజయం సాధించాం. అదే ఉత్సాహంతో చైనా, ఇండోనేషియాలతో ఆడినప్పటికీ విజయం సాధించలేకపోయాం. అయినప్పటికీ బలమైన ప్రత్యర్థులకు గట్టి పోటీ ఇచ్చామన్న సంతృప్తి మాత్రం మాకు కలిగింది. వరంగల్‌ వేదికగా గతంలో రెండు రాష్ట్ర స్థాయి టోర్నమెంటుల్లో పాల్గొన్నాను. త్వ రలో వరంగల్‌ మా అత్తారి ఊరు కాబో తుండడం సంతోషంగా ఉంది. మహబూ బాబాద్‌ జిల్లా నర్సింహులపేట మండలం జయపురం గ్రామానికి చెందిన అంతర్జాతీయ బ్యాడ్మింటన్‌  క్రీడాకారిణి నెలకుర్తి సిక్కిరెడ్డితో ఇటీవల నిశ్చితార్థమైంది. ఇద్ద రం క్రీడాకారులం కావడం, అందులోనూ ఇద్దరం బ్యాడ్మింటన్‌ క్రీడాకారులం సంతో షంగా ఉంది’ అని ఆయన వెల్లడించారు.  

‘మహిళలకు ఎన్నో అవకాశాలున్నాయి, ఎదగడానికి ఆకాశమే హద్దు’ అనే మాటలు వినడానికి ఎంత బాగున్నప్పటికీ వాస్తవంలో అలా ఏ మాత్రం లేదంటున్నారు ప్రముఖ బ్యాడ్మింటన్‌ క్రీడాకారిణి గుత్తా జ్వాల. సాధికారత సాధనలో మహిళలకు అడుగడుగునా అవాంతరాలే ఎదురవుతున్నాయని, కెరీర్‌లో నిలదొక్కుకోవడం కంటే మహిళ అయిన కారణంగా ఎదురయ్యే విమర్శలను, వివక్షను ఎదుర్కోవడానికే ఎక్కువ శక్తి అవసరమవుతోందన్నారామె. ‘‘ఫిఫ్టీ– ఫిఫ్టీ అనేది ఒక ముసుగు మాత్రమే. క్రీడాకారుల్లో పది మంది అబ్బాయిలుంటే అమ్మాయిలు ముగ్గురో నలుగురో ఉంటారు. ఆ ముగ్గురు నలుగురిని చూపించి మహిళలకు ఎన్ని అవకాశాలో అని భూతద్దంలో చూపించుకుంటారు. క్రీడారంగంలోకి రావాలనే ఆసక్తి ఉన్న అమ్మాయిలకు కొదవలేదు. అయితే పరిస్థితులే అందుకు అనుకూలంగా లేవు. స్పోర్ట్స్‌ ప్రాక్టీస్‌ చేయడానికి స్టేడియాలున్నాయి. కానీ కోచ్‌లే తగినంతగా లేరు. ప్రభుత్వం కోచ్‌లను నియమించి ట్రైనింగ్‌ ఇప్పిస్తూ, వాటిలో దిగువ స్థాయి బాలికలకు అవకాశం ఇస్తే వారిలో నుంచి ఎంతోమంది క్రీడాకారిణులు వస్తారు. అలాంటి ప్రయత్నమే కనిపించడం లేదు. రాను రాను బ్యాడ్మింటన్‌ రిచ్‌మన్‌ గేమ్‌గా మారిపోతోంది. మా నాన్నలాంటి నాన్న ఉంటే! మనది పితృస్వామ్య సమాజం. కాబట్టి సమాజం మహిళలనే ప్రశ్నిస్తుంది. మహిళలు ప్రశ్నిస్తే సహించలేదు. అమ్మాయి ఇలాగే ఉండాలి... అన్నట్లు కండిషన్‌ అయిపోయింది సొసైటీ. ఆ మైండ్‌సెట్‌ నుంచి సొసైటీ బయటపడాలి. ఉదాహరణకు నన్ను మా నాన్న చాలా లిబరల్‌గా పెంచారు. అప్పట్లో మా నాన్నను అందరూ ‘ఏంటి అలా పెంచుతున్నావు, మగరాయుడిలా ఉంటోంది’ అనేవాళ్లు. మా నాన్న ధైర్యవంతుడు కాబట్టి ఈ రోజు నేను సమాజం ముందు తలెత్తుకుని నిలబడగలిగాను. అలాంటి నాన్నలు లేని అమ్మాయిలు చాలామంది అందరిలో ఒకరిలా జీవించేస్తున్నారు. ఇప్పటి వరకు నేను ఎవరి ముందూ తలదించలేదు. ఆ తత్వాన్ని తలబిరుసుగా ముద్ర వేస్తుంటారు. నా జీవితంలో పాతికేళ్లు బ్యాడ్మింటన్‌ ప్రాక్టీసే ఉంది. నన్ను నేను ప్రూవ్‌ చేసుకుంటూనే ఈ స్థాయికి వచ్చాను. అయినప్పటికీ నా ముఖాన్నే ‘ఈమె ఆడలేదులే’ అన్నారు. నేను దేశం కోసం ఆడాను, దేశానికి విజయాలు తెచ్చాను. పరాయి దేశంలో భారత్‌కు ప్రాతినిధ్యం వహించడంలో ఎంత సంతోషపడ్డానో దేశానికి పతకాలు తెచ్చినప్పుడూ అంతే సంతోషపడ్డాను. అవేవీ కనిపించలేదు ఈ మేల్‌ డామినేషన్‌ సిస్టమ్‌కి. నా కళ్లెదురుగా జరిగే తప్పుల్ని ‘అలా ఎందుకు’ అని ప్రశ్నించడమే వాళ్లకు గుర్తొచ్చేది. దేశంలో నంబర్‌వన్‌ పొజిషన్‌లో ఉన్నప్పుడు కూడా నన్ను అకారణంగా తప్పించారు. కారణం ఒక్కటే! నేను 2006లో కామన్‌వెల్త్‌ గేమ్స్‌లో మెడల్‌ సాధించిన తర్వాత నా గ్రాఫ్‌ పెరిగింది. 2008 బీజింగ్‌ ఒలింపిక్స్‌లో ఆడకుండా తప్పించారు. మనసులో మరేవో కారణాలు పెట్టుకుని, ఫిట్‌నెస్‌ వంకతో తప్పించారు. మగ బ్యాడ్మింటన్‌ ప్లేయర్‌ 30 ఏళ్ల వయసులో కూడా ఆడుతూ మెడల్‌ సాధించినప్పుడు నేను 24 ఏళ్లకే ఫిట్‌నెస్‌ కోల్పోతానా? ఆ తర్వాత 2010లో ఢిల్లీలో జరిగిన కామన్‌వెల్త్‌లో గోల్డ్‌ సాధించాను, 2011 వరల్డ్‌ చాంపియన్‌ షిప్‌లో కాంస్య పతకం వచ్చింది. నిజానికి ఫిట్‌నెస్‌ కోల్పోయి ఉంటే ఇవన్నీ ఎలా సాధ్యమయ్యాయి? ఆ మాటలోనే ఉంది ఆధిపత్యం! ఎన్ని కబుర్లు చెప్పుకున్నా సరే మనది మేల్‌ డామినేషన్‌ సొసైటీ. ‘మహిళలకు ఎన్నో అవకాశాలనిస్తున్నాం’ అనే మాటలోనే ఆధిపత్యం కొట్టొచ్చినట్లు కనిపిస్తోంది. అంటే ఇచ్చే స్థాయిలో వాళ్లు తీసుకోవాల్సిన స్థితిలో మహిళలు ఉన్నారనేగా ఈ మాటలు చెప్పే మగవాళ్ల ఉద్దేశం. మా ఆటలో కూడా మెన్స్‌ డబుల్స్‌ ఉన్నట్లు విమెన్స్‌ డబుల్స్‌ ఉండవు. ఆ బారికేడ్‌ను దాటడానికి ఎంతో శ్రమించాల్సి వచ్చింది. విమెన్స్‌ డబుల్స్‌ గురించి మాట్లాడితే ‘విమెన్‌ సింగిల్స్‌ ఉన్నాయి చాలు కదా’ అంటారు. ఇంకా గట్టిగా అడిగితే మిక్స్‌డ్‌ డబుల్స్‌ పెట్టేవారు.  సాధికారత సాధించాలనే తపన ఉన్న మహిళలకు కొదవ లేదు. తమ చేతిలో ఉన్న అధికారాన్ని కాస్తంత వదులుకోవడానికి సిద్ధంగా లేని మగవాళ్లే ఎక్కువగా ఉన్నారు, అడ్డంకులను ఎదుర్కొని తమను తాము నిరూపించుకోవాలని ప్రయత్నించే వాళ్లంతా తీవ్రమైన వివక్షను ఎదుర్కోవాల్సి వస్తోంది. ఏదైనా అసమానతను ప్రశ్నిస్తే వారికి ఒక ముద్ర వేసేస్తారు. అందుకు ఉదాహరణ నేనే. సోషల్‌ మీడియా విస్తరించడం వల్ల సమాజం నిజస్వరూపం బయటపడుతోంది. ఎంత ఇరుకుగా ఆలోచిస్తారో తెలుస్తోంది. ముఖ్యంగా యూత్‌ ఆలోచనలు ఇలా ఉంటే రాబోయే తరం మహిళ పరిస్థితి ఎలా ఉంటుంది? కమింగ్‌ జనరేషన్‌కి తండ్రులు ఈ యువతే కదా! సొసైటీ ఈ లేబిలింగ్‌ హ్యాబిట్‌ పోనంత వరకు మహిళకు సమానత్వం అనేది సాధ్యం కాదు. సమానత్వం కోసం, సాధికారత కోసం పోరాటమే ఉంటుంది. 21వ శతాబ్దంలో కూడా ఇంకా ఫెమినిజం, సమానవేతనం, వివక్ష, వేధింపులు, సాధికారత సాధన వంటి పదాలు వినిపిస్తున్నాయంటే... ఇందుకు తలదించుకోవాల్సింది మహిళలు కాదు మొత్తం సమాజం. ఈ పదాలు వినిపించని రోజు, వీటి అవసరం లేని రోజు మనం సంపూర్ణ సాధికారత సాధించినట్లు’’. – వాకా మంజులారెడ్డి, సాక్షి ఫీచర్స్‌ ప్రతినిధి మహిళలు జనాభాలో సగభాగం ఉన్నారు, అయినా అవకాశాల్లో మైనారిటీలే. అందుకే మహిళలు సాధికారత సాధించాలంటే ప్రోత్సాహకాలు ఇవ్వాలి, ప్రోత్సాహకరమైన వాతావరణం కల్పించాలి. మహిళలకు తమ మీద తమకు సందేహం ఉండకూడదు. తానిది చేయగలనా అని మనమే సందేహపడితే ఇక ప్రోత్సాహం ఎక్కడ నుంచి లభిస్తుంది? ఎవరైనా వేలెత్తి చూపించగానే బెంబేలు పడిపోవడం మానేయాలి. అమ్మాయిలు తమకు ఇష్టమైన రంగంలో రాణించడానికి ముందడుగు వేయాలి. పరిస్థితులను ఎదుర్కోవడానికి ధైర్యాన్ని సమకూర్చుకోవాలి. ∙సినిమాలలో హీరోయిన్‌ పాత్రతో పోల్చుకోవడం మానేయాలి. ఎందుకంటే మన సినిమాల్లో హీరోయిన్‌ పాత్ర చాలా బలహీనమైనది. ఆమెకు కష్టం వస్తే హీరో వచ్చి రక్షించే సీన్లకోసం, హీరో పాత్రను ఎలివేట్‌ చేయడం కోసం అలా చిత్రీకరిస్తుంటారు. అది కమర్షియల్‌ ఎలిమెంట్‌ కావచ్చు. అమ్మాయిలు ఆ మైండ్‌సెట్‌లో కూరుకుపోకూడదు. కళ్ల ముందు ఏమి జరుగుతున్నా తలదించుకుని వెళ్లిపోతుంటే మంచి అమ్మాయి అనే బిరుదు వస్తుంది. ఆ బిరుదు కోసం ఎవరూ తమ ఉనికిని పణంగా పెట్టకూడదు. ∙ఈ తరం పేరెంట్స్‌ ప్రోగ్రెసివ్‌గా ఆలోచిస్తే... రాబోయే తరం అమ్మాయిలు, అబ్బాయిలకు అవకాశాలలో సమానత్వం వస్తుంది. మహిళలకు సాధికారత అందుబాటులోకి వస్తుంది. పరిస్థితులను మనమే మార్చుకోవాలి ‘రాజకీయాల్లో ఉన్నప్పుడు అన్ని సెక్టార్‌ వాళ్లతో కలసి పనిచేయాలి. వివక్ష ఎదురైనా వ్యక్తిత్వాన్ని పోగొట్టుకోకుండా, మన గౌరవాన్ని మనమే కాపాడుకోవాలి. సమస్యలు అన్ని చోట్లా ఉన్నట్లే రాజకీయాల్లోనూ’ అన్నారు కొత్తూరు గీతామూర్తి.  ‘‘నేను 20 ఏళ్లుగా ప్రజల మధ్య ఉన్నాను. నిజామాబాద్‌ జిల్లాలో ఎమ్మెల్యేగా పోటీచేశాను. పార్టీలో ఉంటూ రకరకాల సమస్యల మీద సమాచారం ఇవ్వడం, పోలీస్‌ వ్యవస్థతో అవగాహన సదస్సులు నిర్వహించడంతోపాటు 23 జిల్లాలకు డైరెక్టర్‌గా, పార్టీ కోర్‌ కమిటీ మెంబర్‌గా చేశాను. గ్రామ కో ఆర్డినేటర్‌గా చేశాను. ఏ ఉద్యోగానికైనా ఓ టైమ్‌ లిమిట్‌ ఉంటుంది. పాలిటిక్స్‌లో ఉదయం ఆరుగంటల నుంచే డ్యూటీ మొదలైతే అర్ధరాత్రి దాటాకా ఫోన్లు వస్తుంటాయి. ఇక్కడ ఆడ–మగ తేడా లేదు. ధర్నాలు, రాస్తారోకోల్లో పాల్గొనాలి. రాజకీయాల్లో మహిళల పట్ల వివక్ష ఉంది. అలాగని దూరంగా ఉంటే ఇంకా దూరం పెట్టేస్తారు. ఇప్పటికీ చాలా పార్టీలలో మగనాయకులు ఆడవారి సేవలను మంగళహారతులకు, పూల దండలు వేయడానికే సరిపెడుతున్నారు.   కొన్ని కొన్ని విషయాల్లో నాకూ ఆత్మన్యూనత ఉండేది. అది పోవడానికి నెట్‌వర్కింగ్, కమ్యూనికేషన్‌ స్కిల్స్‌ నేర్చుకున్నాను. రాజకీయాల్లో ఉన్న మహిళ ప్రతి రోజు తనని తాను కొత్తగా మార్చుకోవాలి. నిరంతరం ప్రజల్లో ఉండాలి, వారి కష్టసుఖాలు తెలుసుకోవాలి, వాటిని సాధ్యమైనంత పరిష్కరించాలి. యాక్టివ్‌గా ఉంటేనే అది సాధ్యమవుతుంది. బేటీ బచావో ప్రోగ్రామ్‌లో అంగన్‌వాడీ స్థాయి నుంచి అవేర్‌నెస్‌ ప్రోగ్రామ్‌లు నిర్వహిస్తున్నాం. ఆడపిల్లలకు ఎక్కడ సమస్యలు ఉంటే అక్కడ అండగా మేము నిలబడుతున్నాం. మా ఇంట్లో వాళ్లు నాకు మంచి సపోర్ట్‌. అలా ఉండేలా ఇంటి వాతావరణాన్ని మనమే మార్చుకోవాలి. అప్పుడే రాజకీయాల్లోనూ విజయం సాధించగలం.’’ – నిర్మలారెడ్డి రాస్తే పుస్తకమే అవుతుంది! ఏ స్పోర్ట్స్‌ పర్సన్‌ కూడా స్టార్‌డమ్‌ కోసం ఆట మొదలు పెట్టరు. ఆట మీద ప్యాషన్‌తో శ్రమిస్తాం. సక్సెస్‌ సాధించిన తర్వాత స్టార్‌డమ్, సెలబ్రిటీ హోదాను సమాజమే ఇస్తుంది. మేము కోరేది క్రీడాకారులుగా ఆదరించమనే. అయితే అందులోనూ మగవాళ్లకు ఆడవాళ్లకు తేడా చూపిస్తుంటే ఏంటిది అనిపిస్తుంది. నేను అనుభవించిన తేడాలను రాస్తే పుస్తకమే అవుతుంది. ఎదురీదాల్సిన పరిస్థితులు ఎన్ని వచ్చినా వెనుకడుగు వేయలేదు. నాకు తెలుసు నేనేమిటో? అందుకే ఎటువంటి వివక్షనీ ఖాతరు చేయలేదు. నేను నేనుగా నిలబడగలిగాను. నన్ను నేను నిరూపించుకోగలుగుతున్నాను. అక్కడా పోరాటమే! సమానమైన పనికి సమాన వేతనం అనే డిమాండ్‌ని ఇప్పుడు  క్షేత్రస్థాయిలో వింటున్నాం. కానీ ఒకప్పుడు స్పోర్ట్స్‌లోనూ ఈ వివక్ష ఉండేది. బ్యాడ్మింటన్‌లో మగవాళ్లకు ఇచ్చినంత ప్రైజ్‌మనీ ఆడవాళ్లకు ఇచ్చే వారు కాదు గతంలో. మనదేశంలోనే కాదు, ప్రపంచ స్థాయిలోనే ఇంతటి వివక్ష ఉండేది. ఈ కండిషన్‌ నుంచి ఈక్వల్‌ రెమ్యూనరేషన్‌ కోసం ప్లేయర్‌లు పోరాడి సాధించుకోవాల్సి వచ్చింది. ఫండమెంటల్‌ రైట్స్‌... - మహిళలకు మగవాళ్లతో సమానమైన హక్కు  - మహిళల పట్ల లింగవివక్ష నిషేధం - అవసరమైనప్పుడు రాజ్యం... మహిళల ప్రయోజనాల కోసం నిశ్చయాత్మకమైన చర్యలు తీసుకోవాలనే సూచన - ఉద్యోగాల కల్పనలో ప్రతి పౌరునికీ సమాన అవకాశాలుండాలి... అని చెప్తున్నాయి.

సాక్షి, బెంగళూరు: భారత బ్యాడ్మింటన్ ప్లేయర్ అశ్విని పొన్నప్ప ఓ ఇంటివారయ్యారు. వ్యాపారవేత్త, మోడల్ అయిన కరన్ మేడప్పతో ఆమె వివాహం అంగరంగ వైభవంగా జరిగింది. కుటుంబసభ్యులు, కొందరు సన్నిహితుల సమక్షంలో కర్ణాటకలోని కూర్గ్‌లో అశ్విని, మేడప్పలు వివాహ బంధంతో ఒక్కటయ్యారు. అశ్విని వివాహ ఫొటోలు సోషల్ మీడియాలో వైరల్ అయ్యాయి. గత అక్టోబర్ 30న కరన్ మేడప్పతో తన నిశ్చితార్థం జరిగిన విషయాన్ని బ్యాడ్మింటన్ ప్లేయర్ అశ్విని సోషల్ మీడియా ద్వారా వెల్లడించారు. భారత్ తరఫున పలు అంతర్జాతీయ టోర్నీల్లో మహిళల డబుల్స్, మిక్స్‌డ్ డబుల్స్ విభాగాల్లో ఆమె పతకాలు సాధించిన విషయం తెలిసిందే.


 ♦ విధుల్లో చేరిన బ్యాడ్మింటన్‌ క్రీడాకారిణి
 ♦ శిక్షణ కోసం కృష్ణా జిల్లాకు కేటాయింపు
 
 సాక్షి, అమరావతి: బ్యాడ్మింటన్‌ క్రీడాకారిణి పీవీ సింధు డిప్యూటీ కలెక్టర్‌గా బాధ్యతలు చేపట్టారు. విజయవాడ గొల్లపూడిలోని ఆంధ్రప్రదేశ్‌ భూ పరిపాలన ప్రధాన కమిషనర్‌ (సీసీఎల్‌ఏ) కార్యాలయంలో ఆమె బుధవారం శుభఘడియల్లో విధుల్లో చేరారు. సీసీఎల్‌ఏ అనిల్‌ చంద్ర పునేతా సెలవులో ఉండటంతో సీసీఎల్‌ఏ జాయింట్‌ కమిషనర్‌ జగన్నాథం, సీసీఎల్‌ఏ కార్యదర్శి రామారావులకు ఆమె జాయినింగ్‌ రిపోర్టు ఇచ్చారు.
 
 ఒలింపిక్స్‌లో రజత పతకం సాధించిన సింధును డిప్యూటీ కలెక్టర్‌గా నియమిస్తూ ఏపీ ప్రభుత్వం ఉత్తర్వులు ఇచ్చిన రోజే ముఖ్యమంత్రి చంద్రబాబునాయుడు ఆమెకు నియామక పత్రాన్ని అందజేసిన విషయం విదితమే. సీసీఎల్‌ఏకు వచ్చిన సందర్భంగా అక్కడి ఉద్యోగులు సింధుకు ఘనంగా స్వాగతం పలికారు. డిప్యూటీ కలెక్టర్‌గా నియమించడం తనకెంతో సంతోషంగా ఉందని ఈ సందర్భంగా సింధు పేర్కొన్నారు.
 
 గోపీచంద్‌ అకాడమీలో మంచి శిక్షణ పొందుతున్నానని, రాబోయే ప్రపంచ చాంపియన్‌ షిప్‌లో విజయం సాధిస్తానని సింధు ధీమా వ్యక్తం చేశారు. సింధు విజ్ఞప్తి మేరకు సీసీఎల్‌ఏ అనిల్‌ చంద్ర పునేత ఆమెను శిక్షణ నిమిత్తం కృష్ణా జిల్లాకు కేటాయించారు. కృష్ణా జిల్లా కలెక్టరు బి.లక్ష్మీకాంతంకు బుధవారం సాయంత్రం రిపోర్టు చేశారు. సింధు వెంట ఆమె తండ్రి రమణ ఉన్నారు. డిప్యూటీ కలెక్టర్‌ విధులు, బాధ్యతలపై ఆమె కృష్ణా జిల్లాలో శిక్షణ పొందనున్నారని అధికార వర్గాలు తెలిపాయి.
 
 సింధుకు వైద్య ధృవీకరణ పత్రాలు
 విధుల్లో చేరే ముందు పీవీ సింధుకు వైద్యవిద్యా సంచాలకులు వైద్య ధ్రువీకరణ పత్రాలు అందజేశారు. డిప్యూటీ కలెక్టర్‌గా బాధ్యతలు స్వీకరించాలంటే నిబంధనల ప్రకారం మెడికల్‌ బోర్డు ధ్రువీకరణ పత్రాలు ఇవ్వాల్సి ఉంటుంది. అందువల్ల సింధు బుధవారం తన తండ్రితో కలసి వైద్యవిద్యా సంచాలకుల కార్యాలయానికి  వచ్చారు. ఆమెకు వైద్య విద్య సంచాలకులు డా.ఎన్‌.సుబ్బారావు, అకడెమిక్‌ వైద్యవిద్యా సంచాలకులకు డా.కె.బాబ్జీ సాదర స్వాగతం పలికారు. సింధుకు సిద్ధార్థ వైద్య బృందం పరీక్షలు చేశారు.


 హైదరాబాద్: తనకు పద్మ పురస్కారం దక్కకపోవడం పట్ల బ్యాడ్మింటన్ క్రీడాకారిణి గుత్తా జ్వాల తీవ్ర ఆవేదన వ్యక్తం చేసింది. మూడుసార్లు దరఖాస్తు చేసినా తనను విస్మరించారని వాపోయింది. తనను కావాలనే విస్మరించారని ఆరోపించింది. మిక్స్ డ్ డబుల్స్, మహిళ డబుల్స్ లో టాప్- 10లో ఉన్న తనను ప్రతిష్టాత్మక పురస్కారాలకు ఎంపిక చేయకపోవడం బాధ కలిగించిందని తెలిపింది.
 
 ‘15 ఏళ్లుగా దేశం కోసం ఆడుతున్నాను. ఎన్నో ప్రతిష్టాత్మక టోర్నమెంట్లలో సత్తా చాటాను. అన్ని అర్హతలు ఉన్నాయనే పద్మ అవార్డు కోసం దరఖాస్తు చేశాను. కానీ ఇది సరిపోలేదు. అవార్డు రావాలంటే రికమండేషన్ ఉండాలి. రికమండేషన్ ఉంటేనే అవార్డుకు ఎంపిక  చేస్తామంటే దరఖాస్తులు ఆహ్వానించడం దేనికి? పద్మ పురస్కారాలకు నేను సాధించిన విజయాలు సరిపోవా? ఈ మొత్తం వ్యవహారం నాకు అంతుపట్టకుండా ఉంది.
 
 నేను సాధించిన ఢిల్లీ కామన్వెల్త్ గేమ్స్ లో బంగారు పతకం, గ్లాస్కో లో వెండి పతకం.. ప్రపంచ చాంపియన్‌ షిప్స్ మెడల్స్‌ సరిపోవా? 15 సార్లు నేషనల్ చాంపియన్‌ షిప్ గెలిచాను. ఇలా ఎన్నో ఘనతలు సాధించాను. బ్యాడ్మింటన్ డబుల్స్ విభాగంలో అందరికీ మార్గదర్శకంగా నిలిచాను. కానీ ఇవేమి సరిపోలేదు. ఎందుకంటే నేను ముక్కుసూటి మనిషిని. అందుకే నాకు అవార్డు నిరాకరించార’ ని జ్వాల తన ఫేస్ బుక్ పేజీలో రాసుకొచ్చింది.


 ‘‘నేను సినిమా పరిశ్రమకొచ్చిన ఈ ఎనిమిదేళ్లల్లో ఎన్నో జయాపజయాలు చవిచూశాను. కొన్నిసార్లు ‘ఈ సినిమాకి దీపికా పనికి రాదు’ అని తిరస్కరణకు కూడా గురయ్యాను. ఆ గాయం మానడానికి టైమ్ పట్టేది. అది మానేలోపు పుండు మీద కారం చల్లినట్లు ‘దీపికా కెరీర్ అంతే సంగతులు’ అనే మాటలు వినిపించేవి. స్వతహాగా క్రీడా నేపథ్యం ఉన్న కుటుంబానికి చెందిన అమ్మాయిని కాబట్టి, గెలుపు ఓటములను తేలికగా తీసుకోవడం అలవాటయ్యింది.
  
  మా నాన్న ప్రకాశ్ పదుకొనె (బ్యాడ్‌మింటన్ ప్లేయరు) జీవితమే నాకా మనస్తత్వాన్ని అలవాటు చేసింది. అందుకే, ఆటుపోట్లను తట్టుకోగలిగాను. ఇవాళ నన్ను అందరూ ‘స్టార్ హీరోయిన్’ అంటున్నారు. నీకు తిరుగు లేదంటున్నారు. డేట్స్ ఇస్తే చాలు.. సినిమా చేస్తామంటున్నారు. ఇదంతా సక్సెస్ మహిమే. ఈ స్టార్ డమ్‌ని నెత్తికెక్కించుకోకుండా ఎప్పటిలానే ఉండాలని అనుకు న్నాను. ఎందుకంటే, ఇవాళ ఎత్తేసినవాళ్లే రేపు పడేస్తారని నాకు తెలుసు. నా ఎనిమిదేళ్ల కెరీర్ నేర్పించిన విషయం ఒకటే. కష్టాల్లో ఉన్నప్పుడు ఎవరో వచ్చి సహాయం చేస్తారని ఎదురు చూడకూడదు. మనకు మనమే సహాయం చేసుకోవాలి’’.
  - దీపికా పదుకొనె
  


 క్రీడామంత్రిత్వ శాఖ తీరుపై బ్యాడ్మింటన్ క్రీడాకారిణి గుత్తా జ్వాల మండిపడింది. టార్గెట్ ఒలింపిక్ పోడియం (టాప్) పథకం విషయంలో తనను పట్టించుకోకపోవడాన్ని ఆమె తీవ్రంగా పరిగణించింది. ఇంతకాలం దేశానికి సేవ చేసిన తర్వాత ప్రభుత్వం తనను ఇలా అవమానించిందని ఆవేదన వ్యక్తం చేసింది. తన పేరు గానీ, అశ్వని పేరు గానీ టాప్ పథకంలో లేవన్న విషయం తనకు ఇప్పుడే తెలిసిందని జ్వాల చెప్పింది.
 
 ఇన్నాళ్లూ తమకు కేంద్ర ప్రభుత్వం నుంచి మద్దతు ఉందనుకున్నామని.. ఇప్పుడు అది కూడా కొడిగట్టిందని తెలిపింది.  ఇప్పటికే కార్పొరేట్ వర్గాల నుంచి కావల్సినంత సపోర్ట్ ఉన్న క్రీడాకారుల పేర్లే అందులో ఉన్నాయి తప్ప, తనను.. అశ్వనిని పట్టించుకోలేదని వాపోయింది. ఇప్పుడు ఇక ఏంచేయాలో అర్థం కావట్లేదని, తాను బాగా అలిసిపోయానని చెప్పింది. డబుల్స్ గేమ్లో ఆడేందుకు తాము చాలా కష్టపడ్డామని, కానీ ఇలా చేస్తారని మాత్రం ఎప్పుడూ ఊహించలేదని తెలిపింది.


 ‘అర్జున’ అవార్డు కోసం ఆటగాడు కోర్టుకెక్కిన ఉదంతం మర్చిపోక ముందే క్రీడల్లో ఇప్పుడు మరోసారి అవార్డుల రగడ మొదలైంది. ఈసారి భారత నంబర్‌వన్ బ్యాడ్మింటన్ క్రీడాకారిణి సైనా నెహ్వాల్ వంతు! ప్రతిష్టాత్మక ‘పద్మభూషణ్’ అవార్డు ఎంపిక కోసం తన దరఖాస్తును తిరస్కరించడంపై ఆమె ఆవేదనతోపాటు ఆగ్రహం వ్యక్తం చేసింది.
 
 ఐదేళ్ల క్రితం ‘పద్మశ్రీ’ పొందిన తనకు నిబంధనల ప్రకారం ఈ అవార్డు పొందే అర్హత ఉందని, తనను కాదని రెజ్లర్ సుశీల్ కుమార్ పేరును ఎలా పరిగణనలోకి తీసుకున్నారని సైనా ప్రశ్నించింది. సైనా స్పందనతో ఇప్పుడు కేంద్ర క్రీడా మంత్రిత్వ శాఖ కూడా డైలమాలో పడింది. ఇద్దరికీ ఇవ్వాలా, లేక నిబంధనలు చూపించి సుశీల్ పేరును కూడా తప్పించాలా అనే ఆలోచనతో అధికారులు ఉన్నారు.
  
  కెరీర్ విశేషాలు
  గత ఐదేళ్లలో సైనా 14 అంతర్జాతీయ టైటిల్స్ నెగ్గింది ఒలింపిక్స్, ఆసియా క్రీడలు, ఆసియా చాంపియన్‌షిప్, ఉబెర్ కప్‌లో కాంస్య పతకాలు కామన్వెల్త్ గేమ్స్‌లో స్వర్ణ, రజత, కాంస్య పతకాలు
  
  
  న్యూఢిల్లీ: అన్ని అర్హతలు ఉన్నా... ‘పద్మభూషణ్’ పురస్కారం కోసం తాను పంపించిన దరఖాస్తును తిరస్కరించడంపై భారత బ్యాడ్మింటన్ స్టార్ సైనా నెహ్వాల్ ఆవేదన వ్యక్తం చేసింది. నిబంధనలకు విరుద్ధంగా రెజ్లర్ సుశీల్ కుమార్‌ను ఎంపిక చేయడం ఎంత వరకు సబబు అని ప్రశ్నించింది.
 
  ఏం జరిగిందంటే?
  సైనా నెహ్వాల్ 2010లో ‘పద్మశ్రీ’ అవార్డు అందుకుంది. భారత పౌర పురస్కారాల్లో మూడోదైన ‘పద్మభూషణ్’ కోసం ఆమె 2014లో దరఖాస్తు చేసింది. అయితే నిబంధనల ప్రకారం రెండు పద్మ అవార్డుల మధ్య కనీసం ఐదేళ్ల వ్యవధి ఉండాలి. ఇదే కారణాన్ని ఆమెకు చెబుతూ కేంద్ర హోంమంత్రిత్వ శాఖ సైనా దరఖాస్తును తిరస్కరించింది. దాంతో ఈసారి ఐదేళ్లు పూర్తవుతున్నాయి కాబట్టి ఆమె మళ్లీ తన దరఖాస్తును పంపించింది.
 
  సుశీల్‌కు అవకాశం
  సాధారణంగా కేంద్ర క్రీడా మంత్రిత్వశాఖ ఆటగాళ్ల పేర్లను సిఫారసు చేస్తే, హోం మంత్రిత్వ శాఖ వాటికి ఆమోద ముద్ర వేస్తుంది. అయితే తగిన కారణం చూపకుండా ఈసారి కూడా సైనా దరఖాస్తును తిరస్కరించారు. పైగా ‘అవార్డుకు తగిన వ్యక్తి’ అంటూ ప్రత్యేక కేసుగా పరిగణిస్తూ సుశీల్  పేరును మాత్రం జాబితాలో ఉంచింది. వాస్తవానికి 2011లో పద్మశ్రీ పొందిన సుశీల్‌కు కూడా నిబంధనల ప్రకారం అర్హత లేదు. ఇదే సైనాకు దిగ్భ్రాంతి కలిగించింది. రెజ్లింగ్ సమాఖ్య కార్యదర్శి రాజ్‌సింగ్ చొరవతోనే నిబంధనలు సడలించి సుశీల్ పేరును జాబితాలో చేర్చారని తెలిసింది.
 
 ట్విట్టర్ ద్వారా...
 ఈ పరిణామంతో కలత చెందిన సైనా ట్విట్టర్ ద్వారా తన ఆవేదనను వ్యక్తం చేసింది. ఇందులో కేంద్ర క్రీడా మంత్రిత్వశాఖ తీరును తప్పు పట్టింది. ఇందులో సుశీల్ అర్హతను కూడా ఆమె ప్రశ్నించింది. ‘పద్మ అవార్డు కోసం క్రీడా శాఖ నా పేరును హోం శాఖకు పంపించకపోవడం చాలా బాధ కలిగించింది. నిబంధనల పేరు చెప్పి గత ఏడాది తిరస్కరించారు. నేను కూడా 2012లో ఒలింపిక్స్ పతకం నెగ్గాను. 2010లో కామన్వెల్త్ గేమ్స్‌లో స్వర్ణం, 2014లో కూడా గొప్ప టైటిల్స్ (ఇండియన్ ఓపెన్ గ్రాండ్‌ప్రి గోల్డ్, ఆస్ట్రేలియన్ ఓపెన్, చైనా ఓపెన్) గెలిచి ప్రస్తుతం వరల్డ్ నంబర్ 4గా ఉన్నాను.
 
 ఇలాంటి అవార్డులు ఆటగాళ్లకు ఉత్ప్రేరకంగా పని చేస్తాయి. క్రీడా శాఖ మరోసారి నా విషయంపై దృష్టి పెట్టాలని విజ్ఞప్తి చేస్తున్నా. ఇద్దరం 2012 ఒలింపిక్స్‌లో పతకం గెలిచాం కాబట్టి మా ఇద్దరికీ అవార్డు వస్తే చాలా సంతోషం. అయితే ఐదేళ్ల వ్యవధి ఉండాలనే నిబంధన అందరికీ సమంగా వర్తించాలి కదా?’ అని వరుస ట్వీట్‌లతో బహిరంగంగా అసంతృప్తిని ప్రకటించింది. ఈ విషయంలో తాను సంబంధిత అధికారులతో మాట్లాడితే ఇప్పటికే సుశీల్ పేరు హోం శాఖకు వెళ్లిపోయిందని వారు చెప్పారని సైనా వెల్లడించింది. సుశీల్‌ను నిజంగా ప్రత్యేక కేసుగా పరిగణించాల్సి ఉంటే 2012లో ఆ పని చేయాల్సిందని సైనా చెప్పింది. ఇప్పుడు ఒకవైపు నిబంధనలు అంటూ మరోవైపు ఇలా ఎందుకు చేశారని ఆమె అడిగింది.
  
  జాబితాలో ధోని, కోహ్లి, మిథాలీ!
  మరోవైపు ‘పద్మ’ పురస్కారాల కోసం ప్రతిపాదించిన క్రీడాకారుల జాబితాలో భారత క్రికెట్ కెప్టెన్లు ముగ్గురూ ఉండటం విశేషం. ‘పద్మభూషణ్’ కోసం వన్డే కెప్టెన్ మహేంద్ర సింగ్ ధోని, ‘పద్మశ్రీ’ కోసం టెస్టు కెప్టెన్ విరాట్ కోహ్లితో పాటు మహిళా జట్టు కెప్టెన్ మిథాలీ రాజ్ పేరు కూడా ఉంది. ఎనిమిది సార్లు జాతీయ టేబుల్ టెన్నిస్ చాంపియన్‌గా నిలిచిన ఇందు పురి, జాతీయ బాక్సింగ్ కోచ్ గురుబక్ష్ సింగ్, ఫుట్‌బాల్ ఆటగాడు సమర్ బెనర్జీ పేర్లు కూడా పద్మశ్రీ జాబితాలో ఉన్నట్లు సమాచారం.


 ఎల్బీ స్టేడియం: జాతీయ బాల్ బ్యాడ్మింటన్  మాజీ ఆటగాడు ఎల్.ఎ.ఇక్బాల్ అలీ (78) అనారోగ్యంతో గురువారం కన్ను మూశారు. హైదరాబాదీ క్రీడాకారుడైన ఆయనకు ముగ్గురు కుమారులు, ముగ్గురు కుమార్తెలు ఉన్నారు. దక్షిణ మధ్య రైల్వేలో ఉద్యోగిగా పదవీవిరమణ చేశారు. కొంతకాలంగా అనారోగ్యంతో బాధపడుతున్నప్పటికీ గత నెలలో జరిగిన ఒలింపిక్‌డే రన్‌కు హాజరై క్రీడాస్ఫూర్తిని చాటారు. ఈ సందర్భంగా ఇక్బాల్‌ను రాష్ట్ర ఉప ముఖ్యమంత్రి  మహమూద్ అలీ, హోం మంత్రి నాయిని నర్సింహారెడ్డి సన్మానించారు. పలు జాతీయ బాల్ బ్యాడ్మింటన్ చాంపియన్‌షిప్‌ల్లో సత్తాచాటిన ఆయనను భారత ప్రభుత్వం 1975లో అర్జున అవార్డుతో సత్కరించింది.
  
  కెరీర్‌కు వీడ్కోలు పలికిన అనంతరం ఆయన రాష్ట్ర జట్టుకు కోచ్‌గా వ్యవహరించారు. ఇక్బాల్ వద్ద శిక్షణ పొందిన రాంబాబు, రాజ్ కుమార్ తదితరులు జాతీయ చాంపియన్లుగా ఎదిగారు. ఇక్బాల్ మృతి పట్ల రాష్ట్ర ఒలింపిక్ సంఘం కార్యదర్శి కె.జగదీశ్వర్ యాదవ్, హైదరాబాద్ బాల్ బ్యాడ్మింటన్ సంఘం అధ్యక్షుడు సి.హెచ్.రాజశేఖర్, ప్రధాన కార్యదర్శి ఎ.రవీందర్ తమ ప్రగాఢ సానుభూతి వ్యక్తం చేశారు.
  


 ‘‘నా పెళ్లికి ఇంకా చాలా సమయం ఉంది. నేనింకా చిన్నదాన్నే’’ అంటున్నారు తాప్సీ. బ్యాడ్‌మింటన్ ఆటగాడు మథియాస్ బోతో ఆమె ప్రేమలో పడ్డారనే వార్త వచ్చిన విషయం తెలిసిందే. త్వరలో వీళ్లిద్దరూ పెళ్లి చేసుకోనున్నారనే ఊహాగానాలకు ఈ విధంగా సమాధానం చెప్పారు తాప్సీ. ఆ విషయాన్ని అలా ఉంచితే, హిందీలో ఆమె నటించిన ‘రన్నింగ్ షాదీ డాట్ కామ్’ విడుదలకు సిద్ధమవుతోంది. ఈ నేపథ్యంలో అక్షయ్‌కుమార్ హీరోగా నీరజ్ పాండే దర్శకత్వం వహించనున్న ఓ చిత్రంలో కథానాయికగా నటించడానికి ఆమె అంగీకరించిన విషయం తెలిసిందే.
 
 అక్షయ్ వయసు 46 ఏళ్లు. తాప్సీకేమో 26 ఏళ్లు. ఇద్దరి మధ్య ఇరవయ్యేళ్ల వయసు వ్యత్యాసం ఉంది కాబట్టి, అక్షయ్ సరసన చిన్నపిల్లలా కనిపిస్తారేమో? అనే ప్రశ్న తాప్సీ ముందు ఉంచితే - ‘‘సినిమా చూస్తే మా జంట ఎలా ఉంటుందో తెలుస్తుంది. కుర్ర హీరోల సరసన ఒదిగిపోయినట్లుగానే అక్షయ్ సరసన కూడా ఒదిగిపోగలుగుతాను. తనకు సరిజోడీ అనిపించుకుంటాను. సినిమా చూసినవాళ్లు మా జంట బాగుందని కచ్చితంగా అంటారు.
  
 దాదాపు ప్రతి సినిమాలోనూ హీరోల పాత్రకు ఉన్నంత నిడివి హీరోయిన్లకు ఉండదు. ఈ సినిమాలో కూడా నా పాత్ర నిడివికన్నా అక్షయ్‌ది ఎక్కువగా ఉండొచ్చు. కానీ, నిడివి గురించి ఆలోచించలేదు. కథానాయికగా కూడా ప్రాధాన్యం ఉన్న పాత్ర కాబట్టే, ఈ సినిమా అంగీకరించాను’’ అని చెప్పారు.


 సినిమా తారలు క్రీడాకారులతో ప్రేమలో పడటం చాలా కామన్. అయితే, ఎక్కువగా క్రికెటర్ల ప్రేమకు కథానాయికలు క్లీన్ బౌల్డ్ అవుతుంటారు. కానీ, తాప్సీ మాత్రం బ్యాడ్‌మింటన్ ప్లేయర్ మథియాస్ బోతో ప్రేమలో పడ్డారనే వార్త హల్‌చల్ చేస్తోంది. అలాంటిదేమీ లేదని ముంబయ్‌లో తాప్సీ స్పందించారనే వార్త కూడా వచ్చింది. కానీ, నిప్పు లేనిదే పొగ ఎలా వస్తుంది? అన్నది కొంతమంది ప్రశ్న. పైగా కొన్ని నెలల క్రితం ‘మై బ్యూటీఫుల్ జీఎఫ్ తాప్సీ’ అని ట్విట్టర్‌లో పెట్టారట మథియాస్. గాళ్‌ఫ్రెండ్ అంటూ బహిరంగంగా ప్రకటించిన మథియాస్‌ని ఇటీవల మీడియావారు తాప్సీతో ప్రేమకహానీ గురించి అడగ్గా ‘నో కామెంట్స్’ అన్నారు. గత వారం మథియాస్ బ్యాడ్‌మింటన్ మ్యాచ్‌లో పాల్గొన్నారు. 
  
 ఈ మ్యాచ్‌ని తిలకించడానికి తాప్సీ వెళ్లారు. స్టేడియమ్‌లో ఓ కార్నర్‌లో కూర్చుని మథియాస్ పాయింట్ సాధించినప్పుడల్లా తాప్సీ చప్పట్లు కొడుతూ ఆనందపడిపోవడం అందరి కంట్లోనూ పడింది. బహుశా బ్యాడ్‌మింటన్ అంటే.. తాప్సీకి చాలా ఇష్టం ఉండటంవల్లే ఆ మ్యాచ్‌ని తిలకించి ఉంటారని, అంత మాత్రానికే లింకులు పెట్టేయడం కరెక్ట్ కాదని కొంతమంది అంటున్నారు. కానీ, మథియాస్ పాయింట్స్ సాధించినప్పుడే తాప్సీ ఎందుకు చప్పట్లు కొట్టాలి? ఇంకో ప్లేయర్ ఉన్నాడుగా? అని లా పాయింట్లు లాగుతున్నారు మరికొంతమంది. పాయింటే కదా!
  


  ‘‘నేనెంత మందినని ప్రేమిస్తాను ఇప్పటికే చాలా మందితో కలుపుతూ రాశారు. మీ రాతలకు అంతం ఉండదా?’’ అంటూ మండిపడుతోంది నటి తాప్సీ. ఆడుగళం చిత్రం ద్వారా కోలీవుడ్ కొచ్చి పడిన ఈ ఢిల్లీ బ్యూటీ ఆ తరువాత వందాన్ వెండ్రాన్, మరందేన్ మన్నిత్తేన్, ఆరంభం వంటి చిత్రాల్లో నటించింది. ఆరంభం షూటింగ్ సమయంలో ఆర్యతో ప్రేమాయణం అంటూ, అంతకు ముందే ఒక తెలుగు నటుడితో  కలుపుతూ సాగిన ప్రచారం పెద్ద సంచలనాన్నే రేకెత్తించింది.
  
   తాజాగా మరో కొత్త బాయ్ ఫ్రెండ్‌తో చెట్టాపట్టాలంటూ ప్రచారం జోరందుకుంది. ఆయనెవరో కాదు ప్రముఖ బ్యాడ్మింటన్ క్రీడాకారుడు మాథ్యూస్ బోవ్ నే. ఈ ప్రేమ పక్షులిద్దరూ నిత్యం ఫేస్‌బుక్ ద్వారా మాటల రొమాన్స్ చేసుకుంటున్నారట. సమయం దొరికినప్పుడల్లా జంటగా చెట్టాపట్టాలేసుకు తిరుగుతున్నారట. ప్రస్తుతం షాదీ డాట్‌కామ్ అనే హిందీ చిత్రంలో తాప్సీ నటిస్తోంది. ఈ చిత్ర షూటింగ్ ఇటీవల చండీగఢ్‌లో జరిగింది. ఆ సమయంలో తాప్సీని కలుసుకోవడానికి మాథ్యూస్ ముంబాయి నుంచి చండీగఢ్ వెళ్లడం చర్చనీయాంశం అయ్యింది. 
  
  అంతేకాదు తన ట్విట్టర్‌లో తనకో మంచి గర్ల్‌ఫ్రెండ్ దొరికింది. ఆమె మరెవరో కాదు నటి తాప్సీనే అంటూ మ్యాథ్యూస్ పోస్ట్ చేయడంతో వీరి మధ్య లవ్వాట మొదలైందనే ప్రచారం ఇటీవల కోలీవుడ్‌లో జోరందుకుంది. అయితే ఈ వ్యవహారంపై స్పందించాలని తాప్సీని అడగితే ఆగ్రహంతో అగ్గిమీద గుగ్గిలయ్యింది. ‘‘నా గురించి నా వ్యక్తి గత జీవితం గురించి ఇప్పటికే చాలా వదంతులు ప్రచారం చేశారు. అలాంటి వాటికి బదులిచ్చి అలసిపోయూను. ఇకపై ఎలాంటి గ్యాసిప్స్ కు సమాధానం చెప్పేది లేదు. ఇతరులతో నన్ను చేరుస్తూ రాయడానికి అంతం లేదా? ఇలా నేనెంతమందిని ప్రేమిస్తాను. రోజుకో కథ రాస్తున్నారు’’ అంటూ తాప్సీ రుసరుసలాడుతోంది. నిప్పులేనిదే పొగరాదని ఈమె ఎరుగదేమో!  
  


 భారత ప్రభుత్వం క్రీడాకారులకు అందించే ప్రఖ్యాత పురస్కారమైన అర్జున అవార్డుకు బ్యాడ్మింటన్ క్రీడాకారిణి పి.వి.సింధు ఎంపిక కావడంతో ఆమె విద్యనభ్యసిస్తున్న మెహిదీపట్నంలోని సెయింట్‌ఆన్స్ కళాశాల అధ్యాపకులు, తోటి విద్యార్థులు ఆనందం వ్యక్తం చేశారు. సంబరాల్లో మునిగితేలారు. మంగళవారం కళాశాలలోని నోటీస్‌బోర్డులో ఉన్న ఆమె పేపర్ క్లిప్పింగ్స్‌పై ‘కంగ్రాట్స్ సింధు..’, ‘గ్రేట్ సింధు..’, ‘వెల్డన్ సింధు..’ అంటూ రాసి తమ అభిమానాన్ని చాటుకున్నారు. తమకు గర్వకారణంగా ఉందని వారివారి అభిప్రాయాల్ని ‘సాక్షి’తో పంచుకున్నారు.
  - మెహిదీపట్నం, న్యూస్‌లైన్
 
 రోల్ మోడల్...   సింధు ఇన్ని ఘనతలు సాధించి మాలాంటి వారికి రోల్ మోడల్‌గా నిలిచింది. నా స్నేహితురాలే ఇన్ని ఘనతలు సాధించిందా అని ఇప్పటికీ నమ్మలేకపోతున్నా. తన ప్రతిభకు భారత ప్రభుత్వం తగిన గుర్తింపు ఇవ్వడం సంతోషకరం. ఆమె నా స్నేహితురాలు కావడం గర్వంగా ఉంది.
  - సౌమ్య, సహ విద్యార్థి
 
 ప్రతిభకు చక్కటి గుర్తింపు... సింధు ప్రతిభకు భారత ప్రభుత్వం అర్జున అవార్డుతో గుర్తింపునిచ్చినందుకు చాలా సంతోషంగా ఉంది. మా కళాశాలకు చెందిన విద్యార్థి కావడం మాకు గర్వకారణం. చిన్న వయసులో ఎంతో ఎత్తుకు ఎదిగిన సింధూ మరిన్ని ఉన్నత శిఖరాలు అధిరోహించాలని  ఆశిస్తున్నా. మరిన్ని విజయాలు అందుకునేందుకు నా వంతు సహకారం అందిస్తా.
 - డాక్టర్, సిస్టర్ ఆంథోనమ్మ, ప్రిన్సిపాల్, సెయింట్ ఆన్స్ కళాశాల.
 
 క్రమశిక్షణతోనే... సింధు ఇటు చదువులో, అటు క్రీడల్లో ఎంతో క్రమశిక్షణతో మెలుగుతోంది. గర్వం లేకుండా అందరితో స్నేహపూర్వకంగా ఉంటూ తన పని తాను చేసుకుంటుంది. నిన్న ప్రపంచ స్థాయిలో పతకం సాధించడం నేడు అర్జున అవార్డుకు ఎంపిక కావడంతో చాలా ఆనందంగా ఉంది. ఆమె మరింత ఎత్తుకు ఎదగాలని మనస్ఫూర్తిగా కోరుకుంటున్నా.
  - విమలారెడ్డి, ఫిజికల్ డెరైక్టర్
  
 ఫుల్ హ్యాపీ... సింధుతో నేను కళాశాలకు వచ్చిన ప్రతిసారీ బ్యాడ్మింటన్ ఆడుతా. బ్యాడ్మింటన్‌కు సంబంధించిన విషయాలు చర్చించడంతో పాటు సరదా కబుర్లు చెప్పుకుంటాం. ప్రపంచ ఛాంపియన్ టోర్నమెంట్‌కు వెళ్లేప్పుడు ‘ఆల్ ది బెస్ట్’ చెప్పి పతకం కొట్టాలని కోరా.  పతకం సాధించడంతో చాలా సంతోషించా. అంతేకాకుండా అర్జున అవార్డుకు ఎంపిక కావడం మరింత ఆనందం కలిగించింది.   
  - ముకుంజోత్ కౌర్, సహ విద్యార్థి.
  
 సింధును అభినందించిన మంత్రి ..2013 అర్జున అవార్డుల జాబితాలో చోటు దక్కించుకున్న బాడ్మింటన్ క్రీడాకారిణి పీవీ సింధుకు రాష్ట్ర వుంత్రి వట్టి వసంత కువూర్ అభినందనలు తెలిపారు. దేశం గర్వించేలా భవిష్యత్తులో వురిన్ని విజయూలు సాధించాలని రాష్ట్ర స్పోర్ట్స్ అథారిటీ వుంగళవారం విడుదల చేసిన ప్రకటనలో ఆయున కోరారు.