ఏకంగా ఆర్టీసీ బస్సుకే టెండర్ పెట్టాడు..

ఆదిలాబాద్: ఓ లారీ డ్రైవర్ ఆర్టీసీ బస్సును చోరీచేసి పారిపోయే ప్రయత్నంలో పోలీసులకు పట్టుబడ్డాడు. ఈ ఘటన ఆదిలాబాద్ జిల్లాలో శుక్రవారం ఉదయం చోటు చేసుకుంది. వివరాలు....ఆదిలాబాద్ జిల్లాలోని తాళమడుగు మండలం లక్ష్మీపురం గ్రామానికి చెందిన లారీ డ్రైవర్ శర్మకి శ్రీకాంత్(30) శుక్రవారం ఉదయం నిర్మల్ డిపో నుంచి ఓ ఖాళీ బస్సును తీసుకుని పరారయ్యాడు.

 

సమాచారం అందుకున్న పోలీసులు నేరడిగొండ మండలం రోడ్డుమాముల టోల్ ప్లాజా వద్ద బస్సుతోపాటు శ్రీకాంత్‌ను పట్టుకున్నారు. ఇక్కడి నుంచి మరో 20 కిలోమీటర్లు ప్రయాణిస్తే మహారాష్ట్ర సరిహద్దు వస్తుంది. బస్సును మహారాష్ట్రకు తీసుకెళ్లి విక్రయించాలని శ్రీకాంత్ ప్రయత్నంగా తెలుస్తోంది.  
(నేరడిగొండ)