క్వార్టర్స్లో ముగిసిన సైనా, కశ్యప్ పోరాటం

క్వార్టర్స్లో ముగిసిన సైనా, కశ్యప్ పోరాటం

ప్రపంచ బ్యాడ్మింటన్‌ చాంపియన్‌షిప్‌లో మూడ సీడ్‌ సైనా నెహ్వాల్‌కు షాక్‌ తగిలింది. కొరియా ప్లేయర్‌ 13వ సీడ్‌ యియాన్‌ బెతో జరిగిన క్వార్టర్స్‌ మ్యాచ్‌లో 21-23, 9-21 తేడాతో సైనా చిత్తుగా ఓడింది. ప్రిక్వార్టర్స్‌లో పోరాడి గెలిచిన స్ఫూర్తితో ఈ మ్యాచ్‌ బరిలోకి దిగిన సైనా.. మొదట్లో దూకుడుగా ఆడింది. తొలి గేమ్‌లోనే ఆధిక్యంలోకి దూసుకుపోయింది. అయితే అనూహ్యంగా ప్రత్యర్థి పుంజుకోవడంతో తడబడింది. తొలి గేమ్‌ను 21-23 తేడాతో ఓడింది. ఇక రెండో గేమ్‌లో యియాన్‌ బె మరింత దూకుడుగా ఆడటంతో.. సైనా ఎదురు నిలవలేకపోయింది. దీంతో 9-21 తేడాతో పరాజయం పాలైంది.

అటు పురుషుల 13వ సీడ్‌ పారుపల్లి కశ్యప్‌ కూడా ప్రపంచ బ్యాడ్మింటన్‌ చాంపియన్‌షిప్‌ క్వార్టర్స్‌లో ఓడిపోయాడు. మూడో సీడ్‌ డు పెంగ్యూతో జరిగిన మ్యాచ్‌లో మూడు గేమ్‌ల పాటు కశ్యప్ పోరాడి ఓడాడు‌. 21-16, 20-22, 15-21 తేడాతో కశ్యప్‌కు ఓటమి తప్పలేదు. తొలి గేమ్‌ సునాయాసంగా గెలిచినా.. రెండో గేమ్‌లో కశ్యప్‌కు తీవ్ర ప్రతిఘటన ఎదురైంది. చివరికి 20-22 తేడాతో గేమ్‌ కోల్పోయాడు. మూడో గేమ్‌లోనూ మొదట ఆధిక్యంలోకి దూసుకుపోయినా.. తర్వాత వెనకడుగు వేశాడు.