జొకోవిచ్ వర్సెస్ ఫెదరర్

మెల్బోర్న్:ఆస్ట్రేలియా ఓపెన్ లో మరో ఆసక్తికర పోరుకు ముందుగానే తెరలేవనుంది. డిఫెండింగ్ చాంపియన్, వరల్డ్ నంబర్ వన్ నొవాక్ జొకోవిచ్ , మూడో సీడ్ రోజర్ ఫెదరర్ లు సెమీ ఫైనల్లో పోరులో తలపడేందుకు సన్నద్ధమయ్యారు. మంగళవారం జరిగిన పురుషుల సింగిల్స్ క్వార్టర్ ఫైనల్లో వీరు విజయం సాధించి సెమీస్ బెర్తులను ఖాయం చేసుకున్నారు.  తొలుత జరిగిన క్వార్టర్ ఫైనల్లో ఫెదరర్ 7-6(7-4), 6-2, 6-4 తేడాతో బెర్డిచ్ పై గెలిచి సెమీస్ చేరగా, ఆ తరువాత జొకోవిచ్ 6-3, 6-2, 6-4 తేడాతో నిషికోరిపై విజయం సాధించి సెమీస్ బెర్తును ఖాయం చేసుకున్నాడు.

ఇప్పటివరకూ వీరిద్దరి ముఖాముఖి రికార్డు 22-22తో సమంగా ఉంది. ఇప్పటికే 17 గ్రాండ్ స్లామ్ లు సాధించి టెన్నిస్ చరిత్రలో తనదైన ముద్రవేసిన ఫెదరర్ మరో టైటిల్ ను అందుకోవాలని భావిస్తుండగా, జొకోవిచ్ మరో గ్రాండ్ స్లామ్ సాధించి తన టైటిల్స్ సంఖ్యను 11కు పెంచుకోవాలని యోచిస్తున్నాడు.