మనిషి ఎలాంటి వాడు?

 మనిషి జీవితంలోని ఎత్తుపల్లాలు, మలుపులు, గుణాల నేపథ్యంలో సాగే కథతో రాధాస్వామి ఆవుల దర్శకత్వం వహించిన చిత్రం ‘ఓ మనిషి కథ’. జగపతిబాబు, కల్యాణి జంటగా బాలా భాయ్ చొవాటియా నిర్మించిన ఈ చిత్రానికి విజయ్ కురాకుల పాటలు స్వరపరిచారు. రాధాస్వామి ఆడియో సీడీని ఆవిష్కరించి రచయిత సుద్దాల అశోక్‌తేజకి ఇచ్చారు. అనంతరం దర్శకుడు మాట్లాడుతూ -‘‘కథతో పాటు సినిమాపట్ల నాకున్న అపరిమితమైన ప్రేమనుచూసి జగపతిబాబు గారు ఈ సినిమా చేశారు. నిర్మాత కూడా కథను నమ్మారు. మూడక్షరాల మనిషిలో ఉన్న మూడు గుణాలను బట్టి, అతనెలాంటివాడో నిర్ణయిస్తాం.
 
 ఈ విషయానికి పలు వాణిజ్య అంశాలు జోడించి, ఈ సినిమా చేశాం. విజయ్ కురాకుల మంచి పాటలిచ్చారు. సుద్దాల రాసిన సాహిత్యం అద్భుతం’’ అన్నారు. ప్రస్తుతం పరిశ్రమలో నడుస్తున్న ట్రెండ్‌తో తనకు సంబంధం లేదనీ, కథే తనకు ముఖ్యమని నిర్మాత ఈ చిత్రం చేశారని అశోక్‌తేజ చెప్పారు. మంచి పాటలివ్వడానికి ఆస్కారం ఉన్న కథ ఇదని విజయ్ కురాకుల తెలిపారు. ‘సీత లేని రామ కథ ఇంతేనమ్మా..’ అనే పాటకు జాతీయ అవార్డు వస్తుందని ‘ఆదిత్య’ సత్యదేవ్ అన్నారు. ఈ చిత్రానికి ఎగ్జిక్యూటివ్ నిర్మాత: చంద్రశేఖర్.