మిల్కీబూటీ ‘స్నేక్‌ డాన్స్‌’ వీడియో వైరల్‌

ఈ కాలంలో హీరోలకు ధీటుగా డాన్స్‌ చేసే హీరోయిన్‌ ఎవరూ... అంటే టక్కున గుర్తుకు వచ్చే సమాధానం మిల్కీబ్యూటి తమన్నా. ఈ టాలెంట్‌ వల్లే ఆమెకు పలు సినిమాల్లో​ ప్రత్యేక గీతాల్లో నటించే అవకాశం దక్కుతుంది. కొద్దిరోజుల క్రితం వచ్చిన ఎన్టీఆర్‌ ‘జైలవకుశ’ సినిమాలో​ ‘స్వింగ్‌ జర’ పాటకు యంగ్‌ టైగర్‌కు ధీటుగా ఈ బ్యూటీ చేసిన డాన్స్‌ చూస్తే ఈ విషయాన్ని అంగీకరించక తప్పదు.

ఆమెకు పారిస్‌కు చెందిన ప్రముఖ డీజే(డిస్క్‌ జాకీ) స్నేక్‌ ఓ ఛాలెంజ్‌ విసిరారు. తాను నటించిన ‘మెజెంటా రిడిమ్‌’ పాటకు డ్యాన్స్‌ చేయాలని తమన్నాతో ఛాలెంజ్‌ చేశారు. ఈ ఛాలెంజ్‌కు తమన్నా ఒప్పుకోవడమే కాక బ్రహ్మండంగా డాన్స్‌ చేసి మరి ఛాలెంజ్‌ నెగ్గారు. వెస్ట్రన్‌, ఇండియన్‌ స్టెప్పులతో తమన్నా వేసిన ఈ డాన్స్‌కు నెటిజన్లు కూడా ఫిదా అయ్యారు. ‘డీజే స్నేక్‌ కోసం ‘మెజెంటా రిడిమ్‌’ ఛాలెంజ్‌కు ఒప్పుకొన్నా. జూయీ వైద్య ఈ పాటకు డాన్స్‌ కొరియోగ్రాఫ్‌ చేశారు’ అని క్యాప్షన్‌ ఇచ్చారు. దాదాపు లక్ష మందికిపైగా ఈ వీడియోను లైక్‌ చేశారు.

తమన్నా, స్నేక్‌ మంచి స్నేహితులు. ‘మెజెంటా రిడిమ్‌’ పాటను కంపోజ్‌ చేయడానికి ఇటీవల స్నేక్‌ హైదరాబాద్‌ వచ్చారు. ఆ సమయంలో తమన్నా స్నేక్‌కు స్వయంగా దగ్గరుండి ‘బాహుబలి’ సినిమాను చూపించారు. స్నేక్‌ ఈ సినిమా చూసి ‘భారతీయ సంస్కృతి, డాన్స్‌లు నాకెంతో స్ఫూర్తినిస్తాయి’ అని పేర్కొన్నారు. కల్యాణ్‌ రామ్‌కు జోడీగా తమన్నా నటించిన ‘నా నువ్వే’ చిత్రం త్వరలో విడుదలకానుంది. వెంకటేశ్, వరుణ్‌ తేజ్‌ మల్టీస్టారర్‌ మూవీ ‘ఎఫ్‌2’, ‘క్వీన్‌’ చిత్రాల్లో ఆమె నటిస్తున్నారు.