విమానంలో భద్రకాళి!

 భువనేశ్వర్/న్యూఢిల్లీ:  విమానమే కదా ఎవరూ పెద్దగా చూడరు లే.. అనుకున్నాడు! వెనక సీటు నుంచి చేయి పెట్టి ఆ మహిళను తడమడానికి యత్నించాడు!!! అంతే..ఆ మహిళ భద్రకాళి అవతారమెత్తింది. విమానంలోనే ఆ వృద్ధ కామాంధుడిని పట్టుకొని దుమ్ముదులిపింది. పెద్దగా అరిచి, అందరినీ పిలిచి లెఫ్ట్ అండ్ రైట్ ఇచ్చింది. ప్రయాణికులందరి ముందు సిగ్గుతో చచ్చిపోయేంతగా అవమానపరి చింది.

అంతటితో ఊరుకుందా.. ఈ తతంగాన్ని తన సెల్‌తో వీడియో తీసి యూ ట్యూబ్ లో పెట్టింది. ఫోన్ ద్వారానే పోలీసులకు సమాచారం ఇచ్చింది. ఢిల్లీ నుంచి భువనేశ్వర్ వస్తున్న ఇండిగో విమానంలో జనవరి 27న ఈ ఘటన చోటుచేసుకుంది. భువనేశ్వర్‌కు చెందిన ఓ 60 ఏళ్ల వ్యాపారవేత్త సింగపూర్ నుంచి భువనేశ్వర్‌లోని తన తండ్రి ఇంటికి వస్తూ విమానంలో మహిళతో అసభ్యంగా ప్రవర్తించిన అతణ్ణి విమానం దిగగానే పోలీసులు అరెస్టు చేశారు.