దేవీ అలంకారాలు

ఆశ్వయుజ శుద్ధ షష్ఠి, సోమవారం, 15–10–2018

నిత్యానందకరీ వరాభయకరీ సౌందర్య రత్నాకరీ
నిర్ధూ్దతాఖిల వంశ పావనకరీ ప్రత్యక్ష మాహేశ్వరీ
ప్రాలేయాచల వంశ పావనకరీ కాశీపురాధీశ్వరీ
భిక్షాందేహి కృపావలంబనకరీ మాతాన్నపూర్ణేశ్వరీ

శరన్నవరాత్రి మహోత్సవాలలో కనకదుర్గమ్మవారు అన్నపూర్ణాదేవి అలంకారంలో దర్శనమిస్తుంది. ఈ తల్లి అన్నాన్ని ప్రసాదించే మాతృమూర్తి. అన్నపూర్ణాదేవి ఎడమ చేతిలోని బంగారుపాత్రలో అమృతాన్నం ఉంటుంది. వజ్రాలు పొదిగిన గరిటెతో తన భర్త అయిన ఈశ్వరునికే ఆ అన్నాన్ని భిక్షగా అందించే అంశం అద్భుతం. సర్వ పుణ్య ప్రదాయకం. లోకంలో జీవుల ఆకలిని తీర్చటం కన్నా మిన్న ఏదీ లేదు. అందుకే అన్ని దానాల కంటె అన్నదానం గొప్పదంటారు. నిత్యాన్నదానేశ్వరి అలంకారంలో ఉన్న దుర్గమ్మను దర్శించి తరించి, అన్నాదులకు లోపం లేకుండా, ఇతరులకు అన్నదానం చేసే సౌభాగ్యాన్ని పొందడమే ఈ అవతార ప్రాశస్త్యం.