PODCAST
ప్రియురాలి చేత భార్యను చంపించేశాడు
చండీగఢ్‌ : అక్రమ సంబంధాన్ని కొనసాగించేందుకు అడ్డుగా ఉందన్న అక్కసుతో ప్రియురాలి చేత కట్టుకున్న భార్యను హత్య చేయించాడో కిరాతకుడు. ఆస్ట్రేలియాలో ఉంటూనే పక్కా ప్లాన్‌ ప్రకారం కిడ్నాప్‌ చేయించి గర్భిణి అనే కనికరం లేకుండా ఆమెను అంతమొందించాడు. ఈ ఘటనకు సంబంధించిన వివరాలను ఫిరోజ్‌పూర్‌ ఎస్పీ సందీప్‌ గోయల్‌ మంగళవారం మీడియాకు వెల్లడించారు.
‘ మృతురాలు రవ్‌నీత్‌ కౌర్‌ అనే గర్భిణి.. భర్త జస్ప్రీత్‌తో కలిసి ఆస్ట్రేలియాలో నివసించేవారు. కొన్ని రోజుల క్రితం ఆమె పంజాబ్‌లోని పుట్టింటికి వచ్చారు. ఈ క్రమంలో మార్చి 14న భర్తతో వీడియో కాల్‌ మాట్లాడేందుకు బయటికి వెళ్లి అదృశ్యమయ్యారు. ఈ మేరకు ఆమె సోదరుడు ఫిర్యాదు చేశారు. అనంతరం భక్రా కెనాల్‌లో శవమై తేలారు. ఈ విషయం గురించి విచారణ జరుపగా.. రవ్‌నీత్‌ భర్త జస్ప్రీత్‌కు కిరణ్‌జీత్‌ అనే మహిళతో వివాహేతర సంబంధం ఉన్నట్లుగా తేలింది. ఈ క్రమంలో తన భార్యను చంపాల్సిందిగా కోరడంతో కిరణ్‌జీత్‌ తన సోదరితో కలిసి రవ్‌నీత్‌ను హత్య చేయించినట్లు ఆధారాలు లభించాయి. నిందితులపై కేసు నమోదు చేసి లోతుగా దర్యాప్తు చేస్తున్నాం. జస్ప్రీత్‌, కిరణ్‌జీత్‌లను ఇక్కడకు రప్పించాల్సి ఉంది’ అని సందీప్‌ గోయల్‌ పేర్కొన్నారు.
