TV
సత్యనారాయణ పరిస్థితిపై వివరాలు తెల్సుకుంటున్న ఎస్పీ రాహుల్‌ హెగ్డే , గాయాలపాలైన సత్యనారాయణ
సిరిసిల్లక్రైం: పోలీస్‌ హెడ్‌క్వార్టర్‌లో గార్డుడ్యూటీ నిర్వహించడానికి సన్నద్ధమవుతుండగా ఎస్‌ఎల్‌ఆర్‌ వెపన్‌ మిస్‌ఫైర్‌ కావడంతో కానిస్టేబుల్‌కు గాయాలయ్యాయి. ఈ ఘటనతో రాజన్న సిరిసిల్ల జిల్లాకు చెందిన తంగళ్లపల్లి పోలీస్‌ హెడ్‌క్వార్టర్‌లో కలకలం రేగింది. తోటి సిబ్బంది వివరాల ప్రకారం.. వై.సత్యనారాయణ అనే కానిస్టేబుల్‌ తన రోజువారి విధుల్లో భాగంగా శుక్రవారం సాయంత్రం 6 గంటలకు హెడ్‌క్వార్టర్‌లో గార్డుడ్యూటీ చేయడానికి హాజరయ్యాడు. ఈ క్రమంలో తన ఎస్‌ఎల్‌ఆర్‌ వెపన్‌ను పరీక్షించే క్రమంలో మిస్‌ఫైర్‌ అయ్యింది. చేతితో పాటు ఎడమ చెంప భాగం నుంచి తూటా పాక్షికంగా దూసుకెళ్లింది. గమనించిన తోటి సిబ్బంది సిరిసిల్ల ఏరియాస్పత్రికి తరలించి ప్రాథమిక చికిత్స అందించారు.
ప్రాణాపాయం లేదు: ఎస్పీ రాహుల్‌హెగ్డే
గార్డు డ్యూటీ నిర్వహణలో ఒక కానిస్టేబుల్‌ నుంచి మరొక కానిస్టేబుల్‌ షిప్టుల వారీగా తమకు ఉన్న వెపన్‌లను పరీక్షిస్తారని, ఈ క్రమంలోనే సత్యనారాయణ తన ఆయుధాన్ని పరీక్షిస్తుండగా మిస్‌ఫైర్‌ జరిగిందని జిల్లా ఎస్పీ రాహుల్‌హెగ్డే తెలిపారు. కానిస్టేబుల్‌కు ప్రాణాపాయం ఏమీలేదని, మెరుగైన చికిత్స కోసం కరీంనగర్‌కు తరలించనున్నట్లు తెలిపారు. ఆయన వెంట డీఎస్పీ వెంకటరమణ, రూరల్‌ సీఐ అనిల్‌కుమార్‌ ఉన్నారు.
