‘రిజిస్ట్రేషన్ ఆఫీసుల్లోనూ ఈసీలివ్వాలి’

 సాక్షి, హైదరాబాద్: మీసేవ కేంద్రాలలో మాదిరిగానే సబ్ రిజిస్ట్రార్ కార్యాలయాల్లో కూడా ఎన్‌కంబరెన్స్ సర్టిఫికెట్లు, దస్తావేజు నకళ్లు (సీసీలు) ఇచ్చేందుకు వెసులుబాటు కల్పించాలని సబ్‌రిజిస్ట్రార్స్ అసోసియేషన్, రిజిస్ట్రేషన్ ఎంప్లాయిస్ అసోసియేషన్ ప్రతినిధులు డిమాండు చేశారు. ఈమేరకు మంగళవారం అసోసియేషన్ల ప్రతి నిధులు రెవెన్యూ శాఖ ముఖ్య కార్యదర్శి వీకే అగర్వాల్‌ను కలసి వినతిపత్రం అందజేశారు. మీసేవ కేంద్రాలతో సమాంతరంగా సబ్ రిజిస్ట్రారు కార్యాలయాల్లో కూడా దరఖాస్తులు స్వీకరించి సీసీలు, ఈసీలు ఇచ్చే వెసులుబాటు కల్పించాలని కోరారు. ఆంధ్రప్రదేశ్ సబ్‌రిజిస్ట్రార్స్ అసోసియేషన్ అధ్యక్ష, ప్రధాన కార్యదర్శులు విజయ భాస్కర్‌రావు, స్థితప్రజ్ఞ, తెలంగాణ సబ్‌రిజిస్ట్రార్స్ అసోసియేషన్ అధ్యక్షుడు ఆర్.శ్రీనివాసరావు నేతృత్వంలో రిజిస్ట్రేషన్ ఎంప్లాయిస్ అసోసియేషన్ల ప్రతినిధులు కూడా రెవెన్యూ శాఖ ముఖ్య కార్యదర్శిని కలిసి సమస్యలను వివరించారు. అనంతరం వారు స్టాంపులు, రిజిస్ట్రేషన్ల శాఖ కమిషనర్ విజయకుమార్‌ను కూడా కలిసి ఇవే అంశాలను వివరించారు.