జర్మనీని చిత్తు చేసిన భారత్.. హాకీ ప్రపంచకప్‌లో అరుదైన రికార్డు

మహిళల హాకీ ప్రపంచకప్‌లో సెమీఫైనల్‌కు చేరడంలో విఫలమైన భారత జట్టు.. ఇప్పుడు ఐదో స్దానం సాధించి టోర్నీని ముగించింది. గురువారం ఐదో స్థానం కోసం జ‌ర్మ‌నీతో జ‌రిగిన ప్లే ఆఫ్ మ్యాచ్‌లో భార‌త్  3-1 తేడాతో ఘన విజయం సాధించింది. మహిళల ప్రపంచకప్ చరిత్రలోనే భారత్‌కు ఇదే అత్యుత్తమ ప్రదర్శన కావడం విశేషం. 

ఈ మ్యాచ్ ఆరంభం నుంచే ఇరు జ‌ట్లు గోల్ కోసం తీవ్రంగా శ్ర‌మించాయి. ఫస్ట్ హాఫ్ స‌మ‌యానికి  ఏ జట్టూ గోల్ నమోదు చేయలేకపోయింది. అయితే మూడో క్వార్ట‌ర్‌లో మాత్రం భార‌త ప్లేయ‌ర్లు స‌త్తాచాటారు. మ్యాచ్ 43వ నిమిషంలో ఈషిక అద్భుతమైన గోల్‌తో భార‌త్‌కు 1-0 ఆధిక్యాన్ని అందించింది.

ఆ తర్వాత స్ట్రైకర్ నవ్‌నీత్ కౌర్ రెండు గోల్స్‌తో మెరిసి జ‌ట్టును 3-0 ఆధిక్యంలో తీసుకెళ్లింది. మ్యాచ్ ముగిసే సమయానికి జర్మనీ తరఫున లిన్ క్రింగ్స్ ఒక ఫీల్డ్ గోల్ సాధించి ఖాతా తెరిచిన‌ప్ప‌టికి.. భార‌త్ 3-1 తేడాతో ఘనవిజయాన్ని అందుకుంది.
చదవండి: IND vs SL: 90 బంతులు.. 12 పరుగులు! నీ ఓపికకు ఓ దండం సామీ?