విద్యుత్‌ ఉచ్చులు పెడితే కఠిన చర్యలు

ములుగు రూరల్‌: అడవి జంతువుల నుంచి పంటలను రక్షించుకునేందుకు పంట పొలాల చుట్టూ విద్యుత్‌ ఉచ్చులు పెడితే కఠిన చర్యలు తీసుకుంటామని ములుగు డీఎస్పీ రవీందర్‌ గురువారం ఒక ప్రకటనలో తెలిపారు. జంతువుల కోసం ఏర్పాటు చేసే ఉచ్చులతో మనుషుల ప్రాణాలు సైతం పోయే ప్రమాదం ఉందని వెల్లడించారు. ఇటీవల కాలంలో జిల్లాలోని జాకారం పంచాయతీ పరిధిలో విద్యుత్‌ ఉచ్చులో పడి పలువురు మృతి చెందగా సదరు వ్యక్తి జైలుపాలు అయ్యాడని గుర్తుచేశారు. ఎవరైనా విద్యుత్‌ ఉచ్చులు పెట్టినట్లు తెలిసినా, కనిపించినా పోలీసులకు తక్షణమే సమాచారం ఇవ్వాలని డీఎస్పీ కోరారు.