TV
ములుగు రూరల్‌: నకిలీ లోన్‌ ఆఫర్లపై ప్రజలు అప్రమత్తంగా ఉండాలని ఎస్పీ సుధీర్‌ రాంనాథ్‌ కేకన్‌ సూచించారు. ఈ మేరకు బుధవారం సైబర్‌ నేరాలపై అవగాహన కార్యక్రమం నిర్వహించి వాల్‌ పోస్టర్‌ ఆవిష్కరించారు. ఈ సందర్భంగా ఎస్పీ మాట్లాడుతూ తెలంగాణ పోలీస్‌శాఖ చేపట్టిన ఫ్రాడ్‌ కా పుల్‌స్టాప్‌ కార్యక్రమం నిర్వహించినట్లు తెలిపారు. తక్షణం, తక్కువ వడ్డీ రుణాలు, నిమిషాల్లో లోన్‌ మంజూరు అంటూ సైబర్‌ నేరగాళ్లు ప్రజలను ఆకర్షించి జీఎస్టీ, లోన్‌ప్రాసింగ్‌ ఫీజు పేరుతో ముందుగా డబ్బులు చెల్లించాలని కోరుతున్నారని తెలిపారు. ప్రజలు అనుమానాస్పద లింకులు, ఫోన్‌ కాల్స్‌, మెసేజ్‌లకు స్పందించకూడదని వివరించారు. ఇతరులకు బ్యాంకు ఖాతా వివరాలు, ఓటీపీలు, పాస్‌వర్డ్‌లు తెలుపరాదని వెల్లడించారు. సైబర్‌ మోసాల భారిన పడితే వెంటనే 1930 కాల్‌ చేయాలని సూచించారు. ఫిర్యాదు చేస్తే డబ్బును నిలిపివేసే అవకాశం ఉంటుందని తెలిపారు. ఈ కార్యక్రమంలో డీసీఆర్బీ డీఎస్పీ కిశోర్‌కుమార్‌, సీఐ సురేశ్‌కుమార్‌, ఎస్‌బీ ఇన్‌స్పెక్టర్‌ ప్రతాప్‌, వెంకటాపురం(ఎం) ఎస్సై చల్లా రాజు, డీసీఆర్బీ ఎస్సై వెంకటేశ్‌ తదితరులు పాల్గొన్నారు.
ఎస్పీ సుధీర్‌ రాంనాథ్‌ కేకన్‌
