Naina Ganguly: నో కండీషన్స్‌ అంటున్న 'డేంజరస్‌' హీరోయిన్‌

‘నయ్‌.. నయ్‌..’ నువ్వు ఇలాంటి పనులు చేయకూడదు.. అని చెప్పే ఆడపిల్లల తల్లిదండ్రులందరికీ ఓ షార్ట్‌ఫిల్మ్‌తో సమాధానం చెప్పింది నైనా గంగూలీ. స్క్రీన్‌ మీదే కాదు ఈ తీరుతో నిజ జీవితంలోనూ సాగిపోతోంది. ఆమె పరిచయం.. 

కోల్‌కతాలో పుట్టి, ముంబైలో పెరిగిన నైనా గంగూలీని తెర మీదకు తెచ్చింది ప్రముఖ దర్శకుడు రామ్‌గోపాల్‌ వర్మ.  ఆమె నటించిన ‘వంగవీటి’ సినిమా, ఆ తర్వాత చేసిన ‘మేరీ బేటీ సన్నీలియోనీ బన్‌నా చాహ్‌తీ హై’ అనే షార్ట్‌ ఫిల్మ్‌.. ఈ రెండూ కూడా విడుదల కోసం ఎన్నో ఆటంకాలను ఎదుర్కొన్నాయి. అయితే ఆ అడ్డంకులేవీ ఆమె నటనా ప్రతిభను ఆపలేకపోయాయి.

అవి రిలీజ్‌ కావడానికి ముందే వరుస బాలీవుడ్‌ ఆఫర్స్‌తో బిజీ అయిపోయింది నైనా. ‘చరిత్రహీన్‌’ వెబ్‌ సిరీస్‌ సీజన్‌ 1,2,3 లలోనూ, ‘డి కంపెనీ’ అనే మరో వెబ్‌ సిరీస్‌లోనూ నటించి మెప్పించింది. ఈ మధ్యనే తిరిగి తెలుగు ప్రేక్షకుల ముందు ప్రత్యక్షమైంది. త్వరలోనే ఆమె నటించిన ‘జోహార్‌’ సినిమా విడుదలకు సిద్ధంగా ఉంది. ప్రస్తుతం డిస్నీ హాట్‌స్టార్‌లో ప్రసారమవుతోన్న  ‘పరంపర’ సిరీస్‌తో ప్రేక్షకులను అలరిస్తోంది.

ఏ అమ్మాయికీ  షరతులు పెట్టే పేరెంట్స్‌ కానీ, పర్మిషన్‌ తీసుకునే పరిస్థితి కానీ ఉండకూడదు, రాకూడదు. నిజానికి తను ఎంచుకున్న రంగంలో పనిచేయడానికి, ఎవరి అనుమతి తీసుకోకపోవడమే నిజమైన మహిళా సాధికారత.
– నైనా గంగూలీ.