బిగ్‌బాస్‌: నోయ‌ల్ వీడ్కోలు, హారిక క‌న్నీళ్లు

అనారోగ్యంతో అవ‌స్థ ప‌డుతున్న నోయ‌ల్.. గంగ‌వ్వ లాగే బిగ్‌బాస్‌ షో నుంచి అనూహ్యంగా వెళ్లిపోయాడు. దీంతో ఇంటిస‌భ్యులు భారంగా వీడ్కోలు ప‌లికారు. కానీ వీలైనంత త్వ‌ర‌గా కోలుకుని నోయ‌ల్ మ‌ళ్లీ తిరిగి రానున్నాడు. మ‌ళ్లీ వ‌చ్చేస్తాడ‌న్న సంతోషం క‌న్నా ఇప్పుడు వెళ్లిపోతున్నాడ‌న్న బాధే హారిక‌ను ఎక్కువ‌గా కుంగ‌దీసింది. దీంతో అభిజిత్ ఆమెను ఆప్యాయంగా హ‌త్తుకుని ఊర‌డించాడు. ఇక ముందుగా ఊహించిన‌ట్లుగానే అరియానా ఎనిమిదో కెప్టెన్‌గా అవ‌త‌రించింది. కానీ ప్రోమోలో మాస్ట‌ర్‌, అవినాష్ క‌లిసి ఇంటిస‌భ్యుల‌ను ఆట‌ప‌ట్టించిన క్లిప్పింగుల‌ను మాత్రం మొత్తానికే చూపించ‌లేదు. ఇదిలా వుంటే నేటి బిగ్‌బాస్‌ ఎపిసోడ్‌లో ఇంకా ఏమేం విశేషాలు, గొడ‌వ‌లు జ‌రిగాయో చ‌దివేసేయండి...

ఆడ‌వాళ్ల‌కు మాత్ర‌మే కెప్టెన్సీ టాస్క్‌
అనారోగ్యంతో బాధ‌ప‌డుతున్న నోయ‌ల్‌కు అర్ధ‌రాత్రి దాటినా నిద్ర పట్టలేదు. దీంతో ఒంట‌రిగా పాట‌లు పాడుకుంటూ క‌న్నీళ్లు పెట్టుకున్నాడు. త‌ర్వాతి రోజు అభి నోయ‌ల్ ద‌గ్గ‌ర కూర్చుని మోనాల్‌పై సెటైర్ వేశాడు. ఆమె పెద్ద పెద్ద‌గా అడుగులేసుకుంటూ ఒంటెలా న‌డుస్తుంద‌ని కామెంట్ చేశాడు. మ‌రి నువ్వు దుబాయ్ షేక్‌లా కూర్చున్నావ‌ని నోయ‌ల్ అభి గురించి చెప్పుకొచ్చాడు. అనంత‌రం బిగ్‌బాస్ "ఆడ‌వాళ్ల‌కు మాత్ర‌మే" కెప్టెన్సీ టాస్క్ ఇచ్చాడు. ఈ టాస్క్‌లో భాగంగా గార్డెన్ ఏరియాలో ఒక యాపిల్ చెట్టు, దానిపై పోటీదారుల ఫొటోలు అతికించి ఉన్నాయి. దానిప‌క్క‌నే ఒక డ‌బ్బా(అందులో క‌త్తి), దాని తాళం ఉన్నాయి. మూడుసార్లు బ‌జ‌ర్ మోగిన‌ప్పుడు అబ్బాయిలు ఆ తాళ‌పుచెవిని సంపాదించి న‌చ్చిన అమ్మాయికి ఇవ్వొచ్చు. అప్పుడు ఆమె తాళంచెవి సాయంతో డ‌బ్బాలోని క‌త్తి తీసుకుని ఎవ‌రు కెప్టెన్ అవ‌డానికి వీల్లేద‌ని భావిస్తారో ఆమె ఫొటో అతికించి ఉన్న యాపిల్‌ను తెంపి ముక్క‌లు ముక్క‌లుగా కోయాల్సి ఉంటుంది. (చ‌ద‌వండి: బిగ్‌బాస్‌: అస్వ‌స్థ‌త‌కు గురైన నోయ‌ల్)

నీ తెలివి ప‌ని చేయ‌లేదు: హారిక‌
ఈ టాస్క్‌లో మొద‌ట తాళ‌పు చెవిని ద‌క్కించుకున్న అఖిల్‌ను తాళ‌పు చెవి త‌న‌కివ్వ‌మంటే త‌న‌కివ్వండ‌ని అమ్మాయిలు అర్జీ పెట్టుకున్నారు. కానీ అత‌డు మాత్రం అంద‌రూ ఊహించిన‌ట్లుగా మోనాల్‌కే ఇచ్చాడు. కత్తి చేత‌బ‌ట్టిన మోనాల్‌.. హారిక‌ కెప్టెన్సీకు అర్హురాలు కాదంటూ ఆమె ఫొటో ఉన్న పండును ముక్కలు ముక్క‌లు చేయ‌డంతో దేత్త‌డి హ‌ర్ట‌య్యింది. త‌ర్వాత తాళ‌పు చెవిని ద‌క్కించుకున్న మెహ‌బూబ్ దాన్ని అరియానాకు ఇచ్చాడు. క‌త్తి అందుకున్న అరియానా.. లాస్య ‌ఫొటో ఉన్న పండును నాశ‌నం చేసి ఆమెను కెప్టెన్సీ పోటీ నుంచి తొలగించింది. త‌ర్వాత కీ చేజీక్కించుకున్న మాస్ట‌ర్ దాన్ని అరియానాకు ఇవ్వ‌గా ఆమె మోనాల్‌ను సైడ్ చేసేసింది. దీంతో అరియానా హౌస్‌లో రెండో మ‌హిళా కెప్టెన్‌గా అవ‌త‌రించింది. అప్ప‌టికే ఫ్ర‌స్టేష‌న్‌లో ఉన్న హారిక‌.. నీకు తెలివి ఉంది కానీ ఈ రోజు ప‌ని చేయ‌లేదని మోనాల్‌ను న‌వ్వుతూనే తిట్టింది.

రేష‌న్ మేనేజ‌ర్‌గా ఉంటే సేఫ్ అయ్యేవాడిని
కెప్టెన్ అరియానా రేష‌న్ మేనేజ‌ర్‌గా మోనాల్‌ను ఎంచుకుంది. దీంతో మాస్ట‌ర్ ముఖం మాడ్చుకున్నాడు. నామినేష‌న్‌లో ఉన్న‌ప్పుడు రేష‌న్ మేనేజ‌ర్‌గా ఇస్తే త‌న‌కు స‌పోర్ట్ అయ్యేద‌ని అర్థం ప‌ర్థం లేని మాట‌లు అన్నాడు. అస‌లు తాను మోనాల్‌కు స‌పోర్ట్ చేసి ఉండాల్సింద‌ని, నీకు విశ్వాసం లేద‌ని అస‌హ‌నం వ్య‌క్తం చేశాడు. క‌న్నీళ్లు రాక‌పోయినా కెమెరాల ముందు ఏడుపు న‌టించిన‌ట్లు ఈజీగా అర్థ‌మ‌వుతోంది. అత‌ని ప్ర‌వ‌ర్త‌న‌తో విసుగెత్తిన అరియానా.. రేష‌న్ మేనేజ‌ర్‌గా ఉంటే సేవ్ అవుతార‌ని ఎక్క‌డా లేద‌ని స్ప‌ష్టం చేసింది. అయినా స‌రే ప‌ట్టించుకోని మాస్ట‌ర్‌.. నువ్వు చేసిన ప‌నికి నాకు చెప్పుతో కొట్టిన‌ట్లుగా ఉందంటూ పెద్ద పెద్ద డైలాగులు కొట్టాడు. ఈ గొడ‌వ‌తో అరియానా త‌ల బొప్పి క‌ట్టింది. (చ‌ద‌వండి: క‌మెడియ‌న్‌కు ముద్దు పెట్టిన హీరోయిన్‌)

నీకోసం ఎదురు చూస్తూ ఉంటా: హారిక‌
అనంత‌రం అనారోగ్యంతో బాధ‌ప‌డుతున్న‌ నోయ‌ల్‌ను వైద్యులు ప‌రీక్షించారు. అత‌డు మెడిక‌ల్ రూమ్‌కు వెళ్ల‌డం చూసిన హారిక..‌ నోయ‌ల్‌ వెళ్లిపోవ‌డం నాకిష్టం లేదంటూ గుక్క‌పెట్టి ఏడ్వ‌డంతో ఆమెను అభిజిత్ హ‌త్తుకుని ఓదార్చాడు. ఇక నోయల్‌ను కన్ఫెష‌న్ రూమ్‌లోకి పిలిచిన బిగ్‌బాస్.. స్పెష‌లిస్టుల స‌ల‌హా మేర‌కు మ‌రింత మెరుగైన వైద్యం అందుకునేందుకు ఇంటి నుంచి వెళ్లిపోవాల‌ని సూచించాడు. అయితే త్వ‌ర‌లోనే పూర్తి ఆరోగ్య‌వంతులై తిరిగి రావాల‌న్నాడు. నీ కోసం ఎదురు చూస్తూ ఉంటాన‌ని హారిక నోయ‌ల్‌ వెళ్లిపోయిన  చాలాసేప‌టివ‌ర‌కు ఏడుస్తూనే ఉంది. (చ‌ద‌వండి: నాన్న డిఫెన్స్ ఉద్యోగి, కానీ..:  నోయ‌ల్ త‌మ్ముడు)