క్రెడిట్‌ కార్డు యూజర్లకు అలర్ట్‌..! కొత్త నిబంధనలను ప్రకటించిన ఆర్బీఐ..!

క్రెడిట్‌ కార్డు యూజర్లకు అలర్ట్‌..! క్రెడిట్‌ కార్డులకు సంబంధించి రిజర్వ్‌ బ్యాంక్‌ ఆఫ్‌ ఇండియా(ఆర్బీఐ) కొత్త  రూల్స్‌ను తీసుకువచ్చింది. ఈ రూల్స్‌ 2022 జూలై 1 నుంచి అమలలోకి రానుంది. పేమెంట్స్ బ్యాంక్, ప్రభుత్వ రంగ కోఆపరేటివ్ బ్యాంక్స్, డిస్ట్రిక్ట్ సెంట్రల్ కోఆపరేటివ్ బ్యాంక్స్‌ మినహా ఇతర బ్యాంకులన్నింటికీ ఈ రూల్ వర్తిస్తాయి. దాంతోపాటుగా నాన్ బ్యాంకింగ్ ఫైనాన్షియల్ కంపెనీలు (ఎన్‌బీఎఫ్‌సీ) ఎన్‌బీఎఫ్‌సీలు కూడా వర్తించనుంది.

►  క్రెడిట్ కార్డు క్లోజర్‌కు సంబంధించి అప్లికేషన్ వచ్చిన 7 రోజులలోగా సదరు క్రెడిట్‌ కార్డును క్లోజ్ చేయాల్సి ఉంటుందని ఆర్బీఐ ప్రకటనలో పేర్కొంది. ఇదిలా ఉండగా క్రెడిట్‌ కార్డు యూజర్లు అన్నీ బకాయిలు పూర్తిగా చెల్లించాల్సి ఉంటుంది. 

►  క్లోజర్‌ విషయంలో సదరు బ్యాంకులు, సంస్థలు కార్డు దారులకు ఈమెయిల్‌, ఎస్‌ఎంఎస్‌ రూపంలో వివరాలను తెలియజేయాల్సి ఉంటుంది. ఏడు రోజులలోగా క్రెడిట్ కార్డును క్లోజింగ్ అప్లికేషన్‌ను పూర్తి చేయకపోతే.. అప్పుడు బ్యాంకులు, ఎన్‌బీఎఫ్‌సీలు కస్టమర్లకు రోజుకు రూ.500 పెనాల్టీ చెల్లించాల్సి ఉంటుంది. 

►  క్రెడిట్ కార్డును ఏడాదికి పైగా ఉపయోగించకపోతే అప్పుడు బ్యాంకులు ఆటోమేటిక్‌గానే ఆ కార్డును పూర్తిగా క్లోజ్ చేయాలి. కాగా ఈ విషయాన్ని ముందుగా కస్టమర్లకు తెలియజేయాలి.  వారి నుంచి 30 రోజులలోగా ఎలాంటి వివరణ రాకపోతే క్రెడిట్‌ కార్డును క్లోజ్ చేసే అధికారం ఆయా సంస్థలకు ఉంది. 

►  బ్యాంకులు, ఆర్థిక సంస్థలు కార్డు క్లోజింగ్ వివరాలను క్రెడిట్ ఇన్‌ఫర్మేషన్ కంపెనీలకు 30 రోజులలోగా తెలియజేయాలి. క్రెడిట్ కార్డులో కస్టమర్లకు రావాల్సిన డబ్బులు ఏమైనా ఉంటే..బ్యాంకులు వాటిని వారి బ్యాంక్ అకౌంట్‌కు ట్రాన్స్‌ఫర్ చేయాల్సి ఉంటుంది.  

►  కస్టమర్ల అనుమతి లేకుండా బ్యాంకులు, ఇతర సంస్థలు కార్డులు జారీ చేయడం, అప్‌గ్రేడ్ కార్డులు అందించడం వంటివి చేయకూడదు.

►  కార్డ్-జారీ చేసేవారు/వారి ఏజెంట్లు తమ రుణ సేకరణ ప్రయత్నాలలో ఏ వ్యక్తిపైనైనా ఎలాంటి బెదిరింపు లేదా వేధింపులను ఆశ్రయించకూడదు.

►   క్రెడిట్ కార్డ్‌లను ఉచితంగా జారీ చేసేటప్పుడు ఎటువంటి హిడెన్‌ ఛార్జీలను వేయకూడదు. 

చదవండి: షాకింగ్‌ న్యూస్‌...వడ్డీరేట్లు పెరిగే అవకాశం...ప్రభావమెంతంటే..?