బెంగళూరు: కర్ణాటక ఓపెన్‌ ఏటీపీ చాలెంజర్‌-50 టెన్నిస్‌ టోర్నీ పురుషుల డబుల్స్‌ విభాగంలో భారత డేవిస్‌కప్‌ జట్టు మాజీ సభ్యుడు, ఆంధ్రప్రదేశ్‌ ప్లేయర్‌ సాకేత్‌ మైనేని ఫైనల్లోకి ప్రవేశించాడు. శుక్రవారం జరిగిన సెమీఫైనల్లో సాకేత్‌-నికీ కలియంద పునాచా (భారత్‌) జోడీ 7-5, 6-1తో టాప్‌ సీడ్‌ ప్రజ్వల్‌ దేవ్‌-నితిన్‌ కుమార్‌ సిన్హా (భారత్‌) జంటపై విజయం సాధించింది.71 నిమిషాలపాటు జరిగిన ఈ మ్యాచ్‌లో సాకేత్‌-పునాచా మూడు ఏస్‌లు సంధించి, ఒక డబుల్‌ ఫాల్ట్‌ చేశారు. తొలి సర్వీస్‌లో 27 పాయింట్లు, రెండో సర్వీస్‌లో 12 పాయింట్లు స్కోరు చేశారు. తమ సర్వీస్‌ను ఒకసారి కోల్పోయి, ప్రత్యర్థి సర్వీస్‌ను నాలుగుసార్లు బ్రేక్‌​ చేశారు. ఆంధ్రప్రదేశ్‌లో డిప్యూటీ కలెక్టర్‌గా విధులు నిర్వహిస్తున్న సాకేత్‌ ఈ ఏడాది తొమ్మిది టోర్నీల్లో పాల్గొన్నా క్వార్టర్‌ ఫైనల్‌ దాటి ముందుకెళ్లలేకపోయాడు.పదో టోర్నీలో మాత్రం టైటిల్‌కు విజయం దూరంలో నిలిచాడు. నేడు జరిగే ఫైనల్లో పీటర్‌ బార్‌ బిరుకోవ్‌ (రష్యా)-గ్రిగోరి లొమాకిన్‌ (కజకిస్తాన్‌)లతో సాకేత్‌-పునాచా తలపడతారు. రెండో సెమీఫైనల్లో బిరుకోవ్‌-లొమాకిన్‌ 7-6 (7/4), 7-6 (7/4)తో ఆదిల్‌ కల్యాణ్‌పూర్‌-ముకుంద్‌ శశికుమార్‌ (భారత్‌)లపై విజయం సాధించారు.


  హో చి మిన్ సిటీ: వియత్నాం ఓపెన్ ఏటీపీ చాలెంజర్ టెన్నిస్ టోర్నమెంట్‌లో హైదరాబాద్ ప్లేయర్ సాకేత్ మైనేని సింగిల్స్‌తోపాటు డబుల్స్ విభాగంలోనూ ఫైనల్లోకి దూసుకెళ్లాడు. శనివారం జరిగిన సెమీఫైనల్లో నాలుగో సీడ్ సాకేత్ 5-7, 6-4, 6-2తో ఐదో సీడ్ థామస్ ఫాబియానో (ఇటలీ)పై విజయం సాధించాడు. గంటా 54 నిమిషాలపాటు జరిగిన ఈ మ్యాచ్‌లో సాకేత్ ఏకంగా 14 ఏస్‌లు సంధించి ప్రత్యర్థిని హడలెత్తించాడు. కేవలం రెండు డబుల్ ఫాల్ట్‌లు చేసిన సాకేత్ ప్రత్యర్థి సర్వీస్‌ను మూడుసార్లు బ్రేక్ చేశాడు. డబుల్స్ సెమీఫైనల్లో సాకేత్ మైనేని-సనమ్ సింగ్ (భారత్) జంట 6-7 (5/7), 6-4, 10-6తో ‘సూపర్ టైబ్రేక్’లో సంచాయ్ రటివటానా-సొంచాట్ రటివటానా (థాయ్‌లాండ్) జోడీపై గెలిచింది.