breaking news
Jeffrey Archer
-
జెఫ్రీ ఆర్చర్ కన్నుమూత
లండన్: ప్రపంచ ప్రఖ్యాత బ్రిటిష్ రచయిత జెఫ్రీ ఆర్చర్ (86) సోమవారం లండన్లో కన్నుమూశారు. సోమవారం (భారత కాలమానం ప్రకారం మంగళవారం తెల్లవారుజాము) తన నివాసంలో అకస్మాత్తుగా, ప్రశాంతంగా ఆయన మరణించినట్లు ప్రచురణ సంస్థ హార్పర్ కాలిన్స్ ప్రకటించింది. సుమారు యాభై ఏళ్ల పాటు తన రచన వ్యాసంగాన్ని కొనసాగించిన ఆర్చర్ రాజకీయ నాయకుడు కూడా. ఆర్చర్ రాసిన చివరి నవల ‘ఆడమ్ అండ్ ఈవ్‘ మంగళవారమే విడుదల కావడం యాదృచి్ఛకం. జెఫ్రీ ఆర్చర్ రాజకీయ జీవితం మొత్తం వివాదాలతో కూడుకున్నదే.అబద్ధపు ప్రమాణం చేసిన ఆరోపణలపై దోషిగా తేలడంతో ఆయన కొంతకాలం జైలు శిక్ష కూడా అనుభవించారు. అయితే రచయితగా మాత్రం ఎన్నో రికార్డులు ఈయన సొంతం. ఆర్చర్ రాసిన నవళ్లు సుమారు 30 కోట్ల కాపీలు అమ్ముడుపోయినట్లు అంచనా. అంతేకాదు... వీటిని 47 భాషల్లోకి అనువదించారంటే ఆయన పాపులారిటీ ఏమిటన్నది ఇట్టే అర్థమైపోతుంది. ఆర్చర్ పుస్తకాలు బ్రిటన్లోని సండే టైమ్స్ బెస్ట్ సెల్లర్ జాబితాలో 14 ఏళ్ల ఐదు నెలల పాటు, న్యూయార్క్ టైమ్స్ బెస్ట్ సెల్లర్ జాబితాలో ఐదేళ్లకు పైగా నిలిచినట్లు హార్పర్ కాలిన్స్ తెలిపింది.కొన్ని పెట్టుబడులతో ఆర్థికంగా భారీగా నష్టపోయిన నేపథ్యంలో ఆర్చర్...1976లో ‘నాట్ ఎ పెన్నీ మోర్, నాట్ ఎ పెన్నీ లెస్‘ ద్వారా రచయితగా అరంగేట్రం చేశారు. దివాలా అంచుల్లోంచి బయటపడ్డ తన సొంత అనుభవం స్ఫూర్తితో ఈ పుస్తకం రాసినట్టుగా చెబుతారు. 1987లో ఆర్చర్ ఒక కేసులో కోర్టులో ప్రమాణం చేసి అబద్ధం ఆడారన్న ఆరోపణ రుజువైంది. దీంతో ఆయనకు నాలుగేళ్ల జైలు శిక్ష పడింది. అయితే రెండేళ్ల జైలు శిక్ష తరువాత 2023లో ఆర్చర్ విడుదలయ్యారు. జైలు జీవితాన్ని ఆర్చర్ ‘ఎ ప్రిజన్ డైరీ‘ అనే మూడు సంపుటాల సిరీస్లో వివరించారు. -
29 ఏళ్లకే ఎంపీ.. షాకింగ్ స్కాండల్.. జైలు.. ఆ తర్వాతే అసలు కథ!
కొన్ని జీవితాలు సినిమాటిక్గా ఉంటాయి.. మరికొన్ని జీవితాలే ఓ కథగా మారుతాయి. బ్రిటన్ ప్రముఖ రచయిత జెఫ్రీ ఆర్చర్ జీవితం రెండో కోవకు చెందుతుంది. రాజకీయాల్లో అతి చిన్న వయసులోనే ఎంపీగా అడుగుపెట్టి.. సెక్స్ స్కాండల్తో కెరీర్ దెబ్బతిని.. జైలుకెళ్లి.. చివరికి ఆ జైలు జీవితం నుంచే ప్రపంచాన్ని తన కథలతో కట్టిపడేసిన స్టార్ రైటర్గా ఎదిగారు. అలాంటి రచయిత చివరికి తన చివరి నవల విడుదలకు ఒక్కరోజు ముందు కన్నుమూశారు.దిగ్గజ నవలా రచయిత జెఫ్రీ ఆర్చర్ (jeffrey archer) సోమవారం కన్నుమూశారు. ఆయన వయసు 86 ఏళ్లు. ఇంట్లో రచనా పనిలో ఉండగానే “అకస్మాత్తుగా, ప్రశాంతంగా” మృతి చెందినట్లు ప్రచురణ సంస్థ హార్పర్కాలిన్స్ తెలిపింది. ఆయన నవల అడమ్ అండ్ ఈవ్ అక్టోబర్ 6న రిలీజ్ కావాల్సి ఉంది. ఈలోపే మహా కథకుడి ప్రయాణం ముగియడంతో.. సాహిత్య ప్రపంచం విషాదంలో మునిగింది.అప్పుడు జెఫ్రీ ఆర్చర్ వయసు 29 సంవత్సరాలు. బ్రిటన్ రాజకీయాల్లోకి వచ్చిన ఆయన లౌత్ నియోజకవర్గం నుంచి కన్జర్వేటివ్ పార్టీ తరఫున ఎంపీగా గెలిచారు. అప్పటికే అతనిలో రాజకీయ నాయకుడి కంటే పెద్ద లక్ష్యాలు కనిపించేవి. ప్రసంగాలు, పరిచయాలు, నిధుల సేకరణలో ఆయనకు మంచి పేరు వచ్చింది. కానీ రాజకీయ జీవితం ఎక్కువకాలం సాగలేదు. కెనడాకు చెందిన ఓ పారిశ్రామిక కంపెనీలో భారీగా పెట్టుబడి పెట్టి నష్టపోవడంతో ఆయన అప్పుల్లో కూరుకుపోయారు. దాదాపు దివాళా అంచుకు చేరుకున్నారు. చివరకు 1974లో పార్లమెంట్ను వీడాల్సి వచ్చింది. అక్కడితో కథ ముగిసిపోయి ఉంటే.. జెఫ్రీ ఆర్చర్ పేరు ఇవాళ ఎవరికీ తెలియకపోయేదేమో.డబ్బుల్లేవు.. అప్పులు మాత్రం భారీగాఆర్థికంగా పూర్తిగా దెబ్బతిన్న సమయంలో ఆయన ఒక నిర్ణయం తీసుకున్నారు. రాయాలి. తన అప్పులు తీర్చుకోవడానికి రచయితగా మారారు. 1976లో వచ్చిన తొలి నవల నాట్ ఏ పెన్నీ మోర్.. నాట్ ఏ పెన్నీ లెస్ Not a Penny More, Not a Penny Less ఆయన జీవితాన్నే మలుపుతిప్పింది. విమర్శకులు పెద్దగా పట్టించుకోకపోయినా పాఠకులు మాత్రం పట్టించుకున్నారు. అక్కడి నుంచి ఆయన వెనక్కి తిరిగి చూడలేదు.ఆ తర్వాత వచ్చిన కేన్ అండ్ ఎబెల్(Kane & Abel) ఆయనకు అంతర్జాతీయ ఖ్యాతి తెచ్చింది. ఇద్దరు వ్యక్తులు.. రెండు భిన్న ప్రపంచాలు.. డబ్బు, అధికారం, ఆశయం, ప్రతీకారం.. ఆర్చర్ కథల్లో కనిపించే ఈ అంశాలన్నీ పాఠకులను కట్టిపడేశాయి. కాలక్రమంలో ఆయన పుస్తకాలు ప్రపంచవ్యాప్తంగా 300 మిలియన్లకు పైగా అమ్ముడయ్యాయి. ఆయన రచనలు 47కుపైగా భాషల్లో, 100కుపైగా దేశాల్లో పాఠకులను చేరుకున్నాయి.రచయితగా ఎదిగినకొద్దీ.. రాజకీయ ఆశలు కూడాఆర్చర్ రాజకీయాలను పూర్తిగా వదిలేయలేదు. 1980లలో మళ్లీ కన్జర్వేటివ్ పార్టీలో కీలకంగా ఎదిగారు. 1985లో అప్పటి ప్రధాని మార్గరెట్ థాచర్ ఆయనను పార్టీ డిప్యూటీ చైర్మన్గా నియమించారు. ఒకప్పుడు ఆర్థికంగా కుప్పకూలిన వ్యక్తి.. ఇప్పుడు అధికార పార్టీలో అగ్రస్థానానికి చేరువయ్యారు. కానీ ఈసారి సమస్య డబ్బు కాదు.ఒక మహిళతో సంబంధానికి సంబంధించిన ఆరోపణ ఆయన రాజకీయ జీవితాన్ని మరోసారి కుదిపేశాయి. డైలీ స్టార్ పత్రికపై పరువు నష్టం దావా వేసి భారీ మొత్తంలో పరిహారం కూడా గెలుచుకున్నారు. ఆ కేసులో తనపై వచ్చిన ఆరోపణలను ఆయన ఖండించారు. అయితే కొన్నేళ్ల తర్వాత అదే వ్యవహారం ఆయన జీవితంలోనే అతిపెద్ద కుంభకోణంగా మారింది.లండన్ మేయర్ కల, కానీ..1990ల చివర్లో జెఫ్రీ ఆర్చర్ లక్ష్యం మరింత పెద్దదైంది. లండన్ తొలి ఎన్నికైన మేయర్ కావాలి. 1999లో కన్జర్వేటివ్ పార్టీ ఆయనను మేయర్ అభ్యర్థిగా ఎంపిక చేసింది. రాజకీయంగా తిరిగి పుంజుకున్నానని అనుకుంటున్న సమయంలో పాత కేసు మళ్లీ తెరపైకి వచ్చింది. 1987లో డైలీ స్టార్పై వేసిన పరువు నష్టం కేసులో తనకు అనుకూలంగా తప్పుడు అలీబీ సృష్టించేందుకు స్నేహితుడిని ఉపయోగించుకున్నారన్న విషయం బయటపడింది. ఇక రాజకీయ పునరాగమనం అక్కడితో ఆగిపోయింది.కోర్టులో అబద్ధం.. జైలు2001లో జెఫ్రీ ఆర్చర్ పర్జరీ, న్యాయ ప్రక్రియను అడ్డుకోవడానికి కుట్ర చేసిన నేరాల్లో దోషిగా తేలారు. ఆయనకు నాలుగేళ్ల జైలు శిక్ష పడింది. 2003లో పెరోల్పై విడుదలయ్యారు. సుమారు రెండేళ్లు జైలులో గడిపారు. ఇక్కడే ఆర్చర్ జీవితంలో మరో అసాధారణ అధ్యాయం మొదలైంది. జైలులో కూడా రాశారు.తన జైలు అనుభవాలనే ఏ ప్రిజన్ డైరీ(A Prison Diary)గా మూడు భాగాలుగా(.. Hell, Purgatory, Heaven) రాశారు. అంటే.. ఒకప్పుడు తన కథల్లో జైలు, కోర్టు, రాజకీయాలు, కుట్రలు రాసిన రచయిత.. ఇప్పుడు వాటినే స్వయంగా అనుభవించి రాశారు.జైలు అతన్ని ఆపలేదుసాధారణంగా ఇలాంటి కుంభకోణం తర్వాత ఒక ప్రజా వ్యక్తి పేరు కనుమరుగవుతుంది. ఆర్చర్ విషయంలో అలా జరగలేదు. జైలు నుంచి బయటకు వచ్చిన తర్వాత కూడా రాయడం కొనసాగించారు. A Prisoner of Birth, Paths of Glory, The Clifton Chronicles, William Warwick సిరీస్ వంటి రచనలు వచ్చాయి. ప్రపంచవ్యాప్తంగా పాఠకులు ఆయన వెంట నడిచారు. ఆయన జీవితంలోని ఓ విచిత్రమైన విషయం ఏమిటంటే.. తనను కూల్చిన అనుభవాలనే కథలుగా మార్చుకుని మళ్లీ పాఠకుల ముందుకు రావడం. ఆర్థిక పతనం ఆయనకు తొలి నవలను ఇచ్చింది. రాజకీయాలు ఆయనకు పాత్రలను ఇచ్చాయి. కోర్టు, జైలు ఆయనకు మరో ప్రపంచాన్ని ఇచ్చాయి.భార్య మేరీ.. ప్రతి మలుపులోనూ తోడుగాజెఫ్రీ ఆర్చర్ జీవితంలో మరో ముఖ్యమైన పాత్ర ఆయన భార్య డేమ్ మేరీ ఆర్చర్ది. భర్త ఎదుర్కొన్న రాజకీయ ఆరోపణలు, కోర్టు కేసులు, జైలు.. అన్నింటి మధ్యా ఆమె ఆయనకు అండగా నిలిచారు. శాస్త్రవేత్త అయిన మేరీ ఆర్చర్ తర్వాత యూనివర్సిటీ ఆఫ్ బకింగ్హామ్ చాన్స్లర్గా కూడా పనిచేశారు. ఆర్చర్ తన వ్యక్తిగత జీవితంలో ఎన్నో తుఫాన్లు ఎదుర్కొన్నప్పటికీ.. కుటుంబ జీవితం పూర్తిగా విచ్ఛిన్నం కాలేదు.30 కోట్లకు పైగా.. ఒక విచిత్రమైన రికార్డుఆర్చర్ గురించి చెప్పేటప్పుడు ఒక సంఖ్య తప్పక చెప్పాలి. 300 మిలియన్లకు(30 కోట్లకు) పైగా. అంతటి స్థాయిలో పుస్తకాలు అమ్ముడైన రచయిత ఆయన. అంతేకాదు.. ఆయన అధికారిక వెబ్సైట్ ప్రకారం ఫిక్షన్, షార్ట్ స్టోరీస్, నాన్-ఫిక్షన్ మూడు విభాగాల్లోనూ నంబర్ వన్ బెస్ట్సెల్లర్గా నిలిచిన ఏకైక రచయితగా ఆయన రికార్డు పేర్కొంటారు. అతని కథల్లో వేగం ఉంటుంది. మలుపులు ఉంటాయి. అధికారాన్ని కోరుకునే వ్యక్తులు ఉంటారు. డబ్బు కోసం పోరాటం ఉంటుంది. ప్రేమ ఉంటుంది. ద్రోహం ఉంటుంది. విచిత్రమేమిటంటే.. ఆయన స్వయంగా అలాంటి కథలో ప్రధాన పాత్రలా జీవించారు.86 ఏళ్ల వయసులోనూ.. రాయడం ఆపలేదుజెఫ్రీ ఆర్చర్ చివరి దశ వరకు రచన కొనసాగించారు. Adam & Eveను తన చివరి నవలగా ప్రకటించారు. 50 ఏళ్ల కథా రచనా ప్రయాణానికి ముగింపు పలుకుతున్నానని స్వయంగా చెప్పారు. ఈ నవల అక్టోబర్ 6న విడుదల కావాల్సి ఉంది(అయ్యింది కూడా). నవల కథ కూడా ఆయనకు ఇష్టమైన భారీ కాన్వాస్లోనే సాగుతుంది. 1918లో మొదటి ప్రపంచ యుద్ధం ముగిసే సమయంలో పుట్టిన ఇద్దరు పిల్లలు. ఒకరు కౌంట్ కుమార్తె, మరొకరు గొర్రెల కాపరి కుమారుడు. వారి జీవితాలు, ప్రేమ, రెండో ప్రపంచ యుద్ధం.. కథ ముందుకు సాగుతుంది. ఇక ఆ పుస్తకం విడుదలకు ఒక్కరోజు ముందు.. జెఫ్రీ ఆర్చర్ చనిపోయారు. ఇంతకంటే విచిత్రమైన ముగింపు ఒక రచయిత జీవితానికి దొరకడం కష్టం.భారత్లోనూ జెఫ్రీ ఆర్చర్కు ప్రత్యేకమైన అభిమానగణం ఉంది. ‘కేన్ అండ్ ఏబెల్’, ‘నాట్ ఎ పెన్నీ మోర్, నాట్ ఎ పెన్నీ లెస్’, ‘ది క్లిఫ్టన్ క్రానికల్స్’ వంటి రచనలు ఇక్కడ విశేష ఆదరణ పొందాయి. 2019లో జైపూర్ లిటరేచర్ ఫెస్టివల్లో ఆయనను వినేందుకు ఏకంగా 7,500 మంది తరలివచ్చారు. భారతీయులు, తాను సహజమైన స్నేహితుల్లాంటివారమని ఆర్చర్ చెప్పేవారు. ఆయన పుస్తకాలకు ఉన్న డిమాండ్ కారణంగా కొన్ని సందర్భాల్లో బ్రిటన్ కంటే ముందే భారత్లో విడుదల చేసేవారు. ‘క్లిఫ్టన్ క్రానికల్స్’లో భారత్ నేపథ్యం, భారతీయ పాత్రలు కనిపించడంతోపాటు.. ఆర్.కె. నారాయణ్ రచనలను కూడా ఆయన అభిమానించేవారు. అందుకే భారత్ ఆయనకు కేవలం ఓ మార్కెట్ కాదు.. ప్రత్యేకమైన పాఠకుల ప్రపంచం.::వెబ్డెస్క్ ప్రత్యేకం -
కథాబాణాల విలుకాడు
పరిచయం చేయడానికి అతిశయోక్తులు వాడవలసిన అవసరం లేని రచయిత జెఫ్రీ ఆర్చర్ కేవలం కథనంతోనే మాయాజాలాన్ని సృష్టించగలడు. ఈ సంవత్సరం ఆర్చర్ ఎనభై ఏళ్లు పూర్తిచేసుకున్న సందర్భంగా, తను రాసిన తొంభైరెండు కథల్లో పాఠకులు మెచ్చిన ఇరవై కథలతో ప్రత్యేకమైన కథాసంపుటిని తీసుకురావాలన్న సంకల్ప ఫలితమే ‘ది షార్ట్, ది లాంగ్ అండ్ ది టాల్’. పాతకథలే అయినా, ఇందులోని ప్రత్యేకత– పాల్ కాక్స్ గీసిన బొమ్మలు. చదువుతున్న కథని వదిలేసి వాటినే చూస్తూండేలా చేస్తుంటాయి! చరిత్రని కల్పనతో కలగలిపిన కథలలోని చారిత్రకఘట్టం ప్రముఖమైనదైతే కథాపరికల్పన రాణిస్తుంది. ఆర్చర్ ఎంచుకునే చారిత్రకాంశాలు సరీగ్గా అలానే ఉంటాయి. క్రీస్తుశకపు ప్రారంభం గురించి రాసిన ‘ది ఫస్ట్ మిరకిల్’ కథలోకి సూటిగా వెళ్లిపోయి, కథ ముగిసే సమయానికి ఆ అద్భుతాన్నంతా అనుభవింపజేయిస్తుంది. నాజీల కాలంలోని దురాగతాల్లో వాడిన గాస్ ఛాంబర్ని నిర్మించినవారి సంతతి అనంతరకాలంలో అవమానభారాన్ని మోయక తప్పదు ‘ది రోడ్ టు డమాస్కస్’ కథలో. భాషని బోధించిన జర్మన్ గురువునే ఒక ఆంగ్లేయుడు యుద్ధంలో ఎదుర్కోవాల్సి వచ్చినప్పుడు, జాతివిభేదాలకి అతీతంగా మానవతాంశపు విలువలు ముందుకొచ్చి స్థిరంగా నిలబడటం వల్ల ‘ఎ గుడ్ టాస్ టు లూజ్’ అంతులేని ఉపశమనాన్ని కలిగిస్తుంది. రాజకీయాల్లో అవినీతిని గురించి రాసిన ‘క్లీన్ స్వీప్ ఇగ్నేషియస్’ కొసమెరుపు కథలాగా అనిపించినా, అవినీతి అనేది సార్వజనీనం. ఒక బ్యాంక్ ఆర్థిక పరిస్థితి నేపథ్యంగా రాసిన ‘ది గ్రాస్ ఈజ్ ఆల్వేస్ గ్రీనర్’ కథలో ప్రతి ఉద్యోగీ తనకంటే పైవాణ్ణి చూసి అసూయపడేవాడే. మరి అందరికంటే పైనున్న బ్యాంక్ చైర్మన్ ఎవర్ని చూసి అసూయ పడాలి? ఆర్చర్ చెప్పిన సమాధానంలో కథాతాత్వికత నిండివుంటుంది. ప్రేమకంటే మరేవో అంశాలు ముందుకొచ్చి కనిపిస్తుండే ప్రేమకథలు ఆర్చర్ ప్రత్యేకత. ‘వన్ మాన్స్ మీట్’లోని అబ్బాయి, అమ్మాయిల మధ్య చదువుల్లో స్పర్ధలు ప్రధానంగానూ, ‘క్రిస్టినా రోసెంథాల్’లో పరస్పర విముఖత ప్రధానంగానూ కనిపిస్తాయి. మొదటికథలోని నాలుగు ముగింపులూ ఎంత వైవిధ్యభరితంగా ఉంటాయో, రెండోకథలోని రెండు ముగింపువాక్యాలూ అంత విషాదభరితంగా ఉంటాయి. వ్యాపారాలు, మోసాలు, ఎత్తుకి పైఎత్తులు ఆర్చర్కి ఇష్టమైన సబ్జక్ట్. సగం ధరకే నగని సంపాదించినట్టు కనిపించే ‘చీప్ ఎట్ హాఫ్ ప్రైస్’, ఉంగరాన్ని షాప్నుంచి దొంగిలించడానికి వేసిన పథకంతో ‘స్టక్ ఆన్ యు’ ఈ తరహా కథలు. ఈ రెండు కథల్లోని వాతావరణ పోషణ, సూక్ష్మవివరాల పట్ల రచయిత పరిశీలనని ప్రస్ఫుటపరుస్తుంది. సాహిత్యం నేపథ్యంగా సాగే ‘ఎ జెంటిల్మన్ అండ్ ఎ స్కాలర్’లో షేక్స్పియర్ సాహిత్యం అంతర్వాహిని అయితే, ‘ఎ వేస్టెడ్ అవర్’లో ప్రముఖ రచయిత జాన్ స్టైన్బెక్ ప్రధానపాత్ర. ఈ కథల్లోని భాషాచాతుర్యం ప్రత్యేకంగా గమనించవలసిన అంశం. ఆర్చర్ కథల్లో పైకి కనిపించే వస్తువు మాటున మరో అంశం కూడా తొంగిచూస్తుంటుంది. ‘హూ కిల్డ్ ద మేయర్’ కథలో హత్యోదంతం ప్రధానస్రవంతి, మరో ప్రేమకథ ఉపాంగం. ‘ది క్వీన్స్ బర్త్డే టెలిగ్రాం’ కథలో వందవ పుట్టినరోజు జరుపుకోవడం ప్రధానాంశమే కానీ, ఆలస్యంగా వెలుగుచూసే రహస్యాలు కొసరు కథ. దీనికి విరుద్ధంగా ఆర్చర్ చేసే ప్రయోగం మరోటుంది. ‘నెవర్ స్టాప్ ఆన్ ద మోటార్వే’ కథలో హంతకుడు వెంబడిస్తున్నాడనుకోవడం భ్రమ; గమనించని నిజం వేరే ఉంటుంది. అలానే, ‘ఇట్ కాన్ట్ బి అక్టోబర్ ఆల్రెడీ’ కథలోని పాత్ర చెబుతూండే అసంపూర్ణ కథే అసలుకథ అనే భ్రమ నుంచి, ఒక పాత ఐరిష్ జోక్లోకి మారిపోవడం బాగుంటుంది. ""... but however hard she tried she could not be other than beautiful'' అంటాడు కథకుడు ఒక కథలో. ఈ సంపుటిలో రెండుమూడు కథలు చేర్చి ఉండకపోయినా ఫరవాలేదు అనిపిస్తుంది కానీ, అవి కూడా ‘బ్యూటిఫుల్’ కథలే! ముఖ్యంగా– అవి కూడా ఆర్చర్కి నచ్చిన కథలే కావడం వల్ల. -ఎ.వి.రమణమూర్తి 9866022150 పుస్తకం: ది షార్ట్, ది లాంగ్ అండ్ ది టాల్ రచన: జెఫ్రీ ఆర్చర్ ప్రచురణ: సెయింట్ మార్టిన్స్, 2020 -
మాల్గుడి నారాయణ్
‘ఏ కోర్సూ నిన్ను ఆర్కే నారాయణ్ చేయలేదు,’ అంటాడు రచయిత జెఫ్రీ ఆర్చర్. చిన్న మనుషులు, చిన్న సంపాదనలు, చిన్న సమస్యలు... పుస్తకం కూడా చిన్నదిగానే ఉండాలి. రెండొందల పేజీలకు మించకూడదు! ‘స్వామి’ ఎంతుంటాడు! కానీ వాడి ఎత్తు భారతదేశం నుంచి ఆఫ్రికానో, అమెరికానో అందుకునేంత. ఉపాధ్యాయుడిగా మొదట్లో పనిచేసిన ఆర్కే(1906–2001)కు ఆ పనిలో అర్థం కనబడలేదు. దాంతో రచయిత అయిపోదామని వాళ్ల బామ్మ దగ్గర ప్రకటించేసి, ముహూర్తం చూసుకుని మరీ నోట్బుక్ ముందేసుకుని కూర్చున్నాడు. ఊహా రైల్వేస్టేషన్ మాల్గుడి తళుక్కుమంది. ‘స్వామి అండ్ ఫ్రెండ్స్’ పరుగెత్తుకుని వచ్చేశారు. అయితే, స్వామి ఇంగ్లీషులో మాట్లాడతాడు. ఆయన వరకూ అది పరాయిభాష కాదు, పెరిగిన వాతావరణమే అది. పుట్టిన తమిళమంత, పెరిగిన కన్నడమంత అలవోకగా ఇంగ్లీషులో రాశాడు, తొలితరపు భారతీయాంగ్ల రచయిత అయ్యాడు. ప్రతి నాయకుడి పాత్రయినా సరే, దాన్ని నిలబెట్టగలిగేదేదో పట్టుకోవాలి, అంటారాయన. ‘మాల్గుడి డేస్’, ‘ది ఇంగ్లీష్ టీచర్’, ‘ద బాచిలర్ ఆఫ్ ఆర్ట్స్’, ‘మిస్టర్ సంపత్’, ‘ఫినాన్సియల్ ఎక్స్పర్ట్’, ‘వెయిటింగ్ ఫర్ ద మహాత్మ’, ‘ద గైడ్’, ‘ద మ్యాన్ ఈటర్ ఆఫ్ మాల్గుడి’, ‘టాకెటివ్ మ్యాన్’, ‘అండర్ ద బన్యాన్ ట్రీ’, ‘మై డేస్’, ఆయన ఇతర రచనలు. ఆత్మకథాత్మకంగా కనబడే ఆయన పుస్తకాలకు, ‘ఈ కథలో ఏముంది? శక్తివంతమైన క్లైమాక్స్ లేదు. అసలు ఎటు తీసుకెళ్దామని దీన్ని?’ లాంటి ప్రశ్నలు ఎదుర్కొన్నారు. అయినా అదే శైలికి కట్టుబడి ఉండటానికి కారణం, ఇంకోరకంగా నేను రాయలేకపోవడమే, అంటారు. -
'భారత రవాణా మంత్రి కావాలని ఉంది'
కోల్ కతా:భారత రవాణా మంత్రిత్వ శాఖపై బ్రిటీష్ రచయిత జెఫ్రీ ఆర్చర్ మనసుపడ్డాడు. తనకు మళ్లీ జన్మ అంటూ ఉంటే భారత్ లో రవాణా మంత్రిగా చేయాలని ఉందని మనుసులోని కోరికను స్పష్టం చేశాడు ఆర్చర్. ఈ భూమి మీద అత్యంత కఠినమైన ఉద్యోగం ఏదైనా ఉందంటే అది భారత్ లోని రవాణా మంత్రిత్వ శాఖేనని అభిప్రాయపడ్డాడు. 'ప్రస్తుతానికి నాకు ఆ అవకాశం లేదు. మళ్లీ జన్మ ఉంటే భారత్ లోని ఆ శాఖకు మంత్రిగా పని చేస్తా'అని అన్నాడు.ఒక వేళ అది సాధ్యం కాకపోతే ఇంగ్లండ్ క్రికెట్ కు కెప్టెన్ గా చేయాలని ఉందని తెలిపాడు. తను రాసిన 'మైటియర్ ధేన్ ది స్వార్డ్' పుస్తక ఆవిష్కరణలో భాగంగా ఇక్కడకు హాజరైన ఆర్చర్ పై విధంగా స్పందించాడు.


