breaking news
armed attackers
-
నైజీరియాలో నేరగాళ్ల దురాగతం
అబుజా: నైజీరియా ఈశాన్య ప్రాంతంలో సాయుధ నేరగాళ్ల ముఠా సామాన్యుల రక్తం కళ్ల జూసింది. బందిపోట్లుగా స్థానికులు పిలిచే ఈ ముఠా ఓ గ్రామంలో జరుగుతున్న వారసంతపై పడి ఏకంగా 62 మందిని చంపేసింది. వీరు జరిపిన కాల్పుల్లో మరో 52 మంది గాయాలపాలయ్యారు. టరాబా రాష్ట్రంలోని కరిం–లమిడో పరిధిలోని బిన్నారిలో శుక్రవారం ఈ దారుణం చోటుచేసుకుందని నేషనల్ ఎమర్జెన్సీ మేనేజ్మెంట్ ఏజెన్సీ అధికారి లడన్ అయుబా చెప్పారు. బిన్నారి పక్కనే ఉన్న నదిలోనూ 15 వరకు మృతదేహాలు లభ్యమయ్యాయన్నారు. దుండగులను చూసి పారిపోయే క్రమంలో నీళ్లలో మునిగి వీరు చనిపోయారన్నారు. ఈ ప్రాంతంలో మృతదేహాలు ఇంకా బయటపడుతున్నందున మరణాలు మరింతగా పెరిగే అవకాశముందని వివరించారు. ఆమ్నెస్టీ ఇంటర్నేషనల్ నైజీరియా డైరెక్టర్ ఇసా సనుసి ఈ దారుణంపై వివరిస్తూ.. మోటారు సైకిళ్లపై వచ్చిన దుండగులు వార సంత జరుగుతున్న చోటుకు చేరుకున్నారు. అక్కడున్న సామాన్యులపైకి ఆ దుండగులు ఒక్కసారిగా కాల్పులకు తెగబడ్డారు. వారు పక్కనే ఉన్న బెన్యు నదిని తమకు అనుకూలంగా మార్చుకున్నారు. ప్రజలను నది వైపునకు తరుముకుంటూ వెళ్లారు. ప్రాణాలు కాపాడుకునేందుకు, తప్పించుకోవడానికి కొందరు నదిలోకి దూకారు. కొందరు నీట మునిగి ప్రాణాలు కోల్పోయారు’అని చెప్పారు. అనంతరం దుండగులు ప్రజల ఇళ్లను ధ్వంసం చేసి, నిప్పు పెట్టారన్నారు. భయాందోళనకు గురైన వేలాది మంది ఊళ్లను విడిచి సురక్షిత ప్రాంతాలకు వెళ్లిపోయారు. నైజీరియా ఉత్తర ప్రాంతంలో సామాన్య ప్రజలపై బందిపోట్ల దాడులు సర్వసాధారణం. దుండగులు పెద్ద సంఖ్యలో ప్రజలను కిడ్నాప్ చేసి, డిమాండ్ చేసినంత డబ్బు ఇచ్చాక వదిలి వేస్తుంటారు. ఈ నేరగాళ్ల ముఠాలు అక్రమ మైనింగ్ కార్యకలాపాలు కూడా నడుపుతుంటాయి. వీరికి తోడు బోకో హరామ్, ఇస్లామిక్ స్టేట్ వంటి గ్రూపులు కూడా ఇక్కడ చురుగ్గా పనిచేస్తున్నాయి. -
వెస్ట్బ్యాంక్లో పాలస్తీనా వాసిపై దాడి
టెల్ అవీవ్: ఆక్రమిత వెస్ట్ బ్యాంక్లోని ఓ నర్సరీపై ముసుగు ధరించిన సాయుధులు దాడి చేశారు. ఒక పాలస్తీనా వాసిని దారుణంగా కొట్టారు. ఇందుకు సంబంధించిన వీడియో వైరల్గా మారింది. దెయిర్ షరాఫ్ గ్రామానికి సమీపంలోని ఓ మొక్కల నర్సరీ ఉంది. ఇందులో పాలస్తీనా వాసి అయిన 67 ఏళ్ల బధిరుడు బసిమ్ సలేహ్ యాస్సిన్ పనిచేస్తున్నాడు. సెటిలర్లయిన కొందరు వ్యక్తులు ముసుగులు, ఆయుధాలు ధరించి గురువారం ఆ నర్సరీ వద్దకు వచ్చారు. వారిని చూసి నర్సరీలో పనిచేసే వారంతా దూరంగా వెళ్లిపోయారు. వెళ్తూ వారు బధిరుడైన బసిమ్కు హెచ్చరికలు చేశారు. వినిపించకపోవడంతో అతడు అక్కడే ఉండిపోయాడు. దుండగులు వచ్చీ రావడంతోనే అక్కడ కనిపించిన బసిమ్పై కాళ్లతో తన్నుతూ కర్రలతో కొట్టారు. అతడు నేలపై పడిపోయేదాకా కొట్టి, వదిలేసి వెళ్లిపోయారు. ఈ దాడిని ప్రత్యక్షంగా చూసిన వారు సెల్ఫోన్లలో బంధించి ఆన్లైన్లో ఉంచారు. బసిమ్ చేతి వేళ్లు విరిగిపోయా యని, శరీరమంతటా గాయాలతో ఆస్పత్రిలో చికిత్స పొందుతున్నట్టు నర్సరీ నిర్వాహకులు తెలిపారు. -
పోలీస్ స్టేషన్కు తుపాకులతో వచ్చి..
జైపూర్: సాయుధులైన పది మంది ఏకే–47 రైఫిల్తో పోలీస్స్టేషన్పై కాల్పులు జరిపి జైల్లో ఉన్న నిందితున్ని తమతో తీసుకెళ్లిన ఘటన రాజస్తాన్లోని అల్వార్ జిల్లాలో చోటుచేసుకుంది. పోలీసులు తెలిపిన వివరాల ప్రకారం.. పోలీసులు పెట్రోలింగ్ విధులు నిర్వహిస్తుండగా విక్రమ్ గుజ్జర్ (28, పప్లాగా సుపరిచితుడు) వాహనంలో రూ. 30 లక్షలు పట్టుకున్నారు. అనంతరం డబ్బును సీజ్ చేసి పప్లాను పోలీస్స్టేషన్కు తీసుకెళ్లారు. పోలీసులు ఆతన్ని విచారిస్తుండగా, సాయుధులైన దాదాపు 15 మంది దుండగులు ఏకే 47 రైఫిళ్లతో పోలీస్స్టేషన్లోకి ప్రవేశించారు. దాదాపు 45 రౌండ్లు కాల్పులు జరిపి పప్లాను తీసుకొని ఉడాయించారు. ఈ ఘటనలో ఎవరూ గాయపడలేదు. తప్పించుకున్న వారి కోసం గాలిస్తున్నామని పోలీసు అధికారి సుగన్ సింగ్ అన్నారు. హరియాణాకు చెందిన పప్లా మీద ఇప్పటికే అయిదు హత్యా నేర అభియోగాలున్నాయి. ఆయుధాలు ధరించిన ఫొటోలను తరచూ సామాజిక మాధ్యమాల్లో పోస్టు చేస్తుంటాడు. అతడిపై రూ. లక్ష రివార్డు కూడా ఉంది. -
మాలి జాతి ఘర్షణల్లో 50 మంది దుర్మరణం
బమాకో: ఆఫ్రికాదేశమైన మాలి మరోసారి నెత్తురోడింది. మాలిలోని ఫులానీ తెగకు చెందిన ఒగౌస్సగౌ గ్రామంపై శనివారం తెల్లవారుజామున 4 గంటలకు డోగోన్ జాతికి చెందిన వేటగాళ్లు దాడిచేశారు. విచక్షణారహితంగా తుపాకులతో కాల్పులు జరుపుతూ నివాసాలకు నిప్పుపెట్టారు. ఈ దుర్ఘటనలో 50 మంది ఫులానీ తెగప్రజలు ప్రాణాలు కోల్పోయారు. ఈ విషయమై ప్రభుత్వ ఉన్నతాధికారి ఒకరు మాట్లాడుతూ.. పశువుల మేత, నీటి విషయంలో ఈ రెండు తెగల మధ్య కొన్నేళ్లుగా ఘర్షణలు కొనసాగుతున్నాయని తెలిపారు. ఈ ఏడాది జనవరిలో చోటుచేసుకున్న ఘర్షణలో డోగోన్ వేటగాళ్లు 37 మంది ఫులానీ ప్రజలను చంపేశారన్నారు. ఈ ప్రాంతంలోని జాతివైరాన్ని అల్కాయిదా, ఇస్లామిక్ స్టేట్ వంటి ఉగ్రసంస్థలు పావుగా వాడుకుంటూ భారీగా చేరికలు చేపడుతున్నాయని పేర్కొన్నారు. -
కోర్టులో ఆగంతకులు కాల్పులు: ముగ్గురు మృతి
పాకిస్థాన్ కోర్టు తుపాకుల కాల్పులతో దద్దరిల్లింది. ఆ కాల్పులలో పోలీసు, ఖైదీతోపాటు ఓ పౌరుడు మృతి చెందారు. ఆ ఘటన రావల్పిండిలోని స్థానిక కోర్టులో శుక్రవారం చోటు చేసుకుందని డాన్ పత్రిక వెల్లడించింది. స్థానిక కోర్టులో ఈ రోజు ప్రశాంతంగా ఓ కేసు విచారణ కొనసాగుతుంది. అయితే అప్పటికే కోర్టు హాల్లోకి ప్రవేశించిన ఆగంతకులు విచక్షణ రహితంగా కాల్పులకు తెగబడ్డారు. దాంతో కోర్టులోని వారంత ప్రాణాలు అరచేతిలో పెట్టుకుని బయటకు పరుగులు తీశారు. అయితే వెంటనే అప్రమత్తమైన పోలీసులు ఎదురు కాల్పులు జరిపి....నలుగురు నిందితలను ఆదుపులోకి తీసుకున్నారు. వారిని అరెస్ట్ చేసి రహస్య ప్రాంతానికి తరలించి విచారిస్తున్నారు. అయితే ఆ దాడికి పాల్పడింది తామేనంటూ ఇంత వరకు ఏ సంస్థ ప్రకటించ లేదని డాన్ పేర్కొంది. ఆ సంఘటనలో గాయపడిన వారు పలు ఆసుపత్రులలో చికిత్స పొందుతున్నారు.


