ప్లేట్లోంచి నోట్లోకి టేస్టీ ఎవరెస్ట్...!

ప్లేట్లోంచి నోట్లోకి టేస్టీ ఎవరెస్ట్...!

ఇప్పిస్తే అలకలు తీరుస్తుంది. అంటిస్తే మెలికలు తిప్పేస్తుంది. ఈ పొడుపు కథకు ఆన్సరేమిటీ? పళ్లను జిల్లనిపించే, నాల్కకు ఛిల్లనిపించే థ్రిల్లయిన ఐస్‌క్రీమ్. ఐస్‌క్రీమ్ తినడం ఈజీక్వల్‌టూ నైస్‌డ్రీమ్ కనడం
 ఐస్‌క్రీమ్ తెచ్చి ఇచ్చి ఐస్‌లో ఐస్ పెట్టి చూస్తే చాలు  
 ప్రేమికులు ఐసైపోవాల్సిందేనట!
 ఐస్‌క్రీములు కేవలం వాళ్లకోసమేనా?  
 వయసుతో నిమిత్తం లేకుండా అందరికోసం కాదా?
 ఎందుక్కాదూ!
 ఐస్‌క్రీములంటేనే వైజ్ ప్యూపిల్స్ కోసం,
 గాళ్స్ అండ్ గైస్ అండ్ నైస్ పీపుల్ కోసం
 అందుకే ఈ వేసవిలో మనాలీ వెళ్లినట్టనిపించేలా
 వెనీలానూ, కష్టాలన్నీ తీరేలా కస్టర్డ్ సలాడ్స్‌నూ
 మరెన్నో రకాలతో పాటు మ్యాంగో మ్యానియానూ
 మీకందిస్తున్నాం.
 కప్, కోన్‌లలోనే ఎవరెస్టులెక్కండి.
 తనివితీరా... చల్లటి ఐస్‌క్రీములు మెక్కండి.
 
 మ్యాంగో మ్యానియా
 
 కావలసినవి
 డెజైస్టివ్ బిస్కెట్స్ - రెండు కప్పులు; అన్‌సాల్టెడ్ బటర్ - 100 గ్రా. (కరిగించాలి); క్రీమ్ చీజ్ - ఒక టిన్; క్రీమ్ - ఒక కప్పు; మామిడిపండు గుజ్జు - ఒకటిన్నర కప్పులు; మామిడిపండు ముక్కలు - కప్పు; జిలెటిన్ - టీ స్పూను (సూపర్ మార్కెట్‌లో దొరుకుతుంది) వేడి నీళ్లు - అర కప్పు; పంచదార - అర కప్పు
 
 తయారీ
 బిస్కెట్లను మెత్తగా పొడి చేయాలి.
     
 కరిగించిన బటర్, బటర్ ఒక పాత్రలో వేసి రెండూ కలిపి, గ్లాసులలో వేసి గట్టిగా ఒత్తి, ఫ్రిజ్‌లో పది నిమిషాలు ఉంచాలి.
     
 ఒక పాత్రలో క్రీమ్ చీజ్, క్రీమ్, పంచదార వేసి బాగా గిలక్కొట్టాలి.
     
 మామిడిపండు ముక్కలు జత చేయాలి.
     
 అరకప్పు వేడి నీళ్లలో జిలెటిన్ వేసి కరిగించాలి.
     
 మామిడిపండు గుజ్జు జత చేసి, ఈ మిశ్రమాన్ని సగం పక్కన పెట్టి, మిగిలిన దానికి క్రీమ్ చీజ్ జత చేసి బాగా కలపాలి.
     
 ఫ్రిజ్‌లో నుంచి గ్లాసులను బయటకు తీసి, వాటిలో మామిడిపండు మిశ్రమం, చీజ్ మిశ్రమం వరుసగా పోయాలి.
     
 ఇలా చేయడం వల్ల అన్ని పదార్థాలు కలిసిపోకుండా విడివిడిగా కనిపిస్తాయి.
      
 గ్లాసులను సుమారు నాలుగు గంటలు డీప్ ఫ్రిజ్‌లో ఉంచి, చల్లగా అందించాలి.
 
 ఈజీ వెనీలా ఐస్‌క్రీమ్
 
 కావలసినవి:
క్రీమ్ - 2 కప్పులు (సూపర్ మార్కెట్ లేదా బేకరీలో దొరుకుతుంది); హోల్ మిల్క్ - కప్పు; పంచదార - 2/3 కప్పు; వెనీలా ఎక్స్‌ట్రాక్ట్ - టీ స్పూను; వెనీలా బీన్ - 1 (తురమాలి)
 
 తయారీ:
 ఒక పాత్రలో క్రీమ్, పాలు, పంచదార, వెనీలా వేసి బాగా కలిపి స్టౌ మీద ఉంచి పంచదార కరివేవరకు కలుపుతుండాలి
 
 వెనీలా బీన్ తురుమును పాల మిశ్రమంలో వేసి కలిపి దించి, ఒక పాత్రలో పోసి చల్లారనివ్వాలి
 
 పైన ప్లాస్టిక్ కవర్‌తో చుట్టి సుమారు నాలుగు గంటల సేపు ఫ్రిజ్‌లో ఉంచి బయటకు తీయాలి  
 
 మిక్సీలో వేసి మెత్తగా చేసి మళ్లీ పాత్రలో పోసి ఫ్రిజ్‌లో ఉంచాలి  
 
 ఈ విధంగా సుమారు మూడు సార్లు చేసి చివరగా డీప్ ఫ్రిజ్‌లోఉంచి నాలుగు గంటల తర్వాత తీసి చెర్రీలు, కిస్‌మిస్‌లతో గార్నిష్ చేసి చల్లగా సర్వ్ చేయాలి.
 
 మిక్స్‌డ్ ఫ్రూట్ క స్టర్డ్
 
 కావలసినవి:
 పాలు - పావు లీటరు; కస్టర్డ్ పౌడర్ - 2 టీ స్పూన్లు; పంచదార - 50 గ్రా.; అరటిపళ్లు - 2;  ఆపిల్ - 1 ; దానిమ్మ - 1; ద్రాక్షపళ్లు - కొద్దిగా; చెర్రీస్, డ్రైఫ్రూట్స్ - గార్నిషింగ్ కోసం.
 
 తయారీ:
 ఒక పాత్రలో పాలు పోసి మరిగించాలి  
 
 పంచదార జత చేయాలి కస్టర్డ్ పౌడర్‌ను కొద్దిగా చన్నీటిలో వేసి కలిపి ఆ మిశ్రమాన్ని మరుగుతున్న పాలలో వేసి కలిపి దించేసి చల్లారనివ్వాలి  
 
 చల్లారిన పాలకు పండ్ల ముక్కలు జత చేసి ఫ్రిజ్‌లో ఉంచాలి  
 
 సుమారు రెండు గంటల తరువాత బయటకు తీసి, క ప్పులలో ఉంచాలి  
 
 డ్రైఫ్రూట్స్ ముక్కలు, చెర్రీలు, ద్రాక్షపళ్లతో గార్నిష్ చేసి సర్వ్ చేయాలి.
 
 చాకొలేట్ చిప్ ఐస్ క్రీమ్
 
 కావలసినవి
 పాలు - అర లీటరు; హెవీ క్రీమ్ - అర లీటరు;
 పంచదార - మూడు టేబుల్ స్పూన్లు;
 ప్లెయిన్ చాకొలేట్ తురుము - 3 టీ స్పూన్లు
 (ఇందులోని పదార్థాలన్నీ సూపర్‌మార్కెట్‌లో దొరుకుతాయి)
 
 తయారీ
 ఒకపాత్రలో పాలు, పంచదార వేసి సన్నని మంట మీద ఉంచి పంచదార కరిగేవరకూ కలుపుతుండాలి.
     
 పాలు చల్లారేవరకు పక్కన ఉంచి చల్లారాక క్రీమ్ వేసి కలపాలి.
     
 తయారుచేసి ఉంచుకున్న మిశ్రమాన్ని జాగ్రత్తగా ఒక పాత్రలో పోసి, ఫ్రిజ్‌లో సుమారు రెండు గంటలు ఉంచాలి.
     
 బయటకు తీసి, ఫ్రీజర్‌లో సుమారు అరగంట ఉంచాక, బయటకు తీసి మిక్సీలో వేసి మెత్తగా చేయాలి.
     
 ఫ్రీజర్‌లో మరో అరగంట ఉంచి తీసి మళ్లీ మిక్సీలో వేసి మెత్తగా చేయాలి.
     
 ఈ విధంగా మూడు నాలుగు సార్లు చేయాలి.
     
 చివరగా ఈ మిశ్రమాన్ని డీప్ ఫ్రీజ్‌లో ఉంచి అరగంట తర్వాత తీసి సర్వ్ చేయాలి.
 
 ఫ్రోజెన్ బనానా కస్టర్డ్
 
 కావలసినవి:
 పాలు-2 కప్పులు; బ్రౌన్ సుగర్-కప్పు; కస్టర్డ్ పౌడర్ - 4 టేబుల్ స్పూన్లు; వెనిలా ఎసెన్స్-టీ స్పూను; అరటిపళ్లు - 3 (బాగా పండినవి); రాస్ప్ బెర్రీస్-కొన్ని
 
 తయారీ:  
 ఒక పాత్రలో పాలు, బ్రౌన్ సుగర్ వేసి పంచదార కరిగేవరకు పాలు కలుపుతుండాలి  చల్లటి నీళ్లలో కస్టర్డ్ పొడి వేసి జారుగా కలిపి, మరుగుతున్న పాలలో వేయాలి  వెనిలా ఎసెన్స్ జత చేసి, బాగా ఉడికిన తర్వాత దించేయాలి  
 
 అరటిపళ్లను ముక్కలుగా కట్ చేసి ఒక పాత్రలో ఉంచి, మూత పెట్టి ఫ్రిజ్‌లో సుమారు అరగంటసేపు ఉంచాలి  
 
 పాల మిశ్రమం పూర్తిగా చల్లారాక అరటిపండు ముక్కల మీద పోసి మళ్లీ సుమారు అరగంటసేపు ఫ్రిజ్‌లో ఉంచి తీసి సర్వ్ చేయాలి.
 
 ఫిజీ మింట్
 చలివేంద్రం
 
 కావలసినవి:
 పుదీనా ఆకులు - ఒక కట్ట; నిమ్మకాయ - సగం చెక్క; పంచదార పొడి - 3 టీ స్పూన్లు; రాళ్ల ఉప్పు - టీ స్పూను; సోడా లేదా నీళ్లు - 100 మి.లీ.
 
 తయారీ:
 పుదీనా ఆకులను, నిమ్మచెక్కను రసం పిండే దానిలో ఉంచి గట్టిగా ఒత్తి రసం వేరు చేయాలి
 
 ఒక గ్లాసులో పంచదార పొడి, ఉప్పు వేసి కలపాలి
 
 పుదీనా, నిమ్మ చెక్కల రసాన్ని పంచదార మిశ్రమం మీద పోయాలి  
 
 సోడా జత చేసి కాసేపు ఫ్రిజ్‌లో ఉంచి తీసి, చల్లగా సర్వ్ చేయాలి.
 
 సేకరణ: డా. వైజయంతి