రేపు వెల్లడికానున్న జియో భవిష్యత్

ముంబై : టెలికాం కంపెనీల గుండెల్లో గుబేలు పుట్టిస్తున్న రిలయన్స్ జియో ఇన్ఫోకామ్ భవిష్యత్ ప్రణాళిక గురువారం వెల్లడికానుంది. రేపు జరిగే వార్షిక సర్వసభ్య సమావేశంలో ఈ ప్లాన్ వివరాలను రిలయన్స్ ఇండస్ట్రీస్ చైర్మన్ ముకేశ్ అంబానీ ప్రవేశపెట్టనున్నట్టు తెలుస్తోంది. చాలా కాలంగా ఎదురుచూస్తున్న టారిఫ్ ప్లాన్ వివరాలు ఈ సమావేశంలో ముకేశ్ వివరించనున్నారని అధికారులు పేర్కొంటున్నారు.ఎల్వైఎఫ్ వంటి ప్రత్యేక కేటిగిరీ యూజర్లను లక్ష్యంగా చేసుకుని కంపెనీ టారిఫ్ ప్యాకేజీలను ప్రకటించనుందని తెలుస్తోంది. ఇప్పటికే జియో గుబులుతో రేట్లలో భారీగా కోత విధిస్తున్న టెలికాం పరిశ్రమ ఈ టారిఫ్ వివరాలపై ఎక్కువగా దృష్టిసారించింది. అదేవిధంగా టారిఫ్ ప్లాన్స్ కు సంబంధించిన వివరాలను టెలికాం రెగ్యులేటరీ అథారిటీ ఆఫ్ ఇండియా(ట్రాయ్) కు కూడా త్వరలోనే ఫైల్ చేయాలని జియో భావిస్తోంది.