సీబీఐకి సిద్ధం

అంతకు ముందు కర్ణాటక ప్రభుత్వం అనుమతించాలి
లోక్‌సభలో కేంద్ర హోం శాఖ మంత్రి రాజ్‌నాథ్ వెల్లడి
 
బెంగళూరు: ఐఏఎస్ అధికారి డి.కె.రవి మృతికి సంబంధించిన కేసును సీబీఐకి అప్పగించాల్సిందిగా డిమాండ్ చేస్తూ లోకసభలో కర్ణాటకకు చెందిన బీజేపీ ఎంపీలు గురువారం సైతం తమ నిరసనను కొనసాగించారు. బీజేపీ ఎంపీ ప్రహ్లాద్‌జోషి లోక్‌సభలో ఈ విషయాన్ని గురువారం సైతం ప్రస్తావించారు. నిజాయితీ గల అధికారిగా ప్రజల మన్ననలు అందుకున్న డి.కె.రవి ఆత్మహత్య చేసుకునేంత పిరికివారు కాదని ప్రహ్లాద్‌జోషి తెలిపారు.

కర్ణాటక ప్రభుత్వం ఈ కేసును సీఐడీకి అప్పగించిందని, అయితే సీఐడీ విచారణపై డి.కె.రవి తల్లిదండ్రులతో పాటు రాష్ట్ర ప్రజలందరిలోనూ వ్యతిరేకత వ్యక్తమవుతోందని అన్నారు. అందుకే ఈ విషయంలో కేంద్రం జోక్యం చేసుకొని డి.కె.రవి మృతి కేసు దర్యాప్తును సీబీఐకి అప్పగించేలా చర్యలు తీసుకోవాలని కోరారు. ఈ అంశంపై కేంద్ర హోం శాఖ మంత్రి రాజ్‌నాథ్ సింగ్ సమాధానమిస్తూ...‘ఈ కేసును సీబీఐకి అప్పగించేందుకు రాష్ట్ర ప్రభుత్వం అంగీకరిస్తే విచారణ జరిపేందుకు మేం సిద్ధంగానే ఉన్నాం’ అని తెలిపారు.