రాజస్తాన్‌ లక్ష్యం​ 177

జైపూర్‌: ఇండియన్‌ ప్రీమియర్‌ లీగ్‌(ఐపీఎల్‌)లో భాగంగా రాజస్తాన్‌ రాయల్స్‌తో జరుగుతున్న మ్యాచ్‌లో చెన్నై సూపర్‌ కింగ్స్‌ 177 పరుగుల లక్ష్యాన్ని నిర్దేశించింది. టాస్‌ గెలిచి బ్యాటింగ్‌ ఎంచుకున్న చెన్నై సూపర్‌ కింగ్స్‌ 19 పరుగుల వద్ద అంబటి రాయడు(12) వికెట్‌ను కోల్పోయింది. ఆ తరుణంలో మరో ఓపెనర్‌ షేన్‌ వాట్సన్‌కు జత కలిసిన సురేశ్‌ రైనా ఇన్నింగ్స్‌ను ముందుకు తీసుకెళ్లాడు. వీరిద్దరూ రెండో వికెట్‌ 86 పరుగుల భాగస‍్వామ్యాన్ని సాధించిన తర్వాత వాట్సన్‌(39; 31 బంతుల్లో 2 ఫోర్లు, 2 సిక్సర్లు) ఔటయ్యాడు. ఆపై రైనాకు ఎంఎస్‌ ధోని జత కలిశాడు.

కాగా, హాఫ్‌ సెంచరీ నమోదు చేసిన తర్వాత రైనా(52;35 బంతుల్లో 6 ఫోర్లు, 1 సిక్స్‌) మూడో వికెట్‌గా పెవిలియన్‌ చేరాడు. దాంతో ఇన్నింగ్స్‌ నడిపించే బాధ్యతను మరోసారి భుజాలపై వేసుకున్న ధోని సమయోచితంగా ఆడాడు. సామ్‌ బిల్లింగ్స్‌ కలిసి ఇన్నింగ్స్‌ను చక్కదిద్దాడు. ధోని(33 నాటౌట్‌; 23 బంతుల్లో 1 ఫోర్‌, 1 సిక్సర్‌),  సామ్‌ బిల్లింగ్స్‌(27;‌ 22 బంతుల్లో 3 ఫోర్లు) బాధ్యతాయుతంగా ఆడారు.  ఫలితంగా చెన్నై సూపర్‌ కింగ్స్‌ నిర్ణీత ఓవర్లలో నాలుగు వికెట్లు కోల్పోయి 176 పరుగులు చేసింది. రాజస్తాన్‌ రాయల్స్‌ బౌలర్లలో జోఫ్రా ఆర్చర్‌ రెండు వికెట్లు తీయగా, ఇష్‌ సోథీకి వికెట్‌ దక్కింది.