లవ్లీ ఎంటర్ టైనర్...

సీనియర్ నటుడు నరేశ్ తనయుడు నవీన్ విజయ్‌కృష్ణ హీరోగా, నిత్యానరేశ్ నాయికగా ఓ చిత్రం రూపొందుతోంది. ఎస్.వి.సి ఎంటర్‌టైన్‌మెంట్స్ పతాకంపై పీవీ గిరి దర్శకత్వంలో బిక్షమయ్య, రాధాకిషోర్ నిర్మించనున్న ఈ చిత్రం శనివారం హైదరాబాద్‌లో ప్రారంభమైంది. ముహూర్తపు సన్నివేశానికి హీరో సాయిధరమ్ తేజ్ కెమెరా స్విచ్చాన్ చేశారు. సూపర్‌స్టార్ కృష్ణ క్లాప్ కొట్టగా, విజయనిర్మల గౌరవ దర్శకత్వం వహించారు. కృష్ణ మాట్లాడుతూ-‘‘ నవీన్ హీరోగా చేస్తున్న రెండో చిత్రమిది.  వైవిధ్యమైన ప్రేమకథగా అందరినీ నవ్వించే ఎంటర్‌టైనర్’’ అని అన్నారు. ‘‘చాలా ఎంటర్‌టైనింగ్‌గా ఉండే సబ్జెక్ట్ ఇది. ప్రేక్షకులకు నచ్చే అన్ని అంశాలతో ఈ చిత్రం సాగుతుంది’’ అని నరేశ్ తెలిపారు. రచయితగా చాలా సినిమాలకు వర్క్ చేసిన తనకిది దర్శకునిగా తొలి చిత్రమనీ, ఏప్రిల్ తొలివారం నుంచి షూటింగ్ ప్రారంభమవుతుందని దర్శకుడు చెప్పారు.