'బాహుబలి-3'లో ప్రభాస్ ఉండడు'

'బాహుబలి-3'లో ప్రభాస్ ఉండడు'

'బాహుబలి' సినిమాకు సంబంధించిన పరిణామం ఒకటి సినిమా వర్గాల్లో హాట్ టాపిక్ గా మారింది. 'బాహుబలి' సిరీస్ లో రానున్న మూడో సినిమా కోసం తాను స్క్రిప్ట్ పనులు కూడా ప్రారంభించనట్టు ప్రముఖ సినీ రచయిత విజయేంద్రప్రసాద్ వెల్లడించారు. అయితే, 'బాహుబలి' తొలి రెండు సినిమాల్లో హీరోగా ఉన్న ప్రభాస్ మూడో పార్టులో కనిపించే అవకాశం లేకపోవచ్చునని ఆయన స్పష్టం చేశారు.

అనుకున్నది అనుకున్న ప్రకారం జరిగితే 'బాహుబలి-3' పూర్తిగా సరికొత్త కథ, కథనాలతో తెరకెక్కిస్తామని,  సత్యరాజ్ పోషించిన కట్టప్ప పాత్ర కూడా మూడో పార్టులో ఉండకపోవచ్చునని చెప్పారు. ఎపిక్ డ్రామాగా తెరకెక్కిన 'బాహుబలి' బాక్సాఫీసు వద్ద భారీ కలెక్షన్లతో రికార్డులు బద్దలుకొట్టిన సంగతి తెలిసిందే. దాయాదుల వైరం ప్రధాన ఇతివృత్తంగా తెరకెక్కిన ఈ సినిమా దేశవ్యాప్తంగా తన సత్తా చాటింది. 'బాహుబలి' రెండోపార్టు వచ్చే ఏడాది విడుదలయ్యే అవకాశముంది.