ఊహకందని ప్రేమ

సంభీత్, నేహారత్నాకరన్‌ జంటగా రూపొందుతోన్న ప్రేమకథా చిత్రమ్‌ ‘లాలిజో లాలిజో’. మోహన్‌ శ్రీ వత్సస దర్శకత్వంలో జై శ్రీ సంతోషిమాత ప్రొడక్షన్‌ పతాకంపై షంఖు, కిరణ్‌ నిర్మిస్తున్నారు. ఈ సినిమా ట్రైలర్‌ని హీరో, హీరోయిన్లు రిలీజ్‌ చేయగా, పాటల రచయిత కాసర్ల శ్యామ్‌ లోగో ఆవిష్కరించారు. దర్శకుడు మాట్లాడుతూ– ‘‘ఇది థ్రిల్లర్‌ కథాంశం కాదు. స్వచ్ఛమైన ప్రేమకథ. మనకు తెలియకుండానే మన నాలుక మీద తిరిగే అందమైన ప్రేమకథ ఇది.

ప్రేక్షకుల ఊహకందని ప్రేమకథ. రిలీజ్‌ రోజు మొదటి షో చూడండి, బాగాలేకపోతే సినిమా చూడవద్దని అందరికీ చెప్పండి. బాగుంటే  మంచి సినిమా అని పదిమందికీ చెప్పండి’’ అన్నారు. ‘‘ఈ సినిమా  మా పాపలాంటిది. చాలా అందంగా, అద్భుతంగా వచ్చింది. మాకు మంచి గుర్తింపు తెస్తుందనే నమ్మకం ఉంది’’ అన్నారు నిర్మాతలు. ‘‘సినిమా చాలా బాగా వచ్చింది. ఈ చిత్రానికి అవార్డు వస్తుందని, రావాలని కోరుకుంటున్నా’’ అన్నారు కాసర్ల శ్యామ్‌. ఈ సినిమాకి సంగీతం: మెలోడీ శ్రీనివాస్, కెమెరా: మురళి కృష్ణ.