TV
హత్యకు గురైన సరబ్‌జిత్‌ కౌర్‌
లండన్‌ : భారత సంతతికి చెందిన సరబ్‌జిత్‌ కౌర్‌(38) అనే మహిళ అనుమానాస్పదస్థితిలో హత్యకు గురైంది. ఈ విషయాన్ని పోలీసులు మూడు నెలల తర్వాత గుర్తించారు. కౌర్‌ భర్త గురుప్రీత్‌ సింగే గొంతు నులిమి చంపేసినట్లు పోలీసులు అనుమానిస్తున్నారు. ఈ మేరకు బుధవారం ఆయనపై కేసు నమోదు చేశారు. గురువారం కోర్టులో ప్రవేశపెట్టారు. ఇంగ్లాండులోని వాల్వర్‌హాంప్టన్‌ నగరంలో ఈ ఘటన చోటుచేసుకుంది.
పోస్టుమార్టం నివేదికలో సరబ్‌జిత్‌ కౌర్‌ గొంతునులమడం వల్లే చనిపోయిందని తేలింది. హత్యకు గురైన ఇంటిలో కొన్ని వస్తువులు కూడా అదృశ్యమయ్యాయని పోలీసులు తెలిపారు. సరబ్‌జిత్‌ కౌర్‌ ఇంటి ఆవరణలో హత్య జరిగిన రోజు అనుమానాస్పదంగా ఓ మహిళ సంచరించినట్లు పోలీసులు సీసీటీవీ కెమెరా ద్వారా గుర్తించారు. ఈ మేరకు అనుమానంగా సంచరిస్తున్న ఓ మహిళ చిత్రాలను కూడా మీడియాకు పోలీసులు విడుదల చేశారు. హత్య భర్త చేశాడా లేక అనుమానంగా సంచరించిన మహిళ చేసిందా అనేది మిస్టరీగా మారింది.
