ముఖేష్‌ అంబానీతోనే స్టెప్పులేయించింది

ముంబై : అంబానీల ఇంట మరోసారి పెళ్లి బాజా మోగనుంది. మొన్నటివరకూ కుమార్తె ఇషా అంబానీ వివాహ వేడుకలతో బిజీగా ఉన్న ముఖేష్‌ అంబానీ కుటుంబం మరో పెళ్లి వేడుకకు సిద్ధమవుతోంది. నీతా అంబానీ - ముఖేష్‌ అంబానీల పెద్ద కుమారుడు ఆకాశ్‌ అంబానీ పెళ్లి పనులు షూరు అయిన సంగతి తెలిసిందే. గత ఏడాది జూన్‌లో వజ్రాల వ్యాపారి రస్సెల్‌​ మెహతా కుమార్తె శ్లోకా మెహతాతో.. ఆకాశ్‌ అంబానీ నిశ్చితార్థం జరిగింది. మార్చి 9నుంచి మూడు రోజుల పాటు జరిగే ఈ వివాహ వేడుక పనులు చకచక జరుగుతున్నాయి. ముంబైలోని బాంద్రా-కుర్లా కాంప్లెక్స్‌లోని జియో వరల్డ్ సెంటర్‌లో ఈ వేడుక జరగనుంది.

ఇషా అంబానీ పెళ్లి చేసుకుంది.. మరికొద్ది రోజుల్లో ఆకాశ్‌ అంబానీ ఓ ఇంటి వాడు కాబోతున్నాడు. ఇక ఇప్పుడు అందరి దృష్టి అనంత్‌ అంబానీ మీద పడిందట. నువ్వేప్పుడు పప్పన్నం పెడతావని అనంత్‌ను అడుగుతున్నారు నెటిజన్లు. ఈ క్రమంలో అనంత్‌ అంబానీ గర్ల్‌ ఫ్రెండ్‌ రాధిక మర్చంట్‌కు సంబంధించిన వీడియో ఒకటి ప్రస్తుతం సోషల్‌ మీడియాలో వైరలవుతోంది. ఓ పెళ్లిలో తీసిన ఈ వీడియోలో ఇషా, అనంత్‌ అంబానీలు డోలు వాయిస్తుండగా.. అందుకు అనుగుణంగా ముఖేష్‌ అంబానీ, రాధిక మర్చంట్‌ డ్యాన్స్‌ చేస్తున్నారు. ప్రస్తుతం ఈ వీడియో నెటిజన్లను విపరీతంగా ఆకర్షిస్తోంది. ‘మామాకోడళ్ల అనుబంధం బాగానే ఉంది.. త్వరలో మీరు కూడా పెళ్లి పీటలు ఎక్కండి.. ఓ పనైపోతుంది’ అంటున్నారు నెటిజన్లు.