జీఎంఆర్ కు ఫిలిప్పీన్స్ ఎయిర్‌పోర్టు

హైదరాబాద్, బిజినెస్ బ్యూరో: ఇన్‌ఫ్రా దిగ్గజం జీఎంఆర్ కన్సార్షియం మరో అంతర్జాతీయ ఎయిర్‌పోర్టు ప్రాజెక్టును దక్కించుకుంది. ఫిలిప్పీన్స్‌లోని మక్తాన్-సెబు అంతర్జాతీయ విమానాశ్రయ అభివృద్ధి కాంట్రాక్టును చేజిక్కించుకుంది. ఈ డీల్ విలువ 320 మిలియన్ డాలర్లు (సుమారు రూ. 1,920 కోట్లు) ఉంటుందని జీఎంఆర్ తెలిపింది. ఫిలిప్పీన్స్‌కి చెందిన మెగావైడ్ సంస్థతో కలసి కన్సార్షియంగా ఏర్పడి ఈ ప్రాజెక్టును దక్కించుకున్నట్లు పేర్కొంది. ఈ కాంట్రాక్టు వ్యవధి 25 సంవత్సరాలని వివరించింది. ఇప్పటికే హైదరాబాద్, న్యూఢిల్లీ, ఇస్తాంబుల్‌లో కీలకమైన ఎయిర్‌పోర్టులను అభివృద్ధి చేసిన అనుభవం తమకు ఉందని, ఫిలిప్పీన్స్ విమానాశ్రయ ప్రాజెక్టులో అది ఉపయోగపడగలదని జీఎంఆర్ ఇన్‌ఫ్రా సంస్థ చైర్మన్ జీఎం రావు తెలిపారు. మక్తాన్-సెబు విమానాశ్రయాన్ని ఫిలిప్పీన్స్‌లో ప్రాంతీయ హబ్‌గా తీర్చిదిద్దుతామని ఆయన వివరించారు.