అప్రమత్తత నీళ్లు

అగ్నిపై చల్లు..

జిల్లాలో రోజురోజుకూ ఎండ తీవ్రత పెరిగిపోతోంది. అగ్ని ప్రమాదాలకు ఆస్కారం ఉన్న సమయమిది. ప్రజలు అప్రమత్తంగా ఉండాల్సిన తరుణమిది. వారికి అవగాహన కల్పించేందుకు ఈ నెల 14వ తేదీ నుంచి ప్రారంభమైన అగ్నిమాపక వారోత్సవాలు 20వ తేదీ వరకు జరగనున్నాయి. ఈ నేపథ్యంలో అగ్ని ప్రమాదాలు, నివారణపై అవగాహన పెంచుకోవాల్సిన అవసరం అందరికీ ఉంది.

సత్తెనపల్లి: వేసవికాలంలో తరచూ అగ్ని ప్రమాదాలు జరుగుతుంటాయి. అప్రమత్తంగా ఉన్నా కొన్ని సమయాల్లో ప్రాణనష్టంతోపాటు, ఆస్తి నష్టం కూడా సంభవిస్తూ ఉంటుంది. ఈ నేపథ్యంలో ప్రజలు అప్రమత్తంగా ఉండాలి. పైగా ప్రమాదాలను నివారించే అగ్నిమాపక శాఖలో సిబ్బంది కొరత వేధిస్తుండటం కలవరపరిచే అంశం. అరకొర సిబ్బందితోనే విధులు నిర్వహిస్తున్నారు. లీడింగ్‌ ఫైర్‌మెన్లు, ఫైర్‌ మెన్లు, డ్రైవర్‌ కం ఆపరేటర్లు, సిబ్బంది కొరతతో అన్ని అగ్నిమాపక కేంద్రాల్లో ఇబ్బంది పడుతున్నారు. జిల్లాలో 6 అగ్నిమాపక కేంద్రాలకుగాను 5 చోట్ల అగ్నిమాపక అధికారులు లేకపోవడంతో ఇన్‌చార్జ్‌ లీడింగ్‌ ఫైర్‌ మెన్లు విధులు నిర్వహిస్తున్నారు. జిల్లాలో డ్రైవర్‌ కం ఆపరేటర్‌ 18 మందికిగాను కేవలం 12 మంది మాత్రమే విధులు నిర్వహిస్తున్నారు. 6 పోస్టులు ఖాళీగా ఉన్నాయి. ఇక ఫైర్‌మెన్‌ 54 మంది ఉండాలి. కేవలం 28 మంది మాత్రమే విధులు నిర్వహిస్తున్నారు. 26 పోస్టులు ఖాళీగా ఉన్నాయి. దీంతో జిల్లాలో ఒకేసారి రెండు మూడు చోట్ల ప్రమాదాలు జరిగితే నష్ట నివారణ చేయడం వీరికి కష్టసాధ్యంగా మారుతుంది. జిల్లా వ్యాప్తంగా 30 మంది హోంగార్డులతోనే విధులు నిర్వహిస్తున్నారు.

పిడుగురాళ్లకు కొత్త వాహనం...

ప్రస్తుతం పల్నాడు జిల్లాలో 6 అగ్ని మాపక కేంద్రాలు ఉన్నాయి. నరసరావుపేట, చిలకలూరిపేట, సత్తెనపల్లి, పిడుగురాళ్ల, మాచర్ల, వినుకొండ కేంద్రాలన్నీ సింగిల్‌ యూనిట్‌ కావడంతో ఒక్కో కేంద్రానికి ఒక్కో అగ్నిమాపక వాహనం మాత్రమే ఉంటుంది. వినుకొండ, మాచర్ల అగ్నిమాపక కేంద్రాలకు కేటాయించిన అగ్నిమాపక వాహనాలు 15 ఏళ్లు పైబడ్డాయి. ఇటీవల 15వ ఆర్థిక సంఘం నిధులతో కొత్త అగ్నిమాపక వాహనాలను రాష్ట్రవ్యాప్తంగా మొదటి విడత విడుదల చేశారు. వాటిలో జిల్లాకు మంజూరైన కొత్త అగ్నిమాపక వాహనాన్ని పిడుగురాళ్లకు కేటాయించారు.

కొనసాగుతున్న వారోత్సవాలు...

వేసవిలో జరిగే అగ్ని ప్రమాదాలపై ప్రజలను అప్రమత్తం చేసేందుకు ఏటా తరహాలోనే ఏప్రిల్‌ 14 నుంచి 20వ తేదీ వరకు అగ్నిమాపక వారోత్సవాలు నిర్వహిస్తున్నారు. 1994 ఏప్రిల్‌ 14న ముంబై ఓడరేవులో జరిగిన అగ్ని ప్రమాదానికి గుర్తుగా ఏటా జాతీయ అగ్నిమాపక దినోత్సవం నిర్వహిస్తారు. జిల్లాలోని 6 అగ్నిమాపక కేంద్రాల పరిధిలో వారోత్సవాల నిర్వహణ కొనసాగుతోంది. అలాగే అవకాశం ఉన్నప్పుడల్లా స్కూళ్లు, కళాశాలలు, వైద్యశాలలు, పెట్రోల్‌ బంకులు, గ్యాస్‌ సిలిండర్‌ గోదాములు, కర్మాగారాల్లో అగ్నిమాపక అధికారులు అవగాహన పెంచడానికి విన్యాసాలు ప్రదర్శిస్తున్నారు.

ఏడేళ్లలో అగ్ని ప్రమాదాల వివరాలు...

ఏడాది ఫోన్‌ ఆస్తి నష్టం మృతుల కాపాడిన

కాల్స్‌ (రూ.) సంఖ్య వారి సంఖ్య

2019–20 536 6,89,55,561 14 04

2020–21 459 14,22,97,460 06 –

2021–22 498 10,52,53,400 04 –

2022–23 464 4,27,30,020 10 04

2023–24 533 56,21,78,000 12 02

2024–25 530 6,62,18,000 13 27

2025–26 3,048 98,76,32,450 85 65

మొత్తం 6,088 197,62,64,891 144 102

అగ్ని ప్రమాదాలను అదుపు చేయడంతోపాటు ప్రమాదాలపై ముందస్తు అవగాహన కల్పిస్తున్నాం. అవసరమైన వారికి శిక్షణ ఇస్తున్నాం. వేసవిలో నిర్లక్ష్యంగా స్మోకింగ్‌ చేయడాన్ని నియంత్రించాలి. ఇంట్లో వంట చేసే సమయంలో తగిన జాగ్రత్తలు తీసుకునేలా అవగాహన కల్పిస్తున్నాం. వేసవిలో అగ్ని ప్రమాదాలకు అవకాశం ఎక్కువగా ఉంటుంది. ప్రజలు అప్రమత్తంగా ఉండాలి.

–ఎస్‌ శ్రీధర్‌,

జిల్లా విపత్తుల స్పందన అధికారి, పల్నాడు