కొత్త అనుభూతినిచ్చేలా...

నాగచైతన్య హీరోగా కార్తీక్‌ వర్మ దండు దర్శకత్వంలో రూపొందుతున్న చిత్రం ‘వృష కర్మ’. ఈ చిత్రంలో మీనాక్షీ చౌదరి హీరోయిన్‌గా నటిస్తుండగా, స్పర్శ్‌ శ్రీవాస్తవ కీలక పాత్రలో నటిస్తున్నారు. బాపినీడు సమర్పణలో బీవీఎస్‌ఎన్‌ ప్రసాద్, బి. సుకుమార్‌ ఈ సినిమాను నిర్మిస్తున్నారు. ఇటీవల రాజస్తాన్‌లో ఓ భారీ షెడ్యూల్‌ను పూర్తి చేశారు.

దీంతో ఈ సినిమా చిత్రీకరణ తుది దశకు చేరుకున్నట్లు తెలిపి, రాజస్తాన్‌ లొకేషన్‌లోని కొన్ని ఫొటోలను విడుదల చేశారు. రాజభవనాలు, పురాతన శిల్ప కళతో కనిపిస్తున్న ఈ లొకేషన్స్‌లో చిత్రీకరించిన కీలక సన్నివేశాలు సినిమాకి ఓ హైలైట్‌ అని తెలుస్తోంది. ‘‘షూటింగ్‌ ముగింపు దశకు చేరుకోవడంతో పోస్ట్‌ ప్రోడక్షన్‌ పనులు కూడా శరవేగంగా జరుపుతున్నాం. అత్యాధునిక విజువల్‌ ఎఫెక్ట్స్‌తో ప్రేక్షకులకు కొత్త అనుభూతిని అందించడానికి కృషి చేస్తున్నాం’’ అని యూనిట్‌ పేర్కొంది.