గంజాయి తరలిస్తున్న యువకుడి అరెస్ట్‌

అనపర్తి: గంజాయి రవాణా చేస్తున్న యువకుడిని అనపర్తి పోలీసులు అరెస్ట్‌ చేశారు. ఎస్సై వి.సుజాత తెలిపిన వివరాల ప్రకారం.. అనపర్తి ఐఎల్‌టీడీ జంక్షన్‌ సమీపంలో వాహనాలను తనిఖీ చేస్తుండగా జీబీఆర్‌ కళాశాల ఎదురుగా ఉండే కాలనీలో నివాసం ఉండే కొల్లాటి శ్రీతేజ అనే 19 ఏళ్ల యువకుడి వద్ద రూ.2 లక్షల విలువైన నాలుగు కిలోల గంజాయిని పట్టుకున్నామన్నారు. అతడిని విచారించగా వివిధ పోలీస్టేషన్ల పరిధిలో 9 మోటార్‌ బైక్‌లను కూడా చోరీ చేసినట్టు అంగీకరించాడన్నారు. దీంతో ఆ వాహనాలను స్వాధీనం చేసుకున్నామన్నారు.

20 మందిని రక్షించిన కోస్ట్‌గార్డ్‌ సిబ్బంది

కాకినాడ క్రైం: అర్నబ్‌ తుపాను ఉధృతికి అంతర్వేది తీరానికి కొట్టుకొచ్చిన వాణిజ్య నౌక సిగ్మపెర్ల్‌ రెస్క్యూ ఆపరేషన్‌ విజయవంతమైంది. కాకినాడ కోస్ట్‌గార్డ్‌ కల్నల్‌ రంజిత్‌ ఆధ్వర్యంలో సిబ్బంది నౌకలో ప్రయాణిస్తున్న 20 మందిని రక్షించారు. సుజయ్‌ నౌక కోస్ట్‌కార్డు సిబ్బందిని విజయవంతంగా సిగ్మపెరల్‌ వద్దకు చేర్చింది. గురువారం నిర్వహించిన ఈ రెస్క్యూలో సాంకేతిక కీలక పాత్ర పోషించింది. విశాఖపట్నం నుంచి సింగపూర్‌ వెళ్తున్న వాణిజ్య నౌకలో 20 మంది సిబ్బంది ఉండగా వారంతా సురక్షితంగా ప్రాణాలతో బయటపడ్డారు. నౌక పరిస్థితిని అధికారులు అంచనా వేస్తున్నారు. నౌక పొట్టభాగం (హల్‌), అంతర్గత యంత్రాలకు ఏమైనా నష్టం వాటిల్లిందా, సమీప తీరానికి నౌకను చేర్చగలమా అనే అంశాలను అధికారులు పరిశీలిస్తున్నారు.