బాలికను అపహరించి.. లైంగిక దాడి

నిందితుడిని అరెస్ట్‌ చేసిన పోలీసులు

అడ్డతీగల: బాలిక అదృశ్యం కేసులో అడ్డతీగల పోలీసులు వేగవంతంగా దర్యాప్తు చేసి, నిందితుడిని అరెస్ట్‌ చేశారు. ఈ మేరకు రంపచోడవరం డీఎస్పీ అష్రష్‌ ఆలీ గురువారం అడ్డతీగల పోలీస్‌ స్టేషన్‌లో విలేకర్ల సమావేశం నిర్వహించారు. వివరాల్లోకి వెళితే.. అడ్డతీగల మండలంలోని ఓ గ్రామానికి చెందిన 17 ఏళ్ల బాలిక అక్టోబర్‌ 20వ తేదీ తెల్లవారుజామున 2 గంటల సమయంలో ఇంటి నుంచి వెళ్లిపోయింది. ఈ మేరకు అందిన ఫిర్యాదుతో అడ్డతీగల సీఐ బి.వినోద్‌ కేసు నమోదు చేసి దర్యాప్తు ప్రారంభించారు. అడ్డతీగల పోలీసులు వేగంగా స్పందించి అదృశ్యమైన బాలికను సురక్షితంగా రక్షించారు. వీరభద్రపురం గ్రామానికి చెందిన పలివెల వినయ్‌ (21) అనే యువకుడు తనను అపహరించి, పలుమార్లు బెదిరించి లైంగిక దాడికి పాల్పడినట్లు బాలిక తెలిపింది. ఈ విషయాన్ని ఎవరికై నా చెబితే చంపుతానని బెదిరించాడని వివరించింది. దీంతో బాలిక అదృశ్యం కేసును, మైనర్‌పై లైంగిక దాడి, క్రిమినల్‌ బెదిరింపు, పోక్సో చట్టంలోని కఠినమైన నిబంధనల కిందకు కేసు మార్చారు. ఈ దర్యాప్తులో భాగంగా గురువారం అడ్డతీగల పోలీసులు పాపంపేట గ్రామం వద్ద నిందితుడు పలివెల వినయ్‌ను అరెస్ట్‌ చేశారు. అనంతరం కోర్టులో హాజరుపరిచి, రాజమహేంద్రవరం సెంట్రల్‌ జైలుకు రిమాండ్‌ కోసం తరలించారు.