తీన్మార్‌ మల్లన్న.. సోషల్‌ మీడియాను రెగ్యూలర్‌గా ఫాలో అయ్యేవాళ్లకు బాగా పరిచయం ఉన్న పేరు. ప్రతి రోజు ఉదయం యూట్యూబ్‌ లైవ్‌లోకి వచ్చి వార్త పత్రికల్లో వచ్చిన వార్తలపై చర్చిస్తుంటాడు. అతని అసలు పేరు నవీన్‌ చింతపండు. కానీ తీన్మార్‌ మల్లన్న పేరుతో ఓ వార్త చానెల్‌లో యాంకర్‌గా పని చేసి పాపులర్‌ అయ్యాడు. ఆ తర్వాత సొంతంగా యూట్యూబ్‌ వార్త చానల్‌ని, వార్త పత్రికను పెట్టుకొని.. తెలంగాణ రాజకీయాలపై తనదైన శైలీలో చర్చిస్తుంటాడు. (చదవండి: 2024లో ఈ సినిమాలు వెరీ స్పెషల్‌.. రూ. 1000 కోట్లే టార్గెట్‌!) తెలంగాణ మాజీ ముఖ్యమంత్రి కేసీఆర్‌ని ఎక్కువగా విమర్శించడం కారణంగా మల్లన్నకు బాగా పాపులారిటీ వచ్చింది. ఇలా పాత్రికేయుడు, రాజకీయ నాయకుడిగానే మల్లన్న అందరికి తెలుసు కానీ.. అతను కూడా ఒక నటుడనే విషయం ఎవరికీ తెలియదు. మల్లన్న ఓ సినిమాలో నటించాడు. ప్రస్తుతం మల్లన్న నటించిన సినిమాలోని  ఓ కామెడీ సీన్‌ సోషల్‌ మీడియాలో తెగ వైరల్‌ అవుతోంది.  అందులో దివంగత కమెడియన్‌ వేణుమాదవ్‌ కూడా ఉన్నారు.  (చదవండి: 2024లో బాలీవుడ్‌ నుంచి సత్తా చాటేది ఎవరు..?) మల్లన్న నటించిన ఆ చిత్రం పేరు  ‘శ్రీమతి బంగారం’. రాజీవ్‌ కనకాల, రిచర్డ్‌ రిషి, వేణుమాధవ్‌, హేమలతో పాటు తీన్మార్‌ మల్లన్న కూడా ఓ కీలక పాత్రలో నటించాడు. 2016లో  ఈ మూవీ రిలీజై బాక్సాఫీస్‌ వద్ద దారుణంగా బోల్తా పడింది. అసలు ఆ సినిమా రిలీజైన విషయం కూడా జనాలకు తెలియదు. ఇక మల్లన్న అందులో నటించారనే విషయం ఎలా తెలుస్తుంది. అందుకే ఈ విషయం ఇన్నాళ్లు మరుగున పడింది. అయితే తాజాగా మల్లన్నకు సంబంధించిన కామెడీ సీన్‌ని ఎవరో కట్‌ చేసి సోషల్‌ మీడియాలో పోస్ట్‌ చేయడంతో అది కాస్త వైరల్‌ అయింది. మల్లన్నలో కూడా మంచి నటుడు ఉన్నాడే అని నెటిజన్స్‌ కామెంట్‌ చేస్తున్నారు. వేణుమాధవ్ పక్కన ఉన్న యాక్టర్ ఎవరో గుర్తుపట్టారా 😂 pic.twitter.com/YFQ5L25FjA — Vamshi (@vamsi_144) January 1, 2024

టాలీవుడ్‌లో ఎప్పటికి గుర్తుండిపోయే కమెడియన్‌ల్లో నటుడు వేణు మాధవ్‌ ఒకరు. ఖమ్మంలో పుట్టిన వేణు మాధవ్‌ మొదట మిమిక్రి అర్టిస్ట్‌గా చేశారు. ఆ తర్వాత సినిమాల్లోకి వచ్చిన ఆయన అతి తక్కువ సమయంలోనే స్టార్‌ కమెడియన్‌గా ఎదిగారు. వెండితెరపై స్పెషల్‌ ఇమేజ్‌ని సొంతంగా చేసుకున్న ఆయన 2019లో అనారోగ్యంతో కన్నుమూసిన సంగతి తెలిసిందే. ఇక వేణు మాధవ్‌ అనారోగ్యం, ఆయన గురించిన పలు ఆసక్తికర విషయాలను ఆయన తల్లి సావిత్రమ్మ తాజాగా ఓ ఇంటర్య్వూలో పంచుకున్నారు. చదవండి: గంగోత్రికి ముందు బన్నీని అడగలేదు.. అన్నయ్య చెప్పడంతో..: నాగబాబు రీసెంట్‌గా ఓ యూట్యూబ్‌ చానల్‌కు ఇచ్చిన ఇంటర్య్వూలో ఆమె మాట్లాడుతూ.. వేణు మాధవ్‌ చనిపోయే నాటికి ఆయనకు రూ. 20 కోట్లపైనే ఆస్తులు ఉన్నాయని, అయినా తాను అద్దె ఇంట్లో ఉంటున్నానని చెప్పారు. ‘నాకు ముగ్గురు కొడుకులు. అందులో వేణు మాధవ్‌ చిన్నవాడు. చిన్నప్పటి నుంచి వాడు చురుగ్గా ఉండేవాడు. మిమిక్రీ బాగా చేస్తుండే వాడు. అలా మిమిక్రీ ఆర్టిస్ట్‌గా  ఓ ప్రోగ్రామ్‌ చేస్తున్నప్పుడు తనని ఎస్వీ కృష్ణారెడ్డి, అచ్చిరెడ్డిగారు చూసి వేణుకి మూవీ ఆఫర్‌ ఇచ్చారు. ఇక ఆ తర్వాత మంచి నటుడిగా ఎదిగాడు. నటుడిగా కొడుకు ఎదుగుదల చూసి గర్వపడ్డాను. వేణు సినిమాలతో బిజీగా ఉండటంతో నా ఇద్దరు కొడుకులని తనకి అసిస్టెంట్‌గా పెట్టాను. కానీ ఇప్పుడు అలా ఎందుకు చేశానా అని బాధపడుతున్నా. చెప్పాలంటే నా జీవితంలో నేను చేసిన పెద్ద తప్పు అదే. వేణు ఎదిగాడు కానీ, వాళ్లీద్దరు ఎదగలేదు. ఒకవేళ వేణు ఉండి ఉంటే వాళ్లిద్దరిని బాగా చూసుకునేవాడేమో’ అంటూ ఆమె ఆవేదన వ్యక్తం చేశారు. వేణు మాధవ్‌ చేజేతురాల తన ఆరోగ్యాన్ని పాడు చేసుకున్నాడంటూ షాకింగ్‌ కామెంట్స్‌ చేశారు ఆమె. వేణుకి ఓ అలవాటు ఉందని, ఎప్పుడు ఏ జబ్బు చేసినా మందులు వేసుకునేవాడు కాదన్నారు. చదవండి: అవతార్‌ 2ను వెనక్కిన నెట్టిన ఆర్‌ఆర్‌ఆర్‌, మరో అంతర్జాతీయ అవార్డుకు ఎన్నిక ‘తలనొప్పి వచ్చినా టాబ్లెట్ వేసుకునే  అలవాటు ఆయనకి లేదు.. అదే అతని  కొంపముంచింది. జాండిస్‌, డెంగ్యూ వ్యాధి వస్తే మందులు వాడకుండా నిర్లక్ష్యం చేసేవాడు. దాంతో పరిస్థితి విషమించి చనిపోయారు. అయితే వేణు చనిపోవడానికి నెల రోజుల ముందే నా పెద్ద కొడుకు కూడా చనిపోయాడు. ఇద్దరి కొడుకుల మరణం చూసి కృంగిపోయాను’ అంటూ ఆమె కన్నీటి పర్యంతం అయ్యారు. ఇక వేణు ఆస్తులు బాగానే సంపాదించాడని, ఏడెనిమిది ఫ్లాట్‌లతో పాటు దాదాపు  20 కోట్లకి పైగా ఆస్తులు ఉన్నాయన్నారు. వేణుకి ఇద్దరు కొడుకులని, వారు సొంత ఇంట్లో ఉంటున్నారని చెప్పారు. తాను మాత్రం తన మూడో కొడుకుతో అద్దె ఇంట్లోనే ఉంటున్నానని సావిత్రమ్మ చెప్పుకొచ్చారు.  

సాక్షి, హైదరాబాద్‌: ‘‘మరణమనేది ఖాయమనీ... మిగిలెను కీర్తి కాయమనీ.. నీ బరువూ... నీ పరువూ... మోసేదీ... ఆ నలుగురూ...’’. జీవిత పరమార్థాన్ని అందరికీ అర్థమయ్యేలా చెప్పే ఈ పాటకు తన అద్భుత గాత్రంతో ప్రాణం పోసిన గాన గంధర్వుడు ఎస్పీ బాలసుబ్రహ్మణ్యం దివికేగారు. వేలాది పాటలు పాడి కోట్లాది మంది అభిమానం చూరగొన్న ఆ యశస్వి అందరినీ శోక సంద్రంలో ముంచి తిరిగిరాని లోకాలకు తరలివెళ్లారు. శ్రీప‌తి పండితారాధ్యుల బాలసుబ్ర‌హ్మ‌ణ్యంగా జన్మించి ఎస్పీ బాలుగా సుపరిచితులై, సంగీత ప్రపంచంలో ఉన్నత శిఖరాలు అధిరోహించి, ఎన్నో తరాలకు స్ఫూర్తిదాతగా నిలిచిన ఆయన శుక్రవారం తుదిశ్వాస విడిచారు.(చదవండి: నా మావయ్య.. భౌతికంగా లేరంతే: సునీత) కరోనా సోకినట్లు నిర్ధారణ కావడంతో ఆగష్టు 5న ఆస్పత్రిలో చేరిన బాలు, సెప్టెంబరు 25న కన్నుమూశారు. దీంతో అభిమానులు తీవ్ర విషాదంలో మునిగిపోయారు. ‘బాలు’ను గుర్తు చేసుకుంటూ నివాళులు అర్పిస్తున్నారు. అంతేగాక గతేడాది సరిగ్గా ఇదే రోజు టాలీవుడ్‌లో చోటు చేసుకున్న మరో విషాదాన్ని తలచుకుంటూ ఆవేదన వ్యక్తం చేస్తున్నారు. వేణుమాధవ్‌ ఈ లోకాన్ని వీడిన రోజు టాలీవుడ్‌లో తనకంటూ ప్రత్యేక గుర్తింపు దక్కించుకుని హాస్య నటుడుగా కళామతల్లికి తనవంతు సేవ చేసిన వేణుమాధవ్‌ 2019, సెప్టెంబరు 25న మరణించారు. కాలేయ సంబంధిత వ్యాధితో ఆస్పత్రిలో చేరిన ఆయన సరిగ్గా ఇదే రోజున కన్నుమూశారు. కాగా అంతకుముందు కొద్ది నెలల క్రితమే వేణు మాధవ్‌ సోదరుడు విక్రమ్‌ బాబు గుండెపోటుతో మృతి చెందడంతో వారి కుటుంబంలో తీరని విషాదం నెలకొంది. కాగా నల్గొండ జిల్లా కోదాడకు చెందిన వేణుమాధవ్‌, 1997లో ‘సంప్రదాయం’ సినిమా ద్వారా సిల్కర్‌ స్క్రీన్‌పై ఎంట్రీ ఇచ్చారు.  ‘తొలిప్రేమ’ చిత్రం ఆయనకు మంచి బ్రేక్‌ ఇచ్చింది. ఆ తర్వాత కమెడియన్‌గా దూసుకుపోతూ, నవ్వులు పూయించిన ఆయనను, ‘లక్ష్మి’ సినిమాలో నటనకు గానూ నంది అవార్డు వరించింది. కాగా వేణుమాధవ్‌కు భార్య, ఇద్దరు కుమారులు ఉన్నారు.

హాస్య నటుడు వేణుమాధవ్ మృతిపై టీమిండియా క్రికెటర్‌, సన్‌రైజర్స్‌ హైదరాబాద్‌ ఆటగాడు యూసఫ్ పఠాన్ దిగ్భ్రాంతి వ్యక్తం చేశాడు. వేణుమాధవ్‌ మరణించారన్న వార్త తనను షాకింగ్‌కు గురిచేసిందన్నాడు. సిల్వర్‌ స్క్రీన్‌పై తాను చూసిన అద్భుత హాస్యనటుల్లో అతను ఒకరని పఠాన్‌ తెలిపాడు. వేణుమాధవ్‌ లాంటి హాస్య నటుడిని ఇంకెవరూ భర్తీ చేయలేరన్నారు. ఈ సందర్భంగా వేణుమాధవ్‌ కుటుంబ సభ్యులకు, స్నేహితులకు ట్విటర్‌ వేదికగా ప్రగాఢ సానుభూతి తెలిపారు. అయితే క్రికెటర్‌ యూసఫ్‌ పఠాన్‌ వేణు మాధవ్‌కు సంతాపం తెలుపుతున్న సందేశానికి వేణుమాధవ్‌ ఫోటోను జతచేసి సోషల్‌మీడియాలో పోస్ట్‌ చేశాడు.  గుజరాత్‌కు చెందిన పఠాన్‌కు కేవలం తెలుగు సినిమాలు మాత్రమే తీసిన వేణుమాధవ్‌ గురించి ఎలా తెలుసని కొందరు చర్చించుకుంటున్నారు. అయితే ఈ మధ్యకాలంలో తెలుగు సినిమాలు హిందీలో డబ్‌ అవుతున్న విషయం తెలిసిందే. దీనిలో భాగంగా సై, ఛత్రపతి వంటి చిత్రాలు హిందీ వర్షన్‌లో మంచి టాక్‌ను సొంతం చేసుకున్నాయి. ఈ సినిమాల్లో వేణుమాధవ్‌ తన విలక్షణ కామెడీతో అందరినీ తెగ నవ్వించాడు. దీంతో పఠాన్‌ వేణు మాధవ్‌కు ఫ్యాన్‌ అయ్యాడంటూ కొందరు నెటిజన్లు అభిప్రాయపడుతున్నారు. అయితే సన్‌రైజర్స్‌ తరుపున పఠాన్‌ ఆడుతుండటంతో వేణుమాధవ్‌ గురించి తెలిసుంటుందని మరికొందరు పేర్కొంటున్నారు.  కాగా, అనారోగ్యంతో మృతిచెందిన వేణుమాధవ్‌ అంత్యక్రియలు గురువారం అభిమానుల అశ్రనయనాల మధ్య ముగిశాయి. వేణమాధవ్‌ మృతిపై టాలీవుడ్‌ లోకం దిగ్భ్రంతిని వ్యక్తం చేసింది.   Shocking to hear the demise of Venu Madhav. He was one of the irreplaceable and finest comedians I've seen on the silver screen. Deep condolences to his family and friends. pic.twitter.com/qxPl63WpwH — Yusuf Pathan (@iamyusufpathan) September 26, 2019

కుషాయిగూడ : అనారోగ్యంతో బుధవారం కన్నుమూసిన ప్రముఖ హాస్యనటుడు వేణుమాధవ్‌కు అభిమానులు కన్నీటి వీడ్కోలు పలికారు. గురువారం ఆయన అంత్యక్రియలను హెచ్‌బీకాలనీ లక్ష్మీనగర్‌ శ్మశానవాటికలో నిర్వహించారు. ఉదయం 11 గంటల సమయంలో వేణుమాధవ్‌ పార్థివ దేహాన్ని హెచ్‌బీకాలనీ నుంచి ఫిలింనగర్‌కు తరలించారు. అక్కడ నుంచి మధ్యాహ్నం 3 గంటలకు తిరిగి హెచ్‌బీకాలనీకి తీసుకువచ్చి నేరుగా రాజీవ్‌నగర్‌ చౌరస్తా నుంచి అంతిమయాత్ర జరిపారు. అక్కడి నుంచి ఇందిరానగర్‌ చౌరస్తా, వార్డు కార్యాలయం మీదుగా లక్ష్మీనగర్‌ శ్మశానవాటికకు తీసుకెళ్లారు. వేణుమాధవ్‌ చిన్న కొడుకు మాధవ్‌ ప్రభాకరణ్‌ తన తండ్రికి అంతిమ సంస్కారాలను నిర్వహించాడు. ఈ అంతిమయాత్రలో గ్రేటర్‌ మేయర్‌ బొంతు రామ్మోహన్, ఎమ్మార్పీయస్‌ వ్యవస్థాపకుడు మంద కృష్ణమాదిగ, మన ఇంటి పార్టీ అధినేత చెరుకు సుధాకర్, కార్పొరేటర్లు గొల్లూరి అంజయ్య. పన్నాల దేవేందర్‌రెడ్డి పాల్గొ న్నారు. వ్యాపారవేత్త దేవరకొండ శ్రీనివాసరావు, నటుడు ఫిష్‌ వెంకట్, మాజీ కార్పొరేటర్‌ శ్రీనివాస్‌రెడ్డి, స్థానిక నేతలు తదితరులు పాల్గొన్నారు.  వేణుమాధవ్‌ కుటుంబాన్ని ఆదుకుంటాం   హాస్యనటుడు వేణుమాధవ్‌ కుటుంబాన్ని అన్ని విధాలుగా ఆదుకుంటామని రాష్ట్ర మంత్రులు ఈటల, ఎర్రబెల్లి తెలిపారు. తెలంగాణ ఓ గొప్ప కళాకారుడిని కోల్పోయిందని, ఇది తెలుగు సినీ పరిశ్రమకు తీరని లోటని వారన్నారు. ఉప్పల్‌ ఎమ్మెల్యే బేతి సుభాష్‌రెడ్డి, టీజేఎస్‌ అధ్యక్షుడు ప్రొఫెసర్‌ కోదండరాం, మాజీ ఎమ్మెల్యే సంపత్‌కుమార్, వీరేందర్‌గౌడ్, నివాళులు అర్పించారు.   ఫిలింనగర్‌ వద్ద అగ్ర నటుడు చిరంజీవి, హీరో రాజశేఖర్, నటి జీవిత, మురళీమోహన్, ఉత్తేజ్‌ తదితరులు వేణుమాధవ్‌కు నివాళులర్పించారు. (ఫొటో గ్యాలరీ కోసం ఇక్కడ క్లిక్ చేయండి)

సాక్షి, హైదరాబాద్‌ : ప్రముఖ హాస్యనటుడు వేణుమాధవ్‌ అంత్యక్రియలు ముగిశాయి. నగరంలోని మౌలాలి హౌజింగ్‌ బోర్డ్‌ లక్ష్మీనగర్‌ శ్మశానవాటికలో కుటుంబ సభ్యులు వేణుమాధవ్‌ దహన సంస్కారాలు నిర్వహించారు. వేణుమాధవ్‌ పెద్ద కుమారుడు చితికి నిప్పంటించాడు. ఫిలిం చాంబర్‌ నుంచి ప్రారంభమైన అంతియ యాత్రలో అభిమానులు పెద్ద సంఖ్యలో పాల్గొన్నారు. సినీ, రాజకీయ ప్రముఖులతో పాటు అభిమానులు వేణుమాధవ్‌కు కడసారి నివాళులర్పించారు. (చదవండి : నవ్వు చిన్నబోయింది) టాలీవుడ్‌లో స్టార్‌ కమెడియన్‌గా ఓ వెలుగు వెలిగిన వేణుమాధవ్‌ 400లకు పైగా సినిమాల్లో నటించారు. స్టార్‌ హీరోలు, స్టార్‌ డైరెక్టర్ల సినిమాల్లో గుర్తుండిపోయే పాత్రల్లో కనిపించారు. కొంత కాలంగా సినీరంగానికి దూరంగా ఉంటున్న ఆయన, కాలేయ సంబంధిత వ్యాదితో బుధవారం మధ్యాహ్నం తుది శ్వాస విడిచారు.

బుధవారం మరణించిన హాస్యనటుడు వేణు మాధవ్‌ అంత్యక్రియలు కాప్రాలో నిర్వహించనున్నారు. గురువారం మధ్యాహ్నం అభిమానులు, సినీ ప్రముఖుల సందర్శనార్థం ఆయన భౌతికకాయాన్ని ఫిలిం చాంబర్‌లో ఉంచారు. ఆ సమయంలో మెగాస్టార్‌ చిరంజీవితో పాటు పలువురు సినీ ప్రముఖులు, అభిమానులు ఆయన భౌతికకాయానికి నివాళులర్పించారు. ఫిలిం చాంబర్‌ నుంచి ప్రారంభమైన అంతియ యాత్రలో అభిమానులు పెద్ద సంఖ్యలో పాల్గొన్నారు. వేణు మాధవ్‌ పెద్ద కుమారుడు ప్రభాకర్‌ అంతిమ సంస్కారాలు నిర్వహించనున్నాడు. టాలీవుడ్‌లో స్టార్‌ కమెడియన్‌గా ఓ వెలుగు వెలిగిన వేణు మాధవ్‌ 400లకు పైగా సినిమాల్లో నటించారు. స్టార్‌ హీరోలు, స్టార్‌ డైరెక్టర్ల సినిమాల్లో గుర్తుండిపోయే పాత్రల్లో కనిపించారు. కొంత కాలంగా సినీరంగానికి దూరంగా ఉంటున్న ఆయన, కాలేయ సంబంధిత వ్యాదితో బుధవారం మధ్యాహ్నం తుది శ్వాస విడిచారు.

సాక్షి, కోదాడ : ప్రముఖ హాస్యనటుడు వేణుమాధవ్‌కు కోదాడతో ప్రత్యేక అనుబంధం ఉంది. కర్ణాటకకు చెందిన వేణుమాధవ్‌ తండ్రి ప్రభాకర్‌ (నాయర్‌)  50 సంవత్సరాల క్రితం కోదాడకు వచ్చి స్థిరపడ్డారు. ఆయన టెలిఫోన్‌ డిపార్టుమెంట్‌లో పనిచేసేవారు. తల్లి సావిత్రమ్మ కోదాడలో ఆర్‌ఎంపీగా పని చేసిది. వేణుమాధవ్‌కు ఇద్దరు అన్నలు, అక్క, చెల్లి ఉన్నారు. కోదాడ బాలుర ఉన్నత పాఠశాలలో 10వ తరగతి వరకు చదివిన ఆయన ఆ తరువాత ఇంటర్, డిగ్రీ బీకాం కోర్సులను కోదాడలోని కేఆర్‌ఆర్‌ కళాశాలలో పూర్తి చేశారు. చదువుకునే సమయంలో మిమిక్రీ, వెంట్రిలాక్విజంలో మంచి పట్టు సంపాదించారు. మాధవరెడ్డితో పరిచయం... కోదాడ ఎమ్మెల్యేగా వేనేపల్లి చందర్‌రావు ఉన్న సమయంలో పార్టీ ప్రచార కార్యక్రమాల్లో వేణుమాధవ్‌ పాల్గొని వేదికలపై నవ్వించేవాడు. ఈ క్రమంలో నాటి హోంశాఖమంత్రి మాధవరెడ్డి వద్దకు వేణుమాధవ్‌ను  ఎమ్మెల్యే చందర్‌రావు తీసుకెళ్లి పరిచయం చేయడంతో ఆయన కోదాడ నుంచి హైదరాబాద్‌కు వెళ్లాడు. కొంత కాలం పాటు టీడీపీ కార్యాలయంలో లైబ్రేరియన్‌గా పని చేశారు. ఆ తర్వాత వివిధ వేదికలపై ప్రదర్శనలు ఇస్తున్న క్రమంలో చిత్ర దర్శకుడు ఎస్వీ కృష్ణారెడ్డి దృష్టిలో పడడంతో ఆయన తన సినిమా ‘ సంప్రదాయం’లో అవకాశం ఇచ్చారు.   ఈ సినిమా 1996 జనవరి 14న విడుదలైంది. అప్పటి నుంచి 2016 వరకు  ఆయన దాదాపు 500 సినిమాళ్లో నటించారు. హం గామా, భూకైలాస్, ప్రేమాభిషేకం సినిమాళ్లో ఆయన హీరోగా కూడా నటించారు. ఈ మూడు సినిమాలకు ఆయనే నిర్మాత కూడా. ఆయనకు భార్య వాణి, ఇద్దరు కుమారులు ఉన్నారు. స్వచ్ఛంద కార్యక్రమాల్లో సినీ నటుడిగా ఎంతో బిజీగా ఉండే వేణుమాధవ్‌ కోదాడలో జరిగే పలు స్వచ్ఛంద కార్యక్రమాల్లో చురుకుగా పాల్గొనేవాడు. 2009వ సంవత్సరంలో కృష్ణానదికి వరదలు వచ్చిన సమయంలో జోలె పట్టి విరా ళాలు సేకరించి నాటి ముఖ్యమంత్రి రోశయ్యకు అందజేశారు. 2016లో కోదాడలో జరిగిన హరితహారం కార్యక్రమంలో పాల్గొని మొక్కలు నాటారు. 2018లో కోదాడలో జరిగిన బొడ్రాయి ప్రతిష్టకు ఆయన వచ్చి రెండు రోజులపాటు కోదాడలో సందడి చేశారు. ఎన్నికల సమయంలో హడావుడి 2018లో జరిగిన అసెంబ్లీ ఎన్నికల సమయంలో కోదాడ అసెంబ్లీ నుంచి ఎమ్మెల్యేగా పోటీ చేయడానికి ఆయన కోదాడ వచ్చారు. రిటర్నింగ్‌ అధికారి వద్దకు నామినేషన్‌ వేయడానికి వెళ్లి ఎలాంటి పత్రాలు తీసుకురాలేదు. దీంతో నామినేషన్‌ తీసుకోవడానికి అధికారులు తిరస్కరించడంతో వెళ్లిన ఆయన మళ్లీ రెండవసారి వచ్చినామినేషన్‌ వేశారు. నాటకీయ పరిణామాల మధ్య చివరి రోజు తన నామినేషన్‌ ఉపసంహరించుకున్నారు. వేణుమాధవ్‌ మృతికి సంతాపం పట్టణానికి చెందిన ప్రముఖ సినీ నటుడు వేణుమాధవ్‌ అకాల మృతికి పలువురు తమ తీవ్ర సంతాపాన్ని వ్యక్తం చేశారు.  తెలంగాణ రాష్ట్రం మంచి కళాకారుడిని కోల్పోయిందని రాష్ట్ర విద్యుత్‌ శాఖ మంత్రి జి. జగదీశ్‌రెడ్డి పేర్కొన్నారు. ఆయన కుటుంబానికి తెలంగాణ సమాజం అండగా ఉంటుందని అన్నారు. టీపీసీసీ చీఫ్‌ ఉత్తమ్‌కుమార్‌రెడ్డి, కోదాడ ఎమ్మెల్యే బొల్లం మల్లయ్యయాదవ్, మాజీ ఎమ్మెల్యేలు వేనేపల్లి చందర్‌రావు, ఎన్‌.పద్మావతి, కోదాడ మాజీ మున్సిపల్‌ చైర్‌పర్సన్‌ వంటిపులి అనితలు వేణుమాధవ్‌ మృతికి సంతాపం తెలిపారు. ఆయన కుటుంబానికి తమ ప్రగాఢ సానుభూతిని వ్యక్తం చేశారు. మాకు వెన్నుదన్నుగా ఉండేవాడు కోదాడ బాలుర పాఠశాల నుంచే వేణుమాధవ్‌ నాకు మంచి మిత్రుడు. ఆ తర్వాత కేఆర్‌ఆర్‌ కళాశాలలో చదువుకున్నాం. కోదాడలో మేము ఏర్పాటు చేసిన తెర సాంస్కృతిక కళామండలికి ఆయన చేదోడుగా ఉండేవాడు. కోదాడ వస్తే మా ఇంటికి రాకుండా వెళ్లడు. సంవత్సరం క్రితం భార్యభర్తలు, పిల్లలు వచ్చి వెళ్లారు. ఆయన మరణం తీవ్రమైన బాధ కలిగించింది. – వేముల వెంకటేశ్వర్లు  సొంత తమ్ముడి కన్నా ఎక్కువ  వేణుమాధవ్‌ నాకు సొంత తమ్ముడి కన్నా ఎక్కువగా అన్యోన్యంగా ఉండే వాడు. ప్రతి ఎన్నికల్లో కోదాడకు వచ్చి నాకు ప్రచారం చేసేవాడు. కోదాడకు వస్తే మా ఇంట్లోనే ఉండేవాడు. ఆయనతో 20 సంవత్సరాల అనుబంధం ఇలా అర్ధంతరంగా ముగియడం బాధగా ఉంది.– పారా సీతయ్య, మాజీ సర్పంచ్‌  ఎంతో సరదాగా ఉండేవాడు వేణుమాధవ్‌ ఇంటర్, డిగ్రీలో నా క్లాస్‌మేట్‌. గత సంవత్సరం కోదాడలో జరి గిన వినా యక చవితి,  హరితహారం కార్యక్రమంలో పాల్గొనడానికి వచ్చి మాతో రెండు రోజులు గడిపాడు. కళాశాల రోజుల్లో సరదాగా ఉండేవాడు. పేదరికం నుంచి కష్టపడి పైకి వచ్చాడు. ఇలా అకాల మరణం చెందడం బాధ కలిగించింది. –పాలూరి సత్యనారాయణ, క్లాస్‌మేట్‌  

అనారోగ్యంతో బుధవారం మృతి చెందిన ప్రముఖ హాస్యనటుడు వేణుమాధవ్‌ స్థానికులతో ఎంతో ఆప్యాయంగా ఉండేవారని మౌలాలీ వాసులు గుర్తు చేసుకున్నారు. ఆయన గత 25 ఏళ్లుగా స్థానిక పెద్దలు, చిన్న పిల్లలకు సన్నిహితులని పేర్కొన్నారు. డివిజన్‌లో జరిగే ప్రతి పండగలోను వేణుఉత్సాహంగా పాల్గొనేవారని, తోటివారితో సందడి చేవారని వారు పేర్కొన్నారు. కుషాయిగూడ: అనారోగ్యంతో మృతిచెందిన ప్రముఖ హాస్యనటుడు వేణుమాధవ్‌ స్థానికులతో కలివిడిగా.. ఎంతో అప్యాయంగా ఉండేవారు. 25 సంవత్సరాలుగా మౌలాలి ప్రాంతంలో నివసిస్తున్న ఆయన పెద్దలతో పాటుగా చిన్నపిల్లలకు సుపరిచితుడిగా మారారు. స్థానికంగా నిర్వహించే పండుగలు, ఉత్సవాలలో పాల్గొంటూ తన హాస్యంతో అందరినీ నవ్విస్తూ ఉండేవారు. ఆయనతో ఉన్న అనుబంధాన్ని స్థానికులు గుర్తుచేసుకున్నారు. నా గెలుపులో భాగస్వామి  జీహెచ్‌ఎంసీ ఎన్నికలలో నాకు అన్ని విధాలా అండగా నిలిచాడు. ఎన్నికల ప్రచారంలో సొంత మనిషిలా నాకు మద్దతుగా  ప్రచారం చేసి  నా గెలుపులో భాగస్వామి అయ్యాడు.   నేను తలపెట్టే ప్రతి కార్యక్రమానికీ హాజరయ్యారు. వేణుమాధవ్‌ మృతి దిగ్భ్రాంతికి గురిచేసింది.    –  గొల్లూరి అంజయ్య,  కార్పొరేటర్‌ 1997 నుంచి స్నేహితులం  వేణు మాధవ్‌ హెచ్‌బీకాలనీకి వచ్చిన తరువాత 1997లో మా స్నేహం మొదలైంది.  ఆయనతో పాటు పది సంవత్సరాలుగా సినిమా రంగంలో పనిచేశాను. ఈ క్రమంలో మా స్నేహం కాస్తా మరింత బలపడి కుటుంబ స్నేహితులుగా మారాం. తన సమస్యలు నాతో చర్చించేవాడు. గొప్ప మిత్రుడిని కోల్పోడం బాధగా ఉంది.    – శ్రావణ్‌కుమార్‌గౌడ్‌  ప్రతి ఫంక్షన్‌కు వచ్చేవాడు కొద్ది కాలం క్రితం పరిచయమైన వేణన్న మా ఫ్యామిలీ ఫ్రెండ్‌గా మారాడు. అందరితో ఎంతో కలివిడిగా ఉండేవాడు. ఎక్కడైనా కలిశాడంటే చాలు నవ్వులు పండించేవాడు. అతనితో గడిపినంత సేపు సమయం గుర్తుకు వచ్చేది కాదు. మా ఇంట్లో జరిగే ప్రతి శుభకార్యానికి కుటుంబ సమేతంగా హజరై సంతోష పరిచేవాడు. అలాంటి వ్యక్తి మరణించాడన్న వార్త మా కుటుంబ సభ్యులందరినీ బాధలో ముంచేసింది. – వంజరి ప్రవీణ్‌ అందరిలో జోష్‌ నింపేవాడు మా కాలనీలో జరిగే ప్రతి కార్యక్రమానికీ ఆయనను ఆహ్వానించేవాళ్లం. ముఖ్యంగా బోనాలకు ఫలహారం బండి ఊరేగింపులో పాల్గొని మా అందరిలో జోష్‌ నింపేవాడు. ఎలాంటి సాయం కోరినా తనవంతు సాయం చేసేవాడు. – సురేష్‌    నమ్మలేకున్నాం హాస్యనటుడు వేణుమాధవ్‌ హెచ్‌బీకాలనీలో అందరితో కలివిడిగా ఉంటూ ఆప్యాయంగా పలకరించేవాడు. డివిజన్‌లో నిర్వహించే అన్ని ఉత్సవాలకు హాజరై  ఉత్సహపరిచేవాడు. అలా అందరికి సుపరిచితుడుగా మారిన వేణుమాధవ్‌ ఇక లేడంటే నమ్మలేకున్నాం.      –  బోదాస్‌ రవి (వేణుమాధవ్‌కు ప్రముఖుల నివాళి దృశ్యాల కోసం... క్లిక్ చేయండి)

‘పంతులమ్మని చేసుకుని పలక మీద అఆలు రాసుకోవాలా? పదిమంది చూపూ నా మీదే ఉండాలి.. వందమందిలో ఉన్నా నన్ను స్పెషల్‌గా గుర్తించాలి’ (ఛత్రపతి), ‘నేనెవరో ఎరుకనా.. నల్లబాలు నల్లతాచు లెక్క.. నేనంటే ట్విన్‌ సిటీస్‌ మొత్తం దడ’ (సై), ‘ఒసేయ్‌ శకుంతల.. రేపు మార్నింగ్‌ 9గంటలకు నీకు అపాయింట్‌మెంట్‌ ఇస్తున్నా.. రూమ్‌కి వచ్చి నన్ను పికప్‌ చేసుకుని వెళ్లి 10 గంటలకు క్యాష్‌ తీసుకెళ్లు.. ఒసేయ్‌ ఒసేయ్‌ ఒసేయ్‌ నడిరోడ్డు మీద ఓ ఆడదాన్ని కొట్టాననే బ్యాడ్‌ నేమ్‌ నాకు రానివ్వొద్దు (లక్ష్మీ)’’ అంటూ ఎన్నో పంచ్‌ డైలాగులతో ప్రేక్షకులను కడుపుబ్బా నవ్వించిన వేణుమాధవ్‌ (51) ఇకలేరు. హాస్యనటుడిగా తనకంటూ ప్రత్యేక ముద్ర వేయించుకుని, ప్రేక్షకుల హృదయాల్లో చెరగని స్థానం సంపాదించుకున్న ఆయన అనారోగ్యంతో బుధవారం హైదరాబాద్‌లో మృతి చెందారు. కొన్ని రోజులుగా కాలేయ సంబంధిత వ్యాధితో బాధపడుతున్నారాయన. అయితే ఇటీవల వ్యాధి సమస్య తీవ్రం కావడంతో సికింద్రాబాద్‌లోని యశోద ఆస్పత్రిలో చేరారు. ఆయన రెండు కిడ్నీలు పూర్తిగా దెబ్బతినడంతో మంగళవారం ఆరోగ్యం క్షీణించి పరిస్థితి విషమంగా తయారైంది. దీంతో వెంటిలేటర్‌ సాయంతో చికిత్స అందించినా ఫలితం లేకపోవడంతో బుధవారం మధ్యాహ్నం 12:21 గంటలకు ఆయన తుది శ్వాస విడిచారు. ఆయనకు భార్య శ్రీవాణి, కొడుకులు మాధవ్‌ సావికర్, మాధవ్‌ ప్రభాకర్‌ ఉన్నారు. ఆయన మృతితో చిత్రపరిశ్రమలో విషాదం నెలకొంది. వేణుమాధవ్‌ మృతదేహాన్ని కాప్రా హెచ్‌పీ కాలనీలోని ఆయన స్వగృహానికి తీసుకెళ్లారు. అంత్యక్రియలు నేడు జరగనున్నాయి. కాగా అభిమానుల సందర్శనార్థం వేణుమాధవ్‌ పార్థివ దేహాన్ని ఈ రోజు మధ్యాహ్నం 1 గంట నుంచి 2:30గంటల వరకూ ఫిల్మ్‌నగర్‌లోని ‘మా’ కార్యాలయ ఆవరణలో ఉంచనున్నారు. మిమిక్రీ ఆర్టిసుగా... నల్గొండ జిల్లాలోని కోదాడలో 1969 డిసెంబర్‌ 30న ప్రభాకర్‌–సావిత్రి దంపతులకు జన్మించారు వేణుమాధవ్‌. తండ్రి టెలిఫోన్‌ డిపార్ట్‌మెంట్‌లో లైన్‌ ఇన్‌స్పెక్టర్‌. తల్లి ప్రైవేట్‌ మెడికల్‌ ప్రాక్టీషనర్‌. వేణుకి అక్క, ఇద్దరు అన్నయ్యలు, ఓ చెల్లి ఉన్నారు. చిన్నప్పట్నుంచి టీచర్లనీ, స్నేహితుల్నీ, తల్లి సావిత్రి దగ్గరకు వైద్యానికి వచ్చే పేషెంట్లనీ అనుకరిస్తుండేవాడు వేణుమాధవ్‌. వేణు సెవెన్త్‌ క్లాస్‌ చదువుతున్నప్పుడు ఫేమస్‌ మిమిక్రీ ఆర్టిస్ట్‌ నేరెళ్ల వేణుమాధవ్‌ కోదాడలో ఓ మ్యారేజ్‌ ఫంక్షన్‌లో మిమిక్రీ చేశారు. అప్పట్నుంచి ఆయన్ను ఆదర్శంగా తీసుకుని మిమిక్రీ చేసేవారు. అయితే మిమిక్రీని ఓ వృత్తిగా తీసుకున్నది మాత్రం ఇంటర్‌లోనే. హైదరాబాద్‌లో గణేష్‌ ఉత్సవాల్లో మిమిక్రీ చేసేవారు. బీకాం తర్వాత సీఏ చదవాలని బలమైన కోరిక ఉన్నా ఆర్థిక ఇబ్బందుల వల్ల చదవలేకపోయారు వేణు. డిగ్రీ తర్వాత ముంబయ్‌ వెళ్లి ‘టాకింగ్‌ డాల్‌’ తెచ్చుకుని, ప్రోగ్రామ్స్‌ చేయడం మొదలుపెట్టారు. రచయిత దివాకర్‌బాబుకి రవీంద్రభారతిలో జరిగిన సన్మానంలో వేణు ప్రతిభ చూసిన డైరెక్టర్‌ ఎస్వీ కృష్ణారెడ్డి, నిర్మాత అచ్చిరెడ్డి ‘సంప్రదాయం’ (1996) సినిమాలో అవకాశం ఇచ్చారు. సినిమా పూర్తయ్యాక డబ్బింగ్‌ చెప్పేందుకు థియేటర్‌కి వెళ్లిన వేణుమాధవ్‌ తొలిసారి తెరపై తన బొమ్మ చూసుకోవడంతో ఎగ్జయిట్‌ అయిపోయి డబ్బింగ్‌ చెప్పలేకపోయారట. చివరికి ఆయన పాత్రకి కాదంబరి కిరణ్‌తో చెప్పించారు. మొదటి సినిమా రిలీజ్‌ కాకముందే వేణుమాధవ్‌కి అవకాశాలు వచ్చాయి. రోజుకి లెక్కలేనన్ని లొకేషన్స్‌లో షూటింగ్‌ చేస్తూ, కారులోనే టిఫిను, భోజనం చేసేవారు. అప్పుడు కొంచెం అలసటగా అనిపించినా మళ్లీ ఇలాంటి అవకాశం రాదేమో అని కష్టపడేవాడినని పలు సందర్భాల్లో వేణుమాధవ్‌ చెప్పారు. హైట్‌ విషయంలో ఎప్పుడూ బాధపడలేదాయన. ‘ఎత్తున్న హీరోలు వినోదం పండిస్తే ప్రేక్షకులు చూస్తారా? వాళ్లు హీరోగానే చేయాలి. హీరోగా అయితే ఏడాదికి మూడు, నాలుగు చిత్రాలు చేస్తారేమో. కానీ, నేను దాదాపు 10–15ఏళ్లు ఏడాదికి 40– 50 సినిమాలు చేశా’ అని పలు ఇంటర్వ్యూల్లో చెప్పారాయన. దాదాపు 600 సినిమాలు చేశారు. ఆయన్ని నటుడిగా పరిచయం చేసిన ఎస్వీ కృష్ణారెడ్డి ‘హంగామా’ సినిమాతో హీరోని కూడా చేశారు. ఆ తర్వాత ‘భూ కైలాస్, ప్రేమాభిషేకం’ చిత్రాల్లో సోలో హీరోగా నటించారు వేణుమాధవ్‌. ‘ప్రేమాభిషేకం’ సినిమాని ఆయనే నిర్మించడం విశేషం. వినాయక్‌ దర్శకత్వంలో 2006లో వచ్చిన ‘లక్ష్మి’ చిత్రానికి ఉత్తమ హాస్యనటుడిగా నంది అవార్డును అందుకున్నారు వేణుమాధవ్‌. సీమాంధ్ర ఉద్యమం సమయంలో తనకు కొంచెం అవకాశాలు తగ్గాయని ఆ మధ్య చెప్పారు. వేణుమాధవ్‌ సేవా కార్యక్రమాలు కూడా చేసేవారు. కరీంనగర్‌ జిల్లా జమ్మికుంటలో తండ్రి ప్రభాకర్‌ జ్ఞాపకార్థం, తల్లి సావిత్రి పేరుతో కళ్యాణ మండపం, కళా వేదిక కట్టించారు. ‘వేణుమాధవ్‌ చారిటబుల్‌ ట్రస్ట్, వేణుమాధవ్‌ ఫ్రెండ్స్‌ సర్కిల్‌’ పేర్లతో సేవాకార్యక్రమాలు చేసేవారాయన. గుణశేఖర్‌ దర్శకత్వంలో 2015లో వచ్చిన ‘రుద్రమదేవి’ తర్వాత వేణుమాధవ్‌ సినిమాలకు దూరంగా ఉంటున్నారు. సినీ ప్రముఖుల సంతాపం వేణుమాధవ్‌ మృతిపట్ల తెలంగాణ రాష్ట్ర సినిమాటోగ్రఫీ శాఖ మంత్రి తలసాని శ్రీనివాసయాదవ్, హీరోలు చిరంజీవి, పవన్‌ కల్యాణ్, మహేశ్‌బాబు, రాజశేఖర్, శ్రీకాంత్, దర్శకుల సంఘం అధ్యక్షుడు ఎన్‌.శంకర్, డైరెక్టర్‌ ఎస్వీ కృష్ణారెడ్డి, నిర్మాత అచ్చిరెడ్డి, ‘మా’ జనరల్‌ సెక్రటరీ జీవితా రాజశేఖర్, నటులు అలీ, శివాజీరాజా, ఉత్తేజ్, మూవీ ఆర్టిస్ట్స్‌ అసోసియేషన్‌తో పాటు పలువురు సినీ ప్రముఖులు దిగ్భ్రాంతి వ్యక్తం చేయడంతో పాటు ఆయన కుటుంబ సభ్యులకు ప్రగాఢ సానుభూతి తెలిపారు.  

సాక్షి, సూర్యపేట : ప్రముఖ హాస్య నటుడు వేణుమాధవ్‌ మరణం పట్ల మంత్రి జగదీష్‌రెడ్డి దిగ్భ్రాంతి వ్యక్తం చేశారు. ఆయన కుటుంబస‌భ్యుల‌కు ప్రగాఢ సానుభూతి తెలిపారు. హాస్యప్రపంచానికి వేణుమాధవ్‌ మరణం తీరని లోటు అన్నారు. సినీ గగన నీలాకాశంలో హాస్యాన్ని పండించిన నటుడు వేణుమాధవ్‌ సూర్యపేట జిల్లా బిడ్డ కావడం తమకెంతో గర్వకారణమని పేర్కొన్నారు. ఎన్నో సవాళ్లను అధిగమించి ఉన్నత స్థానానికి ఎదిగిన గొప్ప వ్యక్తి వేణుమాధవ్‌ అని కొనియాడారు. కళామతల్లి ఒడిలో ఒరిగిపోయిన వేణుమాధవ్‌ ఆత్మకు శాంతి చేకూరాలని ప్రార్థించారు. అనారోగ్యం కార‌ణంగా హైదరాబాద్‌లోని ఓ ప్రైవేటు ఆస్పత్రిలో బుధవారం వేణుమాధవ్‌ కన్నుమూసిన సంగతి తెలిసిందే. మంత్రి ఎర్రబెల్లి దిగ్భ్రాంతి వేణుమాధవ్ మరణం పట్ల పంచాయతీరాజ్, గ్రామీణాభివృద్ధి మంత్రి ఎర్రబెల్లి దయాకర్ రావు దిగ్భ్రాంతి వ్యక్తం చేశారు. వేణుమాధవ్ కుటుంబ సభ్యులకు ప్రగాఢ సానుభూతి తెలిపారు. వేణుమాధవ్ ఆత్మకు శాంతి కలగాలని భగవంతుడిని ప్రార్థించారు. వేణుమాధవ్ తో తనకు ఉన్న వ్యక్తిగత అనుబంధాన్ని మంత్రి దయాకర్ రావు గుర్తు చేసుకున్నారు.

ప్రముఖ సినీ హాస్యనటుడు, మిమిక్రీ కళాకారుడు వేణుమాధవ్ మరణం పట్ల తెలంగాణ రాష్ట్ర ముఖ్యమంత్రి కె.చంద్రశేఖర్ రావు తీవ్ర దిగ్భ్రాంతి వ్యక్తం చేశారు. వేణుమాధవ్ తన నటనతో అనేక మంది అభిమానులను సంపాదించుకున్నారని ముఖ్యమంత్రి స్మరించుకున్నారు. ఆయన కుటుంబ సభ్యులకు ప్రగాఢ సానుభూతి తెలిపారు. తెలంగాణ రాష్ట్ర సినిమాటోగ్రఫీ మంత్రి తలసాని శ్రీనివాస్‌ యాదవ్‌ వేణు మాధవ్‌ భౌతిక కాయానికి నివాళులర్పించారు. ఈ సందర్భం‍గా ఆయన తెలుగు సినిమాకు చేసిన సేవలను గుర్తు చేసుకున్నారు. వేణు మాధవ్‌ ఈ స్థాయికి చేరుకోవడానికి ఆయన కృష్టి పట్టుదలే కారణమన్నారు తలసాని.

బుధవారం మరణించిన హాస్యనటుడు వేణు మాధవ్‌ మృతిపై పవన్‌ కల్యాణ్ దిగ్బ్రాంతి వ్యక్తం చేశారు. ‘కొన్నాళ్లుగా అనారోగ్యంతో బాధపడుతున్న వేణు మాధవ్‌ కోలుకుంటారు అనుకున్నాను. నటుడిగా ఎంతో భవిష్యత్తు ఉన్న ఆయన మరణించటం బాధాకరం. గోకులంలో సీత నుంచి నాతో కలిసి పలు చిత్రాల్లో నటించారు. హాస్యం పండించడంలో మంచి టైమింగ్‌ ఉన్న నటుడు, మిమిక్రీలో కూడా నైపుణ్యం ఉండటంతో సెట్‌లో అందరినీ సరదాగా ఉంచేవారు. వారి కుటుంబానికి ప్రగాఢ సానుభూతి తెలియచేస్తున్నాను’ అంటూ ఓ ప్రకటన విడుదల చేశారు పవన్‌. యువ కథానాయకులు వరుణ్‌ తేజ్‌, సాయి ధరమ్‌ తేజ్‌, నితిన్‌ లు వేణు మాధవ్‌ మృతికి తమ సంతాపాన్ని తెలియజేశారు. వేణుమాధవ్‌తో సన్నిహితంగా ఉండే కమెడియన్లు అలీ, ఉత్తేజ్‌లు ఆయన భౌతికకాయానికి నివాళులర్పించి కన్నీటి పర్యంతమయ్యారు. అన్నా అంటూ ఆప్యాయంగా పిలిచే వేణు మాధవ్‌ లేడంటే నమ్మలేకపోతున్నా అంటూ సీనియర్‌ నటుడు గౌతమ్‌ రాజు ఆవేదన వ్యక్తం చేశారు.


 ఒక్క ఫ్రెండు... వేణుమాధవ్ లాంటి ఒక్క ఫ్రెండు...
  ఉంటే చాలు.
  ఎంత పెద్ద స్టార్ యాక్టర్‌కైనా పక్కన పెద్ద సపోర్ట్!
  అల్లు రామలింగయ్య, చిరంజీవి, రామ్‌చరణ్  నాగేశ్వరరావు, నాగార్జున, నాగచైతన్య  ఫర్ ఎవ్రీ జనరేషన్... మిత్ర ‘పాత్రుడు’ వేణుమాధవ్!
  ఇక ఆయన రుబాబ్ కామెడి... అదొక కొత్త ఒరవడి!
  చేతులు తలపెకైత్తి, సైడుకి ఒక్క లుక్ ఇచ్చాడంటే...
  ఆడియన్స్ తుకడాల్, తుకడాల్!!
  ప్రదీప్ రావత్, తెలంగాణ శకుంతల... ఎవరైనా... లెక్క చేసేదే లేదు. ‘నల్లబాలు’ లెక్క!
  సినిమా ఛాన్స్ వస్తే... ‘‘వద్దొద్దు, ప్రోగ్రామ్స్ ఇప్పించండి చాలు’’ అని  తప్పుకుని తప్పుకుని తిరిగిన ఈ ‘జూనియర్ నేరెళ్ల’...
  చివరికి ఈ ఫీల్డులో ఎలా సెటిలయ్యారు?
  ఇప్పుడెందుకు మళ్లీ దూరమైనట్లు కనిపిస్తున్నారు?!
  చదవండి... ఈవారం ‘తారాంతరంగం’.
  మీ చిన్ననాటి తీపి గుర్తులు?
  వేణుమాధవ్: నాకేం తీపి గుర్తులు లేవు. నాది ఉగాది పచ్చడిలాంటి జీవితం. మాది నల్గొండజిల్లాలోని కోదాడ. పుట్టింది, పెరిగింది, చదివింది అక్కడే. కాలేజీ చదువు మాత్రం బాలాజీనగర్ తండాలో. ప్రతి రోజూ అప్ అండ్ డౌన్ ఐదు కిలోమీటర్లు నడిచి వెళ్లేవాణ్ణి.
  
  మీ నాన్నగారు ఏం చేసేవారు?
  వేణుమాధవ్: టెలిఫోన్ డిపార్ట్‌మెంట్‌లో లైన్ ఇన్‌స్పెక్టర్. అమ్మ ప్రైవేట్ మెడికల్ ప్రాక్టీషనర్‌గా చేసేవారు. మేం ఐదుగురం. అక్క, ఇద్దరన్నయ్యలు, తర్వాత నేను. నా తర్వాత చెల్లి. మాది మిడిల్ క్లాస్ ఫ్యామిలీ.
  
  చిన్నప్పుడు మీరు బాగా అల్లరి చేసేవారా?
  వేణుమాధవ్: అమ్మానాన్న తట్టుకోలేనేంత చేసేవాణ్ణి. స్కూల్‌కి సరిగ్గా వెళ్లేవాణ్ణి కాదు. సరిగ్గా చదువుకునేవాణ్ణి కాదు. అప్పట్లో ఓ సినిమా విడుదలవుతోందంటే, రిక్షాలో ఎనౌన్స్‌మెంట్ చేసేవాళ్లు. రిక్షా కనబడగానే నేనే ఎక్కి, అనౌన్స్ చేసేసేవాణ్ణి. డప్పులోళ్లు కనిపిస్తే.. వాళ్ల వెంటపడి డప్పులు కొట్టడం, పిల్లలతో గోలీలాడటం.. ఇలా నా అల్లరికి అంతుండేది కాదు. మా పిల్లలందరిలోనూ ఎక్కువగా తన్నులు తిన్నది నేనే. మా కుటుంబంలో నా మీద ఎలాంటి నమ్మకం ఉండేది కాదు. ఎందుకూ పనికి రానివాడని అనుకునేవారు.
  
  చదువులో వీక్. మరి, పరీక్షల సంగతేంటి?
  వేణుమాధవ్: టెన్త్ క్లాస్ రెండుసార్లు చదివా. అసలీ చదువుని ఎవరు కనిపెట్టారా? అని నానా రకాలుగా తిట్టుకునేవాణ్ణి. చదవకపోతే ఇంట్లో, స్కూల్లో కొడతారు. ఎందుకొచ్చిన గొడవ అనుకునేవాణ్ణి.
  
  సరే.. ఇంతకూ మిమిక్రీలోకి ఎలా ఎంటరయ్యారు?
  వేణుమాధవ్: నేను చిన్నప్పట్నుంచీ స్కూల్లో టీచర్లనీ స్నేహితుల్నీ, మా అమ్మ దగ్గరకు వైద్యానికి వచ్చే పేషెంట్లనీ అనుకరించేవాణ్ణి. అయితే దాన్ని మిమిక్రీ అంటారన్న సంగతి నాకు తెలియదు. నేను సెవెన్త్ క్లాస్ చదువుతున్నప్పుడు ఫేమస్ మిమిక్రీ ఆర్టిస్ట్ నేరెళ్ల వేణుమాధవ్‌గారు మా కోదాడలో ఓ మ్యారేజ్ ఫంక్షన్‌లో ప్రోగ్రామ్ చేశారు. అప్పుడు నేను చేసేది మిమిక్రీ అనే సంగతి నాకర్థమైంది. అప్పట్నుంచీ ఆయన్ను ఆదర్శంగా తీసుకుని ఎక్కువగా మిమిక్రీ చేసేవాణ్ణి.
  
  మిమిక్రీ మీ జీవితానికి మలుపవుతుందనుకున్నారా?
  వేణుమాధవ్: అస్సలు లేదు. అయితే మిమిక్రీని ఓ ప్రొఫెషన్‌గా తీసుకున్నది మాత్రం ఇంటర్‌లోనే. అప్పుడు ప్రతి ఏడాది హైదరాబాద్‌లో జరిగే గణేష్ ఉత్సవాల్లో మిమిక్రీ చేయడానికి ఇక్కడికి వచ్చేవాణ్ణి. డిగ్రీ అయిన తర్వాత ముంబయ్ వెళ్లి ‘టాకింగ్ డాల్’ తెచ్చుకుని, ప్రోగ్రామ్ చేయడం మొదలుపెట్టాను.
  
  టాకింగ్ డాల్ తెచ్చుకోవాలని ఎందుకనిపించింది?
  వేణుమాధవ్: శ్రీనివాస్ అనే మిమిక్రీ ఆర్టిస్ట్ దగ్గర చూసి, తెచ్చుకున్నాను. నాకు నేనుగా వెంట్రిలాక్విజమ్ నేర్చుకుని ప్రోగ్రామ్స్ చేయడం మొదలుపెట్టాను.
  
  టాకింగ్ డాల్ అంటే చాలా ఖరీదు కదా?
  వేణుమాధవ్: నిజమే. అప్పట్లో దాని విలువ ఐదువేల ఎనిమిదివందల రూపాయలు. అది కొనడానికి నేను మామూలు ఇబ్బందులు పడలేదు. ఇంట్లోవాళ్లు, నా ఫ్రెండ్స్ సహాయంతో కొనుక్కున్నాను.
  
  మిమిక్రీలో జూనియర్ వేణుమాధవ్ అనిపించుకున్నారు.. ఎలా అనిపిస్తోంది?
  వేణుమాధవ్: నేరెళ్ల వేణుమాధవ్‌గారి ఏకలవ్య శిష్యుణ్ణి. కొన్ని వందల సార్లు ఆయన్ను కలిశాను. ‘అరేయ్.. నువ్వు స్ప్రింగులు మింగావురా..’ అని మెచ్చుకునేవారు. ‘నువ్వు కచ్చితంగా సినిమా యాక్టర్ అవుతావు’ అని కూడా అనేవారు. అంతటి మహానుభావుడితో పోల్చి, జూనియర్ వేణుమాధవ్ అనే పేరు తెచ్చుకుంటానని కలలో కూడా ఊహించలేదు.
  
  ఆ టాకింగ్ డాలే మిమ్మల్ని ఎన్టీఆర్ వరకూ తీసుకెళ్లింది కదూ?
  వేణుమాధవ్: అవును. నేను చదువుకున్న గవర్నమెంట్ స్కూల్‌లో అప్పటి కోదాడ ఎమ్మెల్యే చందర్‌రావుగారు, కలక్టర్‌గారు, ఇంకా పలువురు ప్రముఖుల సమక్షంలో టాకింగ్ డాల్‌ని ఇంట్రడ్యూస్ చేశాను. ఆ ప్రోగ్రామ్ చందర్‌రావుగారికి నచ్చి, భువనగిరిలో తెలుగుదేశం పార్టీ మీటింగ్‌కి తీసుకెళ్లారు. అక్కడ మాధవరెడ్డిగారు, చంద్రబాబునాయుడుగారు నా టాకింగ్ డాల్ ప్రదర్శన చూసి, ‘మహానాడులో నువ్వు ప్రోగ్రామ్ చేయాలి’ అన్నారు. ఎన్టీ రామారావుగారి సమక్షంలో ఆరు లక్షల మంది ముందు పోగ్రామ్ చేశా. నా జీవితంలో ఊహించని మలుపు అది. ఆ రోజు సాయంత్రం ప్రోగ్రామ్ అంటే.. మధ్యాహ్నమే నన్ను స్టేజి మీద కూర్చోబెట్టారు. అందరూ మాట్లాడిన తర్వాత, ఎన్టీఆర్‌గారు మాట్లాడే ముందు, నాతో ప్రోగ్రామ్ చేయించారు. అప్పుడు ఎన్టీఆర్‌గారు  నా భుజం మీద చెయ్యేసి, ‘మీ సేవలు మాకెంతో అవసరం బ్రదర్’ అంటూ హిమాయత్‌నగర్ తెలుగు దేశం పార్టీ ఆఫీసులో చేర్చుకున్నారు. అక్కణ్ణుంచీ అసెంబ్లీలోని టీడీపీ లెజిస్లేటివ్ కార్యాలయంలో చేర్చారు. నాకంతా  అయోమయంగా ఉండేది. సరే.. డబ్బులు బాగానే ఇస్తారనే ఊహతో చేరాను.
  
  ఆ ఊహ నిజమైందా?
  వేణుమాధవ్: నెలకు ఆరువందలు ఇచ్చేవారు. ఆ తర్వాత ఎనిమిది వందలు. 1994 నుంచి 96 వరకు అక్కడే చేశాను.
  
  సినిమాల్లోకి ఎలా వచ్చారు?
  వేణుమాధవ్: అప్పుడు నేను, మిమిక్రీ శ్రీనివాస్‌గారు, జనార్ధన్, కోలా... అని మేమందరం ఆకృతి సంస్థ నిర్వహించే ప్రోగ్రామ్స్ చేసేవాళ్లం. నాకు సెకండ్ హ్యాండ్ బజాజ్ 150 ఉండేది. పెట్రోలు ఖర్చులు కలిసొస్తాయని నలుగురూ ఒకే వాహనం మీద వెళ్లేవాళ్లం. ఓసారి రచయిత దివాకర్‌బాబుగారికి రవీంద్రభారతిలో సన్మానం జరిగితే, ఎస్వీ కృష్ణారెడ్డిగారు, అచ్చిరెడ్డిగారు వచ్చారు. మేం చేసిన ప్రోగ్రామ్ చూసి, ఫోన్‌నంబర్ ఇచ్చి, మర్నాడు ఆఫీసుకు వచ్చి కలవమన్నారు. సినిమాలు చూడ్డమే తప్ప నాకు సినిమా మీద కొంచెం కూడా జ్ఞానం లేదు. సినిమాల్లో నటించాలనే ఇంట్రస్ట్ లేదు. సరే.. రమ్మన్నారు కదా అని వెళ్లాలనుకున్నాను.
  
  ఫిల్మ్‌నగర్‌లో అడుగుపెట్టింది అప్పుడేనా?
  వేణుమాధవ్: అవును. ఆఫీసు వెతుక్కుంటూ వెళ్లి, కలిశాను. ‘నువ్వు స్టేజ్ మీద ఏదైతే చేశావో.. సినిమాలో అదే చెయ్యాలి’ అన్నారు. ‘నాకు సినిమా అంటే తెల్వదు సార్.. మనకు ఎరక లేదు. ఏదైనా ప్రోగ్రామ్ ఉంటే చెప్పండి. ఒక్కో ప్రోగ్రామ్‌కి ఇంత అని తీసుకుంటా’ అని ఇదే స్లాంగ్‌లో చెప్పా. ‘కాదు.. కాదు.. ఆలోచించుకో’ అన్నారు. ఇంటికొచ్చి అమ్మకి చెబితే.. ‘పిచ్చోడా.. సినిమా అంటే చిన్న విషయం కాదు. చేస్తానని చెప్పు’ అని చెప్పింది. ఆ తర్వాత అమ్మ మా ఊరు వెళ్లిపోయింది. దాంతో నేను కృష్ణారెడ్డిగార్ని కలవాలనే ఆలోచనను వదిలేశా. కానీ ఊరెళ్లిన తర్వాత కూడా అమ్మ వదల్లేదు. అప్పట్లో నా రూమ్‌లో ల్యాండ్‌లైన్ కూడా లేదు. పక్కింటికి ఫోన్ చేసి మరీ, ‘వెళ్లకుండా ఉండొద్దు’ అని అమ్మ పదే పదే చెప్పడంతో, బాధ భరించలేక వెళ్లాను. నేను మళ్లీ అదే పాట.. ‘పబ్లిక్ మీటింగ్ అయితే చేస్త కానీ.. ఇట్టాంటివి నడ్వదు సార్. సినిమా అంటే నాకు తెల్వదు’ అన్నాను. జనరల్‌గా వేరే దర్శక, నిర్మాతలెవరైనా వద్దంటారు. కానీ, కృష్ణారెడ్డిగారు, అచ్చిరెడ్డిగారు ‘మేం చూసుకుంటాం..’ అని హామీ ఇచ్చారు. ఎలాగూ బతిమాలుతున్నారు కదా అని, క్యాష్ చేసుకుందామని, అయితే ‘ఆర్ నైతో పార్’.. వస్తే డబ్బులొస్తాయ్ లేకపోతే సినిమా చేయకుండా తప్పించుకోవచ్చని, లెవల్‌గా ‘ఎన్ని రోజులు కావాల’ అనడిగాను. అరవై, డెబ్భైరోజులు కావాలంటే, 70వేలు అడిగాను. ఆ సినిమాకి నిర్మాత అన్నారావుగారు. ఆయనతో మాట్లాడతామని చెప్పారు. ‘వాళ్లతో వీళ్లతో నాకు సంబంధం లేదు.. నాకు పైసల్ కావాల్సిందే’ అంటే, ఓకే అన్నారు. ఆ విధంగా  ‘సంప్రదాయం’ సినిమాకి మొదటిసారి మేకప్ వేసుకున్నా.
  
  సరే... షూటింగ్ వాతావరణం ఎలా అనిపించింది?
  వేణుమాధవ్: కృష్ణగారు, ఇంకొంతమంది ఆర్టిస్టులు, నా కాంబినేషన్‌లో మొదటిరోజు షూటింగ్ స్టార్ట్ చేశారు. లొకేషన్‌కి వెళ్లగానే, టిఫిన్ తినమన్నారు. కానీ, నేను బయటికెళ్లి, హోటల్‌లో తినొచ్చాను. ఆ తర్వాత ఒంటి గంటకి బ్రేక్ అన్నారు. అంటే ఏంటో తెలియదు. అందరికీ భోజనం పెడుతుంటే, లంచ్ టైమ్ అనుకుని బయటికెళ్లి భోజనం చేసొచ్చాను. నన్నూ తినమన్నారు. అక్కడ భోంచేస్తే, ఇచ్చే డబ్బుల్లో కట్ చేస్తారని భయం. ఇలా రెండు రోజులు గడిచాయి. మూడో రోజు ‘ఏవయ్యా.. ఎటు వెళుతున్నావ్’ అని ప్రొడక్షన్‌వాళ్లు అడిగితే, తినడానికని చెప్పా. ‘ఎందుకు? ఇక్కడ పెడుతున్నాంగా.. ఫ్రీయే’ అన్నాడు. అంతే.. నా ఫ్రెండ్స్‌కి ఫోన్ చేసి, రమ్మన్నాను. నాలుగు రకాల పచ్చళ్లు, కూరలు.. బ్రహ్మాండమైన భోజనం. ఓ పట్టు పట్టేవాళ్లం. లైఫ్ చాలా హాయిగా అనిపించింది.
  
  పర్టిక్యులర్‌గా 70వేలు పారితోషికం అడగాలని ఎందుకనిపించింది?
  వేణుమాధవ్: లక్ష రూపాయలు సాధించాలన్నది నా జీవితాశయం. అందుకే 70 వేలడిగాను. ఇక్కడ ఇంకో విషయం చెప్పాలి. సినిమా మొత్తం పూర్తయ్యాక, డబ్బింగ్ చెప్పాలి రమ్మంటూ ఓ రోజు కారు పంపించారు. డబ్బింగ్ అంటే ఏంటో నాకస్సలు తెలియదు. సరే.. థియేటర్‌కి వెళ్లాను. స్క్రీన్ మీద నా బొమ్మ చూసుకుంటూ.. డబ్బింగ్ చెప్పాలి. ఫస్ట్ టైమ్ స్క్రీన్ మీద నన్ను నేను చూసుకోవడంతో ఎగ్జయిట్ అయిపోయాను. అలా చూస్తూ నిలబడిపోయాను. అలా పదిసార్లు జరిగింది. నోరెళ్లబెట్టి చూడటం తప్ప మాటలు మాట్లాడటంలేదు. రామ్‌గోపాల్‌రెడ్డిగారని ఎడిటర్‌గారు... ఇలా అయితే లాభం లేదని, రేపు డబ్బింగ్ చెబుదువుగాని అన్నారు. మర్నాడు కూడా అదే తంతు. మూడు, నాలుగో రోజు కూడా అంతే. నా బొమ్మ చూసుకోగానే.. భలే ఉన్నామే అనుకోవడం తప్ప డబ్బింగ్ చెప్పడంలేదు. రామ్‌గోపాల్‌గారికి నేను చెప్పనని అర్థమైంది. దాంతో కాదంబరి కిరణ్‌గారితో చెప్పించారు.
  
  లక్ష రూపాయల జీవితాశయం ఏంటి?
  వేణుమాధవ్: బీకామ్ చేసిన తర్వాత సీఏ చదవాలని విపరీతమైన కోరిక. కోదాడలో సీఏ లేదు. అప్పుడు హైదరాబాద్‌లో కూడా లేదు. సీఏ చేయాలంటే చెన్నయ్ వెళ్లాలి. ఫీజు మాత్రమే లక్ష రూపాయలు కట్టాలి. ఎలాగైనా సీఏ చేయాలన్నది ఆశయం. మా అమ్మానాన్నలకు ఐదుగురు సంతానం. ఐదుగుర్నీ చదివించడం, పెంచడం చిన్న విషయం కాదు. ఇక, లక్ష రూపాయలు ఎక్కడ కడతాం? లక్ష లేకపోవడంతో సీఏ చేయలేకపోయాం కదా.. అందుకే ఎప్పటికైనా లక్ష రూపాయలు సంపాదించాలనుకున్నా.
  
  అదేంటి.. చదువంటే అసహ్యం అన్నారు.. సీఏ చేయాలనుకోవడం ఆశ్చర్యంగా ఉందే?
  వేణుమాధవ్: టెన్త్ ఎప్పుడైతే రెండుసార్లు రాశానో అప్పుడే నాకే ఏదోలా అనిపించింది. ఇంటర్‌లోకొచ్చాక చదువంటే ఇంట్రస్ట్ ఏర్పడింది. సెకండ్ క్లాస్ తెచ్చుకున్నా. బీకామ్ వచ్చేటప్పటికి ఇంకా ఇంట్రస్ట్ ఏర్పడింది. అప్పుడే సీఏ యాంబిషన్ కలిగింది.
  
  సరే... మళ్లీ సినిమాల్లోకొద్దాం. ‘సంప్రదాయం’ విడుదలైన తర్వాత వెంటనే అవకాశాలు వచ్చాయా?
  వేణుమాధవ్: ఆ సినిమా జనవరి 14న  విడుదలయ్యింది. 10, 11న చెన్నయ్‌లో ప్రివ్యూ వేశారు. ఆ ప్రివ్యూ చూసిన కొంతమంది నిర్మాతలు అవకాశం ఇచ్చారు. మొదటి సినిమా రిలీజ్ అవకముందే పాపులర్ అయ్యాను. శ్రీకారం, మెరుపు.. ఇలా బోల్డన్ని సినిమాలకు అవకాశం వచ్చింది. ఒక్క సినిమా కూడా విడుదలవ్వక ముందే బిజీ అవడం అంటే ఎలా ఉంటుందో ఊహించుకోండి.
  
  వెంటనే పారితోషికం పెంచేశారా?
  వేణుమాధవ్: ‘శ్రీకారం’ సినిమాలో నాది హాఫ్ డే కేరక్టర్. మనిషి ఆశాజీవి. అది కూడా తెలియనితనం ఉన్న మనిషైతే మితిమీరి ప్రవర్తిసాడు. అప్పట్లో నా తెలియనితనంతో ఒక్క రోజుకి 70వేలు పారితోషికం అడిగా. నిర్మాతగారు సరే... నేను మాట్లాడతాలే అన్నారు. సినిమా పూర్తయ్యింది. ఆ తర్వాత రెండోరోజుకి అనుకుంటా.. ఆఫీసుకి వెళితే, 10వేలు చేతిలో పెట్టారు. అయినా పట్టుబట్టి నేను ఆఫీసు చుట్టూ తిరిగేవాణ్ణి. నిజం చెప్పండి.. సిగ్గుపడాల్సిన విషయం కాదా ఇది.
  
  మరి.. పాత్రకు తగ్గ పారితోషికం అడగాలని ఎప్పుడు తెలిసింది?
  వేణుమాధవ్: ‘మెరుపు’ సినిమా చేస్తున్నప్పుడు డెరైక్టర్స్, ప్రొడ్యూసర్స్ దగ్గర మిగతా ఆర్టిస్టులు ఎలా నడుచుకుంటున్నారో చూసి, మనం చేస్తున్నది కరెక్ట్ కాదని గ్రహించి, నా బాడీ లాంగ్వేజ్‌ని మార్చుకున్నాను. అంతకు ముందు వరకు నా బాడీ లాంగ్వేజ్ చాలా పొగరుగా ఉండేది. లక్కీగా అప్పుడు ఇంత మీడియా లేదు. ఉండి ఉంటే... నా తీరు స్క్రోలింగ్‌లో వచ్చి ఉండేది. బ్రహ్మానందంగారి లాంటి సీనియర్స్‌ను చూసి, ఎలా ప్రవర్తించాలో నేర్చుకున్నాను. ఎంత పారితోషికం అడగాలో తెలుసుకున్నాను.
  
  వందల నుంచి వేలకి.. అక్కణ్ణుంచి లక్షలకు మీ పారితోషికం పెరిగింది కాబట్టి ‘మనీ మేనేజ్‌మెంట్’ విషయంలో మీ అన్నయ్యల సహకారం తీసుకునేవారా?
  వేణుమాధవ్: హండ్రెడ్ పర్సంట్ తీసుకునేవాణ్ణి. నేను కూడా బాధ్యతగానే వ్యవహరించేవాణ్ణి. అందుకే హైదరాబాద్‌లో పది ఇళ్లు కొనగలిగాను. పదెకరాల ఆస్తి ఉంది. ఆర్టిస్ట్‌గా నా వైభవాన్ని చూసి మా నాన్నగారు, ఇతర కుటుంబసభ్యులు ఆనందపడ్డారు. నాన్నగారు చనిపోయి ఇప్పటికి పదకొండేళ్లవుతోంది. నేనెందుకూ పనికిరానని అనుకునేవారు కాబట్టి.. నేను మంచి స్థాయికి వచ్చినందుకు బయటికి చెప్పకపోయినా అమ్మ దగ్గర చెప్పి సంతోషపడేవారు.
  
  కమెడియన్‌గా ఓ రేంజ్‌కొచ్చిన తర్వాత ఇంకాఎత్తు ఉండి ఉంటే, అందంగా ఉండి ఉంటే ఏ హీరోనో అయ్యుండేవాణ్ణి అని ఎప్పుడైనా అనిపించిందా?
  వేణుమాధవ్: మీరడిగినది నాకు బాగా నచ్చింది. హైట్ తక్కువ ఉన్నాను కాబట్టే.. ఇంత సంపాదించగలిగాను. హైటు ఉన్న హీరోలని తీసుకుందాం. వాళ్లు కామెడీ చేస్తే చూస్తారా? హీరోగానే చేయాలి. సంవత్సరానికి మాగ్జిమమ్ మూడు, నాలుగు చిత్రాలు చేస్తారేమో. కానీ, నేను ఏడాదికి 40, 50 సినిమాలు చేసిన రోజులున్నాయి. రోజుకి లెక్కలేనన్ని లొకేషన్స్‌లో వేరే వేరే సినిమాలు చేసేవాణ్ణి. కారులోనే టిఫిను, భోజనం చేసేవాణ్ణి. ఓ పది, పదిహేనేళ్లు అలా చేశాను. కొంచెం అలసట అనిపించేది...కానీ మళ్లీ ఇలాంటిది రాదేమో అని ఎంత కష్టమైనా చేశాను.
  
  సో... పొట్టివాడు గట్టివాడు అనొచ్చన్నమాట...
  వేణుమాధవ్: అవును. ఒక విషయం చెబితే మీకు గమ్మత్తుగా ఉంటుంది. అల్లు రామలింగయ్యగారి నుంచి మొదలుపెడదాం. ఆయనకు, చిరంజీవిగారికి, రామ్‌చరణ్, చిరంజీవిగారి మేనల్లుడు సాయిధరమ్‌లకు ఫ్రెండ్‌గా చేశాను. ఇక, అక్కినేని నాగేశ్వరరావుగారికి, నాగార్జునగారికి, సుమంత్, నాగచైతన్య రాబోయే అఖిల్‌కీ నేనే ఫ్రెండ్‌ని అవుతా. తరాలు మారుతున్నా ఫ్రెండ్ మారడంలేదు. తాత, కొడుకు, మనవడికి ఫ్రెండ్‌గా చేయడం అంటే చిన్న విషయం కాదు. నా హైట్ వల్ల లాభం ఇదే. ఇంతకన్నా ఏం లాభం కావాలి?
  
  నిర్మాతగా మారి, ‘ప్రేమాభిషేకం’ తీశారు. బాగా నష్టపోయినట్లున్నారు?
  వేణుమాధవ్: అలా అనే అందరూ అనుకుంటున్నారు. ఆ సినిమాకి మహా అయితే కోటి రూపాయలు అయ్యుంటుంది. శాటిలైట్ రైట్సే 70 లక్షలు వచ్చింది. తక్కువలో తక్కువ అన్ని ఏరియాల్లో కలిపి నా సినిమా 30 లక్షలకు అమ్ముడుపోదా? నష్టం ఎందుకు వస్తుంది? ఒకవేళ కొంతమంది అనుకుంటున్నట్లు నష్టం వచ్చిందే అనుకున్నాం. నేనెక్కణ్ణుంచి వచ్చాను? ఇండస్ట్రీకి వచ్చినప్పుడు నేనేం తీసుకొచ్చాను? మా ఊళ్లో ఉన్న ఎకరాలు ఎకరాలు అమ్మి ఇక్కడకు రాలేదు కదా. నా గురించి కొంతమంది ఎక్కువ ఆలోచించి, ఏదేదో అనుకుంటారు. ఎవరి గురించి వాళ్లు ఆలోచించుకుంటే బెటర్.
  
  మరి.. ఆ తర్వాత హీరోగా, నిర్మాతగా ఎందుకు సినిమా చెయ్యలేదు?
  వేణుమాధవ్: మళ్లీ బ్రహ్మాండమైన కథ దొరికితే తప్పకుండా చేస్తా. అశ్లీలత లేకుండా నీట్‌గా ఉన్న స్టోరీ అయితే చేయడానికి రెడీ.
  
  హడావిడిగా కారులోనే భోంచేసి, రకరకాల లొకేషన్స్ తిరిగి షూటింగ్‌లు చేసిన మీకు ఇప్పుడు మూడు, నాలుగు సినిమాలు మినహా లేకపోవడానికి కారణం ఏంటి?
  వేణుమాధవ్: కారణం ఏం లేదు. ప్రస్తుతం రాష్ర్టంలో జరుగుతున్న తెలంగాణ, సీమాంధ్ర ఉద్యమాలే.
  
  కానీ, మీ ఓవర్‌యాక్షన్ వల్లే సినిమాలు తగ్గాయనే టాక్ ఉంది...?
  వేణుమాధవ్: ఎప్పుడైతే ఎదుటివాడు ఎక్కువ సినిమాలు చేసి, ఎక్కువ సంపాదిస్తున్నాడో అప్పుడు కొంతమంది దృష్టి వాడి మీద ఉంటుంది. నాకు తీరిగ్గా తినడానికి ఖాళీ లేక కార్లో భోంచేస్తూ వెళుతున్న సమయంలో, ఎవరైనా పలకరించారనుకోండి.. నేను మామూలుగా స్పందించి ఉండొచ్చు. అలాగే, కంటినిండా నిద్రపోయే టైమ్ దొరక్కపోవడంతో కారులోనే కునికి పాట్లు పడేవాణ్ణి. అప్పుడు ఎవరైనా పలకరిస్తే.. మామూలుగా మాట్లాడి ఉండొచ్చు. అది బలుపు అనుకుంటే నేనేం చేయగలను? అనుకున్నారు కదా అని నేను వాళ్లని ఏమీ అనడంలేదు. నేనేంటో నాకు తెలుసు.
  
  ‘నీ గురించి ఇలా అనుకుంటున్నారు. జాగ్రత్తగా ఉండు’ అని చెప్పేంత స్నేహితులెవరూ మీకు ఇండస్ట్రీలో లేరా?
  వేణుమాధవ్: హలో అంటే హలో అనే స్థాయి ఫ్రెండ్స్ ఉన్నారు. నా దుకాణం నాది. పొద్దున్నే వెళ్లడం, షాప్ ఓపెన్ చేసి, బిజినెస్ చేసుకోవడం. అయిపోగానే దుకాణాన్ని కట్టేయడం అంతే! నాకున్నది ముగ్గురే స్నేహితులు. మా ఆవిడ, నా ఇద్దరు కొడుకులు. పెద్ద కొడుక్కి మా నాన్న పేరే పెట్టాలనుకుని, ‘ప్రభాకర్’ అని పెట్టా. మా అమ్మ పేరు సావిత్రి. అందుకని, రెండోవాడికి ‘సావికర్’ అని పెట్టాను.
  
  మీ భార్య పట్ల అమానుషంగా ప్రవరిస్తారని, ‘శాడిస్ట్’ అనే టాక్ ప్రచారంలో ఉంది...?
  వేణుమాధవ్: మీ ఎదురుగానే మా ఆవిడ ఉంది కదా.. తననే అడగండి.
  
  మీకు ఇద్దరు భార్యలనే టాక్ ఉంది..?
  వేణుమాధవ్: ఇద్దరుంటే ఇద్దరూ కనిపించేవారు కదా. నాకున్నది ఒక్క భార్యే.
  
  మీ పెళ్లయ్యి ఎన్నేళ్లయ్యింది.. లవ్వా.. ఎరేంజ్డ్ మ్యారేజా?
  వేణుమాధవ్: పన్నెండేళ్లు. మా మేనత్త కూతుర్ని పెళ్లి చేసుకున్నా. ఎరేంజ్డ్ మ్యారేజే.
  
  పెళ్లయిన తర్వాత కట్నం కోసం వేధించారని టాక్?
  వేణుమాధవ్: అవన్నీ నిజమైన మాటలు కావండీ. ఎదుగుతున్నవాడి మీద బురద జల్లడం అన్నమాట. అలాంటివి ఏవైనా జరిగి ఉంటే.. ఇక్కడ ఉండేవాణ్ణి కాదు కదా.. లోపల ఉండేవాణ్ణి.
  
  మీకు సినిమాలు తగ్గడానికి కారణం రాష్ర్టంలో జరుగుతున్న ఉద్యమాలని చెప్పారు. అది నిజమైన కారణమేనా?
  వేణుమాధవ్: నిజమైనదే. ‘ఆటోనగర్ సూర్య’ చేశాను. అది విడుదల కావాల్సి ఉంది. వెంకటేష్, రామ్ కాంబినేషన్‌లో చేసిన ‘మసాలా’ విడుదల కావాల్సి ఉంది. ప్రస్తుతం ‘రుద్రమదేవి’ చేస్తున్నాను. ఇంకొన్ని ఉన్నాయి.
  
  మీరు షూటింగ్స్‌కి సరిగ్గా రారనే విమర్శ ఉండటంవల్ల సినిమాలు తగ్గాయని కొంతమంది అంటుంటారు..?
  వేణుమాధవ్: నేను ఉంటున్నది మౌలాలీలో. ఇక్కణ్ణుంచి ఫిల్మ్‌నగర్‌కి రావడానికి కొంత సమయం పడుతుంది. ఒక్కోసారి ట్రాఫిక్‌లో ఇరుక్కున్నప్పుడు పావుగంట, అర్ధగంట లేట్ అయ్యుండొచ్చు. అంతే.. అయినా నా వల్ల ఇబ్బంది కలిగిందని ఒక్క నిర్మాతని అయినా చెప్పమనండి.
  
  మీరు అంతులేని వ్యాధితో బాధపడుతున్నారని.. అందుకే సినిమాలు తగ్గాయన్నది కూడా కొంతమంది ఊహ...
  వేణుమాధవ్: అది పచ్చి అబద్ధం. మీరు ఏ డాక్టర్‌ని అయినా తీసుకొచ్చి, పరిక్షలు చేయించవచ్చు. నేను రెడీగా ఉన్నాను.
  
  మరి.. ఎందుకు వీక్ అయ్యారు?
  వేణుమాధవ్: డైటింగ్ చేయడంతో బరువు తగ్గాను. హీరోలు తగ్గితే సిక్స్‌ప్యాక్ అంటారు. నేను తగ్గితే అంతులేని వ్యాధా? ప్రపంచంలో లేని జబ్బులు కూడా అంటగడతారు. ఇదెక్కడి న్యాయం?
  
  డైటింగ్ ఎందుకు చేయాల్సి వచ్చింది?
  వేణుమాధవ్: చిరంజీవిగారు, పవన్‌కళ్యాణ్‌గారు, నాగబాబుగారితో చేస్తున్నప్పుడు ఒకేలా ఉన్నాను. కానీ, రామ్‌చరణ్‌తో చేసేటప్పుడూ ఒకేలా ఉంటే ఏం బాగుంటుంది? నాగేశ్వరరావుగారు, నాగార్జునగారి పక్కన ఒకేలా కనిపిస్తే ఓకే. కానీ, నాగచైతన్యకీ ఫ్రెండ్ అంటే నమ్మేలా ఉండాలి కదా. తరాలు మారినా ఫ్రెండ్ కేరక్టర్స్ చేయాలంటే మౌల్డ్ అవ్వక తప్పదు. అందుకే ఈ డైటింగ్. ఆరోగ్యం గురించి ఎక్కువ జాగ్రత్త తీసుకోవడంవల్ల ఇదిగో ఇలా బక్కగా అయ్యాను.
  
  సేవా కార్యక్రమాలు కూడా బాగా చేస్తారట?
  వేణుమాధవ్: మా ఇంట్లో ఎవరి బర్త్‌డేకి కేక్స్ కట్ చేసుకునే అలవాటు లేదు. అనాథశరణాలయాల్లో, వృద్ధాశ్రమాల్లో చేసుకుంటాం. ఎవరైనా ఆపదలో ఉంటే ఆర్థిక సహాయం చేస్తుంటాను. కరీంనగర్ జిల్లా జమ్మికుంటలో నాన్నగారి సంస్మరణార్ధం అమ్మ పేరు పెట్టి కళ్యాణ మండపం, కళా వేదిక కట్టించాను. గాంధీగారి విగ్రహాలు పెట్టించాను. వేణుమాధవ్ చారిటబుల్ ట్రస్ట్, వేణుమాధవ్ ఫ్రెండ్స్ సర్కిల్ పేర్లతో సేవాకార్యక్రమాలు చేస్తుంటాం.
  
  ప్రస్తుతం మీ ఆశయం ఏంటి?
  వేణుమాధవ్: సినిమాలపరంగా ఏ ఆశయం లేదు. వ్యక్తిగతంగా మాత్రం వీలైనంతవరకు చాలా మందికి సహాయపడాలన్నదే నా ఆశయం. నేను లక్ష అడిగితే ఆ భగవంతుడు ఎన్నో లక్షలిచ్చాడు. ఇక ఇంతకు మించి ఏదైనా ఆశిస్తే.. ఆ భగవంతుడు కూడా క్షమించడు. ఇంకా కోరికలు కోరి, ఆ భగవంతుడి ఆగ్రహానికి గురి కాదల్చుకోలేదు. ఆయనకు ప్రియభక్తుడిగానే ఉండిపోతా. నేను తినడానికి నాకు దేవుడు ఎంతో ఇచ్చాడు. నాతో పాటు నలుగురికీ పెట్టగలిగే శక్తి ఇచ్చాడు. జీవితానికి ఇంతకు మించి ఇంకేం కావాలి?
  
  - డి.జి. భవాని
  
  సంవత్సరానికి 40, 50 సినిమాలు చేసి, బంజారా హిల్స్, జూబ్లి హిల్స్‌లాంటి రిచ్ ఏరియాల్లో ఉండే స్థాయికి చేరుకున్నారు. కానీ, సిటీగా దూరంగా ఉండే మౌలాలిలో ఉండటానికి కారణం ఏంటి?
  వేణుమాధవ్: నాకున్న పది ఇళ్లూ మౌలాలీ హౌసింగ్‌బోర్డ్‌లోనే ఉన్నాయి. మా  అన్నయ్యలు, అక్క, చెల్లి, నేను... అంతా ఇదే ఏరియాలో ఉంటాం. ఇంకా మా బంధువులు చాలామంది ఉన్నారు. ప్రతిరోజూ మా ఇళ్లల్లోని ఆడవాళ్లు ఫోన్లు చేసుకుని, ‘ఏం కూర చేస్తున్నావ్.. నేను ఫలానాది వండుతున్నా. నువ్వు వేరే చెయ్యి’ అని చెప్పుకుంటారు. ఎవరింట్లో అయినా మహా అయితే రెండు, మూడు కూరలు ఉంటాయేమో.. కానీ మా ఇంట్లో మాత్రం రోజుకి ఎనిమిది రకాల కూరలు ఉంటాయి. నా పిల్లలు బయటికెళితే తప్పిపోతారనే భయం లేదు. ఈ ఏరియాలో ఉన్న మా బంధువులే కాదు.. వేరేవాళ్లు కూడా ‘వేణుమాధవ్ పిల్లలు’ అంటూ.. ఇంటికి తీసుకొచ్చి మరీ వదిలిపెడతారు. ఈ సెక్యూరిటీ ఎక్కడ ఉంటుంది? ఇక్కడ ఇంకో విషయం చెబుతాను. జూబిలీహిల్స్‌లో ఎవరున్నారు? చిరంజీవిగారు. ఆ ఏరియాకు ఆయన మెగాస్టార్. నేను మౌలాలీ మెగాస్టార్‌ని. నేను ఫిల్మ్‌నగర్‌లో ఉంటే.. నా ఇల్లెక్కడో ఎవరికీ తెలియకపోవచ్చు. ఒకవేళ తెలిసినా, వేణుమాధవ్ ఇల్లు అంటారు. కానీ, మౌలాలీలో ‘వేణన్నా..’ అంటూ ఆప్యాయంగా పిలవడానికి బోల్డంత మంది ఉన్నారు. ఈ ఏరియాలోకి ఎంటరవ్వగానే, వేణుమాధవ్ ఇల్లెక్కడ? అని ఎవర్ని అడిగినా.. చెప్పేస్తారు.
 
                                                                       ***************
 
  కొన్ని సందర్భాల్లో ఆడియన్స్‌ని నవ్వించడానికి కమెడియన్స్ జోకర్స్‌గా మారాల్సి ఉంటుంది. డబుల్ మీనింగ్ డైలాగులూ చెప్పాల్సి ఉంటుంది. అప్పుడెలా ఫీలయ్యారు?
  వేణుమాధవ్: దేవుడి దయ వల్ల జోకర్‌గా మారే పరిస్థితి రాలేదు. అలాగే స్త్రీలను అవమానరపరిచేలా ఉండే డైలాగులు కూడా చెప్పిన దాఖలాలు ఉండవు. చెప్పాల్సి వచ్చినప్పుడు లొకేషన్ నుంచి బయటికెళ్లిన సందర్భాలున్నాయి. అందుకని వేణుమాధవ్‌కి బలుపు అన్నవాళ్లు ఉన్నారు. నాలోనూ మంచి రచయిత ఉన్నాడు. అవసరమైతే నేనే మంచి డైలాగులు రాసిస్తానని కూడా కొంతమందితో చెప్పా. వాళ్లిచ్చిన డబుల్ మీనింగ్ డైలాగ్ చెప్పడానికి నిరాకరించా. ఒకవేళ నన్ను ఒత్తిడి చేస్తే, ‘ఇది మీ ఫ్యామిలీకి చూపించండి. మీ ఇంట్లో ఆడవాళ్లు ఒప్పుకుంటే చేస్తా’ అని చెబుతుంటా. ఒక్క డైలాగే కదా అని చెప్పేయొచ్చు. కానీ, ఆ తర్వాత టీవీలో ఆ సినిమా వచ్చినప్పుడల్లా మా అమ్మ, నా అక్కచెల్లెళ్లు, నా భార్య, వదినలు.. అందరూ చూస్తారు. ఇబ్బందిపడతారు. అందుకని లేడీస్‌ని అవమానపరిచే సీన్స్ చెయ్యనని చెప్పేస్తాను.
  
  పెద్ద హీరోల సినిమాల విషయంలోనూ అలా చేసిన సందర్భాలున్నాయా?
  వేణుమాధవ్: కొన్ని ఉన్నాయి.
 
  అలా చేస్తే అవకాశాలు కోల్పోతానని అనుకోలేదా?
  వేణుమాధవ్: పోతే పోనివ్వండి. పెద్ద హీరో ఏడాదికి ఎన్ని సినిమాలు చేస్తాడు? మహా అయితే నాలుగైదు. అవి పోయినంత మాత్రాన నాకేం ఇబ్బంది లేదు. ఆ రెండు సినిమాలకు కేటాయించే సమయాన్ని నా ఫ్యామిలీకి కేటాయిస్తాను.
  
  మీ పిల్లలను సినిమాల్లోకి తీసుకొచ్చే ఆలోచన ఉందా?
  వేణుమాధవ్: అస్సలు లేదు! నేను పడ్డ కష్టాలు మా పిల్లలు పడకూడదని. షూటింగ్స్‌తో బిజీగా ఉండటంవల్ల ప్రతి రోజూ రాత్రి ఒంటి గంటకు ఇంటికి రావడం, ఉదయం షూటింగ్‌కి వెళ్లడం.. దాదాపు నా జీవితం ఇలానే సాగింది. నా పిల్లలు అలా కాకుండా టెన్ టూ ఫైవ్ జాబ్ చేసుకుని, హాయిగా ఉండాలనుకుంటున్నాను. ఎందుకంటే, నేను లేట్‌గా ఇంటికి రావడం, ఉదయమే వెళ్లిపోవడం చూసి, నాన్నగారు చాలా బాధపడేవారు.
 
                                                                          ****************
 
  నటుడిగా అవకాశం ఇచ్చింది కృష్ణారెడ్డిగారు, అచ్చిరెడ్డిగారు. ‘హంగామా’ ద్వారా హీరోని చేసిందీ ఆ ఇద్దరే! అందుకే నా ఇంటికి ‘అచ్చి వచ్చిన కృష్ణ నిలయం’ అని పేరు పెట్టుకున్నాను. నా పదిళ్లకూ అదే పేరు. మౌలాలీలో ఈ పేరుతో ఉన్న ఇల్లు ఎవరిది? అని ఎవర్ని అడిగినా, ‘వేణుమాధవ్’ది అని చెబుతారు.  వాళ్లు ఇంకా నాకెలాంటి రోల్స్ ఇస్తానన్నా నేను రెడీ. ఒకవేళ ఇప్పటికప్పుడు పిలిచి ‘సినిమాలు మానేయ్’ అన్నా, ఒక్క క్షణం కూడా ఆలోచించకుండా మానేస్తా! వాళ్లంటే నాకంత అభిమానం, గురి!
  


  సందర్భం  వేణుమాధవ్ బర్త్‌డే
  ‘నల్లబాలు.. నల్లతాచు లెక్క.. నాకి చంపేస్తా...’ అంటూ తన పర్సనాలిటీతో వేణుమాధవ్ తెరపై రెచ్చిపోతుంటే నవ్వు ఆపుకోవడం ఎవరి తరం? అదిరిస్తాడు, బెదిరిస్తాడు, హడలెతిస్తాడు.. చివరకు హడలెత్తిపోతాడు.. ఈ పరిణామ క్రమంలో వేణుమాధవ్ విన్యాసాలకు ఎవరికైనా పొట్టచెక్కలు కావాల్సిందే. నేడు వేణు మాధవ్ పుట్టినరోజు సందర్భంగా ‘సాక్షి’ జరిపిన భేటీ.
  
  ఈ బర్త్‌డే ఎలా సెలబ్రేట్ చేసుకుంటున్నారు?
  పుట్టినరోజు నాడు కేక్ కట్ చేయడం ఇప్పుడు సంప్రదాయంగా మారింది. నేను మాత్రం ఆ విధానానికి విరుద్ధం. పరిశ్రమకొచ్చినప్పట్నుంచీ నా పుట్టిన రోజును అనాథ శరణాలయంలోనే జరుపుకుంటున్నాను. వారికి ఉపయోగపడే ఏదో ఒక పని చేయడం నాకు చెప్పలేని తృప్తినిస్తుంది. నాది నల్గొండ జిల్లా కోదాడ. అక్కడి నా మిత్రులు కూడా ఈ రోజు హాస్పిటల్‌లో పళ్లు పంపిణీ చేస్తారు. అయితే... ఒక్కసారి మాత్రం నేనూ కూడా కేక్ కట్ చేశాను. దానికి కారణం చిరంజీవిగారు. ‘జై చిరంజీవ’ షూటింగ్ టైమ్‌లో నా పుట్టిన రోజు వచ్చింది. ఆ విషయం తెలుసుకున్న చిరంజీవిగారు స్వయంగా కేక్ తెప్పించి మరీ నాతో కట్ చేయించారు. ఈ ఏడాది నా పుట్టిన రోజు నవరాత్రుల్లో, తెలంగాణ సంస్కృతికి ప్రతీక అయిన బతుకమ్మ పండుగ మధ్య రావడం ఆనందంగా ఉంది. నన్ను అభిమానించే ఎవరైనా ఈ రోజు నాకోసం ఒక్క మొక్క నాటినా ఆనందిస్తా.
  
  అంతకు ముందు విరివిగా సినిమాలు చేసేవారు. ఇప్పుడు వేగం తగ్గించేశారేం?
  కారణం ఒకటి కాదండీ.. చాలా ఉన్నాయి. కొన్నాళ్ల నుంచి నా మైండ్‌సెట్‌లో తెలీని మార్పు వచ్చింది. హాస్యంలో అసభ్యతను తట్టుకోలేకపోతున్నాను. పాత్ర డిమాండ్ మేరకు కొన్ని చేయక తప్పదు. అందుకని విలువలకు తిలోదకాలిచ్చేస్తే ఎలా? బ్రహ్మానందంగారి హాస్యం చూడండి... ఇప్పటికీ అసభ్యత కనిపించదు. కానీ.. కొందరి హాస్యం చూస్తుంటే బాధ అనిపిస్తోంది. చివరకు టీవీ షోలు కూడా రోత పుట్టిస్తున్నాయి. ‘ఇలాంటి పరిస్థితుల్లో సినిమాలు చేయాలా?’ అనిపించింది. అలాగే ఆంధ్ర, తెలంగాణ గొడవల ప్రభావం కూడా మా నటులపై పడింది. రాష్ట్రం కలిసున్నప్పుడు రియల్ ఎస్టేట్ బావుండేది. దాంతో నిర్మాతలు విరివిగా వచ్చేవారు. మా లాంటి ఆర్టిస్టులకు అవకాశాలుండేవి. కానీ... ఇప్పుడు రియల్ బూమ్ లేదు. నిర్మాతల సంఖ్య కూడా తగ్గింది. అందుకే ఇదివరకు చేసినన్ని సినిమాలు చేయలేకపోతున్నా. అయితే... ఇప్పటికీ ఖాళీగా మాత్రం లేను. డా.రాజేంద్రప్రసాద్‌గారి ‘టామీ’, వైవీఎస్ చౌదరి ‘రేయ్’, గుణశేఖర్ ‘రుద్రమదేవి’, రవితేజ ‘కిక్-2’... ఇలా సినిమాలు చేస్తూనే ఉన్నాను.
  
  ఇంతకీ మీ ఆరోగ్యం ఎలా ఉంది.. చెప్పండి?
  బ్రహ్మాండంగా ఉంది. ఇప్పుడొచ్చిన యంగ్ హీరోలకు కూడా ఫ్రెండ్‌గా వేయడానికి రెడీ. అందుకే కాస్త బరువు కూడా తగ్గుతున్నా.
  
  తెలంగాణ నుంచి వచ్చిన కమెడియన్‌గా స్టార్ స్టేటస్ ఎంజాయ్ చేసిన ప్రథములు మీరు. అందుకు తగ్గ గౌరవం మీకు ఇక్కడ లభిస్తుందంటారా?
  కచ్చితంగా. నా ప్రజలు నాకు సరైన గౌరవాన్నే ఇస్తున్నారు. చూడగానే నవ్వడమే ఒక హాస్యనటునికిచ్చే పెద్ద గౌరవం. తెలంగాణలో పుట్టినందుకు ప్రౌడ్‌గా ఫీలవుతాన్నేను. అయితే... కళాకారునిగా నాకు ప్రాంతీయ భేదాల్లేవు. నేను చేసిన ఓ మిమిక్రీ కార్యక్రమం చూసి ఎస్వీకృష్ణారెడ్డి, అచ్చిరెడ్డి ‘సంప్రదాయం’(1996)తో నన్ను నటునిగా పరిచయం చేశారు. వారు తెలంగాణవాళ్లు కాదు. తన దర్శకత్వంలో రూపొందిన ప్రతి సినిమాలోనూ నాకో మంచి పాత్ర ఇచ్చి పోత్సహించిన వినాయక్, నాకెంతో పేరు తెచ్చిన సై, ఛత్రపతి చిత్రాల దర్శకుడు రాజమౌళి తెలంగాణవాళ్లు కాదు. నా అభ్యున్నతిలో ప్రతి ఒక్కరికీ భాగం ఉంది.
  
  ‘సంప్రదాయం’ అంటే గుర్తొచ్చింది. మీ మిమిక్రీ చూసి ఎస్వీ కృష్ణారెడ్డి మీకు అవకాశం ఇచ్చారన్నారు కదా! మరి ఆ సినిమాలో మీకు డబ్బింగ్ చెప్పించారేంటి?
  దానికొక తమాషా కారణం ఉంది. ఆ రోజు డబ్బింగ్ చెప్పడానికి రమ్మన్నారు. వెళ్లాను. తెరపై నన్ను నేను చూసుకోగానే... నాకు ఆనందం పగ్గాలు తెంచేసుకుంది. ‘అయ్... నేనా... తెరపై కనిపిస్తున్నానా’ అని డబ్బింగ్ మీద ధ్యాస పెట్టకుండా తెరపై నన్నే చూసుకుంటున్నాను. ఈ కారణం వల్ల లిప్ సింక్ అవ్వడం లేదు. దాంతో ఎడిటర్‌గారికి, కృష్ణారెడ్డిగారికి విసుగొచ్చేసి, నాకు వేరే వాళ్లతో డబ్బింగ్ చెప్పించారు. అప్పుడు నాకేం బాధ అనిపించలేదు. ఎందుకంటే... సినిమాలో నటించడం తప్ప నాకు వేరే టార్గెట్ లేదు. నటించేశాను. ఎస్వీ కృష్ణారెడ్డి గారే... ‘హంగామా’తో నన్ను హీరోను చేశారు. ఆ తర్వాత ‘భూకైలాస్’, ‘ప్రేమాభిషేకం’ చిత్రాల్లో కూడా హీరోగా నటించాను. ‘ప్రేమాభిషేకం’ చిత్రానికి నిర్మాతను కూడా నేనే.
  
  బ్రహ్మానందం తర్వాత అలీ, మీరూ స్టార్ కమెడియన్లుగా చక్రం తిప్పారు కదా. ఉన్నట్లుండి వెనుక పడటానికి కారణం?
  తెలుగు సినిమా చాలా గొప్పది. ఇక్కడ ఉన్నంతమంది కమెడియన్లు ఏ భాషలోనూ కనిపించరు. ఇంకో యాభై మంది కమెడియన్లకు ఇక్కడ స్థానం ఉంది. రాజకీయాలకు మా హాస్యనటులు అందరం దూరమే. ఒకరికొకరం ఇచ్చిపుచ్చుకునే ధోరణిలోనే ఉంటాం. పోటీగా ఫీలవ్వడం మాకు ఎప్పుడూ లేదు.
  
  నటునిగా లక్ష్యాలు ఏమైనా ఉన్నాయా?
  లక్ష రూపాయలు సంపాదించడమనేది ఒకప్పుడు నా లక్ష్యం. లక్షలు సంపాదించాను. ఎన్టీఆర్, ఏఎన్నార్, కృష్ణ, డి.రామానాయుడు, చిరంజీవి... ఇలా లెజెండ్రీ కుటుంబాల హీరోలందరితో కలిసి పనిచేశాను, చేస్తున్నాను. పరిశ్రమలో నాకున్న గౌరవాన్ని నిలబెట్టుకోవడమే నా ముందున్న లక్ష్యం. అందుకే... ఇక నుంచి అసభ్యతతో కూడుకున్న పాత్రల్ని చేయను. నా భార్య, పిల్లలతో కలిసి చూసేంత స్వచ్ఛమైన సినిమాలే చేస్తా.
  - బుర్రా నరసింహ
  

వెండితెర మీద నవ్వులు తరిగిపోతున్నాయి. ఇప్పటికే ఎమ్మెస్‌ నారాయణ, ధర్మవరపు సుబ్రహ్మణ్యం, ఏవీఎస్‌, గుండూ హనుమంతరావు లాంటి టాప్‌ కమెడియన్లను తెలుగు సినిమా కోల్పోగా..  తాజాగా మరో స్టార్‌ కమెడియన్‌ వేణుమాధవ్‌ కన్నుమూశారు. 400లకు పైగా సినిమాల్లో నవ్వులు పంచిన వేణు మాధవ్‌ కాలేయ సంబందిత సమస్యతో మరణించారు. ఆయనకు భార్య శ్రీవాణి, ఇద్దరు కుమారులు ఉన్నారు. మిమిక్రీ ఆర్టిస్ట్‌గా స్టేజ్‌ షోలు చేసిన వేణుమాధవ్ తరువాత బుల్లితెర మీద తరువాత వెండితెర మీద తనదైన ముద్రవేశారు. 1996లో రిలీజ్‌ అయిన సాంప్రదాయం సినిమాతో వెండితెరకు పరిచయం అయిన ఈ కామెడీ స్టార్‌ దాదాపు దశాబ్ద కాలంపాటు వెండితెరను ఏలాడు. ఒక దశలో తెలుగులో రిలీజ్‌ అయిన ప్రతీ సినిమాలో వేణుమాధవ్‌ కనిపించారంటే అతిషయోక్తి కాదు. అంతేకాదు ఒక్క 2005లో వేణు మాధవ్‌ నటించిన 60 సినిమాలు విడుదలయ్యాయంటే ఆయన ఎంత బిజీ నటుడో అర్ధం చేసుకోవచ్చు. ఫ్యామిలీతో వేణుమాధవ్‌  కెరీర్‌ తొలినాళ్లో సపోర్టింగ్ రోల్స్‌లో కనిపించిన వేణుమాధవ్‌, తొలి ప్రేమ సినిమాతో బ్రేక్‌ వచ్చింది. ఆ సినిమాలో ప్రేమికుల గురించి వేణు మాధవ్ చెప్పిన డైలాగ్‌ సెన్సేషన్‌ సృష్టించింది. తరువాత దిల్‌, ఆది, ఛత్రపతి, సై లాంటి సినిమాల్లో ఆయన నటనకు ప్రశంసలు దక్కాయి. వెంకటేష్‌ హీరోగా తెరకెక్కిన ‘లక్ష్మీ’ సినిమాలో చేసిన సత్తన్న పాత్రకు నంది అవార్డు సైతం వరించింది. సొంతం, నువ్వే నువ్వే, నాగ, సాంబ, ఆర్య, గుడుంబా శంకర్, శంకర్‌ దాదా ఎంబీబీయస్‌, మాస్‌, బన్నీ, అతనొక్కడే, సూపర్‌, జై చిరంజీవ, రణం, పోకిరి, కిక్‌, దేశ ముదురు, నేనింతే లాంటి సినిమాల్లో ఆయన చేసిన పాత్రల్లో ప్రేక్షకులకు ఎప్పటికీ గుర్తుండి పోతాయి. కమెడియన్‌గా మంచి ఫాంలో ఉండగానే హీరోనూ అదృష్టాన్ని పరీక్షించుకున్నారు వేణుమాధవ్‌. తనను వెండితెరకు పరిచయం చేసిన ఎస్వీ కృష్ణారెడ్డి దర్శకత్వంలోనే హంగామా సినిమాతో అలీతో కలిసి హీరోగా పరిచయం అయ్యారు. తరువాత భూకైలాష్‌, ప్రేమాభిషేకం సినిమాల్లో హీరోగా నటించారు. అంతేకాదు ప్రేమాభిషేకం సినిమాను తానే స్వయంగా నిర్మించారు. చివరగా రుద్రమదేవి సినిమాలో నటించిన వేణు మాధవ్‌ చాలా కాలంగా సినిమాలకు దూరంగా ఉంటున్నారు. అదే సమయంలో ఆయన ఆరోగ్యంపై రకరకాల వందుతులు వినిపించాయి. పలుమార్లు వేణుమాధవ్ స్వయంగా ఈ వార్తలు ఖండించారు. అయితే బుధవారం అనారోగ్య కారణాలతో ఆయన మృతి చెందినట్టుగా కుటుంబ సభ్యులు తెలిపారు. ఆయన మృతికి సినీ ప్రముఖులు సంతాపం తెలియ జేస్తున్నారు. చదవండి: హాస్య నటుడు వేణు మాధవ్‌ కన్నుమూత ‘నల్లబాలు.. నల్లతాచు లెక్క.. నాకి చంపేస్తా...’ నేను మౌలాలి మెగాస్టార్‌ని!

సాక్షి, హైదరాబాద్‌ : టాలీవుడ్‌లో విషాదం చోటుచేసుకుంది. ప్రముఖ హాస్యనటుడు వేణు మాధవ్‌ కన్నుమూశారు. సికింద్రాబాద్‌ యశోదా ఆస్పత్రిలో చికిత్స పొందుతున్న ఆయన బుధవారం మధ్యాహ్నం మృతి చెందారు. తెలుగు చిత్రసీమలో కమెడియన్‌గా తనదైన ముద్రను వేసుకున్న వేణు మాధవ్‌ గత కొంతకాలంగా కాలేయ సంబంధ వ్యాధితో బాధపడుతున్నారు. ఈ నెల 7వ తేదీన ఆయనను చికిత్స నిమిత్తం కుటుంబసభ్యులు యశోదా ఆస్పత్రిలో చేర్చారు.  అయితే వేణు మాధవ్‌ చనిపోయారంటూ సోషల్‌ మీడియాలో నిన్నటి నుంచే వార్తలు హల్‌చల్‌ చేశాయి. అయితే వాటిని కుటుంబసభ్యులు ఖండించారు. ఈ నేపథ్యంలో ఇవాళ మధ‍్యాహ్నం ఆయన మరణించినట్లు కుటుంబ సభ్యులు, ఆస్పత్రి వైద్యులు అధికారికంగా నిర్థారించారు. వేణు మాధవ్‌కు భార్య, ఇద్దరు పిల్లలు. కాగా కొద్ది నెలల క్రితం వేణు మాధవ్‌ సోదరుడు విక్రమ్‌ బాబు గుండెపోటుతో మృతి చెందారు. ఫ్యామిలీతో వేణుమాధవ్‌  వేణుమాధవ్‌ స్వస్థలం నల్గొండ జిల్లా కోదాడ. 1997 సంవత్సరంలో సంప్రదాయం చిత్రం ద్వారా వెండితెరకు పరిచయం అయిన ఆయనకు ‘తొలిప్రేమ’ చిత్రంతో గుర్తింపు వచ్చింది. ఆ తర్వాత పలు చిత్రాల్లో నటించి ప్రేక్షకులను మెప్పించారు. ‘లక్ష్మి’ చిత్రంలో నటించిన పాత్రకు వేణు మాధవ్‌కు నంది అవార్డు వరించింది. వేణు మాధవ్‌ మృతిపట్ల టాలీవుడ్‌ ప్రముఖులు సంతాపం తెలిపారు. 

రాంగోపాల్‌పేట: ప్రముఖ హాస్య నటుడు వేణుమాధవ్‌ తీవ్ర అనారోగ్యంతో బాధపడుతూ సికింద్రాబాద్‌ యశోద ఆస్పత్రిలో చికిత్స పొందుతున్నారు. మూత్ర పిండాల వ్యాధితో బాధపడుతున్న ఆయన ఈ నెల 6న సికింద్రాబాద్‌ యశోద ఆస్పత్రిలో చేరారు. గత కొద్ది రోజుల నుంచి ఆయనకు డయాలసిస్‌ నడుస్తోంది. మంగళవారం ఆరోగ్యం విషమించడంతో ఆయనకు ఐసీయూలో వెంటిలేటర్‌పై ఉంచి చికిత్స అందిస్తున్నారు. ఈ విషయం తెలుసుకున్న సినీ నటులు జీవిత, రాజశేఖర్, ఉత్తేజ్‌లు ఆస్పత్రికి వచ్చి ఆయనను పరామర్శించి వెళ్లారు.

సాక్షి, హైదరాబాద్‌: ప్రముఖ హాస్య నటుడు వేణు మాధవ్ తీవ్ర అనారోగ్యంతో బాధపడుతున్నారు. తెలుగు చిత్రసీమలో కమెడియన్‌గా తనదైన ముద్రను వేసుకున్న వేణు మాధవ్‌ గత కొంతకాలంగా కాలేయ సంబంధ వ్యాధితో బాధపడుతున్నారు. ఇటీవల సమస్య తీవ్రం కావడంతో సికింద్రాబాద్‌లోని యశోద ఆస్పత్రిలో చేరారు. కిడ్నీ సమస్యలు కూడా తలెత్తడంతో ఆయన ఆరోగ్య పరిస్థితి విషమంగా ఉందని, వెంటిలేటర్ సాయంతో చికిత్స అందిస్తున్నామని హాస్పిటల్‌ వైద్యులు తెలిపారు. హాస్యపాత్రలతో తెలుగు సినిమా రంగంలో తనదైన ముద్ర వేసిన వేణు మాధవ్‌ అనారోగ్యంపై చాలా కాలంగా వార్తలు వస్తున్నాయి. అయితే తనకు ఎటువంటి అనారోగ్యం లేదని గతంలో ఆయన వివరణయిచ్చారు. రాజకీయాల్లో రాణించేందుకు ఆయన చేసిన ప్రయత్నాలు ఫలించలేదు. తెలంగాణ శాసనసభ ఎన్నికల్లో సూర్యాపేట జిల్లా కోదాడ నియోజకవర్గం నుంచి పోటీ చేసేందుకు అప్పట్లో నామినేషన్‌ కూడా వేశారు.

సాక్షి, కోదాడ : సూర్యాపేట జిల్లాలోని కోదాడ అసెంబ్లీ స్థానానికి ఇండిపెండెంట్‌గా కమెడియన్‌ వేణుమాధవ్‌ సోమవారం నామినేషన్‌ దాఖలు చేశారు. మూడు రోజుల క్రితం నామినేషన్‌ వేయడానికి రిటర్నింగ్‌ అధికారి కార్యాలయానికి రాగా...ఆయన నామినేషన్‌ను తిరస్కరించారు. అవసరమైన అన్ని రకాల పత్రాలు లేకపోవడంతో అధికారులు నామినేషన్‌ తీసుకోలేమని చెప్పారు. దీంతో సోమవారం ఆయన మరో మారు కోదాడ రిటర్నింగ్‌ అధికారి కార్యాలయానికి వచ్చి నామినేషన్‌ దాఖలు చేశారు. స్థానిక తహసీల్దారు కార్యాలయంలో ఆయన నామినేషన్‌ పత్రాలను సమర్పించారు. కోదాడ తన స్వస్థలం కావడంతో ఎమ్మెల్యే అభ్యర్థిగా ఇక్కడ నుంచే పోటీ చేయాలని వేణుమాధవ్‌ భావించారు. నామినేషన్లకు సోమవారం చివరి రోజు కావడంతో తన అనుచరులతో కలిసి రిటర్నింగ్‌ అధికారికి నామినేషన్‌  పత్రాలను సమర్పించారు.

కోదాడ: సూర్యాపేట జిల్లా కోదాడకు చెందిన హాస్యనటుడు వేణుమాధవ్‌ శుక్రవారం ఇక్కడ కాసేపు హల్‌చల్‌ చేశారు. కోదాడ అసెంబ్లీ స్థానానికి ఇండిపెండెంట్‌గా నామినేషన్‌ దాఖలు చేయడానికి ఆయన కోదాడ రిటర్నింగ్‌ అధికారి కార్యాలయానికి వచ్చారు. నామినేషన్‌ పత్రాలను అధికారులకు సమర్పించారు. అయితే అవసరమైన అన్ని రకాల పత్రాలు లేకపోవడంతో అధికారులు నామినేషన్‌ తీసుకోలేమని చెప్పారు. దాంతో అన్ని రకాల పత్రాలను తీసుకొని మారోసారి వస్తానని ఆయన వెళ్లిపోయారు. ఈ సందర్భంగా వేణుమాధవ్‌ విలేకరులతో మాట్లాడుతూ కోదాడ ప్రాంత వాసులకు సేవ చేయడానికి రాజకీయాల్లోకి వస్తున్నానని తెలిపారు. సోమవారం 19వ తేదీన మళ్లీ వస్తానని, అప్పుడు అన్ని వివరాలు చెబుతానని అన్నారు.

సాక్షి, కోదాడ అర్బన్‌: సినీ హాస్య నటుడు వేణుమాధవ్‌ కోదాడ నియోజకవర్గం నుంచి స్వతంత్ర అభ్యర్థిగా గురువారం నామినేషన్‌ వేయనున్నట్లు తెలిపారు. బుధవారం ఆయన విలేకరులకు ఫోన్‌ద్వారా సమాచారం ఇచ్చారు. కాగా వేణుమాధవ్‌ స్వస్థలం కోదాడ పట్టణం. ఇక్కడే విద్యాభ్యాసం పూర్తి చేసి, మిమిక్రి ఆర్టిస్ట్‌గా జీవితాన్ని ప్రారంభించారు. అనంతరం టీడీపీ ఆవిర్భాం  తర్వాత ఆయన పార్టీ సభలో పాల్గొని తన మిమిక్రి ద్వారా ప్రచాన కార్యక్రమాన్ని చేట్టారు. తదనంతరం ఆయనకు సినిమాల్లో ఛాన్స్‌లు రావడంతో హాస్యనటుడిగా వందలాది చిత్రాల్లో నటించారు. ఆయన కుటుంబం రాజకీయ నేపథ్యం కలిగిందే. ఆయన మిత్రబృందం కూడా రాజకీయాల్లో ఉండటంతో నియోజకవర్గ ప్రజలకు తన వంతు సేవాకార్యక్రమాలను చేపట్టేందుకు క్రియాశీలక రాజకీయాల్లోకి వస్తున్నట్లు తెలిపారు. గురువారం ఉదయం 11 గంటలకు తన నామినేషన్‌ను స్వయంగా వేయనున్నట్లు తెలిపారు.

పద్మశ్రీ అవార్డు గ్రహీత డాక్టర్‌ నేరెళ్ల వేణుమాధవ్‌ (86) ఏడు దశాబ్దాల మిమిక్రీ కళను గుర్తిస్తూ, ఆయన పుట్టిన రోజును (డిసెంబర్‌ 28) పురస్కరించుకొని తెలంగాణా సర్కిల్‌ తపాలాశాఖ ప్రత్యేక తపాలా కవర్‌ని ఆవిష్కరించిన సందర్భంగా...  ఈ మనిషి ముందు అద్దం పెడితే... ఈ మనిషి కాదు!  అద్దం తికమక పడుతుంది. తను తప్ప ఎందరో కనబడతారు. సారీ... వినబడతారు.  ఈయన డూప్లికేట్లకు కింగ్‌. మిమిక్రీకి ఛత్రపతి. స్వర అనుకరణకు అంకురం. మీలో ఇన్ని ధ్వనులు ఏలా ... అని అడిగితే దేవుడి ప్రతిధ్వని అన్నారు ఈ ఒరిజినల్‌ డూప్లికేట్‌ మీరెంచుకున్న మార్గం స్వరంతో ముడిపడి ఉంది. ఈ మిమిక్రీ విద్య దైవం ఇచ్చిన శక్తిగా భావిస్తారా? మీకీ కళ ఎలా అబ్బింది? నూటికి నూరుపాళ్లు దైవం ఇచ్చినదే! మా నాన్న తహసీల్దార్‌గా పనిచేసేవారు. ఇంటికి పెద్ద కొడుకుని కావడంతో నేనూ తహసీల్దార్‌ కావాలని ఆయన కోరిక. కానీ, నాకా పని పట్ల ఎప్పుడూ ఆసక్తి లేదు. సినిమాలంటే బాగా ఇష్టపడేవాడిని. అందులోనూ చిత్తూరు నాగయ్య సినిమా అయితే ఎన్నిసార్లు చూసేవాడినో లెక్క ఉండేది కాదు. క్లాసురూమ్‌లో కూడా సినిమా యాక్టర్లను అనుకరిస్తూ తోటివారిని సంతోషపెడుతుండేవాడిని. మా ఇంట్లో అందరూ నాకేదో పిచ్చిపట్టిందనేవారు. మా నాన్న అయితే కోపంలో ‘వీడు మన కుటుంబ లెక్కలోనే లేడు’ అని వదిలేశాడు. ఇంట్లో అందరూ నాతో అలాగే ఉండేవారు. కానీ, మా కాలేజీ ప్రిన్సిపల్‌ నాలో ఉన్న కళను గుర్తించాడు. ఇది అద్భుతమైన కళ. ఇదే దారిగా ఎంచుకుని వెళ్లమని సూచించారు. అప్పటి వరకు మిమిక్రీ అనేది కళగా గుర్తింపు ఎక్కడా లేదు. అసలు ఈ కళను మిమిక్రీ అనేవారే కాదు. అనుకరణ అని మాత్రమే నేను అనుకునేవాడిని. రామాయణంలో సీత పర్ణశాలలో ఉన్నప్పుడు మారీచుడు రాముని గొంతును అనుకరించాడట. ఇదే అనుకరణ గొంతుకు మొదటి ప్రాధాన్యత. నేనీ కళలోకి ప్రవేశించేంతవరకు దీనికి అంతగా ప్రాముఖ్యం లేదు. అలాంటిది ఎన్నో వేదికల మీద ఈ మిమిక్రీ కళ నన్ను ఎంతోమందికి పరిచయం చేసింది. ప్రపంచ దేశాలన్నీ తిప్పింది. పురస్కారాలు అందజేసింది. అంతా భగవంతుని కృప.  ఏదీ ఉన్నపళంగా రాదని నమ్ముతాను. మనం ఎంచుకున్న మార్గానికి దైవ శక్తి తోడవ్వాలంటే నిరంతరం సాధన చేయాలి.   ఈ కళలో జీవితాంతం గుర్తుండిపోయే సందర్భాన్ని ఏదైనా దైవం మీకు ఇచ్చిందా? ఎన్నో.. లెక్కలేవు. వాటిలో అమెరికా ప్రెసిడెంట్‌ జాన్‌ఎఫ్‌ కెనడీని అనుకరించడం, అందుకు ఆయన మెచ్చుకోవడం మరిచిపోలేనిది. అప్పట్లో ఐక్యరాజ్యసమితిలో జరిగిన సమ్మిట్‌లో నా ప్రదర్శనకు అవకాశం లభించింది. ఆ ప్రదర్శనలో  బైబిల్‌లోని టెన్‌ కమాండ్‌మెంట్స్‌ని కెనడీ గొంతును అనుకరిస్తూ చెప్పాను. అంతా తెగ ఆశ్చర్యపోయారు. కెనడీ ఆనందంగా ఆలింగనం చేసుకుని, నాతో కొద్దిసేపు ముచ్చటించారు. అదో అద్భుతమైన సందర్భం. చాలా కొద్ది సందర్భాలలో తప్ప వారి ఎదుటి వారి గొంతును అనుకరించను.  వారు హర్ట్‌ అవుతారేమో అని ఆ పని చేయను.  దైవం ఉందని అనిపించిన ఘటన? మా కుటుంబం అంతా వేంకటేశ్వరస్వామి భక్తులం. నా చిన్నతనం నుంచి నాకో నమ్మకం.. మనసుపెట్టి తలచుకుంటే ఆ స్వామి నా ముందు ప్రత్యక్షం అవుతారని. నాలో భక్తి భావం ఎక్కువే. మా నాన్నగారు తరచూ తిరుమల తీసుకెళ్లేవారు. శ్రీ తిరుమల తిరుపతి వెంకటరమణా అని నామార్చన రాయించేవారు. 1950లో కంచి వైష్ణవుల ద్వారా సమాసశ్రీనామాలు స్వీకరించాను. ఈ సందర్భంగా పీఠాధిపతి మంత్రోపదేశం చేశారు. నిత్యం నియమాలు, పారిశుద్ధ్యం పాటిస్తూ జపం చేయాలని చెప్పారు. ఓ కళాకారుడిగా నేను వేర్వేరు ప్రాంతాల్లో ఉండాల్సి వస్తుంది. రైళ్లు, బస్సుల్లో ప్రయాణం చేస్తుంటాను. కాబట్టి ఈ పారిశుద్ధ్య నియమాలు పాటించలేనండి అన్నాను. ఆయన ‘ఇక్కడున్న అందరికంటే నీవే నిజమైన భక్తుడివి. పరిశుద్ధత దేహానికి కాదు, మనసుకి ఉండాలి’ అని చెప్పారు. మంచి మనసుతో చేతులు కడుక్కుని మంత్రం జపించినా మంత్ర ఫలం ఉంటుందని చెప్పారు. దైవాన్ని తలిస్తే కుళాయి నీళ్లూ మంత్ర జలం అవుతుందని ఉపదేశం చేశారు. ఇప్పటికీ నిత్యం జపం చేస్తుంటాను.  ఇదంతా దైవలీల అనిపించిన సంఘటన? కళాకారుడిగా గుర్తింపు పొంది, మంచి పేరు వచ్చాక తిరుమలలో గజారోహణం జరిగింది. ఇది పూర్తిగా దైవలీలయే. ఆ రోజు తిరుమల పూజారులు మాకు ప్రత్యేక దర్శనం ఏర్పాటు చేశారు. నేను ముందు, నా వెనక శిష్యులు ఉన్నారు. వెనక ఎక్కడో నా భార్య ఉంది. పూజ సమయంలో తను ఎక్కడుందో నాకు తెలియడం లేదు. ఆ సమయంలో ‘నాకింత గౌరవం దక్కుతుందంటే అది నా అర్ధాంగి వల్లే. ఆమె కుటుంబ పోషణలో సరైన పాత్ర పోషించడం వల్ల నేను ఇంత దూరం రాగలిగాను. ఆమెకూ ఈ సముచితగౌరవం దక్కితే బాగుంటుంది’ అనుకున్నాను. ఇంతలో ఎవరో చెప్పినట్లుగా ఓ పూజారి శిష్యులను దాటుకుని వెళ్లి పూజా సమయానికి ఆమెను నా దగ్గరికి తీసుకొచ్చాడు. తిరుమలలో గజారోహణ కార్యక్రమం అంగరంగ వైభవంగా జరిగింది. (చేతులు జోడించి ఆ స్వామిని తలుచుకుంటూ) ఆ దైవానికి నేనెలా కృతజ్ఞతలు చెప్పాలో కూడా ఆ సమయంలో అర్ధం కాలేదు. కళ్లమ్మట నీళ్లు తిరిగాయి.   మీ కష్టాలు తీర్చమని దేవుడికి మొక్కుకుని, ఆ మొక్కులు తీర్చుకున్న విధానం? మొక్కులు ఓ రకంగా దేవుడికి లంచం ఇవ్వడం లాంటిదే. నేనెప్పుడూ దేవుడికి లంచం ఇవ్వలేదు(నవ్వుతూ). దేవుడు మన వెల్‌విషర్‌ అనే నమ్మకం ఉండాలి. బయటకు వెళ్లేప్పుడు దేవుడికి మనస్ఫూర్తిగా దండం పెట్టుకుంటాను. ఇలా ఎందుకంటే నన్ను నడిపించే దేవుడు నాతోనే ఉన్నాడు అనే భరోసాకు. దీంతో పనుల్లో కూడా సానుకూల ఫలితాలు వస్తాయి. ఒకవేళ ఫలితం రాకున్నా మన ఆథ్యాత్మిక వాతావరణం కారణంగా కర్మఫలం అనుకుని సరిపెట్టుకుంటాను. దేవుడిపై నమ్మకం ఉంచి తదుపరి పనిపై దృష్టి పెడతాను.  ఎంతో అనుభవసారాన్ని గ్రహించిన మీరు మీ పిల్లలకు దైవారాధనను ఎలా పరిచయం చేశారు? మిమిక్రీలో ఒక రేంజ్‌కి వెళ్లాక కుటుంబానికి టైమ్‌ ఇవ్వడం కుదరకపోయేది. ఇంటికి వచ్చినప్పుడు మాత్రం పిల్లలతో రకరకాల ధ్వనులతో వారిని మెస్మరైజ్‌ చేసేవాడిని. అలా మా ఆవిడకు కొంత పని తగ్గించేవాడిని (నవ్వుతూ) మన పిల్లలైనా సరే మన ఇష్టాయిష్టాలతో వారిని ఇబ్బంది పెట్టకూడదు అనేది నా జీవన విధానం. భక్తి, వృత్తి ఏదైనా సరే నా వరకే పరిమితం. ఇతరులకు ఇబ్బంది కలిగేలా ప్రవర్తించడం సరికాదు. నేను భక్తి పరుడిని కాబట్టి నా కుటుంబం అంతా నా మార్గంలోనే నడవాలనుకోకూడదు. వారి అభిప్రాయాలు, పద్ధతులనూ తండ్రిగా నేను గౌరవించాలి. నాకు ఇద్దరు అమ్మాయిలు, ఇద్దరు అబ్బాయిలు. వారు వారి వృత్తుల్లో ఆనందంగా ఉన్నారు.  మీ ఈ విశ్రాంత జీవనంలో దైవారాధన ఎలా ఉంటుంది? పిల్లలు పెద్దవాళ్లై, మనవళ్లు వచ్చాక పెద్దవాళ్లకు పని తగ్గిపోతుంది. అలాగే నే చేసే పనులు తగ్గిపోయాయి. కాలక్షేపం కోసం రామకోటి, వెంకటేశ్వర నామార్చన వంటివి ఉంటాయి. కంచి పీఠాధిపతులు ఇచ్చిన మంత్రోపదేశం ఉండనే ఉంది. గతానుభవాలను, దైవాన్ని తలుచుకుంటే ఈ మిగిలిన జీవితాన్ని గడుపుతున్నాను. గతంలో వాకర్స్‌ అసోసియేషన్‌లో మెంబర్‌గా ఉండేవాడిని. రోజూ ఉదయం సాయంత్రం వాకింగ్‌కి వెళ్లేవాడిని. ఇప్పుడు ఎక్కువసేపు నడవలేకపోతున్నాను. అందుకే మానేశాను. ఇంట్లోనే ఉంటే బోర్‌ కొడుతుందని క్యారమ్‌ బోర్డ్‌ క్లబ్‌కి వెళుతుంటాను.  – కృష్ణగోవింద్, సాక్షి ప్రతినిధి, వరంగల్‌ ఫొటోలు: పెద్ద పెల్లి వరప్రసాద్‌


 వేణుమాధవ్‌కి కోపం వచ్చింది! ఆయనకే ఫోన్ చేసి మూడో రోజెప్పుడు, పదకొండో రోజెప్పుడు అని అడిగారట! కాలదూ మరి!  వెంటనే పోలీస్ స్టేషన్‌కి, గవర్నర్ దగ్గరికి కంప్లైంట్ చెయ్యడానికి వెళ్లారు.  వాడెవడో సచ్చినోడు ఫేస్‌బుక్‌లో, వాట్సప్పుల్లో.. వేణు మాధవ్ కాలం చేశాడని రాస్తే...  నచ్చనోళ్లు దాన్ని ఫార్వర్డ్‌లు చేస్తే.. దాన్ని మీడియోళ్లు మోసేస్తే...  మనిషేం కావాలి? కుటుంబాలేం కావాలి? స్నేహితులేం కావాలి? ఇండస్ట్రీ ఏం కావాలి?  బీపీ.. బీపీ.. బీపీ.. బీపీ.. రైజయ్యి.. ఇంకెవ్వరికీ ఇలా జరక్కూడదని సాక్షి ‘ఫ్యామిలీ’తో మాట్లాడారు.
 ♦ ఫిలిం నగర్‌కి ఇంత దూరంగా.. మౌలాలీలో ఉన్నా మీరెప్పుడూ వార్తల్లో నిలుస్తుంటారు.. ఈసారైతే ప్రచారం డోస్ కూడా పెరిగింది..?
 వేణుమాధవ్: అవునండి. నాకు రెండు రకాలు ఫ్యాన్స్ ఉన్నారు. రెండో రకం ఫ్యాన్స్‌కి ఎక్కువ అభిమానం అనుకుంటా. అందుకే ఏదో ఒకటి ప్రచారం చేసి, వార్తల్లో నిలిచేలా చేస్తున్నారు.
 
 ♦ అలా పనిగట్టుకుని ప్రచారం చేస్తున్నవాళ్లెవరో మీకు తెలుసా?
 వేణుమాధవ్: తెలియదు. అది తెలుసుకోమనే లోకల్ పోలీస్ స్టేషన్‌లో ఫిర్యాదు చేశా. మంత్రి తలసాని శ్రీనివాస యాదవ్‌గారికి, గవర్నర్‌గారికి వినతి పత్రం ఇచ్చాను. ఇంకా తెలంగాణా, ఆంధ్ర రాష్ట్రాల సీఎంలను కలిసి, వినతి పత్రం సమర్పించబోతున్నా. ఈ ప్రచారం చేసినవారిపై కఠిన చర్యలు తీసుకోవాల్సిందిగా కోరుతున్నా.
 ♦ అంతకుముందు కూడా మీ గురించి చాలా ప్రచారాలు వచ్చాయి. కానీ, ఈసారి సీరియస్‌గా తీసుకోవడానికి కారణం?
 వేణుమాధవ్:: వేణుమాధవ్‌కి తలనొప్పి వచ్చిందనీ, కాళ్లు చచ్చుపడిపోయాయనీ, క్యాన్సర్ వచ్చిందనీ ప్రచారం చేశారు. సరేలే అని ఊరుకున్నాను. కానీ, ఈసారి ఏకంగా చచ్చిపోయానని ప్రచారం మొదలుపెట్టారు. అందుకే చాలా చాలా హర్ట్ అయ్యాను. ఊరికే వదలదల్చుకోలేదు.
 ♦ ఈ ప్రచారం మొదలైనప్పుడు మీరు ఇంట్లోనే ఉన్నారా?
 వేణుమాధవ్: ఉన్నాను. మా అమ్మ, నా భార్య, పిల్లలు మామూలుగా బాధపడలేదు. నా అన్నయ్యలు, అక్కాచెల్లెళ్లు పడిన బాధ కూడా మాటల్లో చెప్పలేను. ‘ఏమైంది?’ అంటూ కొన్ని వేల ఫోన్లు వచ్చాయి. పోనీ ఫోన్ ఆఫ్ చేద్దామా అంటే, ఆ వార్త నిజమనుకుంటారేమోనని భయం. మరీ ఘోరం ఏంటంటే...  ఫోన్ చేసినవాళ్లల్లో కొంతమంది థర్డ్ డే ఎప్పుడు? లెవెన్త్ డే ఎప్పుడు? అని అడిగారు. అప్పుడు మా పరిస్థితి ఎలా ఉండి ఉంటుందో ఊహించవచ్చు. అందుకే గట్టిగా రియాక్ట్ అయ్యాను.
 ♦ ఓకే.. ఇప్పుడు మీ హెల్త్ ఎలా ఉంది?
 వేణుమాధవ్: ఐయామ్ సో ఫైన్. చూస్తున్నారుగా.. ఎంత హుషారుగా ఉన్నానో.
 ♦ అప్పుడు రామ్‌చరణ్ ‘రచ్చ’ సినిమా షూటింగ్‌లో కళ్లు తిరిగి పడిపోవడం వల్ల మీకు అవకాశాలు ఇవ్వడానికి చాలామంది వెనకడుగు వేశారేమో..?
 వేణుమాధవ్: నేను కళ్లు తిరిగి పడిపోవడం అబద్ధం కాదు. ఆ సినిమా చేస్తున్నప్పుడు మార్నింగ్ చరణ్, మధ్యాహ్నం ఇంకొకరి సినిమా, రాత్రి ఇంకో సినిమా.. ఇలా మూడు సినిమాల షూటింగ్స్ చేశాను. అది ఎండా కాలం. విపరీతమైన ఎండలు. దాంతో పాటు సరిగ్గా భోజనం చేయడానికి కూడా తీరిక చిక్కలేదు. ఒత్తిడి తట్టుకోలేక కళ్లు తిరిగి పడిపోయాను. అప్పటికప్పుడు ఆస్పత్రికి తీసుకెళ్లారు. సెలైన్ ఎక్కించారు. ఆ తర్వాత షూటింగ్‌కి వచ్చేశాను. ఈలోపు దాని గురించి కథలు అల్లేశారు. నాకేం ప్రాబ్లమ్ లేదు. ఐయామ్ హ్యాపీ.
 ♦ ఒకప్పుడు బిజీ బిజీగా సినిమాలు చేశారు.. ఇప్పుడెందుకు చేయడంలేదు?
 వేణుమాధవ్: సినిమాలు చేయనంత మాత్రాన నేను ఫీల్డ్‌కి దూరంగా ఉన్నట్లు కాదు. ఈ మధ్య కావాలనే నేను సినిమాలు చేయడం లేదు. ఎక్కువగా డబుల్ మీనింగ్ ఉన్నవే వస్తున్నాయి. అందుకే సెలక్టివ్‌గా ఉంటున్నాను. నేనూ, నా భార్య, నా బంధువులు కలిసి చూడదగ్గ సినిమాలే చేయాలనుకుంటున్నాను. లేకపోతే ఖాళీగా ఉంటా. నాకేం ప్రాబ్లమ్ లేదు.
 ♦ అంటే.. హీరోగా హంగామా, భూకైలాస్, ‘ప్రేమాభిషేకం’ వంటి చిత్రాలు చేశారు కదా.. ఆ తర్వాత కమెడియన్‌గా చేయాలని లేదా?
 వేణుమాధవ్: అస్సలు లేదు. కమెడియన్‌గా చేయడానికి నాకేం అభ్యంతరం ఉంటుంది? ఆ మాటకొస్తే ఏ పాత్రైనా చేయడానికి నేను రెడీ. విలన్ పాత్రలివ్వమనండి. చేసేస్తాను. అవకాశం వస్తే హీరోగా చేస్తాను. అవకాశం వస్తే చేయడం వేరు... ప్రయత్నించి దక్కించుకోవడం వేరు..  నేను ప్రయత్నం చేయను. నాకు అడుక్కోవాల్సిన అవసరం లేదు. 1996 జనవరి 14న నా మొదటి సినిమా ‘సంప్రదాయం’ రిలీజ్ అయ్యింది. ఆ సినిమా విడుదలకు ముందే రెండు సినిమాలకు అవకాశం వచ్చింది. ఆ దేవుడి దయ వల్ల అప్పట్నుంచీ ఇప్పటివరకూ ఎవర్నీ అడుక్కునే దుస్తితి నాకు రాలేదు.
 ♦ ప్రస్తుతం సినిమాలేమైనా చేస్తున్నారా?
 వేణుమాధవ్: కల్యాణ్ బాబు (పవన్ కల్యాణ్‌బాబు) సినిమా, చిరంజీవిగారి 150వ సినిమా, బాలకృష్ణగారి నూరవ సినిమా చేస్తున్నాను. వీళ్లంతా నాకు కొత్తవాళ్లేం కాదు. ఎన్టీ రామారావుగారిని తీసుకుందాం. ఆయన దగ్గర పని చేశాను. బాలకృష్ణగారు, హరికృష్ణగారితో సినిమాలు చేశాను. అక్కినేని నాగేశ్వరరావుగారితో, నాగార్జునగారితో, నాగచైతన్య.. ఇలా ఆ కుటుంబం హీరోలతో చేశాను. చిరంజీవిగారిని తీసుకుందాం. ఆయనతో, కల్యాణ్‌బాబుతో, రామ్‌చరణ్‌తో, బన్నీతో.. ఇలా అందరితో చేశాను. ఫ్యామిలీలో మూడు తరాల నటుల కాంబినేషన్‌లో సినిమాలు చేశాను. అందుకే కెరీర్ బ్రహ్మాండంగా సాగింది.
 ♦ఇప్పుడు మీరు చెప్పిన ఈ మూడు చిత్రాల అవకాశాలు అడక్కుండానే వచ్చాయంటారు..?
 వేణుమాధవ్: ప్రమాణ పూర్తిగా, దైవ సాక్షిగా, ‘సాక్షి’ పేపర్ సాక్షిగా (నవ్వుతూ) అడక్కుండానే వచ్చాయి. అన్నింట్లోనూ నావి మంచి పాత్రలే.
 ♦ ఏదో అంటున్నారు కానీ.. ఎప్పుడైనా ఒక్క మంచి అవకాశం కోసం ఎవరి దగ్గరైనా బెండ్ అయిన సందర్భం ఉందేమో గుర్తు చేసుకోండి?
 వేణుమాధవ్: చీ.. చీ.. దటీజ్ నాట్ వేణుమాధవ్. నేనా? బెండ్ అవ్వడమా? నాకా అవసరం రాలేదు. ఎప్పటికీ రాదు. నన్ను వెతుక్కుంటూ అవకాశాలొచ్చాయి కానీ, నేను అవకాశాలను వెతుక్కుంటూ వెళ్లలేదు.
 ♦ఇలా మాట్లాడతారు కాబట్టే.. మీకు నోటి దురుసు అంటుంటారు..?
 వేణుమాధవ్: నాకా పదం అంటే చాలా ఇష్టం అండి. వేణుమాధవ్‌కి బలుపు ఎక్కువ.. నోటి దురుసు అనే మాటలు వింటున్నప్పుడు నాకు చాలా ఆనందంగా ఉంటుంది.
 
  కుమారులు సావికర్, ప్రభాకర్, భార్య శ్రీవాణితో వేణుమాధవ్
 ♦అదేంటీ.. ఎవరైనా తిడితే ఆనందంగా ఉంటుందా?
 వేణుమాధవ్: ఒక్క కృష్ణారెడ్డిగారు, అచ్చిరెడ్డిగారంటే భయం.. గౌరవం. ఎందుకంటే వాళ్లే నాకు ఫస్ట్ అవకాశం ఇచ్చారు. మిగతావాళ్లను గౌరవిస్తాను. నాకన్నా పెద్దవాళ్లయితే కాళ్లకు నమస్కరిస్తా. ఎవరి దగ్గరా చెయ్యి చాపను.
 ♦ఇప్పుడు మీరు సినిమాలు తగ్గించేసిన నేపథ్యంలో మీ ప్లేస్‌ని రీప్లేస్ చేసిన ప్రస్తుత కమెడియన్ ఎవరనుకుంటున్నారు?
 అబ్బే.. నాకు రీప్లేస్‌మెంటా? చాన్సే లేదు. వేణుమాధవ్ పోజిషన్‌ని రీప్లేస్ చేయగలవాళ్లు ఇప్పటివరకూ రాలేదు... రాలేరు కూడా.. వచ్చినా చేయలేరు.
 ♦ఏంటా కాన్ఫిడెన్స్?
 వేణుమాధవ్: బేసిక్‌గా నేను మిమిక్రీ ఆర్టిస్ట్. నాకు ఎక్స్‌ప్రెషన్స్ బాగా ఇవ్వడం తెలుసు. టైమింగ్ తెలుసు. నాకు తెలిసి నన్ను రీప్లేస్ చేయగలవాళ్లు లేరు. ఇప్పుడు మీరు గమనించారో లేదో కానీ, మీతో మాట్లాడుతూనే కెమెరా మ్యాన్‌కి కావాల్సిన ఎక్స్‌ప్రెషన్స్ కూడా ఇస్తున్నాను. ఐదువందలకు పైగా సినిమాలు చేశాను. 
 ♦మీరు చనిపోయారని వచ్చిన వార్తకు గవర్నర్, సీఎంలను కలవడం పబ్లిసిటీలో భాగం అనుకుంటున్నారు.. మీదాకా వచ్చిందా?
 వేణుమాధవ్: నాదాకానా? రాదు. వేణుమాధవ్ రెబల్ అండి. చెప్పడానికి కూడా భయపడతారు. అయినా వేణుమాధవ్‌కి పబ్లిసిటీ అవసరమా? నేనెవర్నో ఎవరికీ తెలియదా? ఇప్పుడు గుండు చేయించుకున్న వేణుమాధవ్ బయటికెళ్లినా గుర్తుపడతారు. అలాంటిది పబ్లిసిటీ కోసం నేను పాకులాడతానా? పబ్లిసిటీ నాకెందుకండి బాబూ.
 ♦అవునూ.. గుండు చేయించుకున్నారెందుకని?
 వేణుమాధవ్: పెద్ద కారణం ఏదీ లేదు. నెల్లూరులో ఓ ప్రోగ్రామ్‌కి వెళ్లాను. అట్నుంచి తిరుపతి వెళ్లాను. బాలకృష్ణగారి నూరవ సినిమా, చిరంజీవిగారి 150వ సినిమా హిట్ అవ్వాలని ఆ దేవుణ్ణి కోరుకున్నా. తిరుమల వెళ్లాం కదా అని గుండు చేయించుకున్నా.
 ♦మీ పిల్లల్లో ఎవర్ని హీరో చేయాలనుకుంటున్నారు..?
 వేణుమాధవ్:: మా పిల్లలెవరూ సినిమా ఇండస్ట్రీలోకి రారు. నాకు ఇంట్రస్ట్ లేదు.
 ♦ఇండస్ట్రీకి వస్తే.. మీ పిల్లలు కూడా మీ స్థాయిలో సంపాదించుకుంటారు కదా?
 వేణుమాధవ్: సంపాదన గురించి ఆలోచించలేదు. మా పిల్లలకు మంచి జీవితం ఇచ్చేంత నేను సంపాదించాను. వాళ్లు ఏం చదువుకుంటామంటే అది చదివిస్తాను. ఇంటర్మీడియేట్ వరకే నేను గైడ్ చేస్తాను. ఆ తర్వాత వాళ్ల ఇష్టం. వాళ్లు ఏం కావాలనుకుంటే అది అవుతారు.
 ♦వాళ్లు హీరో అవుతానంటే...?
 వేణుమాధవ్: అది వాళ్లిష్టం. కాదనను.
 ♦ఫైనల్లీ మీ మీద దుష్ర్పచారం చేస్తున్న వాళ్లకు ఏదైనా చెప్పాలనిపిస్తోందా?
 వేణుమాధవ్: వాళ్లకి చాలా థ్యాంక్స్. అయితే, ప్రచారం చేసేటప్పుడు కాస్త వెనకా ముందూ ఆలోచిస్తే బాగుంటుంది. మొన్నా మధ్య నా గురించి వార్త వచ్చినప్పుడు నేను ఇంట్లోనే ఉన్నాను కాబట్టి, సరిపోయింది. నేనేదైనా ఊరెళ్లి, ఊహించని విధంగా నా సెల్‌కి సిగ్నల్ అందలేదనుకోండి అప్పుడు మా ఇంట్లో వాళ్ల పరిస్థితి ఏంటి? ఏదో జరిగే ఉంటుందని నమ్మేవాళ్లు కదా. అంతెందుకు? ఆ వార్త వచ్చినప్పుడు నేను వాళ్ల కళ్లెదుటే ఉన్నా నా భార్య, అమ్మ ఒకటే ఏడుపులు. ‘నేను బతికే ఉన్నాను’ అని ఎంతమందికి చెప్పాలి? గవర్నర్ వరకూ ఎందుకు వెళ్లానంటే... నన్ను అభిమానించే స్నేహితులకూ, నా వేరే టైప్ ఫ్యాన్స్‌కీ.. ఇలా అందరికీ నేను బతికే ఉన్నానని తెలియజెప్పడానికే.  - డి.జి. భవాని


 హైదరాబాద్ : తాను చనిపోయినట్లు కొంతమంది దుష్ప్రచారం చేస్తున్నారని టాలీవుడ్ ప్రముఖ హాస్యనటుడు వేణుమాధవ్ ఆవేదన వ్యక్తం చేశారు. అలాంటి వారిపై చర్యలు తీసుకోవాలని తెలంగాణ రాష్ట్ర సినిమాటోగ్రఫీ మంత్రి తలసాని శ్రీనివాసయాదవ్కు విజ్ఞప్తి చేశారు. గురువారం హైదరాబాద్లో మంత్రి తలసాని శ్రీనివాసయాదవ్ను వేణుమాధవ్ కలిశారు.
 
 తాను మరణించానంటూ ఓ టెలివిజన్ చానెల్‌తోపాటు పలు వెబ్‌సైట్లలో వచ్చిన వార్తలను ప్రముఖ హాస్యనటుడు వేణుమాధవ్ ఖండించిన సంగతి తెలిసిందే. మీడియాలో వచ్చిన వార్తల నేపథ్యంలో వేణుమాధవ్ తీవ్ర మనస్తాపం చెందారు. ఈ నేపథ్యంలో వేణుమాధవ్ మంగళవారం కుషాయిగూడ పోలీసులకు ఫిర్యాదు చేశారు. తెలుగు చానెల్, వెబ్‌సైట్లు, సోషల్ మీడియా వెబ్‌సెట్లలో వేణుమాధవ్ మృతి చెందిన్నట్లు వచ్చిన వార్తలు వెలువడటం సినీ పరిశ్రమ వర్గాలను, అభిమానులను ఆందోళన గురిచేశాయి.
 తాను ఆరోగ్యంగానే ఉన్నానని, ఆ వార్తల్లో వాస్తవం లేదని ఆయన వివరణ ఇచ్చారు. తన ఆరోగ్యంపై దుష్ప్రచారం చేస్తున్న వారిని గుర్తించి తగు చర్యలు తీసుకోవాలని ఆయన పోలీసులను కోరారు. గతవారం తన అభిమాన నటులు చిరంజీవి, బాలకృష్ణ చిత్రాలు విజయవంతం కావాలని ఆకాంక్షిస్తూ తిరుమలకు వెళ్ళి వెంకటేశ్వరస్వామిని దర్శించుకున్నట్లు ఆయన వివరణ ఇచ్చారు.


 తిరుమల: తిరుమల శ్రీవారిని శుక్రవారం రాజకీయ, సీనీ ప్రముఖులు దర్శించుకున్నారు. నటుడు వేణుమాధవ్ ఉదయం వీఐపీ విరామ సమయంలో స్వామిని దర్శించుకున్నారు. అలాగే వైఎస్సార్‌సీపీ నేత ఉమ్మారెడ్డి వెంకటేశ్వర్లు, మాజీ మంత్రి కాసు వెంకట కృష్ణారెడ్డి కూడా స్వామి సేవలో పాల్గొన్నారు. తన స్నేహితుడి కుమార్తె తల వెంట్రుకలు ఇచ్చే కార్యక్రమంలో పాల్గొనేందుకు తిరుమలకు వచ్చినట్టు కాసు వెంకటకృష్ణారెడ్డి తెలిపారు.
  


 హిట్ క్యారెక్టర్
 చిత్రం : దిల్ (2003)  
 డెరైక్ట్ చేసింది : వి.వి. వినాయక్   
 సినిమా తీసింది : రాజు-గిరి   
 మాటలు రాసింది : చింతపల్లి రమణ
  
 కితకితలు పెట్టకుండానే కడుపుబ్బ నవ్వించేస్తాడు వేణుమాధవ్. మిమిక్రీ అతనికో పెద్ద ఎస్సెట్. ‘సంప్రదాయం’గా సెల్యులాయిడ్ మీదకొచ్చిన ఈ కోదాడ కళాకారుడు ‘తొలిప్రేమ’తో యూత్‌కి కనెక్టయిపోయాడు. ‘దిల్’తో అందరి దిల్‌లూ కొల్లగొట్టేశాడు. షార్ట్ టైమ్‌లో స్టార్ కమెడియన్‌గా ఎదిగిపోయాడు.
  
  ఆ అక్కకు ఒక్కగానొక్క తమ్ముడు. ఆ బావకు తనివితీరా తిట్టాలనిపించే బామ్మర్ది. శీనుగాడికి ఫ్రెండ్ లాంటి, గైడ్ లాంటి, టెక్ట్స్‌బుక్కు లాంటి మేనమామ... అతడే వేణు. రాత్రయితే నిద్రకు ఆగలేడు. పగలయితే భోజనానికి ఆగలేడు. అన్నిటికీ తొందరే. నోటిదూలతో అంతా చిందరవందరే. ఇంట్లో ఖాళీగా కూర్చుని బావతో అక్షింతలు వేయించుకునే కన్నా, ఏజ్ బార్ అయినా కాలేజ్‌కెళ్లడమే బెటరాతి బెటరనుకున్నాడు వేణు. మేనల్లుడు శీనుతో కలిసి కాలేజ్‌కి అప్లయ్ చేశాడు.  ఆ రోజు ఇంటర్వ్యూలు. అక్కడేం జరిగిందంటే...
    
  కాలేజ్ నిండా కుప్పలు తెప్పలుగా కుర్రాళ్లు.‘‘ఇంతమంది వచ్చారేంటి అల్లుడూ! మనకు సీటు దొరుకుతుందంటావా?’’ అంటూ వేణు తెగ టెన్షన్.అప్పుడే ఇంటర్వ్యూ పూర్తి చేసుకుని ప్రిన్సిపాల్ రూమ్‌లో నుంచి నందిని బయటకొస్తోంది. వేణు గబగబా ఆమె దగ్గరకెళ్లి‘‘సిస్టర్.. సిస్టర్! లోపల ఏం అడుగుతున్నారు?’’ అనడిగాడు. ‘‘క్వశ్చన్స్’’ అంది నందిని.‘‘అవేంటో చెప్పి పుణ్యం కట్టుకో సిస్టర్’’ అనడిగాడు వేణు బిక్కమొహం పెట్టి. సిస్టర్ అనే మాటకి నందిని పడిపోయింది. ‘‘క్వశ్చన్స్‌తో పాటు ఆన్సర్లు కూడా చెప్తాను. రాసుకోండి’’ అని చెప్పడం మొదలుపెట్టింది. ‘‘ఇండియాకు స్వాతంత్య్రం ఎప్పుడొచ్చింది?’’ అని నందిని ఫస్ట్ క్వశ్చన్ చెప్పగానే, వేణుకు ఒళ్లంతా చెమట్లు పట్టేశాయి. ‘‘ఏం చెప్పాలి సిస్టర్?’’ అన్నాడు దీనంగా.మనవాడు జీకేలో వీక్ అనే విషయం నందినికి అర్థమైపోయి, ‘‘1857 నుంచి స్ట్రగుల్ చేస్తే... 1947లో వచ్చింది’’ అని ఆన్సర్ చెప్పింది. ‘‘పాకిస్తాన్ ప్రెసిడెంట్ ఎవరు?’ మళ్లీ వేణు బ్లాంక్ ఫేస్.
  
 ‘‘అప్పట్లో భుట్టో.. ఇప్పుడు ముషారఫ్’’ వేణు ఈ క్వశ్చన్ అండ్ ఆన్సర్స్ చకచకా తన అరచేతి మీద రాసేసుకుంటున్నాడు.
  ‘‘యూత్ దేనివల్ల చెడిపోతున్నారు?’’ మళ్లీ క్వశ్చన్ చెప్పింది నందిని. దీనికీ ఆన్సర్ లేదు వేణూ దగ్గర. నందినీయే ఆన్సర్ చెప్పేసింది.
  ‘‘సిగరెట్ తాగడం... మందు కొట్టడం... అమ్మాయిలతో తిరగడం...’’ వేణూకి క్వశ్చన్ పేపర్ లీకైపోవడంతో కాలరెగరేసేశాడు. ప్రిన్సిపాల్ రూమ్‌లోకి వెళ్లడమే ఓ హీరో ఎంట్రన్స్. ఇతని కాన్ఫిడెన్స్ చూసి ప్రిన్సిపాల్ పుల్లారావు ‘‘ఏంటి... చాలా హ్యాపీగా కనబడుతున్నావ్? బాగా ప్రిపేరయ్యావా?’’ అనడిగాడు. వేణు చాలా స్టయిల్‌గా ‘‘ఫుల్‌గా ప్రిపేరయ్యా. అసలు ప్రాసెస్ ఏంటి సార్? నేను ఆన్సర్లు చెప్పాక మీరు క్వశ్చన్లు వేస్తారా? మీరు క్వశ్చన్లు అడిగాక నేను ఆన్సర్లు చెప్పాలా? మీకేది బెటరనిపిస్తోంది?’’ అన్నాడు.
  ప్రిన్సిపాల్ క్వశ్చన్లు అడగడం మొదలుపెట్టాడు. ‘‘నువ్వెప్పుడు పుట్టావ్?’’ ఈ ప్రశ్న వినకుండానే, అరచేయి చూసుకుని ‘‘1857 నుండి స్ట్రగుల్ చేస్తే... 1947లో’’ అని ఆన్సరిచ్చేశాడు.
  
 ‘‘మీ నాన్నగారి పేరేంటి?’’ ‘‘అప్పట్లో భుట్టో... ఇప్పుడు ముషారఫ్’’ ‘‘కాలేజ్‌లో చేరి ఏం చేద్దామనుకుంటున్నావ్?’’ ‘‘సిగరెట్లు తాగడం... మందు కొట్టడం... అమ్మాయిలతో తిరగడం...’’ఇలా వేణు చెప్పిన ఆన్సర్లన్నీ విని ప్రిన్సిపాల్ డంగైపోయాడు. వేణుకు నో సీట్. కానీ వేణు తక్కువ తినలేదు కదా. కాలేజ్‌లో బాగా పరపతి ఉన్న ప్యూన్ రామానాథానికి పది వేలు లంచం కొట్టి, సీటు సంపాదించేశాడు.
    
  కాలేజ్‌కెళ్తే వేణు ఎక్కడ దొరుకుతాడో తెలుసా?
  క్లాస్‌రూమ్‌లో కాదు... కారిడార్‌లో. వచ్చేపోయే అమ్మాయిలకు సైట్ కొట్టడంతో టైమ్ సరిపోతుంది. ఓ అమ్మాయి వేణుకు తెగ నచ్చేసింది. గ్లామర్‌గా ఉంది. స్టయిల్‌గా ఉంది. ఆమెను ఆపాడు. ‘‘మన దగ్గరో లవ్ లెటర్ ఉంది. ఎవరికిస్తే బావుంటుందంటావ్? మేటర్‌లో మంచి డెప్త్ ఉందిలే! బ్లడ్‌తో రాశా. రాణీకిద్దామా? వద్దులే! ఆల్రెడీ ఎవడితోనో తిరుగుతున్నట్టుంది. నిర్మల మనకు వర్కవుట్ అవుద్దంటావా? ఊహూ... సుజాత? అమ్మో అది మన రేంజ్ కాదు. ఇంకెవరికిస్తే బావుంటుందంటావ్? సత్యవతి... ప్రభావతి... నాగలక్ష్మి... వాణి... ఊహూ... ఓ పని చేయ్! నువ్వే ఉంచేసుకో!’’ అంటూ తెలివిగా లవ్ లెటర్ ఆమెకిచ్చాడు. ఆ అమ్మాయి కన్‌ఫ్యూజ్ అయిపోయి ‘‘ఏంట్రా?’’ అనడిగింది. ‘‘ఎహే... మొహమాటపడకు. ఏం... నీకేం తక్కువ! సత్యవతి కన్నా కాస్త కలర్ తక్కువ. ఏం... ఆ మాత్రం సర్దుకోలేనా? సరదాగా చదువుకో! చెప్పాను కదా... మేటర్‌లో మంచి డెప్త్ ఉందని! ఉంచుకో! చదువుకో! క్లియర్‌గా చదువుకో! టైమ్ తీసుకో!’’ అని ఆమె ఇంకేమీ అడగకముందే వేణు అక్కడ నుంచీ మాయం.
    
 ఆ అమ్మాయి వేణును వెతుక్కుంటూ వచ్చి, ‘‘మీ లెటర్ చదివాను’’ అని చెప్పింది. ‘‘బ్లడ్ మరీ రెడ్‌గా ఉందా?’’ కొంటెగా అడిగాడు వేణు. ‘‘అందుకే... ఎందుకైనా మంచిదని బ్లడ్ టెస్ట్ చేయించా. షుగర్, మలేరియాల్లాంటివి ఏమీ లేవంట! కానీ కేన్సర్ ఉందేమోనని డౌట్ అంట’’ అని ఆ అమ్మాయి చెప్పగానే, వేణు పక్కన నిలబడ్డ కుర్రాడు కళ్లు తిరిగి ఢామ్మని పడిపోయాడు.
 
 ‘‘అదేంటి? నీకు కేన్సరంటే... వాడు పడిపోయాడు?’’ అడిగిందా అమ్మాయి ఆశ్చర్యంగా. వేణు చాలా తాపీగా ‘‘ఆ బ్లడ్ వాడిదేలే! అందుకే టెన్షన్’’ అన్నాడు. ‘‘ఎవరి బ్లడ్‌తో రాసినా మీ కాన్సెప్ట్ నాకు నచ్చింది. మీతో పావుగంటసేపు పర్సనల్‌గా మాట్లాడాలి’’ అడిగిందా అమ్మాయి. దాంతో వేణు సిగ్గుపడిపోయాడు. చెలరేగిపోయాడు. ఫ్రెండ్స్ వైపు విజయగర్వంతో చూశాడు. ‘‘రా... తలుపులేసుకుని మరీ మాట్లాడదాం’’ అని ఆ అమ్మాయిని అక్కడున్న గదిలోకి తీసుకెళ్లి తలుపులేసేశాడు. పావుగంట తర్వాత చెమటలు కక్కుకుంటూ బయటికొచ్చాడు వేణు. ఆ అమ్మాయి అలా వెళ్లగానే... ఓ ఫ్రెండ్‌ను కావలించుకుని ‘‘వా...’’ అంటూ బావురుమన్నాడు. లోపలేం జరిగిందో అందరికీ అర్థమైంది.
    
 శీనుగాడు నందినితో ప్రేమలో పడ్డాడు. ఈ విషయం తెలిసి వాళ్ల నాన్న ఆ అమ్మాయి వాళ్ల అమ్మమ్మ గారింటికి పంపించేశాడు. నిజాంపేట. ఓ పల్లెటూరు. శ్రీనుగాడితో కలిసి వేణు కూడా వెళ్లాడు. శీనుగాడు, నందినిని కలవడానికెళ్తే, వేణు టిఫిన్ చేయడానికి ఓ హోటల్‌కెళ్లాడు.
 
 అక్కడందరూ టిఫిన్లు చేసేసి ‘‘సప్తగిరన్నా! నాలుగు దోసెలు రాసుకో!’’ అనేసి వెళ్లిపోతున్నారు. వేణు కూడా దోసెలు సుష్టుగా లాగించేసి చాలా తాపీగా ‘‘సప్తగిరన్నా! నా దోసెలు కూడా రాసుకో’’ అని బైక్ స్టార్ట్ చేసి బయలుదేరబోయాడు. ఆ సప్తగిరొచ్చి వేణు కాలరట్టుకున్నాడు. ‘‘ఏంరా... డబ్బులివ్వకుండా వెళ్లిపోతున్నావ్?’’ ‘‘అదేంటన్నా! అందరూ అకౌంట్లో రాసుకోమని చెప్పి వెళ్తున్నారుగా’’ అనడిగాడు వేణు. ‘‘వాళ్లంటే మా ఊరోళ్లు. ముందు డబ్బులు తీయ్’’ అని గదమాయించాడు సప్తగిరి. ‘‘పర్సు ఖాళీ. పోనీ పిండి రుబ్బనా?’’ అనడిగాడు వేణు. ‘‘నువ్వు పిండి రుబ్బడానికి కూడా పని చేయవ్. డబ్బులిచ్చి ఈ బండి తీసుకెళ్లు’’ అని బైక్ లాగేసుకున్నాడు సప్తగిరి.
 
 ‘‘వార్నీ’’ అనుకుంటూ వేణు నీరసంగా ముందుకెళ్లాడు. అక్కడ పొలం దగ్గర నలుగురు చిన్నపిల్లలు పేకాట ఆడుతున్నారు. వేణు వాళ్ల దగ్గరకు చేరి ‘‘నాకూ ముక్కలేయండ్రా!’’ అనడిగాడు. ‘‘నా బర్రెను పట్టుకోరా... వేస్తా’’ అన్నాడో కుర్రాడు. ‘‘అమ్మో ఈ ఊరోళ్లందరికీ గోరోజనమెక్కువే’’ అనుకుంటూ ముక్కలందుకున్నాడు. తాడు గుంజుకోవడానికి బర్రె ప్రయత్నిస్తోంది. వేణు బూతులు తిట్టాడు.
  ఆ కుర్రాడు హెచ్చరించాడు. ‘‘అన్నా! మా బర్రెకి కోపమెక్కువ. బూతులు తిడితే అస్సలు ఊరుకోదు’’ అన్నాడు. ‘‘నా సంగతి తెల్వదు. నేను హైద్రాబాద్ నుంచి వచ్చినోణ్ణి. ఈ బర్రె ఓ లెక్కా!’’ అని వేణు బిల్డప్పిచ్చాడు.
 
  అక్కడ బర్రెకు కిర్రెక్కింది. అది సూపర్‌ఫాస్ట్‌లో పరుగు తీయడం మొదలుపెట్టింది. ఆ తాడుతో పాటు వేణును కూడా ఈడ్చుడే ఈడ్చుడు. వేణూ కుయ్యో మొర్రోమన్నాడు. బర్రె ఓ చోట ఆగింది. వేణుకి నోటి దూల కదా! ‘‘హైద్రాబాద్ నుంచి మీ ఊరికొచ్చినానని తెలిసి కూడా ఇంత పని చేస్తావా? కోసి కారం పెడతా నీ తల్లి’’ అని తిట్టాడు. దాంతో బర్రె మళ్లీ పరుగందుకుంది. ముందు బర్రె రన్నింగ్... వెనుక
 వేణు దొర్లింగ్... పాపం... వేణు! ప్చ్...
  - పులగం చిన్నారాయణ
  
  స్పాట్‌లో మార్పులు బాగా పేలాయి!
  మేనల్లుడు, మేనమామ - ఒకేసారి ఒకే కాలేజ్‌లో ఒకే క్లాస్ చదవడమనే దర్శక, రచయితల ఐడియా సూపర్. షూటింగ్ స్పాట్‌లో అప్పటికప్పుడు చేసిన ఇంప్రొవైజేషన్‌‌స బాగా పేలాయి. క్లాస్ రూవ్‌ులో ఒక డైలాగ్ చెప్పమంటే, అప్పటికప్పుడు నేను ఎన్టీఆర్,  వైయస్సార్, చంద్రబాబు వగైరాలను ఇమిటేట్ చేస్తూ చెప్పా. అలా సీన్‌ను పెంచుకుంటూ పోయాం. క్లైమాక్స్‌లో ప్రకాశ్‌రాజ్ నా గురించి అడుగుతున్నప్పుడు, అతనెదురుగా వెళ్ళి, అతణ్ణే ఇమిటేట్ చేస్తూ నేను చెప్పే డైలాగులు కూడా స్పాట్‌లో అనుకొని చేశా. బర్రెతో సీన్‌లో అయితే వినాయకన్న వద్దని చెబుతున్నా సరే, డూప్ లేకుండా, స్టంట్ మాస్టర్ లేకుండా పొలాల మధ్య నేనే చేశా. సీన్ సూపర్‌గా వచ్చింది. రిలీజ్ రోజు మధ్యాహ్నం ఆర్టీసీ క్రాస్‌రోడ్‌‌సలో సినిమా చూసి, భోజనానికి వెళుతున్న నన్ను లక్డీకా పూల్ దగ్గర హోటల్‌కు పిలిచి, యూనిట్ సభ్యులు ఎదురొచ్చి మరీ నన్ను పెకైత్తుకున్న క్షణాలు నా జీవితంలో మర్చిపోలేను. ఈ సినిమాతో నిర్మాత రాజు కాస్తా ‘దిల్’ రాజు అయ్యాడు. ఈ పాత్ర వెంటనే పడ్డ రాజమౌళి ‘సై’ సినిమాతో నా కెరీర్ జెట్ స్పీడ్ అందుకుంది. రెమ్యూనరేషన్ దగ్గర తేడా వచ్చి, మొదట ‘దిల్’ సినిమా చేయనంటే, మంచి క్యారెక్టరని నచ్చజెప్పిన వినాయకన్నదే ఈ క్రెడిటంతా! ఇవాళ నాకింత పేరు, డబ్బు వచ్చి, నాలుగువేళ్ళూ నోట్లోకి వెళుతున్నాయంటే, అది వినాయకన్న చలవే!
  - వేణుమాధవ్


 దేవరుప్పుల : మహిళలపై అసభ్యకరంగా వ్యవహరించిన కేసులో ఓ విలేకరని గురువారం రిమాండ్ చేసినట్టు ఎస్సై సూర్యప్రసాద్ తెలిపారు. స్థానిక ఎస్సై కథనం మేరకు.. బుధవారం జనగామ నుంచి దేవరుప్పులకు టాటాఎసీలో ప్రయాణిస్తున్న మహిళా ప్రయాణికుల పట్ల దేవరుప్పుల మండల ఆంధ్రజ్యోతి విలేఖరి ఎం.వేణుమాధవ్ అసభ్యకరంగా వ్యవహరించారు.
 
 ఈ విషయమై బాధిత మహిళలు స్థానిక పోలీస్‌స్టేషన్‌లో ఫిర్యాదు చేసింది విదితమే. ఈ మేరకు ఎస్సై 354 సెక్షన్ కింద  కేసు నమోదు చేసీ నిందితుడిగా భావిస్తున్న వేణుమాధవ్‌ను గురువారం సాయంత్రం జనగామ కోర్టులో హాజరు పర్చగా రిమాండ్ చేసినట్టు ఎస్సై వివరించారు.


 కామెడీ క్లాస్: వేణు మాధవ్
 ‘సంప్రదాయం’ షూటింగ్‌లో తొలిరోజు నుంచే నటన విషయంలో ఎలాంటి బెరుకూ లేకుండా అల్లుకుపోయాను కానీ.. షూటింగ్ స్పాట్‌లో కొన్ని భయాలు వెంటాడాయి. అది కూడా భోజనంతో ముడిపడినవి. మధ్యాహ్నం లంచ్ సమాయానికి ‘బ్రేక్’ అనే మాట వినిపించింది.. అలా ఎవరన్నారో కానీ, అందరూ భోజనాల మీదపడ్డారు. నాకూ ఆకలేస్తోంది. అయితే అందరిలాగా చొరవగా వెళ్లలేకపోయా... ఎందుకంటే అక్కడ భోంచేస్తే చార్జ్ చేస్తారేమో అనే సందేహం నన్ను ఆపేసింది. రేటు ఎక్కువ ఉంటుందేమో.. మనకు ఇవ్వాల్సిన డబ్బులోంచి ఈ అన్నం బిల్లు అంతా కట్ చేస్తారేమో అనే సందేహం మనసులో పెరిగిపెద్దదైంది.
 
 దీంతో అక్కడ తినలె.. నాకు అకౌంట్ ఉన్న మెస్ దగ్గరకెళ్లి తినొచ్చా. మొదటి రోజు.. రెండో రోజు.. మూడో రోజు... లంచ్‌కు బ్రేక్ ఇవ్వగానే అక్కడ నుంచి మాయం అయ్యేవాడిని. ఎవరితోనూ కమ్యూనికేట్ అయ్యి.. నా డౌట్‌ను క్లారిఫై చేసుకోలేదు. ప్రొడక్షన్ మేనేజర్ ఒకరు మాత్రం ఈ విషయంలో నన్ను గమనించినట్టున్నారు. బయటకు వెళ్లి తినొస్తున్నాననే విషయాన్ని అర్థం చేసుకున్నారాయన. నా మనసులో భావాన్ని కూడా ఆయన ఎలా పసిగట్టారో కానీ.. నాలుగోరోజు లంచ్‌కని బైక్ తీస్తుంటే ‘వేణూ.. ఇక్కడే తిను, ఏం చార్జ్ చెయ్యరులే...’ అన్నారు. అప్పటికి అసలు విషయం అర్థమై, ధైర్యంగా భోజనం చేశా!
  
 వద్దంటే... వద్దన్నా
 
 1995లో రవీంద్రభారతిలో రచయిత దివాకర్‌బాబుకు సన్మానం. ఆకృతి అనే సంస్థ నిర్వహించిన ఆ కార్యక్రమంలో నా మిమిక్రీ ప్రదర్శనను కూడా ఏర్పాటు చేశారు. అది నా జీవితాన్నే మలుపుతిప్పే ప్రదర్శన అవుతుందని నేను అనుకోలేదు. ముందు వరసలోనే దర్శకుడు ఎస్వీ కృష్ణారెడ్డి గారు, నిర్మాత అచ్చిరెడ్డిగారు కూర్చున్నారు. నేను కొన్ని స్కిట్స్ చేశాను. ప్రోగ్రామ్ అయిపోయాకా.. ఉదయ్‌భాస్కర్ అని ఒకాయన వచ్చి కలిశాడు. ‘నేను ఎస్వీ కృష్ణారెడ్డి గారికి మేనేజర్‌ను,రేపు ఒకసారి మా ఆఫీస్‌కు రాగలరా...’ అని అడిగారు. మిమిక్రీ ప్రోగ్రామ్ కోసమే అయ్యుంటుందిలే అని.. ‘సరే’ అన్నాను.
 
 మరుసటి రోజు ఆఫీస్‌కు వెళ్లాక కృష్ణారెడ్డి గారు అడిగారు.. ‘సినిమాల్లో చేస్తావా..’ అని. నాకేం అర్థం కాలేదు.. ఎందుకంటే, అప్పటికి సినిమాల్లో చేయాలన్న ఆలోచనే లేదాయె! మిమిక్రీ ప్రోగ్రామ్ అనుకొంటే సినిమాల్లో నటిస్తావా.. అని అడుగుతున్నారేంటి అనుకొని, ఔననకుండా, కాదూ అని చెప్పకుండా ఇంటికెళ్లిపోయా. సాయంత్రం ఊర్లో ఉన్న అమ్మకు ఫోన్ చేసి... ఈ విషయాన్ని చెప్పాను. ఆమె సంబరపడి.. చెయ్యమంది. నేనేమో వద్దనుకొంటున్నానమ్మా అంటే... ఆమె సహజమైన శైలిలో కొంచెం గట్టిగా చెప్పింది. ఎట్టి పరిస్థితుల్లోనూ ఈ అవకాశాన్ని వదులుకోవద్దని సూచించింది. అయితే అప్పటికీ నేను కుదురుకోలేదు. మనం సినిమాల్లో చేయడం ఏమిటనే భావనతోనే ఉండిపోయా. ఎలాగైనా ఈ అవకాశాన్ని వదిలేసుకోవడానికి మెదడులో ఒక మాస్టర్‌ప్లాన్ వేసుకొని మరుసటి రోజు కృష్ణారెడ్డి గారి ఆఫీసుకు వెళ్లాను.
  
 ‘నాకు ఒక్కో మిమిక్రీ ప్రోగ్రామ్‌కు వెయ్యి రూపాయలు ఇస్తారు. మీరు 70 రోజుల షూటింగ్ అంటున్నారు కాబట్టి డెబ్బై వేలు ఇస్తే.. చేస్తా, లేకపోతే లేదు..’ అని ఉదయ్‌భాస్కర్‌కు స్పష్టంగా చెప్పేశా. ఎందుకంటే ఎలాగూ అంత డబ్బు ఇవ్వరు, మనల్ని వదిలేస్తారు అని నా ధీమా. నిజం చెప్పాలంటే అప్పటికి నాకు ఒక్కో మిమిక్రీ ప్రోగ్రామ్‌కి ఇచ్చేది 150 రూపాయలే! సినిమాలో నటించాలనే ఆసక్తి ఏ మాత్రం లేకపోవడం వల్ల ఎక్కువ డబ్బు డిమాండ్ చేయడమనే అస్త్రాన్ని ఉపయోగించుకొన్నా.
  
 సాయంత్రం అమ్మకు ఫోన్ చేస్తే ‘ఏరా.. వాళ్ల ఆఫీసుకు వెళ్లావా’ అంది. ‘హా.. వెళ్లానమ్మా.. వాళ్లు చెప్పినట్టే చేస్తానని చెప్పొచ్చాను’ అని అమ్మకు చెప్పి ఇక సినిమా గొడవ వదిలిపోయిందనుకొని గుండెల మీద చేతులేసుకొని ఆ రోజు రాత్రి ధైర్యంగా నిద్రపోయాను.
  మరుసటి రోజు ఇంటి దగ్గరకు ఉదయ్‌భాస్కర్ వచ్చారు. ఇంట్లోకి రమ్మంటుండగానే చేతిలో పదివేల రూపాయలు పెట్టారు. ఒక్కసారి షాక్. అస్సలు ఊహించని పరిణామం అది. అది కేవలం అడ్వాన్స్ అని, మిగతా డబ్బు సినిమా పూర్తయ్యేలోపు ఇస్తామని చెప్పే సరికి... ఏం మాట్లాడాలో కూడా అర్థం కాని స్థితి.  అలా ‘సంప్రదాయం’ సినిమాతో సినీపరిశ్రమకు పరిచయం అయ్యాను. కృష్ణగారికి అసిస్టెంట్‌గా, బ్రహ్మానందం గారితో హాస్యసన్నివేశాల్లో నటించాను. తొలి సినిమాలోనే అలా ప్రముఖులతో కలసి నటించే అవకాశం రావడం నిజంగా నా అదృష్టం.
 రిపోర్టింగ్: బి. జీవన్ రెడ్డి
  


 కామెడీ క్లాస్: వేణు మాధవ్
 ఆకలి - ఆధ్యాత్మికత
 ఊళ్లోని మతపెద్ద నసీరుద్దీన్‌ను ఒకరోజు విందుకు ఆహ్వానించాడు. కుశల ప్రశ్నలు పూర్తయ్యాక మతపెద్ద బాతాఖానీ ప్రారంభించాడు. క్రమంగా బాతాఖానీ ఆధ్యాత్మిక ప్రసంగంగా మారింది. ఆకలితో నకనకలాడుతున్న నసీరుద్దీన్‌కు సహనం నశించి, ‘మిమ్మల్ని ఒక ప్రశ్న అడగవచ్చా?’ అని సాధ్యమైనంత వినయంగా అడిగాడు.
 ‘తప్పకుండా’ అని బదులిచ్చాడు పెద్దాయన.
 
 ‘మీ కథల్లోని మనుషులు ఎన్నడూ భోజనం చేయరా?’ ప్రశ్నించాడు నసీరుద్దీన్.
 నాలుక్కరుచుకుని ‘ఇక భోజనానికి లేద్దాం’ అంటూ తన వాగ్ధాటికి స్వస్తి చెప్పాడాయన.
  
 సెలూన్ - హాస్పిటల్
 పేషెంట్‌ను తరుముతూ డాక్టర్ వీధిలో పరుగు తీస్తుంటాడు. దారినపోయే దానయ్య అతడిని ఆపి ఇలా అడుగుతాడు: ‘దొంగనా తరుముతున్నారు?’
 డాక్టర్: కాదయ్యా! నా పేషెంట్.. ప్రతిసారీ ఇలాగే చేస్తున్నాడు. ఈసారి వాణ్ణి వదలను గాక వదలను.
 దారినపోయే దానయ్య: ఏం చేశాడేంటి?
 డాక్టర్: బ్రెయిన్ సర్జరీ కోసమంటూ ఇప్పటికే నాలుగుసార్లు నా దగ్గరకు వచ్చాడు. సర్జరీకి సిద్ధం చేసి, తలగొరిగిన తర్వాత తుర్రుమంటాడు. ప్రతిసారీ ఇదే తంతు.
  
 నాకొద్దీ మొగుడు
 రమ: మీ ఆయన నెలరోజుల్నుండీ కనిపించడం లేదంటున్నావ్, మరి పోలీస్ కంప్లెయింట్ ఇవ్వలేదా?
 సుమ: పోయినసారి ఇస్తే, వెతికి వెతికి తెచ్చారే... అందుకే ఇవ్వలేదు...
  
 నో తగ్గుదల
 ‘‘ఈ క్లాత్ పదిమీటర్లు తీసుకుంటే మీటరు ఎంతకిస్తావ్?’’
 ‘‘నాలుగొందలండి’’
 ‘‘కాస్త తగ్గించవయ్యా’’
 ‘‘ఎన్ని మీటర్లు తగ్గించమంటారు?’’
  
 అదీ జన్మస్థానమే!
 టీటీ: ఎక్కడకు వెళుతున్నారు?
 రంగా: రాముడు పుట్టిన చోటుకు
 టీటీ: టికెట్టు ఉందా?
 రంగా లేదు
 టీటీ: అయితే, పదండి..
 రంగా: ఎక్కడికి?
 టీటీ: శ్రీకృష్ణుడు పుట్టిన చోటుకు
  
 వేణుమాధవ్ ఎంపిక చేసిన కార్టూన్స్


 కామెడీ క్లాస్: వేణు మాధవ్
 ప్రపంచంలో ఎవడైనా ఇంటర్ రెండేళ్లు  జదువుతడు, డిగ్రీ మూడేళ్లు జదువుతడు. కానీ నేను స్పెషల్‌గదా... టెన్తు గూడా రెండేళ్లు జదివిన. ఫ్రెండ్సుతోటి తిరుగుడే తిరుగుడు... అదీ కథ! టెన్తు కోదాడలోనే చదివిన. చైతన్యకుమార్ సార్ అని వుండె. ‘‘నువ్వు చదువొద్దు, హాఫ్ అన్ అవర్ అట్ల క్లాసులో గూర్చోరా’’ అనేటోడు. కదలకుండా కూర్చుంటేనైనా రెండు ఒక్కట్లు రెండు, రెండు నాళ్లు ఐదు అని చెప్పచ్చని చూసేటోడు. మనకు ఐదు నిమిషాలు సీటు నిలుస్తదా!
  
 అట్లనో ఇట్లనో టెన్తు పాసై, ఇంటర్లో చేరితి. ‘కెఆర్‌ఆర్ జూనియర్ అండ్ డిగ్రీ కాలేజీ’. కెఆర్‌ఆర్ అంటే కొండపల్లి రాఘవమ్మ, రంగారావు. అది బాలాజీనగర్ తండాలో ఉండేది. కాలేజీలో ఏమన్న సక్కగయిన్నా... ఆడపిల్లల్ని ఏడిపిచ్చుడు, జడలు ముడేసుడు... చేరిన వారంలనే నా మీద పదమూడు కంప్లెయింట్స్! అక్కడ్నే మా సీనియర్ ఒకాయినుండె. తారా సీతయ్య... మాకు బాగా కావాల్సినోడే...  సీతన్నా సీతన్నా అని పిలిచేది.. కొద్దిగ మావాని మంచిచెడ్డలు జూసుకొమ్మని మా అమ్మ చెప్పినట్టుంది... ఒకరోజు కాలేజీ అయిపోయినంక ఇంటికొస్తుంటే నా ఎనుకే వచ్చిండు. దగ్గర్ల ఒక రైసుమిల్లు ఉంటది...  ఎనుకకు తీసుకపోయిండు... కిస్సులే కిస్సులు... ఇంకోమో అనుకునేరు, విపరీతమైన కొట్టుడు! మళ్లీ ఆడపిల్లల జోలికి పోలేదు!
  
 రైళ్లు ధడ ధడ ధడ
 పూరీ జగన్నాథ్ ‘నేనింతే’ తీస్తున్నడని నాకు తెల్సింది. అది సినిమా బేస్డ్ సినిమా. జగనన్నకు ఫోన్ చేసిన. ‘‘అన్నా, నా దగ్గర ఒక స్టోరీ ఉంది, చెప్త...’’ అంటే, ‘‘ఓకే’’ అన్నడు. అప్పుడు నేను వేరే షూటింగులుంటి. ఫోన్లనే ఆయనకు ఆ కథ చెప్పిన. ‘‘సూపర్ ఉంది వేణు’’ అన్నడు.
 
 తమిళ్ డెరైక్టర్స్‌కు ఎట్ల ప్రిఫరెన్స్ ఇస్తరు మనవాళ్లు! అందుకే బ్రహ్మానందం నాకు అసిస్టెంట్ ఛాన్స్ ఇవ్వడు... కట్ చేస్తే-
  రవితేజ దగ్గరికి వెళ్త. అప్పుడాయన హోటల్లో కూర్చుంటడు. ‘‘చాయ్ చెప్పన్నా, కథ జెప్త’’ అంటా. వచ్చిన చాయ్ తాక్కుంట, కథ మొదలుపెడుత.
  ‘‘హీరోకు ఎయిడ్సు, హీరోయిన్‌కు ఎయిడ్సు... ఇద్దరు లవ్‌లో పడ్డరు...’’
  ‘‘క్లైమాక్సులైన తగ్గుద్దా’’ అంటాడు రవితేజ,  ‘సంకనాకిపోద్దని’. ‘‘ఇదే సినిమాను గీతాంజలి అని పేరుపెట్టి మణిరత్నం తీస్తే మీరంతా హిట్ చేసిన్రు గదా’’ అని నేనంటే అందరూ నవ్వి నన్ను ఎంకరేజ్ చేస్తరు.
  
 కట్ చేస్తే- ఒక హీరో(సుబ్బరాజు) దగ్గరికి వెళ్త. వెళ్లేముందు సిగరెట్ నుషితో బొట్టు పెట్టుకుంట. పేరు కూడా సెంథిల్ అని మార్చుకుంట. సెట్లోకి వెళ్లగానే, ‘‘సెంథిల్ అంటే మీరేనా?’’ అని హీరో అడుగుతడు. ‘‘నాన్ దా’’(నేనే) అంట.
  కుర్చీల్లో కూర్చుంటం. హీరో సెల్ ఆఫ్ చేయిస్త. ‘‘పవన్‌కళ్యాన్, ఎన్టీయార్ ఎల్లామ్ అడిగారు... నాన్ నోస్ అన్నా...’’ అని బిల్డప్పు ఇచ్చి, కథ మొదలుపెడుత.
  
 కన్నులెందు ఒరు జూమ్ బ్యాక్ వన్ దా ఫస్ట్ షాట్ (కంట్లో నుంచి జూమ్ బ్యాక్ చేస్తే ఫస్ట్ షాట్)... హీరో సెప్పుకుట్టువాడి మాదిరి... బాబు సైకిల్ మీద వరువార్ వరువార్ (సైకిల్ మీద వస్తుంటాడు)... పాతిక రైళ్లు గాల్లో ధడ ధడ ధడ, అది దా హీరో ఇంట్రడక్షన్...
  ‘బాబు సైకిల్ మీదా?’ అని అడుగుతాడు పక్కనున్న హీరో అసిస్టెంట్.
  ‘ఓ మీ ఇమేజ్ కదా... బెంజ్ కారులో వరువార్ వరువార్’... అని వెటకారం చేస్త. హీరోయిన్ ఎవరు? త్రిషతో ఆల్రెడీ సినిమా చేశానంటాడు హీరో. ఇలియానాతో కూడా ఈమధ్యే అయిపోయిందంటాడు. దీపికా పడుకోనే పేరు చెబుతాడు. ‘పడుకోనే’కు దీర్ఘం తీసి- మళ్లీ స్టోరీ షురు... హీరోయిన్ కోవెలలో నడుచుకుంటూ వస్తుంటే దేవత మాదిరి ఇరుప్పా... అటు హీరో
 
 ఇటు హీరోయిన్... కట్ పన్నా (కట్ చేస్తే)...  తీన్‌మార్ మాదిరి ఒరు సాంగ్... ఎలాంగే ఎలాంగే... సింగపూర్లో పల్లవి... ఒరు చరణం వందు అమెరికా(ఒక చరణం అమెరికాలో)... ఇన్నొరు చరణం వందు హైద్రాబాద్‌లో సముద్రం సెట్టు...
  హైద్రాబాద్‌లో సముద్రం అనగానే, ‘‘నువ్వెక్కడినుంచి వచ్చినవ్‌రా’’ అంటడు.
  ‘‘మణిరత్నం, శంకర్, ఎస్ జె సూర్య ఎల్లారుమ్ నా రూమ్‌మేట్స్’’ అని చెప్త. వీళ్లు నీ రూమ్‌మేట్సారా అని యమకొట్టుడు కొడుతడు! ఇదీ నా స్టోరీ!


 కామెడీ క్లాస్,వేణు మాధవ్
 సై సినిమాలో  మొదట ‘నల్లబాలు’ ది చిన్న పాత్రే.  సినిమా స్టార్టింగ్‌లో కాలేజీ గోడ మీద పొలిటికల్ లీడర్ పేరు రాస్తూ నల్లబాలు ప్రత్యక్షం అవుతాడు. అక్కడికీ మొదట్లోనే తన మనిషి ఒకరు వచ్చి హెచ్చరిస్తాడు. ‘అన్నా గోడ మీద రాయడానికి పర్మిషన్ కావాలంటనే..’ అని. వింటేగా! ‘నల్లబాలు.. నల్లతాచు లెక్క..’ అంటూ రెచ్చిపోతాడు. ఇదే ఊపులో ‘దేతడి... పోచమ్మ గుడి..’ అనగానే స్పాట్‌లో దర్శకుడు రాజమౌళి గారితో సహా అందరూ ఒక్కటే నవ్వు.
 
 కట్ చె ప్పగానే ‘ఈ దేతడి.. పోచమ్మ గుడి.. అంటే ఏంటి వేణు?’ రాజమౌళి అడిగారు. ‘ఏం లేదండీ, ఏదో ఫ్లోలో వచ్చేసింది చెప్పేశానంతే..’ అన్నాను. అది మొదట రాజమౌళి గారికి, ఆ తర్వాత ప్రేక్షకులకు బాగా నచ్చేసింది.  పదిహేను రోజుల తర్వాత రాజమౌళిగారి నుంచి ఫోన్. ‘వేణూ.. నల్లబాలును చూసి ఎడిటింగ్ రూమ్‌లో ఒక్కటే నవ్వులు... ఆ రోల్‌తో మరిన్ని సీన్లు చేద్దాం...’ అని చెప్పారు. నేను కూడా ఉత్సాహంగా ‘ఓకే’ అన్నాను.
  
 రెండోసీన్లో పోలీస్ ముందు‘సక్కమ్మక్కలేసుకొని కొడతా..’ అని బిల్డప్ ఇస్తాడు. భాసింపట్టు వేసుకొని కూర్చోవడాన్నే సక్కమ్మక్కలేసుకోవడం అంటారు. ‘అలా కూర్చొని ఎలా కొడతావయ్యా..’ అంటూ రాజమౌళిగారు నవ్వేశారు!
  
 ముచ్చటగా మూడో సీన్‌లో భిక్షూయాదవ్ ఇంటి ముందు. స్టూడెంటూ, పోలీసూ గాని బండోడొకడు గోడమీద రాయడాన్ని అడ్డుకొంటే ‘నల్లబాలు.. నాకి చంపేస్తా..’ అంటూ హెచ్చరిస్తాడు... నల్లబాలుకి కట్ చెప్పి ‘నాకి ఎలా చంపేస్తావు..వేణూ’అంటూ రాజమౌళి నవ్వులు స్టార్ట్ చేశారు!
  
 కొసమెరుపు ఏమిటంటే... ఫస్ట్‌సీన్లో ‘అన్నా గోడ మీద రాయడానికి పర్మిషన్ కావాలంటనే..’ అంటూ కనిపించే నల్లబాలు అనుచరుడు రాజమౌళి గారే. ఆయన స్క్రీన్ మీద కనిపించిన తొలి సినిమా కూడా ఇదే!
  
 దరువెయ్యబోతే... నాకు దరువేశారు!
 చిన్నప్పటి నుంచి డప్పు కొట్టడం అంటే ఇష్టం. అన్నం ప్లేట్ ముందుపెట్టినా దాంతో దరువేసేవాడిని. పప్పన్నం తిన్న తర్వాత, పెరుగన్నం వడ్డించేంతలో కూడా ప్లేట్ నా చేతిలోకి వచ్చేసేది. నా దరువు  పిచ్చిని చూసి అమ్మ తిట్టేది, కొట్టేది. అయినా మారలా! ఇలా నేను ఆరోక్లాసులో ఉన్నప్పుడు ఒకసారి మా కోదాడకు గద్దర్‌గారు వచ్చారు. ఊళ్లో ఆయన పాట అందుకొంటున్నంతలో ఎవరో అన్నారు.. ‘వేణూ డప్పు బాగా కొడతాడు’ అని. అంతే, అప్పటికప్పుడు ఒక డప్పు తెప్పించారు.
 
 పిల్లాడినైనా నా కోసం డ ప్పును ప్రత్యేకంగా సెట్‌చేసి కొట్టమన్నారు. అలా గద్దరన్న పాటకు దరువేసి నా ప్రతిభను ప్రదర్శిస్తున్నాను. ఇంతలో వెనక నుంచి ఎవరో పిలుస్తూ తడుతున్నారు. చిరాగ్గా వెనక్కుచూస్తే...అన్నయ్య! అక్కడ నుంచి ఇంటి వరకూ నా వీపున దరువేసుకొంటూ తీసుకెళ్లాడు. ఇంటికెళ్లాక అన్నయ్య కొట్టాడని అమ్మకు చెబితే ‘చదువుకోకుండా ఈ డప్పు పిచ్చి ఏంట్రా... పెద్దయ్యాకా శవాల ముందు డప్పుకొట్టుకొని బతుకుతావా...’ అంటూ  అమ్మ మరో నాలుగు తగిలించింది. మా ఫ్యామిలీలో నన్ను కొట్టనోళ్లు ఎవ్వరూ లేరేమో!
  
 ఫ్రేమింగే కామెడీకి టైమింగ్
 నవ్వించడం కోసం ప్రత్యేకంగా స్క్రిప్ట్, డైలాగుల అవసరం లేదు. ఒక్కోసారి కెమెరా ఫ్రేమింగే సీన్‌ను పండిస్తుంది. ఇది కూడా ‘సై’ సినిమా సమయంలోనే జరిగింది. విలన్ ప్రదీప్‌రావత్‌తో నాకు సీన్లుంటాయి. ‘భిక్షూ యాదవ్ అంటే వాడు నా శిష్యుడే...’ అంటూ, భిక్షూ ఎవరో తెలియక, అతడి ముందే బిల్డప్ ఇస్తాను. అసలు విషయం తెలిశాకా ‘అన్నా నీ గురువంట... నమస్తే పెట్టూ’ అంటూ భిక్షూ గ్యాంగ్‌లోని వాళ్లు అంటుంటారు.
 
 ఈ సీన్ చిత్రీకరణ కోసం మొదట ఒక స్టూల్ లాంటిది ఏర్పాటు చేసి నన్ను నిలబడమన్నారు. ఎందుకంటే ప్రదీప్‌రావత్ భారీ కాయం. ఆయన హైట్‌తో నేను మ్యాచ్ కావడానికి అలాంటి ఏర్పాటు చేశారు. అయితే అలా కాదు.. నేను మామూలుగానే నిలబడతాను, అప్పుడే ఫన్ పండుతుంది అని  చెప్పాను. ఇలా షూట్ చేస్తున్నప్పుడు ప్రదీప్ నాతో కిందకి చూస్తూ మాట్లాడుతుంటాడు, నేనేమో ఫస్ట్ ఫ్లోర్లోని మనిషిని చూస్తున్నట్టుగా చూస్తుంటా. ఆ సీన్‌కు ఈ ఫ్రేమింగ్  భలే సెట్ అయ్యింది. మా హైట్‌లలో వేరియేషన్‌ను గమనించిన రాజమౌళి గారి పకపకలు నాకు ఇప్పటికీ గుర్తే!


 *కామెడీ క్లాస్ : వేణు మాధవ్
 *ఆ సీన్ గుర్తొస్తే...
 దిల్ షూటింగ్... వినాయక్ లాంటి పెద్ద దర్శకుడితో పనిచేయడం... ఆ సినిమాలో నాది ఫుల్‌లెంగ్త్  క్యారెక్టర్ కావడంతో మంచి ఊపు మీదున్నా. పల్లెటూర్లో సీన్. విలన్ ఇంటికి నేను, నితిన్ వెళతాం. నితిన్ దొంగతనంగా అటకెక్కేస్తాడు. ఇంట్లోకి వెళితే విలన్ చంపేస్తాడని గ్యారంటీగా తెలుసు కాబట్టి... ఎక్కడ దాక్కోవాలో తెలీక రోడ్లు పట్టుకుని తిరుగుతుంటా. ఓ పిల్లగ్యాంగ్ పేకాడుతూ కనపడితే... వాళ్ల చేత  ‘పైసల్తియ్యి బే’ అని మర్యాదగా పిలిపించుకుని నేనూ కార్డ్స్ పట్టుకుంటా.
 
 ఆడాలంటే గేదెను కదలకుండా పట్టుకోవాలనేది కండిషన్. కార్డ్స్ చేతిలో ఉన్నాయి కాబట్టి... తాడును నడుముకి చుట్టుకుంటా. అది అటూ ఇటూ కదులుతూంటుంది. చిర్రెత్తి ‘నీ తల్లి...’ అని తిడతా. అసలే బర్రె.  మనకి పాలు ఇచ్చి పోషించేది... తిడుతుంటే ఊరుకుంటదా... కుప్పలు, వరికుప్పలు తేడా లేకుండా అది రన్నింగ్...  దాని తాడు మన నడుముకు ఉంది కాబట్టి వెనుకే నేను దొర్లింగ్.. ఈ సీన్ గుర్తొస్తే మీరంతా లాఫింగ్ కదా. షూటింగ్ అయిపోయాక ఇంటికెళ్లిన దగ్గర్నుంచి నాకు వామిటింగే. అప్పటికీ వినయ్ అన్న (వినాయక్) చెప్పాడు కూడా... వేణూ... డూప్‌ని పెడదాం అని. నేను వింటే కదా... బ్యాడ్‌టైమ్... సారీ బర్రె టైమ్.
  
 చిన్నతనంలోని సరదాలు
 మా ఊరు కోదాడ. టూరింగ్ టాకీస్ లాంటి చిన్న థియేటర్లలో ఏఎన్నార్, ఎన్టీయార్... సినిమాలు ఆడుతుండేవి. కొత్త బొమ్మ వచ్చిందని రిక్షాకు మైక్ పెట్టి ఎనౌన్స్ చేస్తూండేవారు. మైక్‌రిక్షా కనపడితే ఎక్కడలేని సంతోషం! దాని మీదకి ఒక్క ఎగురు ఎగిరి నేను మైక్ పట్టుకునేవాడ్ని. మన గొంతు ఊరంతా వింటుంటే గొప్పగా ఉండేది. ఇందులో చిన్న ఇబ్బంది ఏమిటంటే...  ఈ గొంతు మా అన్నయ్యలిద్దరికీ వినపడేది. దీంతో నన్ను వెతుక్కుంటూ వచ్చి, నిక్కరు విప్పి మరీ ఉతుక్కుంటా తీసుకుపోయేవారు. అమ్మా అన్నలు ‘కొట్టిన్రు చూడే’ అంటే అమ్మ అయ్యో అనకుండా... పాత చీపురు తీసుకుని తన వాటా తను పూర్తి చేసేది. హు... ఆ రోజులే వేరులెండి.
  
 బ్రేక్ తర్వాత...
 బ్రహ్మానందం అంటే  పాతకక్షలున్నాయి. అందుకే ఫస్ట్ మారుతి కారు కొన్నప్పుడు ఎమ్మెస్ అన్ననొక్కడ్నే ఎక్కన్నా అని పిలిచా. ఆయనింటే కదా. ‘‘బ్రహ్మానందాన్ని కూడా పిలవరా, బాగోదు’’ అంటూ పోజు కొట్టి నేను బ్రహ్మానందాన్ని కూడా పిలిచేలా చేశాడు. ఓ శుభముహూర్తాన ఊరి శివార్లలో షూటింగైపోయాక ఇద్దర్నీ కారెక్కించుకున్నా.
 
 కాసేపు మంచిగానే నడిపి... తర్వాత సూపర్‌స్పీడ్‌లో మెలికలు తిప్పేశా. ఎమ్మెస్సన్న కంగారు. ‘అరేయ్ ఆపరా’ అంటూ అరుపులు. నేనేమో కారు నడుపుతూ సీలింగ్ వంక కంగారుగా చూడడం... దీంతో ఎమ్మెస్ అన్న ‘ఏరా ఏంటి వెతుకుతున్నావ్?’ అని కంగారుగా అడిగితే, ‘‘బ్రేక్ అన్నా, పైన ఎక్కడో ఉండాలి కనపడట్లే’’ అన్నా. ఇగ చూస్కోండి... కారాపాక బ్రహ్మానందం గంటన్నర పాటు నవ్వీ నవ్వీ...
 రిపోర్టింగ్ : ఎస్.సత్యబాబు


  మంచిర్యాల టౌన్ : ప్రభుత్వం విద్యుత్ కోతల డోస్ పెంచింది. తాజాగా కోతల సమయాన్ని పెంచుతూ ఆదేశాలు జారీ చేసింది. మారిన వేళలు సోమవారం నుంచి అమలులోకి వచ్చాయి. ప్రస్తుతం మున్సిపాలిటీ, మండల, విద్యుత్ సబ్ స్టేషన్ పరిధిలో 6 గంటలు ఉన్న కరెంటు కోతలను 8 గంటలకు పెంచింది. జిల్లా కేంద్రంలో ఉన్న 4 గంటల కోతలను 6 గంటలకు పొడిగించింది.
 
  జిల్లా కేంద్రంలో ఉదయం 5 నుంచి 8 గంటల వరకు, మధ్యాహ్నం 2 నుంచి 5 గంటల వరకు, మున్సిపాలిటీ, మండల, సబ్‌స్టేషన్ హెడ్ క్వార్టర్ పరిధిలో ఉదయం 7 నుంచి 11 గంటల వరకు, మధ్యాహ్నం 2 నుంచి 6 గంటల వరకు విద్యుత్ కోతలు అమలులో ఉంటాయి. ఇక గ్రామీణ ప్రాంతాల్లో ఉదయం 6 గంటల నుంచి సాయంత్రం 6 గంటల వరకు విద్యుత్ కోతలు అమలు ఉంటాయి. అలాగే వ్యవసాయ పరిధిలో నాలుగు కేటగిరీల్లో త్రీ ఫేజ్ విద్యుత్ సరఫరా ఉంటుంది.
 
  ఏ కేటగిరీలో ఉదయం 3 నుంచి 8 గంటల వరకు, రాత్రి 10 గంటల నుంచి 12 గంటల వరకు, బీ కేటగిరీలో ఉదయం 9 నుంచి 2 గంటల వరకు, రాత్రి 12 గంటల నుంచి 2 గంటల వరకు, సీ కేటగిరీలో మధ్యాహ్నం 2 నుంచి రాత్రి 7 గంటల వరకు, మధ్యాహ్నం 2 నుంచి 4 గంటల వరకు, డీ కేటగిరీలో ఉదయం 8 నుంచి 10 గంటల వరకు, రాత్రి 10 గంటల నుంచి ఉదయం 3 గంటల వరకు త్రీఫేస్ సరఫరా ఉంటుంది. విద్యుత్ ఉత్పాదకత తక్కువగా ఉన్నందున విద్యుత్ కోతలు పెరిగాయని  మంచిర్యాల ట్రాన్స్‌కో డీఈ వేణుమాధవ్, ఏడీఈ స్వామి తెలిపారు.


 కుక్కకూ, యజమానికీ మధ్య ఉండే అనుబంధం నేపథ్యంలో రూపొందుతోన్న చిత్రం ‘టామీ’. ఇందులో యజమానిగా రాజేంద్రప్రసాద్ నటిస్తున్నారు. కుక్క చేసే విన్యాసాలు ఈ చిత్రానికి హైలైట్‌గా నిలుస్తాయని దర్శకుడు రాజా వన్నెంరెడ్డి చెబుతున్నారు. పాలకొల్లు, నరసాపురం పరిసరాల్లో ఈ చిత్రం షూటింగ్ జరుగుతోందని, నరసాపురం రైల్వే స్టేషన్‌లో మూడు రోజుల పాటు చిత్ర తారాగణంపై కీలక సన్నివేశాలు చిత్రీకరించామని రాజా వన్నెంరెడ్డి తెలిపారు.
  
  నిర్మాత హరిరామజోగయ్య మాట్లాడుతూ- ‘‘1925-37 మధ్యకాలంలో జీవించిన ఓ పెంపుడు శునకం యదార్థ గాథ ఆధారంగా ఈ సినిమాను తెరకెక్కిస్తున్నాం. ఈ నెల 20 నాటికి షూటింగ్ పూర్తవుతుంది’’ అని తెలిపారు. సీత, సురేశ్, ఎల్బీ శ్రీరామ్, రఘుబాబు, వేణుమాధవ్, ముంతాజ్ తదితరులు ఇతర పాత్రలు పోషిస్తున్న ఈ చిత్రానికి రచన: రాజేంద్రకుమార్, కెమెరా: మోహన్, సంగీతం: చక్రి, పాటలు: అనంతశ్రీరామ్.
  


 నటీనటులు: అల్లరి నరేశ్, ఇషా చావ్లా, స్వాతి దీక్షిత్, రావు రమేశ్, పోసాని కృష్ణ మురళి, వేణుమాధవ్, హేమ, రఘుబాబు, కోట శ్రీనివాసరావు
 దర్శకత్వం: సత్తిబాబు
 నిర్మాత: అంబికా రాజు
 సంగీతం: విజయ్ ఎబెనెజెర్
  
 ప్లస్ పాయింట్స్: 
 పర్వాలేదనిపించే క్లైమాక్స్
  
 మైనస్ పాయింట్స్: 
 కథ, కథనం, 
 సినిమా లెంగ్త్
 ఎడిటింగ్
 మ్యూజిక్
  
 గతంలో తనదైన స్టైల్ తో కామెడీ స్టార్ గుర్తింపు తెచ్చుకున్న 'అల్లరి' నరేశ్ ను ఫ్లాఫ్ లు వెంటాడుతున్నాయి. ఇటీవల విడుదలైన 'లడ్డూబాబు' ప్రేక్షకులను ఆకట్టుకోలేకపోయింది. లడ్డూబాబు తర్వాత ఓ తమిళ చిత్రం 'కలకలప్పు' రీమేక్ మలిచి తెలుగులో 'జంప్ జిలాని' చిత్రంగా ప్రేక్షకులకు అందించారు. సత్తిబాబు దర్శకత్వంలో అల్లరి నరేశ్ సరసన ఇషా చావ్లా, స్వాతి దీక్షిత్ లు నటించిన ఈ చిత్రం జూన్ 12 తేదిన ప్రేక్షకుల ముందుకు వచ్చింది. గత కొద్దికాలంగా పరాజయాల బారిన పడిన అల్లరి నరేశ్ కు 'జంప్ జిలాని' ఎలాంటి టాక్ సంపాదించుకుందో తెలుసుకోవాలంటే ఓసారి కథలోకి వెళ్లాల్సిందే. 
  
 సత్తిబాబు, రాంబాబు(అల్లరి నరేశ్) ఇద్దరు కవల పిల్లలు. సత్తిబాబు దురదృష్టానికి బ్రాండ్ అంబాసిడర్ అయితే, రాంబాబు చిల్లర దొంగతనాలు, పేకాటతో జల్సా చేసే ఓ పోకిరి లాంటోడు. సత్తిబాబు సోదరులకు నిడుదవోలులో ఒకప్పుడు గొప్పగా పేరు చెప్పుకునే సత్యనారాయణ కాఫీ విలాస్ అనే హోటల్ ఉండేది. అయితే కాలక్రమేణ ఫాస్ట్ ఫుడ్ సెంటర్లు, రెస్టారెంట్ల సంస్కృతి పెరగడంతో హోటల్ నష్టాల్లో కూరుకుపోతుంది. ఎలాగైనా తన వంశానికి గొప్ప పేరు తెచ్చిన హోటల్ కు పూర్వవైభవాన్ని సంపాదించే పట్టుదలతో ఉన్న సత్తిబాబు.. మాధవి(ఫుడ్ ఇన్స్ పెక్టర్)తో ప్రేమలో పడుతాడు. తమ హోటల్ లోనే పనిచేసే తన మరదలు(స్వాతి దీక్షిత్)ను రాంబాబు ప్రేమిస్తుంటాడు. కథ ఇలా సాగుతుండగా.. మాధవి ప్రేమను దక్కించుకోవడానికి సత్తిబాబు రాయలసీమలోని ఓ ప్రాంతానికి వెళ్లాల్సివస్తుంది. అయితే రాయలసీమకు వెళ్లిన సత్తిబాబు విలన్ గ్యాంగ్ వెంటాడుతుంటారు. సత్తిబాబును విలన్ గ్యాంగ్ ఎందుకు వెంటాడుతారు?. సత్తిబాబు, రాంబాబు తమ ప్రేమ వ్యవహారాన్ని పెళ్లి పీటలు ఎక్కించారా? తమ హోటల్ కు పూర్వ వైభవం తెప్పించడంలో సఫలమయ్యారా? అనే ప్రశ్నలకు సమాధానమే 'జంప్ జిలానీ'
  
 గతంలో ఎన్నో కామెడి పాత్రలతో ఆలరించిన అల్లరి నరేశ్ సత్తిబాబు, రాంబాబు పాత్రలతో ద్విపాత్రభినయం చేశారు. అయితే గతంలో పోషించిన పాత్రలతో పోల్చితే సత్తిబాబు, రాంబాబుల పాత్రలు విభిన్నమైనవనే ఫీలింగ్ కలుగదు. అల్లరి నరేశ్ రోటిన్ పాత్రలతో ప్రేక్షకులను సంతృప్తి పరించేందుకు ప్రయత్నం చేశారు. 
  
 ఇషా చావ్లా కొంత ప్రాధాన్యత ఉన్న పాత్ర లభించినా.. ఆ స్థాయిని చేరుకోలేదనే చెప్పవచ్చు. గ్లామర్ తో కూడా ఆకట్టుకోవడంలో ఇషా విఫలమైంది. స్వాతి దీక్షిత్ పాత్ర కేవలం గ్లామర్ కే పరిమితమైంది. రాయలసీమలో ఫ్యాక్షన్ నేతగా పోసాని కృష్ణమురళి తనదైన శైలిలో నటించారు. పాత్రల పరిధి మేరకు రావు రమేశ్ విలనిజంతో కూడిన కామెడీ పండించడంలోనూ తన మార్కును సొంతం చేసుకోలేకపోయారు. రఘుబాబు, వేణుమాధవ్ పాత్రలు అంతగా ఆకట్టుకోలేకపోయాయి. 
  
 విశ్లేషణ: 
  
 'హలో బ్రదర్' లాంటి కాన్సెప్ట్ తో మాస్, క్లాస్ కాంబినేషన్ తో ఈవీవీ చేసిన ప్రయోగాన్ని స్పూర్తిగా తీసుకుని రూపొందించిన సత్తిబాబు, రాంబాబు పాత్రలు ప్రేక్షకుల అంచనాలను చేరుకోలేకపోయింది. కథ లో పస లేకపోవడం, దానికి తోడుగా కథనం కూడా పేలవంగా ఉండటంతో అంతా గందరగోళంగా మారింది. వేణుమాధవ్, రఘుబాబు పాత్రలు సహజంగా హస్యాన్ని పండించలేకపోగా.. సన్నివేశాల మధ్య అవసరం లేకునా దూరిన ఫీలింగ్ కనిపించింది. ఇక చిత్ర నిడివి కూడా ప్రేక్షకుల సహనానికి పరీక్ష పెట్టడం ఖాయం. తొలిభాగం, ద్వితీయ భాగం ఫ్లాట్ గా నడిపించి... కైమాక్స్ తో మేనెజ్ చేస్తామని ప్లాన్ అంతగా వర్కవుట్ కాలేకపోయింది. ఈ చిత్ర అధిక భాగం విసిగించే రీతిలో సాగిన కొంతలో కొంత క్లైమాక్స్ ప్రేక్షకుడికి కొంత ఊరట కలిగించే అంశం. ఇక మ్యూజిక్ అంశానికి వస్తే తెలుగు నేటివిటి స్పష్టంగా మిస్సయిందనే చెప్పవచ్చు.   విజయ్ ఎబెనెజెర్ సంగీతం తెలుగు ప్రేక్షకుల టేస్ట్ కు దూరంగా ఉంది. మారుతున్న ప్రేక్షకుల అభిరుచి అంచనా వేయడంలో సత్తిబాబు తడబాటు గురయ్యారు. పాత చింతకాయ పచ్చడినే 'జంప్ జిలాని' అనే ప్యాక్ అందించారే తప్ప.. పక్కా హస్యాన్ని పంచలేకపోయారు. ఓవరాల్ గా చిత్ర విజయం ఏంటనే ప్రశ్న వేసుకుంటే... బీ, సీ సెంటర్లలో ప్రేక్షకుల ఆదరణ పొందితే తప్ప అల్లరి నరేశ్ ఖాతాలో సక్సెస్ చేరుతుంది. 
  
 ట్యాగ్: ప్రేక్షకులు 'జంప్ జిలాని'
  


 పవర్ స్టార్ పవన్ కల్యాణ్ స్థాపించిన జనసేన పార్టీ సూపర్ పార్టీ అని ప్రముఖ హాస్యనటుడు వేణుమాధవ్ అభివర్ణించారు. జనసేన పార్టీ మేనిఫెస్టో తనను బాగా ఆకర్షించిందన్నారు. పవన్ ఆశయాలు తనకు బాగా నచ్చాయని తెలిపారు. బుధవారం హైదరాబాద్లో టీడీపీ అధ్యక్షుడు చంద్రబాబు నాయుడుతో వేణుమాధవ్ భేటీ అయ్యారు.
 
 అనంతరం విలేకరులతో మాట్లాడారు. టీడీపీకి పవన్ కల్యాణ్ స్థాపించిన జనసేన పార్టీ మద్దతు ఇస్తుందని తాను ఆశిస్తున్నట్లు తెలిపారు. చంద్రబాబు ఆశయాలు నచ్చడం వల్లే తాను టీడీపీలో చేరుతున్నట్లు చెప్పారు. రానున్న శాసనసభ ఎన్నికల్లో తెలుగుదేశం పార్టీ తరపున పోటీ చేయాలని భావిస్తున్నట్లు వేణుమాధవ్ వెల్లడించారు. తనకు దేశవ్యాప్తంగా అన్ని ప్రాంతాలలో అభిమానులు ఉన్నారని తెలిపారు.
 
 ఆంధ్రప్రదేశ్లో ఎక్కడి నుంచైనా కూడా పోటీ చేస్తానన్నారు. చివరికి పాకిస్థాన్లో అభిమానులుంటే అక్కడి నుంచి కూడా పోటీ చేసేందుకు సిద్ధమని చమత్కరించారు. దాదాపు రెండు దశాబ్దాలుగా తెలుగుదేశం పార్టీతో తనకు అనుబంధం ఉన్న విషయాన్ని ఈ సందర్బంగా వేణుమాధవ్ గుర్తు చేశారు. నల్గొండ జిల్లా కోదాడ శాసనసభ నియోజకవర్గం నుంచి ఎన్నికల బరిలో నిలిచేందుకు అనుమతించాలని చంద్రబాబును వేణుమాధవ్ కోరారు.


 హైదరాబాద్ : హాస్యనటుడు వేణుమాధవ్ బుధవారం అసెంబ్లీ లాబీలో ప్రత్యక్షమై అందర్నీ ఆశ్చర్యపరిచాడు. ఈ సందర్భంగా ఆయన్ని విలేకర్లు పలకరించగా గతంలో తాను టీడీఎల్పీలో ఉద్యోగిగా పని చేశానని... ప్రస్తుతం షూటింగ్ లేకపోవటంతో నేతలను కలిసేందుకు వచ్చినట్లు తెలిపారు. టీడీపీ అధ్యక్షుడు చంద్రబాబు నాయుడు, టీడీపీ ఎమ్మెల్యేలను వేణుమాధవ్ కలిశాడు.
 
 కాగా వేణు మాధవ్ చదువుకునే రోజుల్లో  మిమిక్రీ చేసేవాడు. ఓ సందర్భంలో అప్పటి కోదాడ ఎమ్మెల్యే చందర్‌రావు టాకింగ్ డాల్‌లో ప్రోగ్రామ్ చేసిన  అతడిని  భువనగిరిలో తెలుగుదేశం పార్టీ మీటింగ్‌కి తీసుకెళ్లారు. అలా ఎన్టీఆర్ మహానాడులో వేణుమాధవ్ ప్రదర్శన ఇవ్వటం జరిగింది. అది ఎన్టీఆర్కు నచ్చటంతో ‘మీ సేవలు మాకెంతో అవసరం బ్రదర్’ అంటూ వేణుమాధవ్ను హిమాయత్‌నగర్ తెలుగు దేశం పార్టీ ఆఫీసులో చేర్చుకున్నారు. అక్కణ్ణుంచీ అసెంబ్లీలోని టీడీపీ లెజిస్లేటివ్ కార్యాలయంలో చేర్చారు.