న్యూఢిల్లీ: టార్గెట్‌ ఒలింపిక్‌ పోడియం పథకం (టాప్స్‌)లో కొత్తగా కాంపౌండ్‌ ఆర్చర్లను చేర్చారు. దీంతో ఎన్నో ఏళ్లుగా అంతర్జాతీయ ఆర్చరీ పోటీల్లో భారత్‌కు పతకాలు తెచి్చపెడుతున్న తెలుగుతేజం, ఆంధ్రప్రదేశ్‌ ఆర్చర్‌ వెన్నం జ్యోతి సురేఖకు ఇది కొత్త ఉత్సాహం ఇవ్వనుంది. భారత్‌ నుంచి ఒలింపిక్‌ పతక విజేతలను తయారు చేయడమే లక్ష్యంగా కేంద్ర క్రీడామంత్రిత్వ శాఖ ‘టాప్స్‌’ ద్వారా చేయూత ఇస్తోంది. అయితే ఇన్నాళ్లు ఒలింపిక్‌ క్రీడాంశాలకే ‘టాప్స్‌’ను అమలు చేస్తూ వచ్చారు. దీంతో ఒలింపిక్స్‌లో లేని కాంపౌండ్‌ కేటగిరీకి ‘టాప్స్‌’ను ఇవ్వడం లేదు. దీనివల్ల ప్రపంచ ఆర్చరీ పోటీల్లో దేశానికి, రాష్ట్రానికి పతక ప్రతిష్టలు తెస్తున్న జ్యోతి సురేఖ, పర్‌నీత్‌ కౌర్, అభిõÙక్‌ వర్మలాంటి వారు దూరమయ్యారు. తాజాగా క్రీడామంత్రిత్వ శాఖ నిర్ణయంతో ఒలింపిక్‌ ఈవెంట్‌తో సంబంధం లేకపోయినా 8 మంది కాంపౌండ్‌ ఆర్చర్లకు లబ్ధి చేకూరనుంది. మరో తెలుగుతేజం రికర్వ్‌ ఆర్చర్‌ ధీరజ్‌ బొమ్మదేవర ఇప్పటికే ఈ పథకంలో ఉన్నాడు. డోపింగ్‌లో పట్టుబడిన మహిళా రెజ్లర్‌ రితిక హుడాను ‘టాప్స్‌’ నుంచి తొలగించారు. 2024–పారిస్‌ ఒలింపిక్స్‌ కోసం 179 మందికి ‘టాప్స్‌’ను అమలు చేశారు. ప్రదర్శన, వైఫల్యం, డోపింగ్‌ కారణాలతో గతేడాది నాటికి 179 జాబితా కాస్తా 94 మందికి పడిపోయింది. ఈ ఏడాది మొదలవుతుండగానే ‘టాప్స్‌’ కోర్‌ గ్రూప్‌ జాబితాను 118 మందికి పెంచారు. ఇందులో 57 మంది అథ్లెట్లు కాగా, మరో 61 మంది పారాథ్లెట్లు ఉన్నారు. క్రీడాశాఖ ప్రత్యేక డెవలప్‌మెంట్‌ గ్రూప్‌ జాబితాలో అథ్లెట్లు అనిమేశ్‌ కుజుర్‌ (200 మీ. పరుగు), తేజస్విన్‌ శంకర్‌ (డెకథ్లాన్‌), 4–400 మీ. రిలే జట్టు సభ్యులు విశాల్, జయ్‌ కుమార్, రాజేశ్‌ రమేశ్, అమోజ్‌ జాకబ్, మొహమ్మద్‌ అజ్మల్, సంతోష్‌ కుమార్‌లు ఉన్నారు. ఈ గ్రూప్‌లోనే టేబుల్‌ టెన్నిస్‌ ప్లేయర్లు మానుశ్‌ షా, మానవ్‌ ఠక్కర్, దియా చిటాలేలకు చోటుదక్కింది. ‘టాగ్‌’లో కొత్తగా గోల్ఫ్, సర్ఫింగ్‌ టార్గెట్‌ ఆసియా క్రీడల గ్రూప్‌ (టీఏజీజీ–టాగ్‌)లో కొత్తగా లబ్దిపొందే క్రీడాంశాలను పెంచారు. ‘టాప్స్‌’లో లేని గోల్ఫ్, సర్ఫింగ్, టెన్నిస్‌ క్రీడాకారులకు ‘టాగ్‌’ కింద చేయూత అందిస్తారు. ఈ ఏడాది జపాన్‌లో ఏషియాడ్‌ జరుగనుంది. ఈ ఆసియా క్రీడల్లో పతకాలు తేవాలనే ఉద్దేశంతో గోల్ఫర్లు శుభాంకర్‌ శర్మ, దీక్ష డాగర్, టెన్నిస్‌ ప్లేయర్లు సుమిత్‌ నగాల్, యూకీ బాంబ్రీ, మాయ రాజేశ్వరన్‌ సహా 48 మందిని ‘టాగ్‌’ పథకం కింద ఎంపిక చేశారు. ఇందులో ఇప్పటికే ఈక్వె్రస్టియన్స్‌ (గుర్రపుస్వారీ) ఫౌద్‌ మీర్జా, అనుశ్‌ అగర్‌వాలా, ఫెన్సర్‌ భవానీ దేవి, జిమ్నాస్ట్‌ ప్రణతి నాయక్‌ తదితరులు ఉన్నారు. ‘టాప్స్‌’, ‘టాగ్‌’ పథకాల కింద కోచింగ్, ఇతరాత్ర ఖర్చుల కింద నెలకు రూ. 50 వేలు చొప్పున ఆర్థిక సాయం చేస్తారు. అవసరమైతే మరో రూ. 25 వేలు పాకెట్‌ అలవెన్స్‌గా అందజేస్తారు. అలాగే విదేశీ శిక్షణలో ఉన్నన్ని రోజులు రోజుకు రూ. 2250 (25 డాలర్లు) అదనంగా ఇస్తారు. అయితే విదేశీ శిక్షణకు ముందుగా ఆమోదం పొందాల్సివుంటుంది.

న్యూఢిల్లీ: భారత షూటర్, లండన్‌ ఒలింపిక్స్‌ కాంస్య పతక విజేత గగన్‌ నారంగ్‌కు స్పోర్ట్స్‌ అథారిటీ ఆఫ్‌ ఇండియా (సాయ్‌) కీలక బాధ్యతలు అప్పగించింది. ‘సాయ్‌’ ఆధ్వర్యంలోని మిషన్‌ ఒలింపిక్‌ సెల్‌ (ఎంఓసీ)లో సభ్యుడిగా నారంగ్‌ను ఎంపిక చేసింది. ప్రతిభావంతులైన ఆటగాళ్లను గుర్తించి వారిని ఒలింపిక్స్‌కు సన్నద్ధం చేసే కార్యక్రమంలో భాగంగా 2014 నుంచి టార్గెట్‌ ఒలింపిక్‌ పోడియం స్కీమ్‌ (టాప్స్‌) పని చేస్తోంది. ‘టాప్స్‌’ కోసం ఆటగాళ్లను గుర్తించడం, వారి సన్నాహకాలకు ఆర్ధికపరంగా సహకారం అందించే విషయంలో తగిన సూచనలు, సలహాలు అందించడం, ఫలితాలను పర్యవేక్షించడమే ‘మిషన్‌ ఒలింపిక్‌ సెల్‌’ బాధ్యత. 2024 పారిస్, 2028 లాస్‌ ఎంజెలిస్‌ ఒలింపిక్స్‌ కోసం అథ్లెట్లను ఎంపిక చేయడంలో తాను భాగస్వామిని కాబోతున్నట్లు హైదరాబాద్‌ షూటర్‌ గగన్‌ వెల్లడించాడు. ‘స్వల్పకాలిక, దీర్ఘకాలిక లక్ష్యాలను పెట్టుకొని డెవలప్‌మెంట్‌ గ్రూప్‌ కోసం ఆటగాళ్లను ఎంపిక చేయడంలో ఎంఓసీ కీలక పాత్ర పోషిస్తోంది. వ్యక్తిగత, టీమ్‌ ఈవెంట్లలో ఆయా ఆటగాళ్ల అవసరాలను గుర్తించి ప్రత్యేక శిక్షణ కోసం నిధులు అందేలా చూడటంతో పాటు అత్యుత్తమ స్థాయి కోచింగ్‌ సౌకర్యం, ఫిట్‌నెస్‌ తదితర అంశాలపై కూడా ఎంఓసీ దృష్టి పెడుతుంది. ఈ బాధ్యతను సమర్థంగా నిర్వర్తిస్తా’ అని గగన్‌ వెల్లడించాడు. 

న్యూఢిల్లీ: విశ్వ క్రీడల్లో పతక విజేతలను తయారు చేసేందుకు ‘టార్గెట్‌ ఒలింపిక్‌ పోడియం స్కీమ్‌’ (టాప్స్‌)ను కొనసాగిస్తామని కేంద్ర క్రీడల మంత్రి అనురాగ్‌ ఠాకూర్‌ స్పష్టం చేశారు. 2024–పారిస్, 2028–లాస్‌ ఏంజెలిస్‌ ఒలింపిక్స్‌ క్రీడల వరకు ‘టాప్స్‌’ను పొడిగిస్తామని ఆయన హామీ ఇచ్చారు. భారత ఒలింపిక్‌ సంఘం ఏర్పాటు చేసిన సన్మాన కార్యక్రమంలో టోక్యో పతక విజేతలకు అనురాగ్‌ ఠాకూర్‌ ప్రోత్సాహకాలు అందజేశారు. ఐఓఏ స్వర్ణ విజేత నీరజ్‌ చోప్రాకు రూ. 75 లక్షలు, ‘రజత’ విజేతలు మీరాబాయి, రవి లకు రూ. 50 లక్షలు చొప్పున, కాంస్యాలు గెలిచిన సింధు, లవ్లీనా, బజరంగ్‌లకు రూ. 25 లక్షలు చొప్పున, హాకీ టీమ్‌ ఈవెంట్‌లో కాంస్యం గెలిచిన జట్టు సభ్యులకు ఒక్కొక్కరికి రూ. 10 లక్షల చొప్పున బహూకరించారు.

న్యూఢిల్లీ: ఆసియా క్రీడల్లో రజతం సాధించిన భారత మహిళల హాకీ జట్టును త్వరలో టార్గెట్‌ ఒలింపిక్‌ పోడియం పథకం (టాప్స్‌)లో చేర్చనున్నారు. తదుపరి ‘టాప్స్‌’ సమావేశంలో జట్టులోని మొత్తం 18 మంది సభ్యులను ఈ పథకం కిందికి తేనున్నారు. ఇప్పటికే భారత పురుషుల జట్టు ‘టాప్స్‌’లో ఉంది.    48 మంది ప్రాబబుల్స్‌... ‘సాయ్‌’ ఆధ్వర్యంలో నేటి నుంచి బెంగళూరులో జరుగనున్న జాతీయ మహిళల శిబిరానికి హాకీ ఇండియా 48 మందితో కూడిన ప్రాబబుల్స్‌ జాబితా ప్రకటించింది. ఇందులో ఆంధ్రప్రదేశ్‌కు చెందిన గోల్‌కీపర్‌ ఇతిమరపు రజని, తెలంగాణకు చెందిన ఫార్వర్డ్‌ యెండల సౌందర్య చోటు దక్కించుకున్నారు.


 టాప్ స్కీమ్‌లో చేర్చడంపై క్రీడాశాఖ వ్యాఖ్య
 
  న్యూఢిల్లీ : భారత బ్యాడ్మింటన్ డబుల్స్ జోడి జ్వాల-అశ్వినిలను టార్గెట్ ఒలింపిక్ పోడియం (టాప్) స్కీమ్‌లో చేర్చడాన్ని ఎప్పుడూ మర్చిపోలేదని కేంద్ర క్రీడాశాఖ స్పష్టం చేసింది. ఏప్రిల్ 21న జరిగిన ఐడెంటిఫికేషన్ కమిటీ సమావేశంలోనే వాళ్ల పేర్లను పరిగణనలోకి తీసుకున్నామని వెల్లడించింది. ‘ఎంపీ అనురాగ్ ఠాకూర్ నేతృత్వంలోని కమిటీ కామన్వెల్త్ గేమ్స్ తర్వాత వీళ్ల ప్రదర్శన గురించి చర్చించింది. చర్చ తర్వాత ఈ ఇద్దర్ని స్కీమ్‌లోకి తీసుకురావాలని నిర్ణయించింది.
 
 డబుల్స్‌లో వీళ్లిదరికి కలిపి శిక్షణ ఇప్పించాలని కమిటీ భావించింది’ అని క్రీడా శాఖ వర్గాలు పేర్కొన్నాయి. బ్యాడ్మింటన్‌లో సైనా, సింధు, కశ్యప్, శ్రీకాంత్, గురుసాయిదత్, హెచ్.ఎస్.ప్రణయ్‌లను టాప్‌కి ఎంపిక చేయగానే... జ్వాల, అశ్విని క్రీడాశాఖపై తీవ్రస్థాయిలో ధ్వజమెత్తిన సంగతి తెలిసిందే.