కొందరు బ్యాట్మింటన్‌ ఆడుతుంటే దూరంగా పడిన షటిల్‌ను వాళ్ల పెంపుడు శునకం పరుగెత్తుకెళ్లి నోటితో కరిచి తెచ్చివ్వడం చూస్తూనే ఉంటా. అయితే ఈ రోబో శునకం మాత్రం షటిల్‌ను తెచ్చివ్వడానికి బదులు షటిల్‌బ్యాట్‌ పట్టుకుని ఆటకు సిద్ధమైంది. రోబోటిక్స్, కృత్రిమ మేథ, క్రీడాంశాల సమ్మేళనంగా రూపుదిద్దుకున్న ఈ కొత్త తరహా రోబో ఇప్పుడు రోబోటిక్‌ రంగంలో చర్చనీయాంశమైంది. బ్యాడ్మింటన్‌లో చకాచకా షటిల్‌తో షాట్స్‌ కొడుతుంటే టకాటకా తిరిగి షాట్స్‌ కొడుతున్న చిన్న రోబో శునకానికి ‘ఏఎన్‌వైఎంఏఎ–ఎనిమల్‌’అని పేరు పెట్టారు. స్విట్జర్లాండ్‌లోని ప్రభుత్వరంగ విశ్వవిద్యాలయం అయిన ఈటీహెచ్, జ్యూరిచ్‌లోని పరిశోధకులు ఈ రోబో శునకాన్ని రూపొందించారు. మెషీన్‌ లెర్నింగ్, రోబోటిక్స్‌ల మేలు కలయికగా దీనిని తయారుచేశామని పరిశోధకులు చెప్పారు. మనిషి తరహాలో వేగంగా కదులుతూ షటిల్‌ గమనాన్ని గుర్తిస్తూ తిరిగి షాట్‌ కొట్టగలడం ఈ రోబో శునకం ప్రత్యేకత. వర్సిటీలోని రోబోటిక్స్‌ సిస్టమ్స్‌ ల్యాబ్‌లోని ప్రొఫెసర్‌ మార్కో హట్టర్‌ సారథ్యంలోని పరిశోధనా బృందం ఈ రోబోను సృష్టించింది. ఇది ఎలా పనిచేస్తుంది? ఈ రోబో శునకం బరువు 50 కేజీలుకాగా ఎత్తు 1.5 అడుగులు మాత్రమే. ఎదురుగా షటిల్‌కాక్‌ దూసుకొచ్చే విధానాన్ని విశ్లేషించి, దానికి అనుగుణంగా కాళ్లు కదపాల్సిన విధానాన్ని విశ్లేషించి ఈ రోబోకు ప్రోగ్రామింగ్‌ చేశారు. ఎదురుగా నిలబడిన ఆటగాడు ఎంత ఎత్తు నుంచి షటిల్‌కాక్‌ కొట్టాడు? కాక్‌ ఎంత ఎత్తు నుంచి దూసుకొస్తోంది? ఎంత వేగంతో వస్తోంది? అది ఏ దిశలో నేలను తాకొచ్చు? అనే పలు అంశాలపై తొలుత పరిశీలనచేసి ఓ అంచనాకొచ్చారు. తర్వాత కాక్‌ పథానికి తగ్గట్లు ఎనిమల్‌ రోబో శునకం నాలుగు కాళ్లను ఎటు వైపునకు కదపాలి. పరుగెత్తేలా లేదంటే ఇంకా పైకి లేచి కొడితే సరిపోతుందా? ఒకవేళ పరిగెడితే వెంటనే పడిపోకుండా స్థిరంగా నిలదొక్కుకోవడం ఎలా? అనే అనేక అంశాలపై ముందస్తు అంచనాప్రోగ్రామ్‌లను రాసుకొని వాటితో తొలుత పరీక్షలు జరిపి విజయవంతమయ్యారు. తర్వాత అన్నింటినీ కలిపి ఆటగాడు కొట్టిన కాక్‌ను వేగంగా తిరిగికొట్టడం, అది కూడా కోర్ట్‌కి లోపల పడేలా షాట్‌ కొట్టడం వంటివి ప్రోగ్రామింగ్‌కు జతచేశారు. ఆట వేగానికి తగ్గట్లుగా రోబో శునకం నాలుగు కాళ్లు మాత్రమే కాదు ప్రత్యేక ‘చేయి’సైతం చురుకుగా కదిలేలా పలు మార్పులుచేశారు. ఎట్టకేలకు మనిషి ఆటను సైతం ఎదిరించేలా స్థాయికి రోబోను సృష్టించారు. – సాక్షి, నేషనల్‌ డెస్క్‌


 లండన్: స్మార్ట్ ఎల్‌ఈడీ (లైట్ ఎమిటింగ్ డయోడ్) లైట్లను ఉపయోగించి ఇంటర్నెట్ ఆఫ్ థింగ్స్‌ను కనెక్ట్ చేయవచ్చని శాస్త్రవేత్తలంటున్నారు. బొమ్మలు, మన ఇంట్లో ఉండే వివిధ రకాల వస్తువులకు బల్బుల నుంచి వచ్చే కాంతి ద్వారా నెట్‌వర్క్‌ను అనుసంధానించవచ్చని వారు చెబుతున్నారు.
 
 ఇళ్లలో వాడే ఎల్‌ఈడీ బల్బులు కాంతిని ప్రసరించడంతోపాటు లైటు సెన్సార్లుగా కూడా పనిచేస్తాయి. ఇవి ఒక నెట్‌వర్క్‌ను ఏర్పాటు చేసుకుని సందేశాలు పంపుకోగలవు, వస్తువులకు కనెక్ట్ అవ్వగలవు. గృహోపకరణాలు, ధరించదగిన వస్తువులు, సెన్సార్లు, బొమ్మలను బల్బుల కాంతితో కలిపి ఉంచడానికి ఎల్‌ఈడీల ద్వారా వీలవుతుంది. ఈ పరిశోధనను స్విట్జర్లాండ్ శాస్త్రవేత్తలు చేశారు.


 మానసికం
 ఇంట్లో రాత్రి వేళ ఒంటరిగా ఉన్నప్పుడు వెనుక ఎవరో ఉన్నట్లుగా అనిపిస్తుంది. వెనక్కి తిరిగిచూస్తే ఎవరూ ఉండరు. కిటికీలో నుంచి ఎవరో తొంగిచూస్తున్నట్లు అనిపిస్తుంది. దగ్గరికి వెళ్లి చూస్తే ఎవరూ కనిపించరు... ఇలాంటివి చాలామందికి అనుభవంలో ఉన్న సంఘటనలే. అందుకే... వాటి గురించి లోతుగా పరిశోధించడానికి స్విట్జర్లాండ్  శాస్త్రవేత్తలు రంగంలోకి దిగారు. కొందరు వ్యక్తులను ఎంచుకొని, వారి కళ్లకు గంతలు కట్టి రోబోట్ సహాయంతో ప్రయోగశాలలో  కొన్ని పరిశోధనలు నిర్వహించారు.
  
 ఈ ప్రయోగంలో పాల్గొన్నవారికి, ఒకరికి కనిపించిన దృశ్యాలు మరొకరికి కనిపించలేదు. అప్పటి వారి శారీరకస్థితి, ఆలోచన సరళిని బట్టి కంటి ముందు దృశ్యాలు ప్రత్యక్షం కావడం ప్రారంభమయ్యాయి. కొందరైతే ఆ దృశ్యాలను తట్టుకోలేక ‘‘ఇక ఆపండి’’ అని అరిచారు.
  
 ‘మెదడు పనితీరు’ ‘శరీర కదలికలు’ ‘బాడీ పొజిషన్ ఇన్ స్పేస్’ ఆధారంగా భ్రమాజనిత దృశ్యాలు ఆవిష్కృతమవుతున్నట్లు శాస్త్రవేత్తలు చెప్పారు. దీంతో పాటు అతి భౌతిక, భావోద్వేగ సందర్భాలు, ఆప్తులను కోల్పోయిన దుఃఖం, శారీరక రోగాలు, మానసిక సమస్యలు, వైద్యపరిస్థితులు... మొదలైనవి భ్రమాజనిత దృశ్యాలకు కారణమవుతాయని శాస్త్రవేత్తలు చెబుతున్నారు.


 ఇంట్లో రకరకాల పనులను చేసిపెట్టే పలు రోబోల గురించి మనకు ఇదివరకే తెలుసు. అయితే చిత్రంలో రెండు పెద్ద సైజు పాచికలు అతుక్కుని ఉన్నట్లు కనిపిస్తున్న ఈ బంతులు కూడా అలాంటి రోబోలే. మనం ఆర్డరేస్తే చాలు.. వెంటనే దొర్లుకుంటూ వెళ్లి ఓ టేబుల్‌గా లేదా చైర్‌గా లేదా స్టూల్‌గా ఎలా కావాలంటే అలా అమరిపోతాయి. రూమ్‌బోట్స్ అనే రోబోలు ఒక్కోటి 9 అంగుళాల సైజు ఉంటాయి. ఓ బ్యాటరీ, మూడు చిన్న మోటార్ల సాయంతో స్వతంత్రంగా పనిచేస్తూ అవసరమైనప్పుడు ఇతర రోబోలకు, వస్తువులకు కొక్కేల ద్వారా అతుక్కుంటాయి. అన్ని దిక్కులకూ తిరగగలిగే ఈ రూమ్‌బోట్స్ రకరకాల ఆకారాల్లోకి అమరడమే కాదు.. గదిలో ఎక్కడికి కావాలంటే అక్కడికి వెళ్లి ఆయా వస్తువులను తరలించేందుకు, ఇతర పనులకూ ఉపయోగపడతాయట. సొంతంగా పనులు చేసుకోలేని వికలాంగులు, వృద్ధులకు ఈ రూమ్‌బోట్స్ బాగా సాయం చేస్తాయని వీటిని తయారు చేసిన స్విట్జర్లాండ్ శాస్త్రవేత్తలు అంటున్నారు.