ప్రతిపక్ష నేత జగన్ వెల్లడి
 * నోటీసు ఇచ్చిన పదిరోజుల్లో స్పీకర్ నిర్ణయం తెలపాలి
 * 17 మంది ఎమ్మెల్యేలు నిలబడి మద్దతు ఇస్తే చర్చకు అనుమతించినట్లే..
 సాక్షి, హైదరాబాద్: శాసనసభలో గవర్నర్ ప్రసంగానికి ధన్యవాదాలు తెలిపే తీర్మానంపై చర్చ తరువాత చంద్రబాబునాయుడు ప్రభుత్వంపై అవిశ్వాస తీర్మానం నోటీసు ఇస్తామని ప్రతిపక్ష నేత వైఎస్ జగన్‌మోహన్‌రెడ్డి చెప్పారు. గవర్నర్ ప్రసంగం పూర్తయిన తరువాత శాసనమండలి, శాసనసభ వాయిదాపడిన అనంతరం ఆయన లాబీల్లో విలేకరులడిగిన ప్రశ్నలకు సమాధానమిచ్చారు.
 
 చంద్రబాబు ప్రభుత్వం అవినీతి సొమ్ముతో పాల్పడుతున్న ఫిరాయింపులు, రాజధాని నిర్మాణం పేరుతో సాగుతున్న బినామీ భూదందా, ఎన్నికల హామీలు నెరవేర్చడంలో చేసిన మోసాలకు నిరసనగా ఈ అవిశ్వాసం ఉంటుందని చెప్పారు. అవిశ్వాసం నోటీసు ఇచ్చినా ఈ సమావేశాలు ముగిసేలోపు స్పీకర్ నిర్ణయం తీసుకునే అవకాశం లేదని అధికారపక్ష సభ్యులు చెబుతున్నారని ఓ విలేకరి ప్రస్తావించగా.. ‘అలా ఉండదు. మేం నోటీసు ఇచ్చిన పది రోజుల్లోపల నిర్ణయం తెలియజేయాలి. సభలో 17 మంది ఎమ్మెల్యేలు లేచి నిలబడి మద్దతు ఇస్తే చాలు అవిశ్వాసాన్ని చర్చకు అనుమతించినట్లు అవుతుంది..’ అని జగన్ పేర్కొన్నారు. గవర్నర్ ప్రసంగంపై వ్యాఖ్యానించాలని కోరినప్పుడు ‘సభలో మాట్లాడతాను..’ అన్నారు.
  
 నేనన్న మాటలను వక్రీకరించడం సరైనదేనా?
  తాను రాజ్‌భవన్ వద్ద అన్న మాటలను మీడియా వక్రీకరించడం సరైనదేనా? అని జగన్‌మోహన్‌రెడ్డి ప్రశ్నించారు. ‘ఆరోజు నేను మాట్లాడిన 13 నిమిషాల నిడివి గల వీడియోను ప్రసారం చేస్తే వాస్తవం ఏమిటనేది తెలుస్తుంది. అసలు నేను చెప్పిందేమిటి? ఏ సందర్భంలో అన్నాను. మీరు చేసిందేమిటి? మీ మనస్సాక్షిని అడగండి.. నేను మాట్లాడింది తప్పు అంటే శిక్షకు నేను రెడీ.. తప్పయితే మీరు రెడీయా?’ అని ఆయన మీడియాను ఉద్దేశించి అన్నారు. ‘ఆరోజు నేనేమన్నాను.. ముఖ్యమంత్రిగా ఉన్న వ్యక్తి మంత్రివర్గ సమావేశంలో.. హరీశ్‌ను చూసి, కేటీఆర్‌ను చూసి బుద్ధి తెచ్చుకోండి.
 
 వాళ్లను చూడండి.. ఎమ్మెల్యేలను ఎలా లాగుతున్నారో.. అన్నారన్నాను. ముఖ్యమంత్రిగా ఉన్న వ్యక్తి అనాల్సిన మాటలేనా అవి అన్నాను. విచ్చలవిడిగా అవినీతి చేసి సంపాదించిన సొమ్ముతో ఎమ్మెల్యేలను కొనుగోలు చేయండని ముఖ్యమంత్రి స్థానంలో ఉన్న వ్యక్తే తన క్యాబినెట్ సహచరులకు చెప్పడం ధర్మమా! అని అడిగాను..’ అన్నారు. ‘మీరు నేను మాట్లాడిన మాటలన్నీ ప్రసారం చేయరు.. మీకు ఏది అవసరమో (కన్వీనియంట్‌గా ఉంటుందో..) దానిని మాత్రమే చూపిస్తారు. ఇది ఏ మాత్రం సరికాదు.’ అని జగన్ పేర్కొన్నారు.


 * విపక్షనేత జగన్‌కు నిరుద్యోగుల మొర
   *   ఏపీపీఎస్సీ ఉద్యోగాల భర్తీ చేసేలా చూడాలని వినతి
 సాక్షి, హైదరాబాద్: ఏపీపీఎస్సీ గ్రూప్-1, గ్రూప్-2 ఉద్యోగాలను భర్తీ చేసేలా ప్రభుత్వంపై ఒత్తిడి తేవాలని ఏపీలోని ఉద్యోగ అభ్యర్థులు ప్రతిపక్ష నేత వై.ఎస్. జగన్‌మోహన్‌రెడ్డికి విజ్ఞప్తి చేశారు. పార్టీ పీఏసీ సభ్యుడు అంబటి రాంబాబు, ఎమ్మెల్యే ముస్తఫాతో పాటుగా వచ్చిన పలువురు నిరుద్యోగులు బుధవారం జగన్ నివాసంలో ఆయనను కలసి ఓ వినతిపత్రం సమర్పించారు.
 
 ఏపీపీఎస్సీ ద్వారా ప్రభుత్వోద్యోగాల విషయంలో సంవత్సర క్యాలెండర్‌ను రూపొందించి అమలు చేస్తామంటూ ముఖ్యమంత్రి చంద్రబాబునాయుడు ఎన్నికల సమయంలో హామీ ఇచ్చారని, అయితే అధికారంలోకి వచ్చాక పట్టించుకోవడంలేదని వారు ఆ వినతిపత్రంలో తెలిపారు. 2009లో దివంగత వైఎస్ రాజశేఖరరెడ్డి ముఖ్యమంత్రిగా ఉన్నపుడు గ్రూప్-1, 2, జేఎల్ ఉద్యోగాలకు సంబంధించి నోటిఫికేషన్ జారీ అయిందని, ఆయన మరణం తరువాత ఆలస్యంగా ఉద్యోగాల భర్తీ జరిగిందన్నారు.
 
 నల్లారి కిరణ్‌కుమార్‌రెడ్డి ముఖ్యమంత్రిగా ఉన్నపుడు 2012లో గ్రూప్-1,2 నోటిఫికేషన్లు జారీ అయినా గ్రూప్-2 పరీక్షలు మాత్రమే సజావుగా జరిగాయన్నారు. 2013లో మళ్లీ గ్రూప్-1, 2, జేఎల్ పోస్టులకు నోటిఫికేషన్ ఇస్తామని కిర ణ్‌కుమార్‌రెడ్డి ప్రకటించడంతో అనేకమంది నిరుద్యోగులు ఎంతో డబ్బు వెచ్చించి హైదరాబాద్‌లో పరీక్షలకు సిద్ధమవుతున్న తరుణంలో వచ్చిన సమైక్యాంధ్ర ఉద్యమం ఆశలపై నీళ్లు చల్లిందని ఆవేదన వ్యక్తం చేశారు.
 
 విభజన ఫలితంగా తెలంగాణకు 1,10,000, ఏపీకి 1,30,000 ప్రభుత్వ ఉద్యోగాల ఖాళీలను కేటాయించారని, వీటిలో సుమారు 3,000 వరకూ గ్రూప్-1, 2 ఉద్యోగాలు కూడా ఉన్నాయన్నారు. తెలంగాణ ప్రభుత్వం ఇప్పటికే అక్కడి ఉద్యోగార్థుల కోరికకు అనుగుణంగా నియామకాల ప్రక్రియకు శ్రీకారం చుట్టిందని, కానీ ఏపీలో మాత్రం ఆ దిశగా ఎలాంటి ప్రయత్నాలు జరగడం లేదన్నారు.  మార్చి నుంచి జరిగే శాసనసభ సమావేశాల్లో తమ సమస్యలను లేవనెత్తి శాశ్వత పరిష్కారం కోసం కృషి చేయాలని వారు జగన్‌ను కోరారు.
 
 వైఎస్ రాజశేఖరరెడ్డి హయాంలో ఉద్యోగమేళా మాదిరిగా అధిక పోస్టులతో కూడిన నోటిఫికేషన్లు ఇచ్చేట్లుగా ప్రభుత్వంపై ఒత్తిడి తేవాలని విన్నవించారు. జగన్‌ను కలసిన ఉద్యోగార్థుల్లో వి.మల్లయ్య, పి.రోజారాణి, ఎం.శ్రీనివాసరెడ్డి, పి.మునికుమార్, పిగిలి వాసు, ఎం.లక్ష్మిరెడ్డి, మణికంఠ, పి.ప్రసాద్, ఎస్.సద్దాంహుస్సేన్, పి.అజయ్‌కుమార్, కె.కొండలరావు, ఆర్.నాగార్జునరావు, కె.రాజయ్య ఉన్నారు.