Magazine Story

‘మా అమ్మగారిని ఆస్పత్రికి తీసుకెళ్ళానండి’‘స్కూటర్‌ టైర్‌ పంక్చర్‌ అయిందండి’‘ట్రాఫిక్‌ రద్దీ సార్‌’ ప్రధాన కార్యాలయం నుండి తనిఖీకి వచ్చిన సుందరం ఇవేం పట్టించుకోకుండా ఆలస్యంగా వచ్చిన వాళ్ళందరికీ హజరుపట్టీలో ‘ఎల్‌’ అని గుర్తు పెట్టాడు. అవినీతికి పాల్పడి, పట్టుబడి ‘అనిశా’ న్యాయస్థానంలో నిలబడిన దానికన్నా ఎక్కువ అవమానంగా భావించారు.తను చెప్పిన కారణం సమంజసమైనదని, సహేతుకమైనదని, సర్వామోదం పొందేదని గిరిధర్‌ ఆక్రోశించాడు. ఆలస్యంగా వచ్చిన వాళ్ళందరిదీ ఇదే అభిప్రాయం. గిరిధర్‌ చెప్పిన మూడు ‘స’లు తాము చెప్పినవాటికి కూడా వర్తిస్తాయని. సుందరం హెచ్చరించిన మీదట అందరూ ఐడీ కార్డ్స్‌ తగిలించుకున్నారు.మనిషి హుందాగా ఉన్నాడు. చురుగ్గా కదులుతున్నాడు. ఇన్‌ స్పెక్టర్స్‌ ఏదైనా ఫైల్‌ అడిగినప్పుడు, అందులో సమస్య ఉందనుకుంటే, అది ఇవ్వడంలో తాత్సారం చేస్తారు సిబ్బంది. రిపోర్ట్‌ పూర్తి చేసే హడావిడిలో పడి మళ్ళీ అడగరు అని. కానీ సుందరం వదలడం లేదు. ముదురులా ఉన్నాడే, అందుకే చిన్న వయసులోనే మంచి స్థాయికి ఎదిగాడు అనుకున్నారు. నాలుగు ముక్కలు బట్టీపట్టి పరీక్షల్లో ఉత్తీర్ణుడయ్యి పదోన్నతి సంపాదించేసాడని పెదవి విరిచాడు ఒక గ్రేడ్‌ తక్కువవాడు (ఒ.గ్రే.త). చిన్నచిన్న తప్పులు కూడా భూతద్దం పెట్టి వెతుకుతున్నాడు అని తిట్టుకున్నారు.సుందరం కఠినాత్ముడు. ∙∙ ‘మీ ఊరొస్తున్నా. రెండు రోజులు ఉంటా. సెలవు పెడతావా?’ గిరిధర్‌కి ఫోన్‌ చేశాడు ఆత్మారామ్‌.‘అబ్బే కుదరదు. ఇన్‌స్పెక్షన్‌ జరుగుతోంది. సుందరం అని ఢిల్లీ నుండి వచ్చాడు ఇన్‌స్పెక్టర్‌. మహా మొండివాడు’ ఎగ్గొట్టడానికి వీడికెప్పుడూ ఏదో ఒక సాకు దొరుకుతుంది అనుకున్నాడు ఆత్మారామ్‌.‘ఎవడు? ఢిల్లీ సుందరమా? వాడు నా క్లాస్‌మేటే. వాడో పెద్ద తిమింగలం. లంచాలు విపరీతంగా మరిగి కోట్లు కూడబెట్టాడు.’ఒక మనిషి మనకన్నా ఉన్నతుడు లేక ప్రతిభావంతుడు లేక అందరిచేత ఆరాధించబడుతున్నవాడు లేక అన్నిన్నూ అని మనం కుళ్ళుకుంటూ ఉండగా అతడి వ్యక్తిత్వంలో ఉన్న ఓ పెద్ద లోపాన్ని ఎవరేనా బయటపెడితే పైకి కనిపించ(నీయ)ని పట్టరాని ఆనందం మనసులో ముప్పిరిగొంటుంది. మనం గుడ్డిగా వ్యతిరేకించే రాజకీయ పక్షం ఎన్నికల్లో చిత్తుగా ఓడిపోతే మనసు మూన్‌వాక్‌ చేస్తుంది. మనం అకారణంగా ద్వేషించే నటుడి సినిమా ఘోర పరాజయం పాలైతే మనసు డిస్కో థెక్‌ ఆడుతుంది.‘సరే వీలుచూసుకుని నేనే మీ ఆఫీస్‌కి వస్తాలే. వాడికి చెప్పకు. సర్‌ప్రైజ్‌ ఇస్తాను.’ ప్రాణం పోతుంటే ఏమో చెప్పలేం కానీ, ఆత్మారామ్‌ అబద్ధం ఆడడు. సుందరానికి చదువులో తనకన్నా ఎక్కువ మార్క్స్‌ వచ్చినందుకు, మంచి ఉద్యోగం సంపాదించినందుకు, అందమైన భార్య వరించడం వల్లా, అతని పిల్లలు తన పిల్లలకన్నా తెలివైనవాళ్ళు అవడం వలనా, రెండు అంగుళాలు పొడవు ఎక్కువ అవడం చేతా, ఇల్లు ఒక అంతస్తు ఎక్కువ కట్టేసిన మూలానా సుందరం అంటే అతనికి ఈర‡్ష్య లేదు. రీ–యూనియన్‌లో తనని చూసి కళ్ళెగరేశాడని, ‘ఏరా నీకు ఇంకా ప్రమోషన్‌ రాలేదా?’ అన్నాడని కోపం లేదు. అలా అని ఆత్మారామ్‌ ఆత్మాభిమానం లేనివాడు, అంత అసమర్థుడేమీ కాదు. అలా అని ఆత్మారామ్‌ ఆర్థికంగా అధమ స్థాయిలో ఏమీ లేడు. అలా అని ఆత్మారామ్‌ అవినీతికి ఆమడ దూరంలో ఏమీ ఉండడు. అయితే సుందరంలా ఎవరినీ పీడించననీ, న్యాయం(?)గా మామూళ్ళు ఇచ్చినంతే పుచ్చుకుంటానని కూసింత, కాసంత, అణా అంత, కనీసం చిల్లి గవ్వంతైనా ఆత్మసంతృప్తి ఉంది.ఈ వార్త విని లంచాలు తీసుకోకుండా మడికట్టుకు కూర్చున్నవాళ్ళు, తీసుకోవడం చేతకానివాళ్ళు, తీసుకుంటే ఏమవుతుందో అని భయపడేవాళ్ళు– అందరూ సుందరాన్ని అసహ్యించుకున్నారు.సుందరం కఠినాత్ముడు, లంచగొండి. ∙∙ సురభి అందగత్తె, తెలివిగలది. అయితే మొదటి విశేషణమే అందరినీ ఆకర్షించేది. పనిలో ఆమె చేసిన ఒక తప్పుని ఎత్తి చూపాడు సుందరం. ‘ఇలాంటివి జరగకుండా చూసుకోండి’ స్వరంలో వీలైనంత మార్దవాన్ని ఒలికించాలని సుందరం చూసినా సురభికి కాఠిన్యంగానే అనిపించింది. ఆరోజంతా తను అడిగిన ప్రశ్నలకి ఆమె అన్యమనస్కంగానే సమాధానాలు చెప్పడం గుర్తించాడు సుందరం. ‘అతనికి ఆడవాళ్ళతో ఎలా మాట్లాడాలో కూడా తెలియదు’ అంది.‘ఏమైనా ఎక్కువగా మాట్లాడాడా? చెప్పండి. కడిగి పారేస్తాను’ అందమైన అతివల హక్కుల సాధనకై ఎంతైనా పోరాడడానికి సిద్ధపడే మదన్‌ ఆవేశపడ్డాడు. ‘హౌ టు టాక్‌ టు అండ్‌ ఇన్‌ ఫ్లుయెన్స్‌ (బ్యూటిఫుల్‌) విమెన్‌ ఇన్‌ థర్టీ డేస్‌’ అనే పుస్తకం రాయాలని తీర్మానించుకున్నాడు.‘సుందరం బాబుకి మహా గీర అనుకుంటానండి. రెండుసార్లు గుడ్‌ మార్నింగ్‌ చెప్పినా పట్టించుకోలేదు’ అన్నాడు సత్యం.‘అవును నేను పలకరించినా పట్టించుకోలేదు. నాకన్నా ఒక గ్రేడ్‌ ఎక్కువని పొగరనుకుంటాను’ అన్నాడు ఒ.గ్రే.త.‘అవును మనిషిని చూస్తేనే అర్థం అవుతుంది’ అన్నాడు పర్చేజ్‌ హెడ్‌. ఆయన్ని తలకాయ లేని హెడ్‌ అంటుంటారు.‘నిజమా? సాటి మనిషిని మనిషిగా చూడలేని కుసంస్కారం. ఆధిపత్య ధోరణికి పరాకాష్ట. హైట్‌ ఆఫ్‌ అథారిటేరియనిజం, హైట్‌ ఆఫ్‌ యారొగన్‌ ్స, హైట్‌ ఆఫ్‌ ఇన్‌ సివిలిటీ’ అని సుందరాన్ని తెగిడి, ‘రాకెట్‌కి ఇంధనం ఎంత అవసరమో ఒక చిన్న బోల్ట్, నట్, వాషర్‌ కూడా అంతే ముఖ్యం అవుతుంది. కంపెనీకి నీ అవసరం కూడా’ అని సత్యాన్ని పొగిడి తన ఆంగ్ల పరిజ్ఞానానికి తనే అబ్బురపడ్డాడు చక్రవర్తి. ఎవరూ ఏకీభవించకపోయినా, తమ సంస్థకి తనే ఆ ఇంధనం అని అతడి నిశ్చితాభిప్రాయం. సత్యంతో కొన్ని సొంత పనులు చేయించుకుంటూ ఉంటాడు. ‘బాబూ! ఇంట్లో మిక్సీ సరిగా పనిచెయ్యడం లేదన్నారు అమ్మగారు. రేపు సాయంత్రం వెళ్ళి చేయించుకొస్తాను’ అన్నాడు సత్యం. దీనిని కర్మఫలానికి ఉదాహరణగా తీసుకొనరాదు.సుందరం కఠినాత్ముడు, లంచగొండి, అహంకారి.∙∙ సుందరం కాఫీ, టీలు తాగడని తెలిసి చాలామంది ఆశ్చర్యపోయారు.‘అయ్యగారికి మందు తప్ప ఇంకే ద్రవ పదార్థమూ గొంతులోకి దిగదనుకుంటాను’ సాయంత్రానికల్లా జనం ఈగల్లా ముసిరే ఈగల్‌ బార్‌ నుండి సుందరం బయటకు రావడం రెండు కళ్ళారా చూశాడట చక్రపాణి. ఒక రోజు అయితే పొరపాటు పడొచ్చు, రెండు రోజులు వరసగా చూశాట్ట! మనిషిలో తూలుడు కానీ, తడబడడం కానీ, కళ్ళు తేలెయ్యడం కానీ లేదట! ‘తాగే సత్తా ఎంత ఉంటే అలా నిలకడగా నడవగలడు? అందుకే తొణకని నిండు (కల్లు)కుండలా, బీరునగధీరుడిలా, స్కాచి వడపోసినవాడిలా కనిపిస్తాడు సుందరం’ అన్నాడు.ఆ వార్త ఆజ్యం పోసిన అగ్నిలా, ఆక్సిజన్‌ అందిన మంటలా, ఆరని వహ్నిలా, అడవి చిచ్చులా అన్ని విభాగాలనూ చుట్టేసింది.రోజూ ఇన్సులిన్‌ ఎక్కించుకోకపోతే చచ్చిపోతామన్నట్టు తాగే డైలీ డోస్‌ మందుబాబులు దేవదాసుని చూసినట్టు సుందరంకేసి ఆరాధనగానూ, అప్పుడప్పుడూ తాగితే పర్వాలేదు అనుకునే మందుపాపలు– సన్నివేశానికి అవసరం లేకపోయినా మందు కొడుతూ ఉండే కుర్రహీరోని చూసినట్టు అభిమానంగానూ, తాగడం పాపం అనుకునేవాళ్ళు జమిలిగా తమ గ్రూప్‌ లీడర్‌ సుబ్రహ్మణ్యం సారథ్యంలో గొంగళిపురుగుని చూసినట్టు అసహ్యంగానూ చూశారు. అసలు మద్యాన్ని ముద్దగా, ముద్దుగా మందు అని వ్యవహరించకూడదు అని న్యాయస్థానంలో ఒక పిల్‌ (అనగా మందుగోలీ కాదు) వేసి ఉన్నాడు గ్రూ.లీ. మనిషిని చూస్తే నిగర్విలా, నిజాయితీపరుడిలా, నిర్వాణం పొందినవాడిలా కనిపిస్తాడా? అయ్యగారి అసలు నిగ్గూ, నిజస్వరూపం, నిర్వాకం ఇదన్నమాట.సుందరం కఠినాత్ముడు, లంచగొండి, అహంకారి, తాగుబోతు.పురస్కారాలు, బిరుదులు ఒకదాని తర్వాత ఒకటి వచ్చి మీద పడిపోతున్నాయి.∙∙ తాటిచెట్టు కింద నిలబడితే తాగినట్టు కాదు: అడపాదడపా మందు కొట్టే ఒక బాబు ఈగల్‌ బార్‌కి వెళ్ళి రెండు పెగ్గులు బిగించాక కేషియర్‌ పలకరించాడు. ‘ఏం సార్‌. ఈమధ్య కనపడడం లేదు?’ బాబు నవ్వాడు. ‘మా సుందరం మీ ఆఫీస్‌కే ఇన్‌ స్పెక్షన్‌ కి వచ్చాడు కదా’ బాబు తెల్లబోయాడు. ‘మీ సుందరమా?’ బాబు అనుమానం.‘అవును సార్‌. వాడు నా క్లాస్‌మేట్‌. బాగా చదివేవాడు’ బాబు ఆశ్చర్యపోయాడు.‘బాగా తాగుతాడేమో కూడా’ బాబు వెటకారం.‘భలేవారే. వాడికి వాసన కూడా పడదు. నేను పనిచేసే సమయం సాయంత్రాలే కదా. నాతో కబుర్లు చెప్పడానికి వస్తున్నాడు. రేపే ఆఖరు అని చెప్పాడు’ బాబుకి మత్తు దిగిపోయింది. ఈ వార్త విని తాగనివాళ్ళు కూడా హేంగోవర్‌కి గురయ్యారు. సుందరం బార్‌ నుండి బయటకు రావడమే చూశాడు చక్రపాణి. తాగడం చూడలేదు. అంటే అది అర్థసత్యమే! తర్కించడానికి జిజ్ఞాస ఉండాలి, జ్ఞానం కావాలి, ఓడిపోవడానికి కూడా సిద్ధపడాలి. సుందరం తాగుబోతు కాకపోతే అతని గురించి చెడుగా చెప్పుకోవడానికి తమకో అవకాశం ఉండదు, సుందరం మంచివాడు అనుకోవడానికి మనసు ఒప్పదు కనుక ఎవరూ తర్కం జోలికి పోలేదు. అదే లోకరీతి!∙∙ పశ్చాత్తాప పర్వం:ఆఖరి రోజు మోటివేషన్‌ లో భాగంగా సుందరం కొంతమంది ఉద్యోగులతో మాట కలిపాడు.‘సత్యం గారూ. మీ అమ్మాయి, అల్లుడూ ఈమధ్యనే ఢిల్లీకి మారారని చెప్పారు కదా? వాళ్ళకేమైనా అవసరం అయితే నా ఫోన్‌ నంబర్‌ ఇవ్వండి. మీరు ఎప్పుడైనా ఢిల్లీ వస్తే మా ఇంటికి తప్పకుండా రండి’ సత్యాన్ని ఇలా మీరు అని గౌరవంగా సంబోధించిన సిబ్బంది ఎవరూ లేరు. సంస్థలో నిన్నో, మొన్నో చేరిన కుర్రకంకులు కూడా ‘సత్యం ఇలా రా’ అని పిలిచేవాళ్ళే.సత్యం తల్లి ఆస్పత్రిలో చేరితే తెలిసిన వైద్యుడి ద్వారా తక్కువ ఖర్చుతో బయటపడేయించిన నారాయణహరి, పిల్ల కళాశాల రుసుములో రాయితీ ఇప్పించిన సరస్వతీ, కొడుకుకి ఉద్యోగం వేయించడంలో సహాయపడిన రాజు– ఇలా పరోపకారి పాపన్నలు, పాపమ్మలు చేసిన సహాయాలన్నీ ఆ పిలుపు ముందు బలాదూర్‌ అనిపించాయి.‘మీరు చాలా బాగా పనిచేస్తారు. అయితే చందమామలో మచ్చ లేకపోతే ఇంకా ఎంత ప్రకాశవంతంగా ఉండేదో అన్నట్టు మీరు ఆ తప్పు చేయకుండా ఉండి ఉంటే బాగుండేది అని అలా చెప్పాను. మీ మనసు నొచ్చుకున్నట్టు ఉంది’ సురభి పొంగిపోయింది. ‘మీ ఆఫీస్‌ నోట్స్‌ చాలా బాగుంటున్నాయి. ఈసారి మీకు తప్పకుండా పదోన్నతి లభిస్తుంది’ ఒ.గ్రే.త. సుందరం చేతులు పట్టుకుని ఊపాడు.‘మీరు చేసిన పొరపాట్లు సరిదిద్దేశారు. అవి రిపోర్ట్‌ చేయదగ్గ పెద్దవి కావు. రాయలేదులెండి’ పర్చేజ్‌ హెడ్‌ సంతోషంతో హెడ్‌ ఆడించాడు.తను రెండుసార్లు పలకరించినపుడు సుందరం పరధ్యానంలో ఉన్నాడని సత్యం గమనించలేదు. ఒక గ్రేడ్‌ తక్కువవాడు ఈర‡్ష్యతో అబద్ధం చెప్పాడు. ఒక విషయంలో మందలించాడని పర్చేజ్‌ హెడ్‌ కోపంతో అలా అన్నాడు. వాళ్ళ మనసుల్లో ఉన్న గొంగళిపురుగు సీతాకోకచిలుకగా పరివర్తనం చెందింది. ∙∙ లోన మనసు వెన్న: ‘మీరింత మంచివారు. మొదటిరోజు ఆలస్యంగా వచ్చినవారి పట్ల ఎందుకు కఠినంగా ఉన్నారు’ అడిగాడు మేనేజర్‌.‘సమయ పాలన పాటించినవాళ్ళకి ఇచ్చిన గౌరవం అది. లేదూ వాళ్ళల్లో కొంతమంది నా మీద పైకి ఫిర్యాదు కూడా చెయ్యొచ్చు ఆధారాలతో సహా. నాకెందుకు తలనొప్పి’ సుందరం తర్కానికి ఆశ్చర్యపోయాడు మేనేజర్‌. ‘కానీ ఇందులో లేట్‌ లతీఫ్‌ల గురించిన పేజ్‌ లేదు’ రిపోర్ట్‌ చూస్తూ సందేహం వెలిబుచ్చాడు.‘మొన్న ఒకరు నిజంగానే ఆస్పత్రికి వెళ్ళి ఉండొచ్చు, టైర్‌ పంక్చర్‌ అవుతుందని ఊహించం కదా, ట్రాఫిక్‌ అయినా అంతే. భగవంతుడు ఉన్నా, లేకపోయినా ఆయన ఉన్నాడు, మన తప్పుల్ని గమనిస్తుంటాడు’ అనే భయం ఉండాలి. అందుకే వాళ్ళ ముందు నటించాను. అది రహస్య నివేదిక కనుక అందరికీ అందుబాటులో ఉండదు’ సుందరం మంచితనానికి ముచ్చటపడ్డాడు మేనేజర్‌. పదో తరగతి కాండక్ట్‌ సర్టిఫికెట్‌లో అందరికీ ‘సంతృప్తికరం’ అని రాసేసే మాస్టారిలా కనిపించాడు సుందరం.‘కానీ ఇంత మంచిమనిషికి లంచాలు తినే దుర్గుణం ఎలా అబ్బిందో? కోట్లు కూడబెట్టేశాడట!’ అనుకున్నాడు. అవును. సుందరం దగ్గర అలా సంపాదించిన మూడు (వేర్వేరు రంగుల) కోట్లు ఉన్నాయి. అవే మార్చి మార్చి బోర్డ్‌ మీటింగ్స్‌కి వేసుకుని వెళుతుంటాడు. ∙∙ ఎ కేస్‌ ఆఫ్‌ మిస్టేకెన్‌ ఐడెంటిటీ: సాయంత్రం అవుతుండగా సుందరం ఉన్నాడని రూఢిపరుచుకుని కార్యాలయానికి వచ్చాడు ఆత్మారామ్‌.‘ఏడీ మావాడు?’‘ఈరోజు వెళ్ళిపోతున్నాడు కదా. రిపోర్ట్‌ ఖరారు చెయ్యడానికి మేనేజర్‌ దగ్గర కూర్చున్నాడు’ చూపించాడు గిరిధర్‌. ‘అబ్బే నేను చెప్పినవాడు కాదు. ఆ సుందరం వేరే, ఇతను వేరే’ అన్నాడు ఆత్మారామ్‌. ఆత్మారామ్‌ జీవితంలో ఈ సుందరాన్ని కలిసింది లేదు. ప్రపంచంలో అతనిలా ఉంటాడని చెప్పబడే మరో ఆరుగురిలో కనీసం ఒక్కరిని కూడా ఇంతవరకూ చూడలేదు. అతనిలో అయ్యో తొందరపడ్డానే అనే భావన, పశ్చాత్తాపం వంటివి లేవు. సూర్యుడు తూర్పున ఉదయించును, ప్రభుత్వ కార్యాలయాల్లో లంచం అడగబడును అనే నిత్యసత్యాలను ఎంత భావరహితంగా ప్రకటిస్తామో అలా చెప్పాడు.ఈ వార్త మాత్రం మలయమారుతంలా, చినుకు పడితే ఎగసే మట్టివాసనలా, సజ్జ వెదజల్లుతున్న పూల పరిమళంలా కార్యాలయమంతా పాకింది.ఆత్మారామ్‌ ఆరోజు రాకపోయి ఉంటే సుందరం చాలాకాలం వాళ్ళ మనసుల్లో ఒక అవినీతిపరుడిగా మిగిలిపోయేవాడు.‘మనం అందరం సుందరం గారిని ఎంత తప్పుగా అర్థం చేసుకున్నాం’ తాము విన్నట్టు, పొరబడినట్టు, నింద మోపినట్టు, తిట్టుకున్నట్టు – సుందరం లంచగొండి, ఒంటెద్దు, అహంకారి, తెలివి తక్కువవాడు, తాగుబోతు కాడనీ – నీతిమంతుడు, కలుపుగోలు మనిషి, మర్యాద తెలిసినవాడు, ప్రజ్ఞావంతుడు, మంచినీళ్ళు మాత్రమే తాగుతాడనీ సర్వసిబ్బంది సమావేశంలో, మూకుమ్మడి పశ్చాత్తాప సభలో ఏకగ్రీవంగా, రెండో ఆలోచన లేకుండా ముక్తకంఠంతో తీర్మానించారు.‘సుందరం బాబు మర్యాదరామన్న’ అన్నాడు సత్యం. ‘టీటోటలర్‌లో టీ, మనం తాగే టీ వేరే అయినా సుందరం గారు కనీసం టీ కూడా తాగని టీటోటలర్‌’ అన్నాడు చక్రపాణి. ‘అవును, మంచివారు చాలా. సుందరంగారు చాలా మంచివారు’ అంది సురభి. అక్కడితో ఊరుకోవచ్చు కదా. కథ అయిపోయేది. ‘శ్రీరామచంద్రుడు. పరాయి ఆడవాళ్ళ వంక కన్నెత్తి కూడా చూడరు’ అని కూడా అంది. ముగిసిన అధ్యాయాన్ని తిరిగి తెరవడం, రీ–పోస్ట్‌మార్టం అంటే ఇదే.∙∙ యాంటిక్లైమాక్స్‌ కాని క్లైమాక్స్‌:నాణేనికి రెండో వైపు ఉంటుందని తెలియని అజ్ఞానం, ఉంటుందేమోననే భయం, లేదని నమ్మే మూఢత్వం, ఉండదని వాదించే మూర్ఖత్వం కొంతమంది అభిప్రాయాలకి పునాది. తెలుసుకోకుండా, బుర్రకి పని పెట్టకుండా, కూలంకషంగా చర్చించకుండా, పక్షపాత వైఖరితో, అకారణ శత్రుత్వంతో ఏర్పరచుకునేవే ఎక్కువ శాతం అభిప్రాయాలు. మళ్ళీ వీటిల్లో తప్పు(డు), సరైన అభిప్రాయాలు కూడా పాలూ నీళ్ళలాగా కలిసి ఉంటాయి. సుందరం గురించి ఇప్పటివరకూ ఏర్పరచుకున్న పొరపాటు అభిప్రాయాలలాగే ఇదీ ఒకటి.‘చందమామలో మచ్చ లేకపోతే ఇంకా ఎంత ప్రకాశవంతంగా ఉండేదో అన్నట్టు’ అన్నవి సుందరం పైకి అన్న మాటలు. ‘చందమామలో మచ్చ లేకపోతే అచ్చం మీలాగే ఇంకా ఎంత అందంగా ఉండేదో’ అనేవి సుందరం మనసులో ఉన్న మాటలు. సుందరం పెళ్ళి అయినవాడే. ఈ మూడు రోజుల్లో సురభి అంటే సుందరానికి విపరీతమైన క్రష్‌ (ఇష్టపడడం, అభిమానించడం, ఆరాధించడం వంటి ముసుగులు లేకుండా చెప్పాలంటే కోరికతో దహించుకుపోవడం) ఏర్పడింది. అది ఎవరికీ తెలియదు. సురభికి కూడా. సుందరం ఆ విధంగా మంచి బాలుడు అనే ముద్రతో సెలవు తీసుకున్నాడు. మనం ఏ వ్యక్తినీ అతని పట్ల మనకున్న పరిజ్ఞానాన్ని మించి అంచనా వేయలేం. మన పరి(మిత)జ్ఞానం ఎంత అల్పమైనది! అన్నాడు ఖలీల్‌ జిబ్రాన్‌.- అనిసెట్టి శ్రీధర్‌ఇదీ చదవండి: వామ్మో.. ఏడాదికి ఒక్కసారే స్నానం! విడాకులు ఇప్పించండి సారూ!!

కాలాలన్నింటిలోనూ శీతకాలం భలే గమ్మత్తుగా ఉంటుంది. ఓవైపు చల్లటిగాలి జివ్వుమనిపిస్తుంటే– స్వెటర్‌ తొడుక్కుని లేదా శాలువలు కప్పుకుని తిరగడం దగ్గర నుంచి, వెచ్చటి చలిమంటల ముందో, రూమ్‌ హీటర్‌ ముందో ఒద్దికగా కూర్చోవడం వరకు, ఇవన్నీ ఆస్వాదించాల్సిన సందర్భాలే! త్వరగా చీకటిపడి, ఆలస్యంగా వెలుతురు రావడం, కాలం వేగంగా పరుగులు తీస్తున్న భావన కలగడం– ఈ సీజన్‌లో మరో ప్రత్యేకత! నిజానికి చాలామంది కాలాలన్నింటిలోనూ పసందైన కాలం చలికాలమే అంటారు. వర్షాకాలంలో వర్షాలు, ఎండాకాలంలో ఎండలు ఎక్కువైనా, తక్కువైనా వాటిని భరించలేం కాని, చలికాలంలో స్వెటర్లు, గ్లౌజులు వేసుకుని చలి గజగజలను ఆస్వాదిస్తూ గమ్మత్తుగా గడిపేయవచ్చు మరి! అయితే శీతకాలంలో చలి మాత్రమే కాదు, వ్యాధులు కూడా వణికించేస్తుంటాయి. ఈ కాలంలో అనారోగ్య సమస్యలు వస్తే తగ్గించుకోవడం ఏమంత సులభం కాదు.చలికాలంలో సాధారణంగా వచ్చే అనారోగ్యాలు ఎంతవరకు అంటువ్యాధులుగా మారతాయి? ఎలాంటి జాగ్రత్తలు అవసరం? ఎలాంటి ఆహారాలు తీసుకోవాలి? వాటి సంగతి ఒకసారి పరిశీలిద్దాం... చలికాలంలో వాతావరణం పొడిగా ఉండటం, అలాగే మనుషులంతా ఇండోర్స్‌లో గుమిగూడటం వలన జలుబు చేసే క్రిములు, ఫ్లూ వైరస్‌లు, ఇతర శ్వాసకోశ వ్యాధులు సులభంగా వ్యాపిస్తాయి. వ్యాధి లక్షణాలు కనిపించక ముందు, లక్షణాలు తగ్గిన తర్వాత కూడా ఇవి ఇతరులకు సోకే అవకాశముంటుందని ప్రపంచ ఆరోగ్య సంరక్షణ వ్యవస్థ – క్లీవ్‌లాండ్‌ క్లినిక్‌ వెల్లడించింది. సాధారణంగా వ్యాధి సోకిన రెండు నుంచి మూడు రోజుల తర్వాత ఇతరులకు అంటించే అవకాశం ఎక్కువగా ఉంటుందని ఆ క్లినిక్‌ తేల్చింది. ఈ చలికాలంలో సర్వసాధారణంగా వచ్చే అనారోగ్యాలు, అవి ఎలా వ్యాప్తి చెందుతాయో ఇప్పుడు చూద్దాం!సాధారణ జలుబుఇది అంటువ్యాధి. లక్షణాలు కనిపించకముందే, లక్షణాలు తీవ్రంగా ఉన్నప్పుడు (సుమారు మూడవ రోజు వరకు) ఇతరులకు సులభంగా సోకుతుంది. లక్షణాలు తగ్గిన తర్వాత కూడా రెండు వారాల వరకు వైరస్‌ ఇతరులకు అంటించే అవకాశవఫ్లూఇది కూడా త్వరగా వ్యాప్తి చెందే అంటువ్యాధే! లక్షణాలు కనిపించకముందే ఇతరులకు అంటుతుంది. లక్షణాలు కనిపించిన తర్వాత ఒక వారం లేదా అంతకంటే ఎక్కువ కాలం పాటు ఇతరులకు సోకే అవకాశముంటుంది.కోవిడ్‌ 19ఇది చాలా సులభంగా, అలాగే వేగంగా వ్యాపిస్తుంది. లక్షణాలు కనిపించడానికి ఒకటి లేదా రెండు రోజుల ముందు, అలాగే లక్షణాలు మొదలైన తర్వాత రెండు నుంచి మూడు రోజుల పాటు ఎక్కువగా వ్యాప్తి చెందే అవకాశముంది. తేలికపాటి లక్షణాలున్నవారు ఐదు రోజుల వరకు, తీవ్రమైన లక్షణాలు ఉన్నవారు 20 రోజుల వరకు కూడా ఈ వ్యాధిని వ్యాప్తి చేసే అవకాశముంది.రెస్పిరేటరీ సిన్సిషీయల్‌ వైరస్‌ఇది సాధారణంగా ఆరోగ్యవంతులలో జలుబులా ఉన్నప్పటికీ, శిశువులు, వృద్ధులు, రోగనిరోధక శక్తి లేనివారికి ఇది ప్రమాదకరమైన వ్యాధి. లక్షణాలు కనిపించడానికి కొన్ని రోజుల ముందు, ఆ తర్వాత ఎనిమిది రోజుల వరకు ఇది అంటువ్యాధి. అయితే, శిశువులు, రోగనిరోధక శక్తి లేనివారు నాలుగు వారాల వరకు కూడా ఈ వైరస్‌ని వ్యాప్తి చెయ్యగలరు.చెస్ట్‌ కోల్డ్‌ (బ్రోంకైటిస్‌)బ్రోంకైటిస్‌ అంటువ్యాధి కాదు. ఇది వస్తే ఊపిరితిత్తుల్లోని శ్వాసనాళాల వాపు, శ్లేష్మం ఎక్కువ ఉత్పత్తి కావడం, ఛాతీ బిగువుగా, నొప్పిగా అనిపించడం వంటి సమస్యలు కనిపిస్తాయి. అయితే బ్రోంకైటిస్‌కు కారణమయ్యే జలుబు, ఫ్లూ లేదా ఇతర వైరస్‌లు మాత్రం అంటువ్యాధులే. వేరొకరి నుంచే వైరస్‌ వ్యాప్తి చెంది చెస్ట్‌ కోల్డ్‌లా మారుతుంది.న్యుమోనియావైరల్‌ న్యుమోనియా, బ్యాక్టీరియల్‌ న్యుమోనియా ఇవి రెండూ అంటువ్యాధులే. వైరల్‌ న్యుమోనియా జ్వరం పూర్తిగా తగ్గేంత వరకు వ్యాప్తి చెందుతుంది. బ్యాక్టీరియల్‌ న్యుమోనియా అయితే, యాంటీబయోటిక్స్‌ తీసుకున్నా, 48 గంటలు తర్వాతే అంటువ్యాధి తీవ్రత తగ్గుతుంది.పింక్‌ ఐవైరస్‌ లేదా బ్యాక్టీరియాతో వచ్చే పింక్‌ ఐ చాలా త్వరగా వ్యాప్తి చెందుతుంది. వైరల్‌ పింక్‌ ఐ లక్షణాలు ఉన్నంత కాలం, ఇంక్యుబేషన్‌ పీరియడ్‌లో ఒకరి నుంచి ఒకరికి సులభంగా వ్యాపిస్తుంది. బ్యాక్టీరియల్‌ పింక్‌ ఐ యాంటీబయోటిక్స్‌ తీసుకున్న 24 గంటల వరకు లేదా లక్షణాలు పూర్తిగా తగ్గేంత వరకు అంటువ్యాధిగానే పరిగణిస్తారు.సైనస్‌ ఇన్ఫెక్షన్‌ బ్యాక్టీరియల్‌ సైనస్‌ ఇన్ఫెక్షన్‌ అంటువ్యాధి కాదు. కానీ, సైనస్‌కు కారణమయ్యే జలుబు మాత్రం ఇతరులకు సోకుతుంది. ఇతరుల వల్లే మనకొస్తుంది.స్ట్రెప్‌ థ్రోట్‌గ్రూప్‌ ఏ స్ట్రెప్టోకాకస్‌ అనే బ్యాక్టీరియాతో ఇది వస్తుంది. ఇది తీవ్రంగా వ్యాప్తి చెందే అంటువ్యాధి! జ్వరం పూర్తిగా తగ్గిన తర్వాత కనీసం 12 గంటల పాటు యాంటీబయోటిక్స్‌ తీసుకున్న తర్వాతే జనాల్లో తిరగడం ఉత్తమం. అంతవరకు ఒకరి నుంచి ఒకరికి సోకుతుంది.ఆయుర్వేద చిట్కాలు ఆహార నియమాలుఆయుర్వేదం ప్రకారం, శీతకాలంలో జీవ శక్తిని, రోగనిరోధక శక్తిని పెంచే ఆహారాన్ని తీసుకోవాలి. సలాడ్‌లు లేదా చల్లటి ఆహారాన్ని తీసుకోవడం తగ్గించాలి, ఎందుకంటే అవి శరీరంలో కఫాన్ని పెంచవచ్చు. నెయ్యి, నూనెలను మితంగా తీసుకోవడంతో చర్మం పొడిబారకుండా ఉంటుంది. చలికాలంలో వెచ్చదనానికి, ఆరోగ్యం కోసం తినదగిన ఉత్తమ ఆహారాలను ఇప్పుడు చూద్దాం.ఆయుర్వేదం ప్రకారం, శీతకాలంలో జీవ శక్తిని, రోగనిరోధక శక్తిని పెంచే ఆహారాన్ని తీసుకోవాలి. సలాడ్‌లు లేదా చల్లటి ఆహారాన్ని తీసుకోవడం తగ్గించాలి, ఎందుకంటే అవి శరీరంలో కఫాన్ని పెంచవచ్చు. నెయ్యి, నూనెలను మితంగా తీసుకోవడంతో చర్మం పొడిబారకుండా ఉంటుంది. చలికాలంలో వెచ్చదనానికి, ఆరోగ్యం కోసం తినదగిన ఉత్తమ ఆహారాలను ఇప్పుడు చూద్దాం.అల్లం: ఆయుర్వేదంలో దీనిని ‘సార్వజనీన ఔషధం’ అని పిలుస్తారు. దీన్ని చలికాలంలో ఎక్కువగా తీసుకుంటే రోగనిరోధక శక్తిని పెంచుతుంది, జీర్ణక్రియకు సహాయపడుతుంది. టీలోను, కూరల్లోను, సూపుల్లోను అల్లం వాడటం మంచిది. అలాగే, అల్పాహారంలో శొంఠి లడ్డూలు, అల్లం చట్నీ తీసుకోవడం కూడా మంచిదిపసుపు: ముఖ్యంగా శీతకాలంలో పసుపు బాగా పనిచేస్తుంది. పసుపులో వాపును తగ్గించే రసాయనాలు ఉంటాయి. ఇది శరీరానికి, మెదడుకి, గుండెకు చాలా మంచిది. శీతకాలంలో కూరల్లోను, పాలల్లోను పసుపు తరచుగా తీసుకోవచ్చు.జాజికాయ : ఇది శరీరానికి వెచ్చదనాన్నిచ్చే సుగంధ ద్రవ్యం. నిద్ర మెరుగుపరచడానికి, జీర్ణక్రియకు ఇది బాగా సహాయపడుతుంది. వేడి పాలలోను, మిఠాయిల్లోను, కూరల్లోని మసాలా మిశ్రమాల్లోను జాజికాయ పొడిని వాడుకోవచ్చు. ఉసిరి: చలికాలంలో వచ్చే జలుబు, ఫ్లూ నుంచి ఉసిరి రక్షణనిస్తుంది. ఉసిరిలో పుష్కలంగా ఉండే విటమిన్‌–సి, యాంటీ ఆక్సిడెంట్లు రోగ నిరోధకశక్తిని పెంచుతాయి. రోజుకి ఒకటైనా పచ్చి ఉసిరిని నేరుగా తినొచ్చు. తేనె లేదా పంచదారతో కలిపి కూడా తినవచ్చు. ఉసిరిని ఊరగాయలా కూడా తీసుకోవచ్చు.నువ్వులు: నువ్వులలో ప్రొటీన్, ఐరన్, కాల్షియం, ఆరోగ్యకరమైన కొవ్వులు ఉంటాయి. ఇవి కాలేయానికి, గుండెకు రక్షణనిస్తాయి. ఈ చలికాలంలో నువ్వుల లడ్డూలు, నువ్వుల చిక్కీలు తీసుకోవచ్చు. రకరకాల వంటకాలపై నువ్వులపొడిని కలుపుకుని తినడం కూడా మంచిదే!బెల్లం: బెల్లం శరీరానికి వెచ్చదనాన్నిస్తుంది. జీర్ణక్రియను మెరుగుపరుస్తుంది, రక్తాన్ని శుద్ధి చేస్తుంది, దీనిలో ఐరన్‌ పుష్కలంగా ఉంటుంది. బెల్లంతో చిక్కీలు, అరిసెలు, లడ్డూలు చేసుకుని తింటే ఉత్తమం.సజ్జలు– రాగులు : ఈ చిరుధాన్యాలు శరీరానికి వెచ్చదనాన్నిస్తాయి. వీటిలో ఫైబర్, ఒమేగా–3 ఫ్యాటీ యాసిడ్స్, కాల్షియం, ఐరన్, బి విటమిన్లు ఉంటాయి. ఇవి రక్తంలో చక్కెర స్థాయిని అదుపు చేయడానికి సహాయపడతాయి. వీటితో రొట్టెలు, ఉప్మా, దోసె, అంబలి, లడ్డూలు వంటివి చేసుకోవచ్చు.నెయ్యి: చలికాలంలో నెయ్యి శరీరానికి శక్తిని, చురుకుదనాన్ని ఇస్తుంది. దీనిలో విటమిన్‌–ఎ, ఒమేగా–3 ఫ్యాటీ యాసిడ్స్, యాంటీ ఆక్సిడెంట్లు ఉంటాయి. చర్మానికి కాంతినిస్తుంది. కిచిడీ, పప్పు, పరాఠాలు, హల్వా లేదా అన్నంతో కలిపి తీసుకోవచ్చు.మెంతులు–మెంతికూర: ఇవి చలికాలంలో జీర్ణక్రియను మెరుగుపరుస్తాయి. వీటిలో ప్రొటీన్, ఐరన్‌ అధికంగా ఉంటాయి. మెంతులను రాత్రి నీటిలో నానబెట్టి పేస్ట్‌ చేసుకుని తినడం మంచిది. మెంతి ఆకులను పరాఠాలు లేదా కూరల్లో కూడా వాడుకోవచ్చు.గోందు: చలికాలంలో శరీరానికి వెచ్చదనాన్నిచ్చే చక్కటి ఆహారం ఇది. తుమ్మచెట్ల నుంచి సేకరించే జిగురును గోందు కటిర అంటారు. ఇది బరువు నియంత్రణకు, కొలెస్ట్రాల్‌ను కరిగించడానికి, కాల్షియం పెరగడానికి సహాయపడుతుంది. దీంతో లడ్డూలు కూడా చేసుకుంటారు.బాదం – వాల్‌నట్‌లు: చలికాలంలో బాదం, వాల్‌నట్‌ వంటి గింజలు తినడం మంచిది. వీటిలో ఆరోగ్యకరమైన కొవ్వులు, ప్రొటీన్, ఫైబర్‌ ఉంటాయి. వాల్‌నట్‌లలో ఒమేగా–3 ఫ్యాటీ యాసిడ్స్, బాదంలో విటమిన్‌– ఇ, యాంటీ ఆక్సిడెంట్లు పుష్కలంగా ఉంటాయి. వీటిని నానబెట్టి చిరుతిండిగా తినడం లేదా డ్రై ఫ్రూట్‌ లడ్డూలలో కలిపి తినడం మంచిది.చిలగడ దుంపలు – క్యారట్‌లు: చలికాలంలో ఈ దుంపలు శరీరానికి వెచ్చదనాన్ని, రోగనిరోధక శక్తిని అందిస్తాయి. క్యారట్‌లలో విటమిన్‌ ఎ, చిలగడ దుంపలలో విటమిన్‌ ఇ పుష్కలంగా ఉంటాయి. చిలగడదుంపలను ఎక్కువగా ఉడికించి లేదా కాల్చి తింటారు. వీటిని సూప్‌లలో కూడా వాడుకోవచ్చు. క్యారట్‌ను కూరల్లో ఉపయోగించడంతో పాటు హల్వా రూపంలోను తీసుకుంటారు.ఆకు కూరలు: పాలకూర, తోటకూర వంటివి చలికాలంలో రోగనిరోధక శక్తిని పెంచడానికి, ఐరన్, కాల్షియం అందించడానికి సహాయపడతాయి. వీటిని పప్పు, పరాఠాలు, సూప్‌ల రూపంలో తీసుకోవడం మంచిది.జామకాయ: జామకాయల్లో విటమిన్‌–సి, యాంటీ ఆక్సిడెంట్లు పుష్కలంగా ఉంటాయి. జామకాయ చలికాలంలో రోగనిరోధక శక్తిని పెంచుతుంది. దీనిలోని అధిక ఫైబర్‌ జీర్ణక్రియను మెరుగుపరుస్తుంది. పచ్చిగా లేదా పండురూపంలో తినొచ్చు.స్టమక్‌ బగ్‌ఇది కూడా వేగంగా వ్యాప్తి చెందే అంటువ్యాధే! వాంతులు, విరేచనాలు అవుతున్న సమయంలో ఎక్కువగా వ్యాపిస్తుంది. లక్షణాలు తగ్గిన తర్వాత కూడా రెండు వారాలు లేదా అంతకంటే ఎక్కువ కాలం పాటు వ్యాధిగ్రస్థుల నుంచి ఇతరులకు సోకే అవకాశముంటుంది. పైగా ఈ వైరస్‌లు ఉపరితలాలపై వారాల తరబడి జీవించగలవు.ఇలాంటి అంటువ్యాధుల విషయంలో చాలా జాగ్రత్తగా ఉండాలి. పైన పేర్కొన్న అంటువ్యాధులతో పాటు చెవినొప్పి, చలి–జ్వరం, దవడ వాపు వంటివన్నీ చలికాలంలో వచ్చే సాధారణ వ్యాధులే.టాన్సిలైటిస్‌చలికాలంలో ఎక్కువగా ఇబ్బంది పెట్టే మరో సమస్య టాన్సిలైటిస్‌. ఇది అంటువ్యాధి కాదు! గొంతు లోపలి భాగంలో గుండ్రటి కణజాలాలుంటాయి. వాటినే టాన్సిల్స్‌ అంటారు. బ్యాక్టీరియా లేదా వైరస్‌ సోకినప్పుడు వీటికి వాపు రావడాన్నే టాన్సిలైటిస్‌ అంటారు. ఈ ఇన్ఫెక్షన్‌ సోకినట్లయితే, ఆహారం, నీళ్లు, లాలాజలం కూడా మింగడానికి కష్టంగా ఉంటుంది.ఆర్థరైటిస్‌ (కీళ్ల నొప్పులు)మధ్య వయస్సు లేదా వృద్ధాప్యంలో ఉన్నవారికి శీతకాలపు కీళ్ల నొప్పులు ఎక్కువగా వస్తాయి. వీటిని ఎదుర్కోవడం చాలా కష్టం. ఈ నొప్పులకు కచ్చితమైన కారణాన్ని వైద్య శాస్త్రం ఇంకా చెప్పలేకపోతోంది. నొప్పి, వాపు, కండరాలు బిగించినట్లుగా అనిపించడం ఇవన్నీ లక్షణాలే! ముఖ్యంగా బరువు పెరగకుండా చూసుకోవాలి, ఎందుకంటే ఈ సమస్య కాళ్ళ కీళ్లపై భారం పడేలా చేస్తుంది. క్రమం తప్పకుండా వ్యాయామం చెయ్యాలి. కనీసం వాకింగ్‌ అయినా చేస్తుండాలి. బాడీ మొత్తం కప్పి ఉండేలా ఉన్ని దుస్తులు వేసుకోవాలి. ఎందుకంటే తీవ్రమైన చలికి గురికావడం కూడా కీళ్ల నొప్పికి కారణమవుతుంది. పొగతాగే అలవాటు ఉంటే మానేయాలి. సెకండ్‌హ్యాండ్‌ స్మోకింగ్‌కు కూడా దూరంగా ఉండాలి. ఈ కాలంలో ఆహారం, నీళ్లు, ఇతర వస్తువులను తోటివారితో పంచుకోకపోవడం ఉత్తమం.శీతకాలంలో డీహైడ్రేషన్‌!సాధారణంగా డీహైడ్రేషన్‌ అనే మాట మనం వేసవిలో ఎక్కువగా వింటాం. నిజానికి చలికాలంలో దాహం తక్కువగా అనిపించినా, డీహైడ్రేషన్‌ సమస్య రాకుండా చూసుకోవాలి అంటున్నారు నిపుణులు. నారింజ, ద్రాక్ష, నిమ్మకాయ వంటి పండ్లలో విటమిన్‌ సి అత్యధికంగా ఉంటుంది. రోగనిరోధక శక్తిని పెంచుకోవడానికి, చర్మానికి సహజ కాంతిని ఇవ్వడానికి వీటిని తీసుకోవడం ఉత్తమం. దానిమ్మ యాంటీ ఆక్సిడెంట్లతో నిండి ఉంటుంది. చలికాలంలో శరీరానికి శక్తినిస్తుంది. వీటితో పాటు వెచ్చని నీళ్లు లేదా హెర్బల్‌ టీలను తరచుగా తీసుకోవడంతో శరీరంలో తేమ శాతం నిలకడగా ఉంటుంది.చలికాలంలో వ్యాధుల వ్యాప్తిని నివారించడానికి చిట్కాలు⇒ దగ్గినప్పుడు లేదా తుమ్మినప్పుడు చేతులకు కాకుండా మోచేతి లోపలి భాగానికి అడ్డు పెట్టుకోవాలి.⇒ తలుపు నాబ్స్, కౌంటర్‌టాప్‌ల వంటి తరచుగా తాకే ఉపరితలాలను శుభ్రం చేయాలి.⇒ వ్యక్తిగత వస్తువులను పంచుకోకుండా ఉండాలి.⇒ లక్షణాలు తగ్గేంత వరకు ఇంటికే పరిమితం కావాలి.⇒ తరచుగా సబ్బు, గోరువెచ్చని నీటితో చేతులు కడుక్కోవాలి. ⇒ వైరస్‌లు– టేబుల్స్, డోర్‌నాబ్‌లు, కౌంటర్‌టాప్‌లు, ఆఫీస్‌ సామాగ్రి వంటి ఉపరితలాలపై కొన్ని గంటలు లేదా రోజులు కూడా జీవించగలవు. ఈ సాధారణంగా తాకే ఉపరితలాలను క్రమం తప్పకుండా శుభ్రం చేయడానికి, సురక్షితమైన క్లీనర్‌లను ఉపయోగించాలి⇒ ఆరోగ్యకరమైన రోగనిరోధక వ్యవస్థకు తగినంత నిద్ర అవసరం. పెద్దలు రాత్రికి 7–9 గంటలు, పిల్లలు వారి వయస్సును బట్టి ఎక్కువ నిద్ర పోవాలి. నిద్ర లేమి రోగనిరోధక శక్తిని బలహీనపరుస్తుంది.⇒ విటమిన్లు, ఖనిజాలు పుష్కలంగా ఉన్న పండ్లు, కూరగాయలు, తృణధాన్యాలు తినడంతో రోగనిరోధక వ్యవస్థను కాపాడుకోవచ్చు. విటమిన్‌ సి, జింక్‌ వంటి పోషకాలు రోగనిరోధక వ్యవస్థను బలోపేతం చేస్తాయి.⇒ క్రమం తప్పకుండా వ్యాయామం చేయడంతో రోగనిరోధక వ్యవస్థ పుంజుకుంటుంది. జలుబు దగ్గు వంటి లక్షణాల నుంచి త్వరగా కోలుకోవడానికి సహాయపడుతుంది. వారంలో ఎక్కువ రోజులు కనీసం30 నిమిషాలు తేలికపాటి వ్యాయామం చేయడం మంచిది. ⇒ చేతులతో తరచుగా ముఖం, నోరు తాకకుండా ఉండాలి. గొంతును తేమగా ఉంచడానికి క్రమం తప్పకుండా నీళ్లు తాగాలి. ⇒ వైరస్‌ లేదా బ్యాక్టీరియా బారిన పడితే రోజుకు రెండుమూడు సార్లు ఉప్పు నీటితో కొన్ని నిమిషాల పాటు పుక్కిలించాలి. ఇది గొంతు నొప్పిని తగ్గిస్తుంది. ⇒ ఈ సీజన్‌లో ఎక్కువగా గోరువెచ్చని నీరు తాగాలి. ఇంటి వాతావరణాన్ని తేమగా ఉంచడానికి ఎయిర్‌ హ్యూమిడిఫైయర్‌ గాడ్జెట్‌ (చర్మం, గొంతు, ముక్కు, పెదవులు పొడిబారకుండా నివారించే పరికరం) ఉపయోగించాలి.ఇక ఈ కాలంలో చర్మం పొడిబారిపోకుండా కళావిహీనంగా మారిపోకుండా ఆలివ్‌ నూనె, వెన్న, కొబ్బరి నూనె వంటి వాటితో శరీరానికి మర్దన చేసుకున్నాక స్నానం చేయడంతో మంచి ఫలితముంటుంది. ఎక్కువగా క్రీమ్స్, లోషన్స్‌ వంటి కాస్మెటిక్స్‌ వాడటం కంటే వంటింటి చిట్కాలను పాటించడమే మేలు. ఆరోగ్యం, ఆహారం, అందం ఈ మూడింటా తగు జాగ్రత్తలు తీసుకుంటే వింటర్‌కి మించి సీజనే ఉండదు. - సంహిత నిమ్మన

తెల్లవారుజామున సుమారుగా ఐదున్నర గంటలు– ఇండియా పాక్‌ సరిహద్దు ప్రాంతం. కంచెకు ఇవతల ఇండియా, అవతల పాకిస్తాన్‌. అక్కడి వాతావరణం అత్యంత ప్రతికూలంగా ఉంది. దట్టమైన పొగమంచు– పక్కన ఎవరున్నారో కూడా తెలుసుకోలేని విధంగా కమ్ముకుని ఉంది. సైనికులు చీమ చిటుక్కుమన్నా పసిగట్టేంత అలెర్ట్‌గా విధులు నిర్వర్తిస్తున్నారు.కొంచెం దూరంలో ఏదో అలికిడి. మన సైనికులు ఒక్కసారిగా అప్రమత్తమై, చెవులు రిక్కించారు. రైఫిల్స్‌ను పొజిషన్‌లోకి తీసుకుని, అడుగులో అడుగు వేస్తూ, అలికిడి వచ్చిన దిశగా ముందుకు కదిలారు. వారికి అక్కడ ఎవరో ఉన్నట్టు అర్థమైంది. వారి దుస్తులు కొంతభాగం మాత్రం కనిపిస్తున్నాయి. వారి కదలికలను జాగ్రత్తగా గమనిస్తూ, సైనికులు ఆ పొగమంచులో కదలకుండా ఉండిపోయారు. ఆ దుస్తులు మరింత ముందుకు వచ్చాయి. సైనికులు ముందుకు కదిలారు. అక్కడ కనిపిస్తున్న దుస్తులను చూస్తూ ఒక్కసారిగా కాల్పులు ప్రారంభించారు. కారణం.. వారు పాక్‌ నుంచి నియంత్రణరేఖ ద్వారా ఇండియాలోకి చొరబడుతున్న ఉగ్రవాదులు.సైనికుల ధాటికి నిలబడలేక, తమ వద్ద ఉన్న ఆయుధాలను ప్రయోగించే సమయం లేక ఇద్దరు ఉగ్రవాదులు అక్కడికక్కడే ప్రాణాలు వదిలారు. అదే సమయంలో ఇండియా సైనికులను చూసి వెనక్కు పారిపోయిన ఒక ఉగ్రవాది ఒకచోట నక్కి ఉన్నాడు. పడిపోయిన ఉగ్రవాదుల వద్ద ఉన్న ఆయుధాలను స్వాధీనం చేసుకుంటున్న సమయంలో వారి కన్నుగప్పి ఆ ఉగ్రవాది నియంత్రణరేఖ దాటి ఇండియాలోకి అడుగుపెట్టి, పొగమంచులో కలిసిపోయాడు.ఫైవ్‌ హిల్స్‌ ప్యాలస్‌ హోటల్‌ ..నగరంలోని అత్యంత ఖరీదైన ఫైవ్‌ స్టార్‌ హోటల్‌. విదేశీ అతిథులు.. వివిధ దేశాల అధ్యక్షులు.. ప్రఖ్యాత పరిశ్రమల అధిపతులు.. సినీతారలు.. వ్యాపార ప్రముఖులు.. ఈ హోటల్లోనే బస చేస్తుంటారు. ఆ రోజు హోటల్‌ చాలా సందడిగా ఉంది. ముగ్గురు విదేశీ రాయబారులు ఇండియాకు వచ్చారు. వారికి అదే హోటల్‌లో బస ఏర్పాటు చేశారు. ఇన్‌స్పెక్టర్‌ అర్జున్‌ తన టీమ్‌తో అక్కడికి చేరుకున్నాడు. క్షుణ్ణంగా ఆ హోటల్‌ పరిసర ప్రాంతాలను తన డేగచూపుతో పరిశీలిస్తున్నాడు. హోటల్‌ వెనుక ప్రదేశాన్ని నిశితంగా పరిశీలిస్తూ వెనక్కు తిరిగాడు. అతడి మస్తిష్కంలో ఏదో తళుక్కుమని మెరిసింది. హోటల్‌ వెనుకభాగంలో రెండు మూడు అడుగుల దూరంలో మట్టి తవ్వినట్టుగా ఉంది. అది తెలియకుండా ఉండటానికి మట్టిని జాగ్రత్తగా కప్పేసి ఉంది. వెంటనే దూరంగా ఉన్న తన టీమ్‌కి సైగ చేశాడు అర్జున్‌. వారు తమతో పాటుగా స్నిఫర్‌ డాగ్‌ను అక్కడికి తీసుకొచ్చారు. అది ఆ ప్రాంతాన్ని వాసన చూసి, తన అరుపులతో హెచ్చరించింది.తక్షణమే అర్జున్‌ అతని టీమ్‌ రంగంలోకి దిగారు. అక్కడ పాతిపెట్టిన ఆర్డీఎక్స్‌ పేలుడు వస్తువులను కనిపెట్టారు. వాటిని పాతిపెట్టిన వారు హోటల్‌ లోపలకు చేరి ఉంటారేమో అనే ఆలోచన అర్జున్‌ను కలవరపరిచింది. వెంటనే హోటల్‌ లోపలకు పరుగు తీశాడు. అర్జున్‌ టీమ్‌ కొద్దిసేపటిలో అక్కడ పాతిపెట్టిన పేలుడు వస్తువులను పేలకుండా నిర్వీర్యం చేసేశారు. ఈలోపు అక్కడికి చేరుకున్న మరో టీమ్‌ వాళ్లు స్నిఫర్‌ డాగ్స్‌తో హోటల్‌ లోపలికి అడుగుపెట్టారు. సరిగ్గా అదే సమయంలో... అక్కడికి చేరుకున్న ఇద్దరు ఉగ్రవాదులు ఏకే–47 తుపాకులతో కాల్పులు జరుపుతూ లోపలకు ప్రవేశించారు. అప్పటికే అక్కడున్న సెక్యూరిటీ పడిపోయి ఉన్నారు. వాళ్ళను తొక్కుకుంటూ లోపలికి వెళ్తున్న ఉగ్రవాదులను రిసెప్షన్‌లో ఉన్నవాళ్లు చూడనే చూశారు. అక్కడున్న డేంజర్‌ అలారం మోగిస్తూ ముందుకు కదిలారు. హోటల్‌లో ఉన్నవారితో పాటు ముగ్గురు విదేశీ రాయబారులు కూడా ఆ డేంజర్‌ అలారం విన్నారు. వెంటనే తమ గది తలుపులు తెరువబోతున్న విదేశీ రాయబారుల ఎదుట ఇన్‌స్పెక్టర్‌ అర్జున్‌ నిలబడి ఉన్నాడు. అతడిని చూసి వారు భయపడ్డారు. వారిని చూస్తూ అర్జున్‌ తన చేతి మణికట్టు మీద ఉన్న మువ్వన్నెల జెండాను చూపించాడు. అది చూసి వారు స్థిమితపడగానే, ‘ఎక్కువ సమయం లేదు. నాతో రండి’ అంటూ అక్కడి నుంచి వారిని వేగంగా పై అంతస్తుకు తీసుకెళ్లాడు. అప్పటికే కింద అంతస్తులలో తుపాకీ శబ్దాలు అరుపులు, కేకలు వినిపిస్తున్నాయి.అక్కడ ఒక మూలనున్న చీకటిగది తలుపు తెరిచాడు. వారిని అందులోకి పంపించి, ‘మీరు ఇందులోంచి వెళ్తే బయటకు చేరుకుంటారు. అక్కడున్న మా వాళ్ళు మిమ్మల్ని క్షేమంగా వేరేచోటుకు చేరుస్తారు’ అని చెప్తుంటే వారు ముగ్గురు అర్జున్‌ని కృతజ్ఞతాపూర్వకంగా చూస్తూ లోపలకు నడిచారు. వెంటనే అర్జున్‌ అక్కడనుండి బయటకు వచ్చి, తన చేతిలోని రైఫిల్‌ను పొజిషన్‌లోకి తీసుకుని ముందుకు నడిచాడు. అప్పటికే ఉగ్రవాదులు జరుపుతున్న కాల్పులతో ఆ హోటల్‌ రణరంగంలా ఉంది. తుపాకీతో ముందుకు నడుస్తున్న అర్జున్, అక్కడి గందరగోళం చూసి ఒక్క క్షణం ఆగిపోయాడు. ఏదైతే అదే అవుతుంది అనుకుంటూ మెట్ల మీదుగా కిందకు పరుగుతీశాడు. చిన్నపిల్లల అరుపులు.. మహిళల ఏడుపులు.. అర్జున్‌కి వినిపిస్తూనే ఉన్నాయి. ఇంకొన్ని మెట్లు దిగితే కింద అంతస్తు వచ్చేస్తుంది అనుకుంటూ వెళ్తున్న అర్జున్‌ ఒక్కసారిగా ఆగిపోయాడు. కారణం అక్కడ మెట్ల కింద భాగంలో ఒక ఉగ్రవాది ఏకే–47 రైఫిల్‌ పట్టుకుని తనవైపు గురిపెట్టి ఉన్నాడు. వాడిని చూసిన అర్జున్‌ తన రెండు చేతులు పైకెత్తి, రెండు మెట్లు దిగాడు. ఇంకో మెట్టు దిగిన అర్జున్, మెరుపువేగంతో కదిలి వాడిని ఒక్క తోపు తోశాడు. వాడు అల్లంత దూరాన ఎగిరి పడ్డాడు. వాడి చేతిలోని ఏకే–47 దూరంగా ఎగిరి పడింది.అర్జున్‌ గాలిలోకి డైవ్‌ చేస్తూ ఏకే–47 అందుకున్నాడు. అది చూసిన ఉగ్రవాది అక్కడనుండి తప్పించుకోవాలని ప్రయత్నిస్తున్నాడు. మరోపక్క అర్జున్‌ రైఫిల్‌ పట్టుకుని తన చుట్టూ గమనించాడు. అక్కడ అప్పటికే చాలామంది చనిపోయి పడున్నారు. ఇంకొంతమంది రక్తమోడుతూ పడి ఉన్నారు. అర్జున్‌ తన చేతిలో ఉన్న ఏకే–47ను ఒక్కసారిగా ఆ ఉగ్రవాది వైపు గురిపెట్టాడు. క్షణాల్లో ఆ ఉగ్రవాది శరీరం జల్లెడలా మారి, కింద పడిపోయాడు. ఆ రైఫిల్‌ను అక్కడే పడేసి క్షతగాత్రులను హాస్పిటల్‌కు తరలించాలని ఆలోచిస్తూ ముందుకు రెండడుగులు వేశాడు అర్జున్‌. సరిగ్గా అప్పుడే.. బాంబు విస్ఫోటం.. హోటల్‌ మొత్తం ఒక్కసారిగా కుప్పకూలిపోయింది. పేలుడు ధాటికి దూరంగా విసిరేయబడ్డాడు అర్జున్‌. కొద్దిక్షణాల తరువాత అతడి కళ్ళు మెల్లిగా తెరుచుకున్నాయి. ఎదురుగా దుమ్ము .. ధూళి .. నల్లటి పొగ .. వాటిని చూస్తూ పైకి లేవడానికి శతవిధాలా ప్రయత్నిస్తున్నాడు. కాని, అతడికి కదలడానికి శక్తి చాలడం లేదు. ఇంతలో లీలగా ఏవో మాటలు వినిపిస్తున్నాయి. వాటిని వినాలని చెవులు రిక్కించాడు.‘సాబ్‌.. నేను మీ గులాం.. నసీర్‌ అబ్దుల్లాని మాట్లాడుతున్నాను. మీరు చెప్పినట్టే ఇక్కడ మొత్తం అందరినీ చంపేశాం’ చెప్తూ వికటంగా నవ్వసాగాడు.అటుపక్క నుంచి చెప్తున్నది వింటూ, ‘అలాగే సాబ్‌.. నేను ఇక్కడనుండి వెంటనే తప్పుకుంటాను. ఈ ఫోన్‌ కాలుతున్న మంటలలోకి విసిరేస్తున్నాను’ అంటూ ఫోన్‌ మంటలలోకి విసిరేసి, అక్కడనుండి ముందుకు నడిచాడు. ఆ వ్యక్తి ఎవరో చూడాలని ప్రయత్నిస్తున్న అర్జున్‌కి కదలడం చేతకాక అలాగే ఉండిపోయాడు. అతడి కళ్ళు మూతలు పడిపోయాయి.రీసెర్చ్‌ అనాలసిస్‌ వింగ్‌ (రా) ఆఫీస్‌..మూడంతస్తుల ఆ భవనంలో చివరి అంతస్తు.. హోమ్‌ మినిస్టర్‌ ఆ అంతస్తులోకి అడుగుపెట్టాడు. హోమ్‌ మినిస్టర్‌ రాక గురించి తెలియగానే ‘రా’ చీఫ్‌ అగస్త్య అక్కడికి వచ్చాడు.‘అగస్త్యా! ఫైవ్‌ హిల్స్‌ ప్యాలస్‌ హోటల్‌ మీద దాడి జరిగి నలభై ఎనిమిది గంటలు దాటింది. అమాయకులైన ఎంతోమంది ప్రాణాలు కోల్పోయారు. ఈ దాడి ఎవరు చేశారో మనకు తొందరగా తెలియాలి’ అన్నాడు.‘సర్‌ .. నాకు రెండుగంటలు టైం ఇవ్వండి’ అన్నాడు అగస్త్య. ఒకపక్క ఒక విశాలమైన గది. ఆ గది నుంచి బయటకు వచ్చిన ఒక డాక్టర్‌ అగస్త్యను కలిశాడు.‘సారీ అగస్త్యగారు! అతడికి ఎలాంటి మందులు పని చేయడం లేదు. శరీరం మొత్తం చచ్చుబడిపోయింది’ అని చెప్పి అక్కడినుంచి వెళ్ళిపోయాడు.అగస్త్య విచారిస్తూ ఆ గదిలోకి అడుగుపెట్టాడు. అది చిన్న సైజు హాస్పిటల్‌లా ఉంది. అక్కడ ఒక మంచం మీద ఒక వ్యక్తి ఉన్నాడు. అతడికి ఆ గదిలోనే ట్రీట్మెంట్‌ జరగడానికి వీలుగా అన్ని పరికరాలు అమర్చారు.అక్కడ ఉన్న కుర్చీలో కూర్చున్నాడు.మంచం మీదున్న ఆ వ్యక్తిని కొద్దిసేపు అలా చూస్తుండిపోయాడు. తరువాత అక్కడున్న సిస్టం ఆన్‌ చేశాడు. పేపర్‌ వెయిట్‌ తిప్పుతూ ఆలోచనలో మునిగిపోయాడు. అతడు పేపర్‌ వెయిట్‌ తిప్పుతూ ఉంటే సిస్టంలో స్క్రీన్‌ సేవర్లు మారిపోతున్నాయి. తిప్పుతున్న పేపర్‌ వెయిట్‌ కిందపడిపోతుండగా, దానిని చేతులతో పట్టుకుని పక్కన పెట్టాడు. సరిగ్గా అదే సమయంలో సిస్టంలో స్క్రీన్‌ సేవర్‌ ఆగిపోయింది. అది ఒక ప్రముఖ వ్యక్తి ఫొటో.కొద్దిసేపు తరువాత అక్కడనుండి వెళదామని అనుకుంటూ అగస్త్య పైకి లేచాడు. అనుకోకుండా అగస్త్య చూపు మంచం మీదున్న వ్యక్తి మీద పడింది. ఒక్కసారిగా అగస్త్య కళ్ళు పెద్దవయ్యాయి. ఆ వ్యక్తి కళ్ళు తెరిచి, అగస్త్యవైపే చూస్తున్నాడు.అగస్త్య అతడిని చూస్తూ, ‘అర్జున్‌! బాగానే ఉన్నావా?’ అడిగాడు.అర్జున్‌ మాట్లాడలేకపోతున్నాడు. అతడి కళ్ళు మాత్రమే చూడగలుగుతున్నాయి.ఏదో చెప్పాలని అర్జున్‌ తీవ్రంగా ప్రయత్నిస్తున్నాడు. కానీ అతడి శరీరం ఇసుమంతైనా కదలడం లేదు. ఆ బాధ అతడి కళ్ళలో స్పష్టంగా కనిపిస్తోంది. అతడి పరిస్థితిని ఆందోళనగా చూస్తున్నాడు అగస్త్య.‘కమాన్‌ .. అర్జున్‌ కమాన్‌.. నువ్వు మాట్లాడగలవు. నువ్వు తలుచుకుంటే పైకి లేచి నిలబడగలవు’ అని ధైర్యవచనాలు చెప్తూ అర్జున్‌ని ఉత్సాహపరుస్తున్నాడు అగస్త్య.అర్జున్‌ పైకి లేవడం కాదు కదా, కనీసం మాట్లాడలేడని అతడికి తెలుసు.‘అర్జున్‌.. నువ్విప్పుడు ఏదైనా చెప్పగలిగితే మనం ఆ ఉగ్రవాదులను పట్టుకోగలం. ఫైవ్‌ హిల్స్‌ ప్యాలస్‌ హోటల్‌ దాదాపుగా ధ్వంసమైంది. నువ్వు కాపాడిన విదేశీ రాయబారులు క్షేమంగా తిరిగి వెళ్లిపోయారు.అందుకుగాను నీకు రాష్ట్రపతి ప్రశంస లభించింది. ఇప్పుడు ఆ ఉగ్రదాడి గురించి నువ్వు చెప్పే వివరాలు మాత్రమే మన దేశాన్ని కాపాడగలుగుతాయి’ అని చెప్తూ అగస్త్య అర్జున్‌ వంక చూశాడు. అర్జున్‌ కనులనుంచి నీటిచుక్కలు రాలిపడ్డాయి. అతని పక్కన కూర్చుని అగస్త్య కన్నీటిని తుడిచాడు. సరిగ్గా అదే సమయంలో.. అర్జున్‌ కళ్ళు అక్కడ ఆన్‌ చేసి ఉన్న సిస్టం మీద పడ్డాయి. సిస్టంను చూస్తూ అతడి కళ్ళు పెద్దవయ్యాయి.అర్జున్‌ కళ్ళలో మార్పులను గమనిస్తున్న అగస్త్య సిస్టంలో ఏముందా అని చూశాడు. అందులో.. ప్రముఖ శాస్త్రవేత్త స్టీఫెన్‌ హాకింగ్‌– నాడీమండలం పని చేయడం ఆగిపోయి అమియోట్రోఫిక్‌ లాటరల్‌ స్కె›్లరోసిస్‌ వ్యాధి వలన స్టీఫెన్‌ హాకింగ్‌ కదలలేని, మాట్లాడలేని పరిస్థితికి చేరుకున్నాడు. అయినా, కేవలం కనురెప్పలు కదిలించడం ద్వారా ఎన్నో పుస్తకాలను రచించాడు.అది చూడగానే అర్జున్‌ కళ్ళలో ఏదో చెప్పాలన్న ఆరాటం కనిపిస్తోంది. అగస్త్య ఉత్సాహంగా పైకి లేచాడు. ‘అర్జున్‌! నువ్వేం చెప్పాలనుకున్నావో నాకు అర్థమైంది. నువ్వు ఆ ఉగ్రవాదుల గురించి ఏదో సమాచారం చెప్పాలని ప్రయత్నిస్తున్నావు కదా’ అన్నాడు అగస్త్య. ‘ఔను’ అన్నట్టుగా కనురెప్పలు ఆడించాడు అర్జున్‌. ‘అర్జున్‌ ముందు వాళ్ళ పేర్లు తెలిస్తే చెప్పు. వాళ్ళు ఏ సంస్థకు చెందిన ఉగ్రవాదులో నేను కనిపెడతాను’ అన్నాడు అగస్త్య.అందుకు సమాధానంగా కనురెప్పలు కదిలించాడు అర్జున్‌.‘మొదలుపెడదాం’ అంటూ అగస్త్య, ‘నేను ఏబీసీడీలు చెప్తుంటాను. వాడి పేరులో మొదటి అక్షరం వచ్చినప్పుడు కనురెప్పలు కదిలించు అన్నాడు. చెప్పడం మొదలుపెట్టాడు. ‘ఎన్‌’ అన్నప్పుడు కనురెప్పలు కదిలించాడు అర్జున్‌. ఎన్‌ అనే అక్షరం రాసి మళ్లీ చెప్పడం మొదలుపెట్టాడు అగస్త్య. అలా ‘నసీర్‌ అబ్దుల్లా’ పేరు బయటకు వచ్చింది. అర్జున్‌ను చూసి అగస్త్యకు కళ్ళు తడిబారాయి.పేరు మోసిన ఉగ్రవాద సంస్థకు చెందిన నసీర్‌ అబ్దుల్లాను, మిగిలినవారిని ‘రా’ అరెస్ట్‌ చేసింది.కేవలం ‘కనురెప్పలే సాక్షిగా‘ భయంకరమైన ఉగ్రవాదులను కనిపెట్టినందుకు అర్జున్‌కు ప్రత్యేకమైన అవార్డు ప్రకటించారు.