ముంబై: ఎల్‌ఐసీ హౌసింగ్‌ ఫైనాన్స్‌ డిసెంబర్‌ త్రైమాసికంలో నికరలాభం అంత క్రితం ఏడాది ఇదే కాలంతో పోలిస్తే 37 శాతం పడిపోయి రూ.480 కోట్లకు వచ్చి చేరింది. ఆస్తుల నాణ్యతలో మెరుగుదల ఉన్నప్పటికీ ఆశించిన క్రెడిట్‌ నష్టానికి అదనపు కేటాయింపులు చేయడం ఈ తగ్గుదలకు కారణమని కంపెనీ ప్రకటించింది. రాని బాకీల కోసం చేసిన అదనపు కేటాయింపులు డిసెంబర్‌ త్రైమాసికంలో రూ.7,285 కోట్లుగా ఉన్నాయి. 2021 అక్టోబర్‌–డిసెంబర్‌లో ఇది రూ.5,716 కోట్లు. స్థూల నిరర్ధక ఆస్తులు 5.04 నుంచి 4.75 శాతానికి వచ్చి చేరాయి. నికర నిరర్ధక ఆస్తులు 3.2 నుంచి 2.4 శాతంగా ఉన్నాయి. ఆదాయం 16 శాతం దూసుకెళ్లి రూ.5,871 కోట్లు, నికర వడ్డీ ఆదాయం 10 శాతం ఎగసి రూ.1,606 కోట్లుగా ఉంది. జారీ చేసిన రుణాలు రూ.17,770 కోట్ల నుంచి రూ.16,100 కోట్లకు వచ్చి చేరాయి.     

ముంబై: ఎల్‌ఐసీ హౌసింగ్‌ ఫైనాన్స్‌ సెప్టెంబర్‌ త్రైమాసికానికి ఫలితాల పరంగా ఫర్వాలేదనిపించింది. నికర లాభం 23 శాతం వృద్ధితో రూ.305 కోట్లుగా నమోదైంది. కానీ, కీలకమైన వడ్డీ ఆదా యం స్వల్పంగా తగ్గి (0.80 శాతం) రూ.1,163 కోట్లకు పరిమితమైంది. ఇందుకు కారణం ఏంటన్నది సంస్థ వెల్లడించలేదు. వ్యక్తిగత విభాగంలో రుణాల మంజూరు స్వల్పంగా తగ్గి రూ.14,300 కోట్లుగా ఉంది. మొత్తం రుణాల వితరణ 4 శాతం పెరిగి రూ.16,110 కోట్లుగా ఉంది. సంస్థ నిర్వహణలోని మొత్తం రుణాల్లో వ్యక్తులకు ఇచ్చినవి రూ.2,16,771 కోట్లుగా ఉన్నాయి. నికర వడ్డీ మార్జిన్‌ ఏడాది క్రితం ఇదే కాలంలో ఉన్న 2 శాతం నుంచి 1.8 శాతానికి పరిమితమైంది. కేటాయింపులు రూ.6,552 కోట్లకు పెరిగాయి.   చదవండి: ఎయిర్‌టెల్‌ బంపరాఫర్‌: ఒకే రీచార్జ్‌తో బోలెడు బెనిఫిట్స్‌, తెలిస్తే వావ్‌ అనాల్సిందే!

ముంబై: ఎల్‌ఐసీ హౌసింగ్‌ ఫైనాన్స్, బజాజ్‌ హౌసింగ్‌ ఫైనాన్స్‌ సంస్థలు తమ గృహ రుణ రేటును 50 బేసిస్‌ పాయింట్ల (0.50 శాతం) వరకూ పెంచాయి. బజాజ్‌ హౌసింగ్‌ ఫైనాన్స్‌ విషయానికి వస్తే, అరశాతం వడ్డీ పెంపుతో వేతనం, వృత్తి పరమైన వ్యక్తులకు గృహ రుణ రేటు 7.70 శాతంగా ఉండనుంది. ఇక ఎల్‌ఐసీ హౌసింగ్‌ ఫైనాన్స్‌ ప్రైమ్‌ లెండింగ్‌ 7.50 శాతం నుంచి 8 శాతానికి చేరింది.

ముంబై: ఎల్‌ఐసీ హౌసింగ్‌ ఫైనాన్స్‌ (ఎల్‌ఐసీ హెచ్‌ఎఫ్‌ఎల్‌) ఇకపై రూ.2 కోట్ల వరకూ గృహ రుణంపై కూడా అతి తక్కువ వడ్డీరేటు 6.66 శాతం వడ్డీని ఆఫర్‌ చేస్తోంది. ఇప్పటి వరకూ  రూ.50 లక్షల రుణం వరకూ ఉన్న ఈ అతితక్కువ వడ్డీరేటు ఆఫర్‌ను రూ.2 కోట్ల వరకూ రుణానికి వర్తింపజేస్తున్నట్లు తెలిపింది. కొత్త రుణ గ్రహీతలకు రూ.50 లక్షల వరకూ 6.66 శాతం వద్ద అతితక్కువ రుణ రేటు నిర్ణయాన్ని ఈ యేడాది జూలైలో సంస్థ ప్రకటించింది. అయితే 6.66 శాతం వడ్డీరేటు కోరుకునే వారికి సిబిల్‌ స్కోర్‌ 700, ఆపైన ఉండాలి. 2021 సెపె్టంబర్‌ 22 నుంచి నవంబర్‌ 30 మధ్య రుణ మంజూరు జరిగి, మొదటి దఫా రుణ పంపిణీ 2021 డిసెంబర్‌లోపు జరిగి ఉండాలి. వేతనం పొందుతున్న వారితోపాటు స్వయం సంపాదనా పరులకూ తాజా నిర్ణయం వర్తిస్తుందని సంస్థ ఎండీ, సీఈఓ వై విశ్వనాథ్‌ గౌడ్‌ తెలిపారు. రూ.2 కోట్ల వరకూ రుణం తీసుకున్న సందర్భంలో రుణ మొత్తంపై 0.25%  లేదా గరిష్టంగా రూ.10,000కానీ ఏది తక్కువైతే అంతమొత్తం ప్రాసెసింగ్‌ ఫీజు రాయితీ లభిస్తుందని కూడా ఆయన వెల్లడించారు. గృహ రుణానికి ఆన్‌లైన్‌ దరఖాస్తు, ఆమోదానికి ఉద్దేశించి ఎల్‌ఐసీ హెచ్‌ఎఫ్‌ఎల్‌ ఇటీవలే ‘హోమై యాప్‌’ను ఆవిష్కరించింది.   ఇప్పటికే పలు బ్యాంకులు ఇలా... పండుగ సీజన్‌ డిమాండ్‌లో భారీ వాటా లక్ష్యంగా ఇప్పటికే ఎస్‌బీఐ, బ్యాంక్‌ ఆఫ్‌ బరోడా(బీఓబీ) , పంజాబ్‌ నేషనల్‌ బ్యాంక్‌ (పీఎన్‌బీ), హెచ్‌డీఎఫ్‌సీ గృహ రుణ రేట్లను ఇటీవలే భారీగా తగ్గించిన సంగతి తెలిసిందే.

మీరు కొత్త ఇల్లు కొనుగోలుచేయాలని చూస్తున్నారా?, అయితే మీకు ఒక అదిరిపోయే శుభవార్త. ఎల్ఐసీ హౌసింగ్ ఫైనాన్స్(ఎల్ఐసీ హెచ్ఎఫ్ఎల్) పండుగ సీజన్ ఆఫర్లలో భాగంగా గృహ రుణాలను అతి తక్కువకు(6.66%) అందించనున్నట్లు నేడు ప్రకటించింది. వినియోగదారులు ₹2 కోట్ల వరకు తక్కువ వడ్డీ రేటుకే గృహ రుణాలను పొందవచ్చు అని తెలిపింది. నేడు ప్రకటించిన ఈ కొత్త ఆఫర్ సిబిల్ స్కోరు 700 అంతకంటే ఎక్కువ ఉన్న రుణగ్రహీతలకు మాత్రమే వర్తిస్తుంది. వారి వృత్తితో సంబంధం లేకుండా (అంటే వేతన లేదా వృత్తిపరమైన/స్వయం ఉపాధి కలిగిన వ్యక్తులు) రుణాలు మంజూరు చేయనున్నట్లు ప్రకటనలో తెలిపింది.  ఈ ఆఫర్ సెప్టెంబర్ 22 నుంచి నవంబర్ 30, 2021 వరకు మంజూరు చేసిన రుణాల మాత్రమే వర్తిస్తుంది అని తెలిపింది. గతంలో ఈ ఆఫర్ రూ.50 లక్షల వరకు గృహరుణాలు తీసుకునే వారికి వర్తించేది అని సీఈఓ వై. విశ్వనాథ గౌద్ తెలిపారు. కానీ, ప్రస్తుతం ₹2కోట్ల వరకు రుణాలకు అదే రేటును పొడిగించినట్లు ఆయన తెలిపారు. రుణగ్రహీతలు HomY App ద్వారా గృహ రుణాల కోసం ఆన్లైన్ లో దరఖాస్తు చేసుకోవచ్చు. ఈ ఆఫర్ పరిమిత కాలం మాత్రమే ఉంటుంది. గృహ రుణాలపై ఇప్పటివరకు అందిస్తున్న అతి తక్కువ వడ్డీ రేటు ఇదే. మీ సిబిల్ స్కోరు 700 లేదా అంతకంటే ఎక్కువ ఉంటే మాత్రమే ఈ తక్కువ వడ్డీ రేటుకు గృహ రుణం పొందే అవకాశం ఉంటుంది. మీ సిబిల్ స్కోరు గనుక తక్కువ ఉంటే వడ్డీ రేటు పెరిగే అవకాశం ఉంది.(చదవండి: ఫ్రెషర్స్‌కు గుడ్‌న్యూస్‌, లక్షకు పైగా ఉద్యోగాలకు..)