Kurla

ముంబై: సెంట్రల్‌ రైల్వే మార్గంలోని ఛత్రపతి శివాజీ మహారాజ్ టర్మినస్‌ (సీఎస్‌ఎంటీ)–కుర్లా స్టేషన్ల మధ్య నిర్మించనున్న ఐదు, ఆరో లేన్ల ప్రాజెక్టులో స్దలం కొరత కారణంగా భారీ మార్పులు చేయాలని ముంబై రైల్వే వికాస్‌ కార్పొరేషన్‌ (ఎంఆర్‌వీసీ) యోచిస్తోంది. అందుకు సంబంధించిన కొత్త ప్రతిపాదన రూపొందించడం, అధ్యయనం చేసే పనిలో ఎంఆర్‌వీసీ అధికారులు నిమగ్నమయ్యారు.సీఎస్‌ఎంటీ–పరేల్‌ స్టేషన్ల మధ్య మసీద్‌బందర్, శ్యాండ్రస్ట్‌రోడ్, బైకళ, చీంచ్‌పోక్లీ, కరీ రోడ్‌ స్టేషన్లు ఉన్నాయి. కానీ ఇందులో భైకళ మినహా మిగత స్టేషన్లలో ఫాస్ట్‌ మార్గంలో ప్లాట్‌ఫారాలు లేవు. దీంతో కేవలం భైకళ స్టేషన్‌ను మాత్రం భూగర్భంలో నిర్మించాలని ప్రతిపాదించనున్నారు. అధ్యయనం పనులు కోసం జపాన్‌కు చెందిన ఇంజినీర్లను, అలాగే మౌలికసదుపాయాల కోసం ఓ ప్రైవేటు సంస్ధను సలహాదారులుగా నియమించింది. ఇరు కంపెనీలు సాంకేతిక సమస్యలు పరిష్కరించడం తోపాటు ఈ ప్రాజెక్టుకు అయ్యే వ్యయం, భూగర్భ మార్గం, బైకళ స్టేషన్‌ రూపురేఖలపై మ్యాపును రూపొందిస్తాయని అధికార వర్గాలు తెలిపాయి.జపాన్‌ సంస్థకు బాధ్యతలు.. సీఎస్‌ఎంటీ–కల్యాణ్‌ జంక్షన్‌ల మధ్య ఒకప్పుడు నాలుగు రైల్వే లేన్లు ఉండేవి. వీటిలో రెండింటిని స్లో రైళ్లకు, రెండు ఫాస్ట్‌ రైళ్లకు కేటాయించారు. కానీ దూరప్రాంతాల రైళ్లకు ప్రత్యేకంగా లేన్లు లేకపోవడంతో మూడు, నాలుగో ఫాస్ట్‌ మార్గంలోనే రాకపోకలు సాగిస్తున్నాయి. ఈ రెండు లేన్ల మీదుగా ఇటు లోకల్‌ రైళ్లు, అటు దూర ప్రాంతాల రైళ్లు రాకపోకలు సాగించడంవల్ల వాటిపై అదనపు భారం పడుతోంది.కొత్త రైళ్లు ప్రవేశపెట్టేందుకు అవకాశం కూడా లేకపోవడంతో దూరప్రాంతాల రైళ్లు నడిపేందుకు ప్రత్యేకంగా ఐదు, ఆరో రైల్వే లేన్లు వేయాలని సుమారు మూడు దశాబ్ధాల కిందటే ప్రతిపాదన సిద్ధమైంది. స్ధలం అనుకూలంగా ఉన్న కుర్లా–కల్యాణ్‌ మధ్య ఐదు, ఆరో లేన్ల పనులు పూర్తిచేశారు. దీంతో కుర్లా–కల్యాణ్‌ స్టేషన్ల మధ్య మూడు, నాలుగో రైల్వే లేన్లపై పడుతున్న భారం కొంతమేర తగ్గింది. కానీ సీఎస్‌ఎంటీ–కుర్లా స్టేషన్ల మధ్య స్ధలం లేకపోవడంతో ఈ ప్రతిపాదన గత రెండు దశాబ్ధాలుగా పెండింగులో పడిపోయింది.సీఎస్‌ఎంటీ–కుర్లా స్టేషన్ల మధ్య 17.5 కిలోమీటర్ల దూరం ఉంది. ఇందులో పరేల్‌ నుంచి కుర్లా వరకు స్ధలం కొంత అనుకూలంగా ఉంది. కానీ సీఎస్‌ఎంటీ–పరేల్‌ మధ్య స్ధలం కొరత ప్రధాన సమస్య కావడంతో ఐదు, ఆరో రైల్వే లేన్లు వేయడానికి వీలుపడలేదు. ఇప్పుడు కొత్తగా చేపట్టనున్న ప్రాజెక్టులో పెను మార్పులు చేశారు. సీఎస్‌ఎంటీ–పరేల్‌ మధ్య 7.4 కిలోమీటర్ల దూరం ఉంది.ఇదీ చ‌ద‌వండి: భావోద్వేగంతో బ‌స్సుకు వీడ్కోలుఐదు, ఆరో లేన్లు వేయాలంటే పట్టాలకు అనుకుని అనేక నివాస భవనాలు, వ్యాపార సంస్ధలు, స్కూళ్లు, కాలేజీ భవనాలు అడ్డువస్తున్నాయి. వీరందరికి పునరావాసం కల్పించడం, నష్టపరిహారం చెల్లించడం రైల్వేకు పెద్ద సవాలుగా మారనుంది. కానీ ఇప్పుడు కొత్తగా నియమించిన జపాన్‌ ఇంజినీర్లు, ప్రైవేటు సలహదారుల సంస్ధ ఇచ్చే నివేదికపై ఈ ప్రాజెక్టు భవిత ఆదారపడి ఉంది. ఒకవేళ నివేదిక అనుకూలంగా వస్తే ఈ ప్రాజెక్టు పూర్తి చేయాలంటే కొన్ని వేల కోట్ల రూపాయలు ఖర్చవుతాయి. ఈ భారాన్ని భరించే ఆర్ధిక స్థోమత ముంబై లోకల్‌ రైల్వే బోర్డుకు ఉందా అనేది వేచిచూడాల్సిందే.

ముంబైలో భారీ వర్షాల వేళ మరో విషాద ఘటన చోటుచేసుకుంది. కుర్లా ప్రాంతంలోని చిరాగ్‌ నగర్‌లో కొండచరియలు విరిగిపడి ఇళ్లు ధ్వంసమయ్యాయి. ఈ ప్రమాదంలో ఐదుగురు ప్రాణాలు కోల్పోయినట్లు అధికారులు వెల్లడించారు. మరికొందరు శిథిలాల కింద చిక్కుకుని ఉండొచ్చని అనుమానిస్తున్నారు. దీంతో సహాయక బృందాలు ప్రాణాల కోసం తీవ్రంగా గాలిస్తున్నాయి.బుధవారం తెల్లవారుజామున 3.48 గంటల సమయంలో కుర్లా పశ్చిమ ప్రాంతంలోని గౌసియా చాల్‌, చిరాగ్‌ నగర్‌ వద్ద ఈ ప్రమాదం జరిగింది. కొండ ప్రాంతంలోని మట్టి ఒక్కసారిగా కూలిపడి సమీపంలోని రెండు మూడు ఇళ్లపై పడటంతో ఈ ప్రమాదం జరిగినట్లు అధికారులు తెలిపారు.విక్టిమ్‌ డిటెక్షన్‌ కెమెరాలతో గాలింపుప్రమాదం జరిగిన వెంటనే ముంబై ఫైర్‌ బ్రిగేడ్‌, ముంబై పోలీసులు, ఎన్‌డీఆర్‌ఎఫ్‌ బృందాలు రంగంలోకి దిగాయి. శిథిలాల కింద చిక్కుకున్న వారి ఆచూకీ తెలుసుకునేందుకు ప్రత్యేక విక్టిమ్‌ డిటెక్షన్‌ కెమెరాలను ఉపయోగిస్తున్నారు. ఈ కెమెరాల ద్వారా శిథిలాల లోపల కదలికలు, మనుషుల ఉనికి వంటి సంకేతాలను గుర్తించే ప్రయత్నం చేస్తున్నారు. భారీ యంత్రాలతో శిథిలాలను తొలగించడంతోపాటు.. లోపల ఎవరైనా ప్రాణాలతో ఉన్నారా అనే విషయంపై అత్యంత జాగ్రత్తగా గాలింపు కొనసాగుతోంది. ఈ ప్రమాదంలో గాయపడిన ఇద్దరిని కుర్లాలోని భాభా ఆస్పత్రికి తరలించారు. ఘటనాస్థలానికి మేయర్‌.. సహాయక చర్యల పరిశీలనముంబై మేయర్‌ రీతూ తావ్డే ఘటనాస్థలానికి చేరుకుని సహాయక చర్యలను పరిశీలించారు. బీఎంసీ అధికారులు, అగ్నిమాపక సిబ్బంది, పోలీసు అధికారులు పరిస్థితిని పర్యవేక్షిస్తున్నారు. ఈ ఘటనపై ఆరా తీసిన సీఎం దేవేంద్ర ఫడ్నవిస్‌.. బాధితులకు మెరుగైన వైద్యం అందేలా చూడాలని అధికార యంత్రాగాన్ని ఆదేశించారు. ముంబైలో వర్షాకాలంలో కొండ ప్రాంతాల్లో ఇలాంటి ప్రమాదాలు జరిగే అవకాశం ఉండటంతో అధికారులు అప్రమత్తంగా ఉండాలని సూచిస్తున్నారు. ప్రమాదానికి గల కారణాలపై కూడా అధికారులు పరిశీలన చేపట్టారు. ప్రస్తుతం శిథిలాల కింద ఉన్న వారి కోసం రెస్క్యూ ఆపరేషన్‌ కొనసాగుతోంది. మరింత సమాచారం అందిన తర్వాత మృతుల సంఖ్య, చిక్కుకున్న వారి వివరాలపై స్పష్టత వచ్చే అవకాశం ఉంది.

ముంబై: కుర్లాలోని ఎస్‌జీ బార్వేరోడ్‌లో ఆర్టీసీ బస్సు బీభత్సం సృష్టించింది. బ్రేకులు ఫెయిలవ్వడంతో పాదచారులపై దూసుకెళ్లినట్లు సమాచారం. మృతులను శివమ్ కశ్యప్ (18), కనీజ్ ఫాతిమా (55), అఫీల్ షా (19), అనమ్ షేక్ (20)లు మరణించారు. 29మంది గాయపడ్డారు. ఐదారు ఆటోలు, 10 ద్విచక్రవాహనాలు ధ్వంసమయ్యాయి. సోమవారం సాయంత్రం 9.30 గంటల సమయంలో హౌసింగ్ కాలనీలో బృహన్ ముంబయి ఎలక్ట్రిక్ సప్లయ్ అండ్ ట్రాన్స్‌పోర్ట్ (బెస్ట్)కు చెందిన కుర్లా- అంధేరి రైల్వే స్టేషన్ మధ్య నడిచే రూట్ నంబర్ 332 బస్సుగా గుర్తించారు. ప్రమాదంపై సమాచారం అందుకున్న పోలీసులు బస్సు డ్రైవర్‌ సంజయ్‌ మోర్‌(43)ని అరెస్ట్‌ చేశారు. సహాయక చర్యల్ని ముమ్మరం చేపట్టారు. ప్రమాదంలో గాయపడ్డ క్షతగాత్రులను అత్యవసర చికిత్స నిమిత్తం ఆస్పత్రికి తరలించారు. బస్సు బ్రేకులు ఫెయిలవ్వడంతో జరిగిన ప్రమాద తీవ్రతను చూసిన స్థానికులు ఉగ్రదాడి తరహాలో ఉండడంతో భయాందోళనకు గురయ్యారు. పలువురు ప్రాణ భయంతో పారిపోయారు. పరిస్థితిని అదుపు చేసేందుకు క్విక్ రెస్పాన్స్ టీమ్, ర్యాపిడ్ యాక్షన్ ఫోర్స్ సిబ్బంది రంగంలోకి దిగారు.బృహన్ ముంబయి ఎలక్ట్రిక్ సప్లయ్ అండ్ ట్రాన్స్‌పోర్ట్ (బెస్ట్)కు చెందిన బస్సు కుర్లా స్టేషన్ నుంచి అంధేరికీ వెళ్తుండగా బ్రేక్‌లు ఫెయిల్ కావడంతో ప్రమాదం జరిగినట్టు మున్సిపల్ కార్పొరేషన్‌ అధికారులు తెలిపారు. అయితే ఆ బస్సు డ్రైవర్‌ సంజయ్‌ మోర్‌ కాంట్రాక్ట్‌ డ్రైవర్‌గా విధులు నిర్వహిస్తున్నట్లు తెలుస్తోంది. బస్సు ప్రమాదానికి గల కారణాల్ని గుర్తించేందుకు ఆర్టీఓ అధికారి రవి గైక్వాడ్ నిపుణుల బృందం రంగంలోకి దిగింది.జాయింట్ కమీషనర్ ఆఫ్ పోలీస్ సత్యనారాయణ చౌదరి స్వయంగా కుర్లా పోలీస్ స్టేషన్‌లో డ్రైవర్‌ను విచారించారు. సంజయ్‌ మోర్‌ను వైద్య పరీక్షల నిమిత్తం జేజే ఆస్పత్రికి తరలించి విచారణ చేపట్టారు. ఇదీ చదవండి : నా డెత్‌ లేఖ సుప్రీం కోర్టుకు చేరాలి


 ముంబై: అదో పెద్ద షాపింగ్ మాల్. అందులోకి వెళ్లాలంటే కాస్త స్టేచర్ ఉండాలన్నది ఆ మాల్ యజమానుల నిబంధన. అయితే ఈ నిబంధన ఎక్కడా లేదు. ఆ మాల్‌కు ఆటోలో వెళ్లిన ఓ సాఫ్ట్‌వేర్‌ ఇంజినీర్‌కు వింత అనుభవం ఎదురైంది. ఆటోలో వచ్చాడని మాల్‌ సిబ్బంది లోపలకు రానివ్వలేదు.
 
 ముంబై శివారు ప్రాంతం కుర్లాలో వికాస్‌ తివారీ (28) అనే సాఫ్ట్‌వేర్‌ ఇంజినీర్‌ కుటుంబ సభ్యులతో కలసి దీపావళి పండగకు షాపింగ్‌ చేసేందుకు మాల్‌కు వెళ్లాడు. వికాస్‌ సోదరుడు సంతోష్‌కు ఆటో ఉంది. ఆయన ఆటోలోనే వికాస్‌.. తన భార్య, సోదరుడి భార్య, పిల్లలను తీసుకుని ఫోయెనిక్స్‌ మార్కెట్‌సిటీ మాల్‌కు వెళ్లాడు. మాల్‌ లోపలకి ఆటో వెళ్తుండగా సెక్యూరిటీ గార్డు గట్టిగా కేకలు వేస్తూ వారిని అడ్డుకున్నాడు. మాల్‌ లోపల ఆటోలను పార్కింగ్‌ చేసేందుకు అనుమతి లేదని అభ్యంతరం చెప్పాడు. ఈ మాట వినగానే షాకయ్యానని వికాస్‌ చెప్పాడు.
 
 ఆటోలను లోపలకు అనుమతించబోమని ఎక్కడ రాశారని గార్డును ప్రశ్నిస్తూనే, ఈ తతంగాన్ని మొబైల్‌తో వీడియో తీశానని తెలిపాడు. గార్డు తనను సెక్యూరిటీ క్యాబిన్‌లోకి తీసుకెళ్లాడని, అక్కడున్న గార్డులు వీడియో తీయవద్దంటూ అభ్యంతరం వ్యక్తం చేశారని వికాస్‌ చెప్పాడు. మొదట్లో భయపడినా, తన భద్రత కోసం వీడియో తీశానని తెలిపాడు. ఆటోలను లోపలకు అనుమతించరాదన్న నిబంధన ఉందని గార్డులు ఎవరూ చెప్పలేదని, వాగ్వాదం జరగడంతో పోలీసులకు సమాచారం ఇచ్చారని చెప్పాడు. పోలీసులు వచ్చి విషయం తెలుసుకుని నవ్వారని, ఫిర్యాదు ఇవ్వాల్సిందిగా తనకు సూచించినట్టు తెలిపాడు. అయితే తనతో ఉన్న కుటుంబ సభ్యులు ఇబ్బంది పడకూడదనే ఉద్దేశ్యంతో పోలీసులకు ఫిర్యాదు చేయలేదని వికాస్‌ చెప్పాడు. ప్రతి రోజు ఆటో డ్రైవర్లు వందలామందిని మాల్స్‌కు తీసుకెళ్తుంటారని, అయితే ఆటోలను లోపలకు ఎందుకు అనుమతించరని ప్రశ్నించాడు. వికాస్‌ ఈ విషయాన్ని ట్విట్టర్‌ ద్వారా ముంబై పోలీసులకు దృష్టికి తీసుకెళ్లాడు.


 సాక్షి, ముంబై : నగరంలోని కుర్లా, ముంబై సెంట్రల్ రైల్వే స్టేషన్లలో ఎక్కువ మంది ఆత్మహత్య చేసుకుంటున్నట్టు తేలింది. దీంతో వీటిని ‘సూసైడ్ హాట్‌స్పాట్స్’గా పేర్కొంటున్నారు. శివారు రైలుపట్టాలపై ప్రతిరోజూ దాదాపు 10 మంది ఆత్మహత్యలకు పాల్పడుతున్నారు. 2013 నుంచి ఇప్పటివరకు దాదాపు 79 మంది ఎదురుగా వస్తున్న రైలు కింద పడి తనువు చాలించారు.
 
  సెంట్రల్, వెస్టర్న్ పరిధిలోని 127 రైల్వేస్టేషన్లలో పలువురు నగరవాసులు ఆత్మహత్య చేసుకుంటున్నారు. వీరిలో అత్యధిక శాతం మంది కుర్లా, ముంబై సెంట్రల్ రైల్వే స్టేషన్లనే ఎంచుకుంటున్నారు.
 
  రైల్వే పోలీసులు ఇందుకు సంబంధించి అందజేసిన గణాంకాల మేరకు.. 2013లో 62 మంది ఆత్మహత్యలకు పాల్పడగా ఇందులో 51 మంది పురుషులు, 11 మంది మహిళలు ఉన్నారని తేలింది. అయితే ఓ వ్యక్తి మాత్రం ఆత్మహత్య చేసుకోబోతూ తృటిలో ప్రాణాపాయం నుంచి బయటపడ్డాడు. వీటిలో సగానికిపైగా కేసులు కుర్లా, ముంబై సెంట్రల్ స్టేషన్లలోనే నమోదయ్యాయి.
 
 అయితే ఈ ఏడాది మాత్రం ఆత్మహత్యలకు సంబంధించిన కేసులు తక్కువగానే నమోదయ్యాయని సంబంధిత అధికారి ఒకరు వెల్లడించారు. ఈ ఏడాది ఇప్పటి వరకు ముంబై సెంట్రల్‌లో మొత్తం ఐదుగురు ఆత్మహత్యలు చేసుకున్నారు. కుర్లాలో ఎనిమిది మంది ఆత్మహత్య చేసుకోగా వీరిలో ఏడుగురు పురుషులు, ఒక మహిళ ఉన్నారు.
 
  దీంతో ఇప్పటివరకు మొత్తం 17 ఆత్మహత్యల కేసులు నమోదయ్యాయి. ఆత్మహత్యలు చేసుకోవడానికి ఈ రెండు స్టేషన్లనే ఎందుకు ఎక్కువగా ఎంచుకుంటున్నారని అధికారులను మీడియా ప్రశ్నించగా దూరప్రాంతాల రైళ్లు ఎక్కువగా రావడమేనని వారు అభిప్రాయపడ్డారు.