K

హలో... క్రాకర్స్‌ కొనడానికి బయలుదేరుతున్నారా? దీపావళి వస్తే మీ ఇంటి ముందు ఢమఢమలాడే టపాకాయల వెనుక నేను ఉన్నానని మీకు తెలుసా? నేనూ, నాలాంటి వేల మంది స్త్రీలు.. మా చేతులతో తయారు చేసిన టపాసులనే మీరు కొంటారు. మరి మీకు శివ కాశీలోని మా జీవితం ఎలా ఉంటుందో తెలుసా? మా సంపాదన, సమస్యలేమిటో తెలుసా? రండి చెబుతాను.నా పేరు మునియమ్మ. నా వయసు ముప్పై ఎనిమిదే. కానీ నా రెండు చేతులూ పొడిబారి, నల్లటి కెమికల్‌ మరకలతో ముడతలు పడి పెద్దవాళ్ల చేతుల్లా ఉంటాయి. గత పదిహేనేళ్లు గా ఉదయం సాయంత్రం నా శ్వాస, నా ఆశ అన్నీ ఇరుకైన, గాలి ఆడని ఫ్యాక్టరీ షెడ్డులోనే గడిచిపోతున్నాయి. మీ ఇళ్లల్లో నవ్వులు పూయించే టపాసుల వెనుక గంధకమై మండే మా జీవితాలున్నాయి.అరవై శాతం మేమే ఉన్నాంమా శివకాశిలో అధికారికంగా లెక్కలు తేల్చిన ఫ్యాక్టరీలు 1,160. ఈ పెద్ద సామ్రాజ్యంలో మొత్తం 56,633 మంది కార్మికులు రాత్రింబగళ్లు మందుగుండుతో చెలగాటం ఆడుతుంటే వారిలో 33,375 మంది నాలాంటి ఆడవాళ్లే. అంటే 60 శాతానికి పైగా మేమే ఉన్నాం. ఒకసారి ఫ్యాక్టరీలో చేరాక మా జీవితం మా చేతుల్లో ఉండదు. ఉదయం ఆరు గంటలకే ఇల్లు వదిలి వచ్చేయాలి. టపాసులు చుట్టడం, మందుగుండు నింపడం, లేబుళ్లు అంటించడం, ప్యాకింగ్‌... ప్రతి పనీ పొంచి ఉన్న ప్రమాదం మధ్య చేయాలి. రసాయనాల ఘాటు... పీల్చలేం. మండే కళ్లను చల్లార్చలేం.అరటిపండు భత్యంమాకు కరెంట్‌ దీపాలు ఉండవు, ఫ్యాన్లు ఉండవు. చిన్న నిప్పురవ్వ వచ్చినా ఇక్కడ సర్వస్వం బూడిదైపోతుంది కాబట్టి ఉంచరు. కాసింత వెలుతురులో గాలి ఆడని షెడ్లలో రోజంతా అల్యూమినియం, సల్ఫర్, బేరియం వంటి రసాయన పొడి మధ్య కూర్చుంటాం. ఈ విషపు పొడి మా ఊపిరితిత్తుల్లోకి వెళ్తూనే ఉంటుంది. మా ఊరిలో చాలామంది మహిళలు ఉబ్బసం, టిబి, చర్మవ్యాధులతో బాధపడుతున్నారు. గర్భవతులుగా ఉన్నప్పుడు కూడా పని చేయడం వల్ల పుట్టే పిల్లలు కూడా అనారోగ్యంతో పుడుతున్నారు. చిత్రమేమిటంటే ఈ రసాయనాల ప్రభావం తగ్గడానికి మాకు ఫ్యాక్టరీ వాళ్లు వారానికి రూ.40 ‘బనానా అలవెన్స్’ (అరటిపండు భత్యం) ఇస్తారు. అరటిపండు తింటే కెమికల్స్‌ విరుగుడు అవుతుందని ఇక్కడి నమ్మకం. అరటిపండు మా ఊపిరితిత్తుల్లో పేరుకుపోయే రసాయనాలను ఎంతవరకు ఆపగలదు? ఇంకోవైపు అగ్నిప్రమాదాలు. చావు ఎప్పుడు ఏ రూపంలో వస్తుందో తెలియదు. గత నాలుగు సంవత్సరాలలో మా కళ్లముందే 104 ప్రమాదాలు జరిగాయి. ఎంతోమంది తోటి అక్కాచెల్లెళ్లు మా ముందే గుర్తుపట్ట లేనంతగా కాలి బూడిదైపోయారు. అయినా సరే, పొట్టకూటి కోసం మరుసటి రోజే మళ్లీ అదే మందుగుండును చేతుల్లోకి తీసుకోక తప్పని పరిస్థితి మాది.ఆశల గ్రీన్‌ క్రాకర్స్‌ఇప్పుడు మార్కెట్లో ‘గ్రీన్‌ క్రాకర్స్‌’ (పర్యావరణ హిత టపాసులు) ట్రెండ్‌ నడుస్తోంది. కోర్టుల నిబంధనల వల్ల ఫ్యాక్టరీలు కూడా కొత్త టెక్నాలజీ వైపు మారుతున్నాయి. కొత్త మెషీన్లు వస్తున్నాయి. ఇవన్నీ వినడానికి బాగున్నా లోపల మాత్రం భయం పట్టుకుంది. టెక్నాలజీ వస్తే మాకు దొరికే అరకొర పని, ఈ రోజువారీ కూలి కూడా ఎక్కడ పోతుందోనని ఆందోళనగా ఉంది. చదువుకున్న మా పిల్లలు ఇప్పుడు ఈ మురికి షెడ్లలోకి రావడం లేదు. పాత వాళ్లమే ఇక్కడ మిగిలిపోతున్నాం. అదొక్కటే మాకు సంతోషం.ఈసారి మీరు దీపావళి రాత్రి ఆకాశంలో రంగు రంగుల మెరుపులు చూస్తున్నప్పుడు ఆ వెలుతురు వెనుక ఉన్న నాలాంటి మునియమ్మల చేతులను గుర్తు చేసుకోండి. మా జీవితాలు బాగుండాలని మనసారా కోరుకోండి.కోట్లలో మాకు వచ్చేది కాణీ డబ్బులేమా ఊరి నుంచి వచ్చే బాణాసంచా మార్కెట్‌ విలువ దాదాపు 7,000 కోట్లు అంటే నమ్ముతారా. కాని నిజం. అంత బిజినెస్‌లో మాకెంత వస్తుందో తెలుసా? మగ కార్మికునికి రోజుకు రూ. 800 వరకు ఇస్తే, అదే పని చేస్తున్న మాకు రూ. 350కి మించి ఇవ్వరు. అదేం లెక్కో. మగాళ్లు వేరు... మేము వేరా? మా చేతులు చేతులు కావా.. రోజంతా వంగి కూర్చోవడం వల్ల పడిపోయే మా నడుములు నడుములు కావా? వాచిపోయే మా కాళ్లు కాళ్లు కావా? ఏడాది పొడవునా ఊపిరి బిగబట్టి పని చేస్తే పండగ ముగిశాక మా చేతిలో మిగిలేది చాలా తక్కువ. ఈ సంపాదనతోనే పిల్లల చదువులు, అప్పుల మీద వడ్డీలు వెళ్లదీయాలి. మగవాళ్లు సంపాదించింది తాగడానికి తగలేస్తుంటే, ఇల్లు గడవడానికి, పిల్లల కడుపు నింపడానికి ఈ విషపు రసాయనాల మధ్య మేము మా ప్రాణాలను వెలిగించుకోక తప్పడం లేదు.హ్యాపీ దీపావళి. – కె

బీజింగ్‌: హెచ్‌–1బీ వీసా వార్షిక రుసుమును పెంచేసి అమెరికా విదేశీ ప్రతిభావంతులను దూరం చేసుకుంటుంటే ఇదే అదనుగా వాళ్లకు చైనా స్వాగతం పలుకుతోంది. కీలకమైన సైన్స్, టెక్నాలజీ, ఇంజినీరింగ్, మెడిసిన్‌(స్టెమ్‌) కోర్సుల్లో పట్టభద్రులైన విదేశీ నిపుణులు సులభంగా తమ కొత్త కే–వీసా పొంది తమ దేశంలో హాయిగా ఉద్యోగాలు చేసుకోవచ్చని చైనా ప్రభుత్వం ప్రకటించింది. ఈ మేరకు అక్టోబర్‌ నుంచి కొత్త కేటగిరీ అయిన కే–వీసాల జారీ ప్రక్రియను ప్రారంభించబోతున్నట్లు ఆదివారం పేర్కొంది. కొత్త కేటగిరీ వీసాల జారీకి వీలుగా విదేశీయుల రాకపోకల అడ్మినిస్ట్రేషన్‌ నిబంధనల్లో మార్పులు తీసుకొచ్చారు. అమెరికా సహా పలు సంపన్న దేశాలు స్థానికుల ఉద్యోగకల్పనకు ప్రాధాన్యతనిస్తూ వర్క్‌ వీసా నిబంధనలను కఠినతరం చేస్తుండటంతో విదేశీ ప్రతిభావంతులను ముఖ్యంగా దక్షిణాసియా యువ ప్రతిభను ఒడిసిపట్టేందుకు చైనా ఇలా కొత్త కేటగిరీ వీసాను తెస్తోంది. చైనా లేదా విదేశీ ప్రముఖ విశ్వవిద్యాలయాలు, ఇన్‌స్టిట్యూట్‌లలో స్టెమ్‌ కోర్సుల్లో బ్యాచిలర్‌ డిగ్రీ లేదా ఆపై ఉత్తీర్ణత సాధించిన యువ శాస్త్ర, సాంకేతిక నిపుణులకు కే–వీసాను ఇవ్వనున్నారు. బోధన, పరిశోధనారంగంలో ఉన్న వాళ్లూ కే–వీసా కోసం దరఖాస్తు చేసుకోవచ్చు. ఎక్కువ రోజుల కాలపరిమితి, ఎక్కువ సార్లు స్వదేశాలకు రాకపోకలు సాగించే వెసులుబాటు, రెన్యూవల్‌ సదుపాయం వంటి మరిన్ని ఫీచర్లను కే–వీసాకు జోడించారు. హెచ్‌–1బీ వీసా రావాలంటే అమెరికాలోని కంపెనీయే స్వయంగా వీసా దరఖాస్తుదారుడిని సిఫార్సు చేయాల్సి ఉంటుంది. చైనా కే–వీసాకు అలాంటి కఠిన షరతులు లేవని తెలుస్తోంది. విదేశీయులు చైనాలో విద్య, సాంస్కృతిక, శాస్త్ర, సాంకేతికత, అంకుర వ్యాపార, వాణిజ్య కార్యకలాపాల్లో పాల్గొనేందుకు కే–వీసా అనుమతిస్తుంది. ఇన్నాళ్లూ అమెరికాకు పొలోమంటూ వెళ్లిన సృజనాత్మక, ప్రతిభావంత యువతను తమ వైపునకు తిప్పుకోవాలని చైనా అభిలషిస్తోంది.

సాక్షి, న్యూఢిల్లీ:  2019–20 ఆర్థిక సంవత్సరంలో జార్ఖండ్‌ ముక్తి మోర్చా(జేఎంఎం)కు వచ్చిన విరాళాలు 37,794 శాతం, లోక్‌ జనశక్తి పార్టీ(ఎల్‌జేపీ)కి విరాళాలు 410 శాతం, సమాజ్‌వాదీ పార్టీ(ఎస్పీ)కి 317 శాతం, ఆమ్‌ ఆద్మీ పార్టీ(ఆప్‌)కి 156 శాతం పెరిగాయి. 2018–19లో జేఎంఎంకు 0.017 కోట్లు, ఎల్‌జేపీకి 0.515 కోట్లు, ఎస్పీకి రూ.1.054 కోట్లు రాగా, 2019–20లో ఆయా పార్టీలకు వరుసగా రూ.6.442 కోట్లు, రూ.2.629 కోట్లు, రూ.4.392 కోట్లు వచ్చాయి. పలు ప్రాంతీయ రాజకీయ పార్టీలు స్వీకరించిన విరాళాలపై అసోసియేషన్‌ ఫర్‌ డెమొక్రటిక్‌ రిఫార్మ్స్‌ (ఏడీఆర్‌) రూపొందించిన నివేదిక శుక్రవారం విడుదలయ్యింది. 2019–20లో అత్యధిక విరాళాలు ప్రకటించిన టాప్‌–5 పార్టీల్లో శివసేన, ఏఐఏడీఎంకే, ఆప్, బీజేడీ, వైఎస్సార్‌ కాంగ్రెస్‌ పార్టీ ఉన్నాయి. 2018–19లో కంటే 2019–20లో తమకు విరాళాలు తగ్గాయని శివసేన, బీజేడీ, వైఎస్సార్‌సీపీ ప్రకటించగా, తాము స్వీకరించిన విరాళాలు పెరిగాయని ఏఐఏడీఎంకే, ఆమ్‌ ఆద్మీ పార్టీ వెల్లడించాయి. టాప్‌–5 పార్టీలకు రూ.189.523 కోట్లు తమకు అందినట్లుగా 27 ప్రాంతీయ పార్టీలు ప్రకటించిన విరాళాల మొత్తం రూ.233.686 కోట్లుగా ఉందని ఏడీఆర్‌ గుర్తించింది. ఇందులో రూ.62.859 కోట్లతో శివసేన ముందంజలో ఉంది. ఆ తర్వాత ఏఐఏడీఎంకే రూ.52.17 కోట్లను స్వీకరించినట్లు ప్రకటించింది. మూడో స్థానంలో ఉన్న ఆమ్‌ ఆద్మీ పార్టీ రూ.37.37 కోట్లు అందుకుంటున్నట్లు తెలిపింది. ప్రాంతీయ పార్టీలు అందుకున్న మొత్తం విరాళాలలో 81.10 శాతం.. అంటే రూ.189.523 కోట్లు కేవలం టాప్‌–5 ప్రాంతీయ పార్టీలకే అందాయి. తగ్గిన విరాళాలు 2018–19 నాటి విరాళాలతో పోలిస్తే 2019–20లో జేఎంఎం, ఎల్‌జేపీ, ఎస్‌పీ, ఆప్‌లకు విరాళాలు భారీగా పెరిగాయి. అదే సమయంలో వైఎస్సార్‌సీపీకి రూ.71.651 కోట్లు, తెలంగాణ రాష్ట్ర సమితి(టీఆర్‌ఎస్‌)కి రూ.40.876 కోట్లు, తెలుగుదేశం పార్టీ(టీడీపీ)కి రూ.23.573 కోట్లు, శివసేనకు రూ.7.371 కోట్లు, జేడీయూకు రూ.7.098 కోట్ల మేర విరాళాలు తగ్గాయి. ప్రాంతీయ పార్టీలు ప్రకటించిన మొత్తం రూ.233.686 కోట్ల విరాళాలలో, 2019–20 ఆర్థిక సంవత్సరంలో 421 విరాళాల నుండి రూ.4.884 కోట్లు నగదు రూపంలో స్వీకరించాయి. ఇది పార్టీలకు వచ్చిన మొత్తం విరాళాలలో 2.09% అని నివేదికలో పేర్కొన్నారు. అత్యధికంగా మహారాష్ట్ర నుంచే విరాళాల కింద అత్యధికంగా మహారాష్ట్ర నుంచి రూ.110.475 కోట్లు, ఢిల్లీ నుంచి రూ.46.24 కోట్లు, కర్ణాటక నుంచి రూ.9 కోట్లు అందుకున్నట్లు ప్రాంతీయ పార్టీలు ప్రకటించాయి. 2019–20 ఆర్థిక సంవత్సరంలో ప్రాంతీయ పార్టీలకు కార్పొరేట్‌/వ్యాపార రంగాల నుంచి విరాళాల ద్వారా రూ.181.522 కోట్లు రాగా, 5,916 మంది వ్యక్తిగత దాతలు రూ.42.48 కోట్లు ఇచ్చారు. అదే సమయంలో మరో రూ.30.766 కోట్ల విరాళాల సమాచారాన్ని పార్టీలు బయటపెట్టలేదు. విరాళాలు స్వీకరించినట్లు ప్రకటించిన 27 ప్రాంతీయ పార్టీలలో 16 పార్టీలు శాశ్వత ఖాతా సంఖ్య(పాన్‌) వివరాలు లేకుండా రూ.24.779 కోట్ల విరాళాలు స్వీకరించినట్లు వెల్లడించాయి. కాగా, 14 ప్రాంతీయ పార్టీలు.. టీఆర్‌ఎస్, వైఎస్సార్‌సీపీ, టీడీపీ, బీజేడీ, డీఎంకే, శివసేన, ఆప్, జేడీయూ, ఎస్పీ, జేడీఎస్, శిరోమణి అకాలీదళ్, ఏఐఏడీఎంకే, ఆర్‌జేడీ, జేఎంఎంలు రూ.447.498 కోట్ల విలువైన ఎలక్టోరల్‌ బాండ్ల ద్వారా విరాళాలు అందుకున్నట్లు పేర్కొన్నాయి. అయితే 2019–20 ఆర్థిక సంవత్సరానికి గాను ఎన్‌డీపీపీ, డీఎండీకే, జేకేఎన్‌సీ పార్టీలు తాము అందుకున్న విరాళాల వివరాలను ప్రకటించలేదు.  


 సాక్షి ప్రతినిధి, చెన్నై: ముఖ్యమంత్రి పీఠం ఎక్కేందుకు సర్వశక్తులూ ఒడ్డుతున్న శశికళపై పిటిషన్ల పరంపర కొనసాగుతోంది. శశికళ మద్దతుదారులు నిర్బంధించిన అన్నాడీఎంకే ఎమ్మెల్యేలకు విముక్తి కలిగించేలా ఆదేశాలి వ్వాలని కోరుతూ మద్రాసు హైకోర్టులో, ఆస్తుల కేసులో తీర్పు వెలువడే వరకు ప్రమా ణ స్వీకారంపై నిషేధం విధించాలని కోరుతూ సుప్రీంకోర్టులో గురువారం పిటిషన్లు దాఖల య్యాయి. ఎమ్మెల్యేలను శశికళ నిర్బంధించిన నేపథ్యంలో.. కున్నమ్‌ నియోజకవర్గ ఎమ్మెల్యే రామచంద్రన్‌ కనపడడం లేదని, ఆయన జాడ కనిపెట్టి, న్యాయస్థానంలో హాజరుపరిచేలా పోలీసులను ఆదేశించాలని కోరుతూ ఇలవరసన్‌ అనే వ్యక్తి మద్రాసు హైకోర్టులో పిటిషన్‌ దాఖలు చేశారు.
 
 ఇదిలా ఉండగా, మద్రాసు హైకోర్టు న్యాయవాది కె.బాలు, సామాజిక కార్యకర్త ‘ట్రాఫిక్‌’ రామస్వామి గురువారం వేర్వేరుగా హైకోర్టు డివిజన్‌ బెంచ్‌ ముందు హాజరై అన్నాడీఎంకేకు చెందిన 130 ఎమ్మెల్యేలను  విడిపించి, కోర్టులో హాజరు పర్చేలా ఆదేశించాలని విజ్ఞప్తి చేశారు. ప్రభుత్వ న్యాయవాది మాట్లాడుతూ... ఎమ్మె ల్యేలు కిడ్నాప్‌నకు గురికాలేదని, ఇంటివద్దనే సురక్షితంగా ఉన్నారని వాదించారు. డివిజన్‌ బెంచ్‌ న్యాయమూర్తులు స్పందిస్తూ... ఎమ్మె ల్యేల కిడ్నాప్‌ అంశంపై పిటిషన్‌ దాఖలు చేస్తేనే విచారణ చేపట్టగలమని అన్నారు. విచారణను శుక్రవారానికి వాయిదా వేశారు.  
 
 సుప్రీంకోర్టులో మరో పిటిషన్‌
 శశికళ సీఎంగా బాధ్యతలు చేపట్టకుండా నిషేధం విధించాలని కోరుతూ తమిళనాడుకు చెందిన చట్ట పంచాయిత్తు ఇయక్కం తరఫున సెంథిల్‌కుమార్‌ అనే వ్యక్తి సుప్రీంకోర్టులో గురువారం పిటిషన్‌ దాఖలు చేశాడు. ఆస్తుల కేసులో సుప్రీంకోర్టు తీర్పు వెలువడేవరకూ సీఎంగా శశికళ బాధ్యతలు స్వీకరించకుండా నిషేధం విధించాలని విజ్ఞప్తి చేశాడు.


 కరీంనగర్: కరీంనగర్‌ను కరువు జిల్లాగా ప్రకటించాలనే డిమాండ్‌తో బీజేపీ భారీగా ఆందోళన చేపట్టింది. పార్టీ రాష్ట్ర అధ్యక్షుడు డాక్టర్ కె.లక్ష్మణ్ ఆధ్వర్యంలో కరీంనగర్ కలెక్టరేట్ ఎదుట ధర్నా సోమవారం మధ్యాహ్నం ధర్నా నిర్వహించారు. జిల్లాలో కరువు పరిస్థితులు తాండవిస్తున్నా ముఖ్యమంత్రి స్పందించటం లేదని ఈ సందర్భంగా నేతలు ఆరోపించారు. వెంటనే కరువు జిల్లాగా ప్రకటించి సహాయక చర్యలు చేపట్టాలని డిమాండ్ చేశారు. కార్యక్రమంలో పెద్ద సంఖ్యలో రైతులు, రాష్ట్ర, జిల్లా స్థాయి నేతలు పాల్గొన్నారు.


 కార్యాలయంలో రూ.2,16,500, లజపతిరావు ఇంట్లో రూ.5,20,500 నగదు స్వాధీనం
  రూ.6.21 లక్షల విలువైన ప్రాంసరీ నోట్లు సీజ్
  ప్రతి హాస్టల్ విద్యార్థి నుంచి రూ.15 చొప్పున వసూలు
  చివరి విడత డైట్ చార్జీల చెల్లింపులో చేతివాటం
  
  ఏలూరు (వన్ టౌన్) : హాస్టల్ విద్యార్థుల నుంచి లంచాలు వసూలు చేస్తూ జిల్లా సాంఘిక సంక్షేమ శాఖ అధికారి కె.లాలాలజపతిరావు అవినీతి నిరోధక శాఖ అధికారులకు అడ్డంగా దొరికిపోయారు. అతడిపై కేసు నమోదు చేసిన ఏసీబీ అధికారులు ఏలూరులోని సాంఘిక సంక్షేమ శాఖ కార్యాలయంతోపాటు లజపతిరావు ఇంట్లో తనిఖీలను కొనసాగిస్తున్నారు. హాస్టల్ విద్యార్థులకు చివరి మూడు నెలల భోజన చార్జీలకు సంబంధించిన సొమ్ము చెల్లింపుల సందర్భంగా ఒక్కొక్క విద్యార్థి నుంచి రూ.15 చొప్పున వసూలు చేసినట్టు ప్రాథమికంగా నిర్థారణకు వచ్చారు. ఏసీబీ డీఎస్పీ కె.రాజేం ద్రరావు తెలిపిన వివరాల ప్రకారం.. హాస్టల్స్ ఉంటున్న ప్రీ మెట్రిక్, పోస్ట్ మెట్రిక్ విద్యార్థుల భోజన ఖర్చుల కోసం చివరి మూడు నెలలకు సంబంధించి ప్రభుత్వం విడుదల చేసిన మొత్తాలను చెల్లించేందుకు వారినుంచి లంచాలు వసూలు చేసినట్టు ఏసీబీ అధికారులకు సమాచారం అందింది.
  
  దీంతో ఏసీబీ బృందం ఏలూరు కలెక్టరేట్ ప్రాంగణంలోని జిల్లా సాంఘిక సంక్షేమ శాఖ కార్యాలయంలో బుధవారం మెరుపు దాడిచేసింది. ఆ సమయంలో సాంఘిక సంక్షేమ శాఖ అధికారి కె.లాలాలజపతిరావు జేబులోంచి రూ.14,500, అదే కార్యాలయంలో ఉన్న భీమవరం హాస్టల్ వార్డెన్ ఎం.తిరుపతిరావు, పాల కొల్లు హాస్టల్ వార్డెన్ ఎల్.కరుణాకరరావు నుంచి రూ.43 వేలు, 24 హాస్టళ్ల నుంచి వసూలు చేసి లజపతిరావు టేబుల్‌పై ఉంచిన రూ.1,09,000లను స్వాధీనం చేసుకున్నారు. అనంతరం కార్యాలయ సూపరింటెండెంట్ జి.సతీష్‌కుమార్ ఉపయోగిస్తున్న బీరువాలో ఉన్న రూ.50 వేలను సైతం స్వాధీనం చేసుకున్నారు. ఇదే సందర్భంలో 24 హాస్టళ్లలో ఏ హాస్టల్ నుంచి ఎంత సొమ్ము వసూలు చేశారనే వివరాలతో కూడిన చిట్టా లజపతిరావు వద్ద లభించింది. లజపతిరావు ఇంట్లో సోదాలు చేయగా రూ.5,20, 500 నగదు, రూ.6,21,000 విలువైన 11 ప్రాంసరీ నోట్లు లభ్యమయ్యాయి. రాత్రి 11.30 గంటల వరకూ సోదాలు కొనసాగుతున్నాయి.
  
  ఒక్కో విద్యార్థి నుంచి రూ.15 చొప్పున..
  జిల్లాలో 89 హాస్టళ్లు ఉండగా, సుమారు 7వేల మంది విద్యార్థులకు ప్రీ మెట్రిక్, పోస్ట్ మెట్రిక్ డైట్ చార్జీల చివరి క్వార్టర్ బడ్జెట్ విడుదలైంది. ఆ మొత్తాలను మంజూరు చేసేందుకు ఒక్కొక్క విద్యార్థి నుంచి రూ.15 చొప్పున హాస్టల్ వార్డెన్లు వసూలు చేశారు. మొదటి విడతగా 24 హాస్టళ్లలోని విద్యార్థుల నుంచి రూ.1,09,000 వసూలు చేశారు. భీమవరం హాస్టల్ వార్డెన్ ఎం.తిరుపతిరావు, పాలకొల్లు హాస్టల్ వార్డెన్ ఎల్.కరుణాకరరావు వసూలు చేసిన రూ.43 వేలను లజపతిరావుకు ఇచ్చేందుకు తీసుకువచ్చారు. పెద్దమొత్తంలో సొమ్ములు చేతులు మారుతున్నాయన్న సమాచారం అధికారులకు అందటంతో ఏసీబీ డీఎస్పీ కె.రాజేంద్రరావు, సీఐ యూజే విల్సన్, సిబ్బంది  రంగంలోకి దిగటంతో వ్యవహారం వెలుగుచూసింది. సాంఘిక సంక్షేమ శాఖ అధికారి లజపతిరావు, సూపరింటెండెంట్ సతీష్‌కుమార్‌లపై ఇప్పటికే కేసులు నమోదు చేశారు.