సాక్షి, సిటీబ్యూరో: హైదరాబాద్‌ మహానగరాభివృద్ధి సంస్థ (హెచ్‌ఎండీఏ) ప్రణాళికా విభాగంలో పారదర్శకత లోపించినట్లు ఆరోపణలు వెల్లువెత్తుతున్నాయి. ఒకవైపు సకాలంలో అనుమతులు లభించకపోవడం వల్ల దరఖాస్తుదారులు పడిగాపులు కాయాల్సిన పరిస్థితి నెలకొని ఉండగా, మరోవైపు కన్సల్టెంట్‌లు, లైజనింగ్‌ సిబ్బంది ద్వారా వచ్చే ఫైళ్లకు మాత్రమే త్వరితగతిన మోక్షం లభిస్తున్నట్లు వివిధ వర్గాల నుంచి ఫిర్యాదులు వస్తున్నాయి. భవన నిర్మాణాలు, లే అవుట్‌ అనుమతులను మరింత వేగవంతం చేసేందుకు, పారదర్శకంగా ఇచ్చేందుకు కొత్తగా బిల్డ్‌నౌ సాంకేతిక వ్యవస్థను ప్రవేశపెట్టినప్పటికీ జాప్యాన్ని నివారించ లేకపోవడం గమనార్హం.బిల్డ్‌నౌ (BuildNow) వెబ్‌సైట్‌ ద్వారా క్షణాల్లో డాక్యుమెంట్లను అప్‌లోడ్‌ చేసి దరఖాస్తు చేసుకొనేందుకు అవకాశం లభించింది. కానీ, ఫైళ్లను పరిష్కరించి, క్షేత్రస్థాయిలో పరిశీలించి అనుమతులు అందజేయడంలో మాత్రం జాప్యం కొనసాగుతోందని దరఖాస్తుదారులు ఆందోళన వ్యక్తం చేస్తున్నారు. ఇదివరకు అనుమతుల్లో ఉద్దేశపూర్వకమైన జాప్యాన్ని అరికట్టేందుకు బాధ్యులైన అధికారులు, సిబ్బందిపై చర్యలు తీసుకొనేవారు. జరిమానాలు విధించేవారు. కానీ, ఇప్పుడు అలాంటి క్రమశిక్షణా చర్యలు లేకపోవడం వల్ల కూడా పారదర్శత కనిపించడం లేదు. మరోవైపు ఈ పరిణామం వల్ల నిజాయతీగా పని చేసే అధికారులు, ఉద్యోగులు సిబ్బంది సైతం అప్రతిష్టను మూట గట్టుకోవలసి వస్తోందని ప్రణాళికా విభాగానికి చెందిన ఒక అధికారి విస్మయం వ్యక్తం చేశారు.రియల్‌ పరుగులు... కొంతకాలంగా నగరంలో రియల్‌ ఎస్టేట్‌ కార్యకలాపాలు పెరిగాయి. నగర శివారు ప్రాంతాల్లో, ఔటర్‌ వెలుపల బహుళ అంతస్థుల భవనాల నిర్మాణం ఊపందుకుంది. అదే సమయంలో భారీ లే అవుట్‌లు సైతం వెలుస్తున్నాయి. దీంతో అనుమతుల కోసం హెచ్‌ఎండీఏకు దరఖాస్తులు కుప్పలుగా వస్తున్నాయి. గతేడాది కంటే ఈ ఏడాది నిర్మాణ రంగంలో అనుమతులు రెట్టింపు అయినట్లు హెచ్‌ఎండీఏ కమిషనర్‌ సర్ఫరాజ్‌ అహ్మద్‌ స్పష్టం చేశారు. శంషాబాద్, అమీన్‌పూర్, కొల్లూరు, పటాన్‌చెరు, మేడ్చల్, ఘట్కేసర్, బాచుపల్లి (Bachupally) తదితర ప్రాంతాల్లో హైరైజ్డ్‌ టవర్లు, బహుళ అంతస్థుల భవనాలు, అపార్ట్‌మెంట్‌ల నిర్మాణం పెరిగినట్లు అంచనా. మరోవైపు టీజీ బీపాస్‌ కంటే బిల్డ్‌నౌ వెబ్‌సైట్‌లో వెంటనే ‘కీ’లు లభించడం వల్ల కూడా దరఖాస్తు ప్రక్రియ సులభతరమైంది. వివిధ రకాలుగా వచ్చిన మార్పులు ఇటు కన్సల్టెంట్‌ల రూపంలో ఉండే మధ్యవర్తులకు, లైజనింగ్‌ సిబ్బంది పేరిట పైరవీలు చేసేవారికి చక్కటి అవకాశంగా మారింది.ట్రిపుల్‌ ఆర్‌ వరకు అనుమతులు హెచ్‌ఎండీఏ (HMDA) పరిధిని ట్రిపుల్‌ ఆర్‌ వరకు విస్తరించిన సంగతి తెలిసిందే. గతంలో డీటీసీపీ నుంచి అనుమతులు పొందిన ప్రాంతాలన్నీ ఇప్పుడు హెచ్‌ఎండీఏ పరిధిలోకి వచ్చాయి. ఈ మేరకు కొత్తగా విలీనమైన 11 జిల్లాల పరిధిలోని 3,550 గ్రామాల్లో హెచ్‌ఎండీఏ నుంచి అనుమతులు ఇవ్వనున్నట్లు ఇటీవల ప్రభుత్వం ఉత్తర్వులు వెలువరించింది. దీంతో కొంతకాలంగా నెలకొన్న స్తబ్దత తొలగిపోయి నిర్మాణ సంస్థలకు ఊరట లభించింది. చ‌ద‌వండి: సిటీ ఆఫ్ టెర్ర‌స్‌ గార్డెన్స్.. కొత్త పుంత‌లుఇదివరకు డీటీసీపీ అనుమతి కోసం దరఖాస్తు చేసుకున్న అపరిష్కృత ఫైళ్లు సైతం హెచ్‌ఎండీఏ పరిధిలోకి వచ్చాయి. అన్ని విధాలుగా రియల్‌ ఎస్టేట్‌ కార్యకలాపాలు, నిర్మాణరంగంలో మార్పులు చోటుచేసుకొని వేగం పెరిగింది. అదేస్థాయిలో హెచ్‌ఎండీఏకు వచ్చే ఫైళ్లు సైతం గణనీయంగా నమోదవుతున్నాయి. అందుకనుగుణంగానే హెచ్‌ఎండీఏ కార్యాలయంలో ప్రణాళికా విభాగం కొలువుదీరిన నాలుగు, ఐదు, ఏడో అంతస్థులు పైరవీకారులతో సందడిగా మారడం గమనార్హం.

మణికొండ(హైదరాబాద్‌): హైదరాబాద్‌ మహానగరాభివృద్ధి సంస్థ (హెచ్‌ఎండీఏ) అక్రమాలకు అంతులేకుండాపోతోంది. మాస్టర్‌ప్లాన్‌లో రోడ్డుగా చూపిన స్థలంలో బహుళ అంతస్తు భవనానికి అనుమతి ఇచ్చిన ఘటన మరువకముందే తాజాగా మరో ఘటన వెలుగుచూసింది. ఒక లేఔట్‌కు అనుమతి జారీ చేసిన హెచ్‌ఎండీఏ.. అందులోని ప్రజావసరాలకు వదిలిన స్థలాన్ని కలుపుకొని మరో లేఔట్‌కు పర్మిషన్‌ ఇచ్చింది. రెండో లేఔట్‌ జారీ చేసేనాటికే.. ఈ ఖాళీ స్థలం స్థానిక గ్రామ పంచాయతీకి గిఫ్డ్‌డీడ్‌ కింద రిజిస్ట్రేషన్‌ కూడా కావడం గమనార్హం. హెచ్‌ఎండీఏ చేసిన తప్పును ఎత్తిచూపాల్సిన స్థానిక పురపాలక సంఘం.. లేఔట్‌ కాపీని పట్టించుకోకుండా తమ పేరిట రిజిష్టర్‌ అయిన ఖాళీ స్థలంలో వేరొకరికి బిల్డింగ్‌ పర్మిషన్‌ను జారీ చేసింది. భవన నిర్మాణ అనుమతి సమయంలో స్థల యజమాని ఎవరనేది కూడా చూడకుండా మున్సిపాలిటీ గుడ్డిగా వ్యవహరించడం అనేక అనుమానాలకు తావిస్తోంది. ఈ అవినీతి భాగోతం ఐటీ హబ్‌ సమీపంలోని మణికొండ పురపాలిక పరిధిలో జరిగింది. సుమారు రూ.50 కోట్ల విలువైన భూమికి స్కెచ్‌ వేసిన రియల్టర్లకు కొందరు పెద్దలు, అధికారులు కూడా తోడు కావడంతో భవన నిర్మాణానికి పునాది పడింది.  పంచాయతీ పేర రిజిస్ట్రేషన్‌  17.36 ఎకరాల విస్తీర్ణంలో వేసిన తిరుమలహిల్స్‌ లేఔట్‌లో 8,633 గజాలను పార్కు స్థలాలుగా నిర్దేశించారు. ఈ మేరకు ఈ విస్తీర్ణాన్ని స్థానిక పంచాయతీకి 1993లో గిఫ్ట్‌డీడ్‌ కూడా చేశారు. మూడేళ్ల క్రితం ఈ పంచాయతీ మణికొండ మున్సిపాలిటీలో విలీనం కావడంతో డాక్యుమెంట్లను ఇక్కడకు బదలాయించారు. విలువైన ఈ స్థలాన్ని కాపాడుకోవాల్సిన మున్సిపల్‌ యంత్రాంగం.. కనీసం కంచె కూడా వేయకుండా వదిలేసింది. అంతేగాకుండా.. ఈ స్థలాన్ని చూపుతూ మరో లేఔట్‌ వెలిసినా చోద్యం చూస్తూ ఉండిపోయింది. దీంతో బిల్డర్ల ఆటలకు అడ్డూఅదుపు లేకుండా పోయింది. అంతేకాదు.. నిబంధనలకు విరుద్ధంగా వేసిన రెండో లేఔట్‌లో ఇళ్ల నిర్మాణాలకు టౌన్‌ప్లానింగ్‌ విభాగం పర్మిషన్లు జారీ చేస్తుండటం విశేషం. స్కెచ్‌ వేశారు.. చెక్కేశారు  పుప్పాలగూడ గ్రామ పంచాయతీ పరిధిలోని సర్వే నంబర్‌ 87, 119లో 17.36 ఎకరాలలో తిరుమల్‌హిల్స్‌ పేరిట 1990లో హైదరాబాద్‌ నగరాభివృద్ధి సంస్థ (హుడా) 10132/ఎంపీ2/హుడా/1990 పేరిట లేఔట్‌కు అనుమతి ఇచ్చింది. హుడా అనుమతి ఇచ్చిన వెంచర్‌ కావడం.. నగరానికి దగ్గరగా ఉండటంతో ఇక్కడి ప్లాట్లు హాట్‌కేకుల్లా అమ్ముడుపోయాయి. క్రమేణా ఈ వెంచర్‌ కాస్తా సంపన్నుల కాలనీగా మారింది. దీంతో ఖాళీ స్థలాలపై పాత రియల్టర్ల కన్ను పడింది. పాత వెంచర్‌లోని ఖాళీ స్థలాలకు పక్కనే మరికొంత స్థలాన్ని (వేరే యజమాని) కలుపుకొని రెండో లేఔట్‌కు ప్రణాళిక రచించారు. హెచ్‌ఎండీఏ అధికారులతో కుమ్మక్కై 6 వేల గజాల పార్కు స్థలాన్ని (మొదటి లేఔట్‌లో చూపిన) కాజేసే ఎత్తుగడకు తెర లేపారు. రెండో లేఔట్‌ ప్రకారం స్థలాలను అమ్మేసి రియల్టర్లు చెక్కేశారు. తాజాగా ఈ ప్లాట్లను కొన్నవారు ఇళ్ల నిర్మాణాలకు రావడం.. మొదటి లేఔట్‌లో కొనుగోలు చేసినవారు వీరిని అడ్డుకోవడంలో అసలు కథ బయటపడింది. మరో విచిత్రమేమిటంటే.. రెండో లేఔట్‌లో నిబంధనలకు అనుగుణంగా కేటాయించాల్సిన పార్కు స్థలాన్ని పక్కనే ఉన్న అజయ్‌హిల్స్‌ కాలనీ పార్కును చూపడం.  అధికారుల వైఫల్యం  హుడా అనుమతులతో వచ్చిన లేఔట్‌లో పార్కు స్థలాలను అప్పటి పంచాయతీ పేరుతో రిజిస్ట్రేషన్‌ చేసినా వాటిని పరిరక్షించడంలో అధికారుల వైఫల్యం స్పష్టంగా కనిపిస్తోంది. గతంలోనే ప్రహరీ నిర్మాణం చేస్తే ఇన్ని ఇబ్బందులు వచ్చేవి కావు. ఇప్పటికైనా అధికారులు స్పందించి చర్యలు చేపట్టాలి. – డాక్టర్‌ పి.అవినాష్, తిరుమలహిల్స్‌ సంక్షేమ సంఘం అధ్యక్షుడు   కేసు ఉండగా అనుమతులా..? తమ కాలనీ పార్కు స్థలాలుగా చూపిన దాన్నే తిరిగి హెచ్‌ఎండీఏ అధికారులు లేఔట్‌కు అనుమతి ఇవ్వటం దారుణం. దాన్ని రద్దుచేశామని ఒకవైపు చెబుతునే మరోవైపు మున్సిపాలిటీ అధికారులు నిర్మాణ అనుమతులు ఇవ్వటం మరింత దారుణం. సదరు భూమి విషయం కోర్టులో ఉన్నా ఇలాంటి చర్యలు జరగటాన్ని ప్రభుత్వం సమర్ది్థస్తుందా..? లేదంటే అలాంటి అధికారులపై కఠినంగా వ్యవహరిస్తేనే ప్రభుత్వం, శాఖలపై నమ్మకం పెరుగుతుంది.   – రంగాచారి, తిరుమలహిల్స్‌ సంక్షేమ సంఘం ప్రధానకార్యదర్శి  నిబంధనల ప్రకారమే అనుమతులు  హెచ్‌ఎండీఏ జారీ చేసిన లేఔట్‌ కావడంతోనే భవన నిర్మాణానికి అనుమతులు జారీ చేశాం. సదరు లేఔట్‌ రద్దు అయిన విషయం తెలియదు. కాలనీవాసులు పేర్కొంటున్న పార్కు భూమి కోర్టు వివాదంలో ఉండటంతో దాన్ని పరిరక్షించేందుకు ఎలాంటి చర్యలు తీసుకోలేకపోతున్నాం. గతంలో గ్రామపంచాయతీగా ఉన్నప్పటి నుంచే దానిపై వివాదాలు కోర్టులో ఉన్నాయి.  – ఎస్‌.జయంత్, కమిషనర్, మణికొండ మున్సిపాలిటీ  


 యాకుత్‌పురా: బిల్డింగ్ అనుమతి మంజూరు కోసం రూ. 25 వేలు లంచం తీసుకుంటూ జీహెచ్‌ఎంసీ దక్షిణ మండలం సర్కిల్-4 కార్యాలయ సెక్షన్ ఆఫీసర్ మెహదీ అలీ మంగళవారం ఏసీబీ (అవినీతి నిరోధకశాఖ) అధికారులకు పట్టుబడ్డాడు. ఈ వ్యవహారంలో ఇతనికి సహకరించిన అటెండర్‌ను కూడా అరెస్టు చేశారు.
 హైదరాబాద్ జిల్లా ఏసీబీ డీఎస్పీ-2 వి.రవి కుమార్ తెలిపిన వివరాల ప్రకారం... మలక్‌పేట్ రేస్ కోర్ట్స్ ప్రాంతానికి చెందిన సయ్యద్ గౌస్ 40 గజాల స్థలంలో ఇంటి నిర్మాణ అనుమతి కోసం సర్కిల్-4 టౌన్ ప్లానింగ్  సెక్షన్ ఆఫీసర్ మెహదీ అలీని సంప్రదించి, దరఖాస్తు ఫీజు నిమిత్తం రూ. 25 వేల డీడీ కట్టాడు. అయితే, తనకు రూ. 30 వేల లంచం ఇస్తేనే అనుమతి మంజూరు చేస్తానని మెహదీ అలీ అన్నాడు.
 
 దీంతో రూ. 25 వేలు ఇచ్చేందుకు ఒప్పుకున్న గౌస్ ఈ విషయాన్ని ఏసీబీ అధికారులకు ఫిర్యాదు చేశాడు. దీంతో సెక్షన్ ఆఫీసర్‌ను పట్టుకొనేందుకు ఏసీబీ అధికారులు పథకం వేసి.. రసాయనాలు పూసిన నోట్లను గౌస్ చేతికి ఇచ్చి మంగళవారం మధ్యాహ్నం 3.30కి సర్కిల్-4 టౌన్  ప్లానింగ్ కార్యాలయానికి పంపారు. గౌస్  ఆ డబ్బును మెహదీ అలీకి ఇవ్వబోగా...అటెండర్ వంశీకి ఇవ్వమని చెప్పాడు.  గౌస్ నుంచి అటెండర్ వంశీ లంచం డబ్బు తీసుకుంటుండగా అప్పటికే అక్కడ కాపుకాసిన ఏసీబీ అధికారులు పట్టుకున్నారు.
 
 కేసు నమోదు చేసి సెక్షన్ ఆఫీసర్ మెహదీ అలీతో పాటు అటెండర్ వంశీని అదుపులోకి తీసుకున్నారు. ప్రభుత్వ ఆఫీసుల్లో పని చేసేందుకు ఎవరైనా లంచం అడిగితే ప్రజలు 9440446134కు సమాచారం అందిస్తే చర్యలు తీసుకుంటామని ఏసీబీ డీఎస్పీ రవి తెలిపారు. ఈ దాడిలో ఏసీబీ ఇన్‌స్పెక్టర్లు అంజిరెడ్డి, నిరంజన్, సుదర్శన్ రెడ్డి, మంజుల, ఏసుదాస్ తదితరులు పాల్గొన్నారు. ఇదిలా ఉండగా.. సెక్షన్ ఆఫీసర్ మెహదీ అలీ ఇంటి నిర్మాణాల అనుమతి కోసం వచ్చే వారి నుంచి లంచం తీసుకుంటున్నట్టు కొన్నేళ్లుగా ఆరోపణలు వినిపిస్తున్నాయి. ఇతను అనుమతి లేని ఇళ్లను గుర్తించి మరీ డబ్బు వసూలు చేస్తున్నాడని తెలుస్తోంది.