చిత్రలోక సంచారి

కవిత
కంటికి కనిపించని రంగుల్ని కూడా
 చూడగలిగిన చిత్రాకారుడెవరైనా
 ఈ క్షణం నిన్నూ- నువ్వున్న స్థలాన్నీ
 యథాతథంగా చిత్రిస్తే
 అదెంత ముచ్చటగా ఉంటుందో తెలుసా..?
 ఆ బొమ్మలో
 నువ్వు నిల్చునో లేదా కూర్చునో
 పడుకునో లేదా పరుగెత్తుతూనో
 నడుస్తూనో లేదా ఆగి
 నడిచొచ్చిన దారివైపు దిగులుగానో
 నడవాల్సిన దూరంవైపు ఆశగానో
 చూస్తూ ఉంటావ్.
 నీ చుట్టూ ఉన్న పరిసరాల్లో దాక్కొని
 జీవితమూ-మృత్యువూ
 నీవైపే ఆసక్తిగా చూస్తూ ఉంటాయి.
 పై విషయాన్ని ధ్రువీకరిస్తూ మాత్రమే
 నీకన్నా ముందు వెళ్లిపోయినవాడి సంతకం
 కనిపించని రంగుల్లో
 చిత్రంలో మరోవైపు ఉంటుంది.
 భగవంతం
 9399328997